تكفي 50 للسعودي ؟؟

أمس جاني أخويا الصغير يطلب مني فلوس عشان يعطي الحمالين اللي نزلو (الفرفيرة) للقبو في بيتنا ... كانو حمالين 2 من محل الالعاب اللي اشترينا منهم الفرفيرة ... طلعتلو 50 ريال اللي احسها اصلا كثيرة بس ماكان عندي صرف وهذول الناس ما تستخسر تعطيهم شي ... أخذ الخمسين وفتح عيونو بقوة وكأنو حيقول شي مهم ... قال : ( ترا الرجالين مو اندونيسينن ... تراهم سعوديين ) ... انا حقيقة استغربت ان السعوديين دخلو في هذي الوظائف اللي تطلب حمل اغراض ودخول بيوت ... بس قلتلو طيب وبعدين ... قالي : (هذول سعوديين ... يعني عادي 50 ريال ) !!

لا تعليق !!

الحين الشباب السعودي قاعد يدخل لمجالات جديدة كانت المجتمع يعتبرها عيب ... وهذا شي كويس .. حتى ان الحين الشباب اللي على الكاشيرات صارو واثقين من نفسهم وصار عادي يضحك وينكت معاك ...

بس لسا في حاجز بين المجتمع والشباب ... لسا كثير من الناس ما تحبذ تركب مع سعوديين لانه صعب يكاسرو في السعر خاصة !! لما تتعامل مع سعودي تاخذ مسألة العيب و (خوارم المروءة على قولتهم ) اما مع الاجنبي فتاخذ راحتك تماما ... والناس ما تحب مثلا سباك سعودي يدخل بيتها لانها ما ترتاح انهم يشوفو ويدخلو بيوتهم !! ويمكن لو شاف شي في البيت بالغلط يكون غير لو شافها سباك هندي مثلا !!

هل تتوقع يجي اليوم اللي يكون فيه السواق والشغالة سعوديين ؟؟

عندنا اشياء حلوة !!

الأربعاء الماضي كنا في طريقنا الى الشرقية ... وكان فيه اكثر من تفتيش على الخط وكانت التفاتيش شغالة وتعطي مخالفات للمسرعين (مو زي بعض تفاتيش الزينة في الرياض) ...

وانتا ماشي على الخط في أمان الله تلاقي اكثر من سيارة على الجانب المعاكس ينورو النور العالي مع ان مافي سيارة قدامهم ... ليش ؟؟

اللي يمسك خطوط كثير يعرف معناها ... انا في البداية ما كنت انتبه لهذي الظاهرة بس بعدين اللي راكب جمبي نبهني ... هذي معناها ان في تفتيش قريب جاي ... فانتبه وهدي السرعة عشان ما يلقطك الرادار مسرع !!
والله عجبتني هذي الحركة ... مع انها قد تكون فيها تعاون ضد القانون ولكن فيه جانب حلو ... السعودي والعربي عموما متعاون ( نشمي) بطبيعته .... يحب يساعد ويعاون الناس .. أي حادث يصير تلاقي زحمة مو طبيعية والشباب ينزلو وأحيانا كثيرة ينقذو أرواح ... والحلو ان في شباب ياخذو دورات اسعافات اولية عشان هذا السبب وتلاقي ناس حاطين في سياراتهم عدة مساعدة كاملة ...

مرة كنا طالعين لجدة بالسيارة وغرزت سيارتنا على جمب الخط ... ما عدت دقايق الا واثنين عرضو علينا الخدمة من بينهم عائلة فيها اب وام واولاد ...

بينما الغربيين قاعدتهم ( حالي حال نفسي ) .. يحكي الدكتور احمد زويل : لما كنت في اول ايامي في امريكا وطلعت للشارع وكان مغطى بالثلج وتزحلقت وطحت طيحة قوية .. انتظرت ان الشارع كلو يوقف ويساعدني زي ما انا متعود في مصر ... وأتفاجأ ان الناس والسيارات تمر من جمبي ولا كأن شي حاصل ...

حلو لو نهتم بميزتنا هذي وننميها ... الحضارة ليست اجهزة وتقنية فقط ... انها قيم واخلاق ...

المطر وما يفعل !!

إن بعد العسر يسرا ... وبعد العج مطرا ...

ايش تأثير المطر علينا ؟؟ هل تغير شي في حياتنا اليومية ؟؟

1- في عادة حجازية أنهم يطبخو " رز بعدس " بمويه المطر ... طيب ليش رز بعدس بالتحديد ؟؟
الرز والعدس زمان كان ياخذ وقت طويييل في الطبخ ... بس موية المطر تخلي الطبخة تستوي بسرعة ... أظن عشان موية المطر مليانة نيتروجين !!
الحين صار الرز بعدس يستوي بسرعة حتى بالموية العادية وأتوقع ان هذا بسبب طريقة صناعية جديدة لتجفيف العدس أو مادة كيميائية فصار العدس ينطبخ بسرعة حتى بالمويه العادية ... بس العوايل الحجازية احتفظت بالتقليد هذا الى الآن وصار الغدا رز بعدس رسمي لما ينزل مطر ... حتى إننا نعرف ناس ما يطبخو رز بعدس الا لما ينزل مطر مع انهم يمكن يطبخوه بمويه عادية !

( (غدانا رز بعدس اليوم ( : )

2- في ناس مستحيل يقعد في البيت اذا شاف مطر .. على البر طوالي ...

3- في عادة ما ادري اذا موجودة ولا لا ؟ وهي ان العيلة تطلع تنظف الحوش بموية المطر بدل ما يستهلكو موية !!بس اتوقع ان الناس خاصة في الرياض مشغولة وما تهتم كثير بتوفير الاستهلاك (هذا لو كانو يغسلو احواشهم بنفسهم ) !!

4- بعض الاحيان تلاقي مساجد اول ما تنقط السما قطرتين يجمعو الصلوات(المغرب والعشا مثلا) !! طبعا كل هذا باجتهاد اهل المسجد فتلاقي مساجد تجمع وثانية ما تجمع !!

يعني مفروض المحلات ما تسكر لو فيه مطر باعتبار ان في ناس جمعو صلاتين ...

(المشكلة مافي نظام في هذا الخصوص ) ...

كل ناس اتوقع لهم عادة مرتبطة بالمطر ...
طيب انتا ايش يغير المطر في حياتك اليومية ؟؟ هل عندك عادة مرتبطة بالمطر !!

تحت رحمة الغبار

ما زلنا في الرياض خلال هذه الأسبوعين...نتلاقى مع الغبار أحيانا ونفترق أحيانا
سأكتب هنا عن بعض آثار الغبار على الحياة اليومية :
1- بلا شك أن نفسيات الناس هنا تتأثر بالغبار بشكل عام،تقابل كثير من الناس،فأول ما تقابله تكون الكلمة الأولى:ايش قصة الجو هذا؟!!...طبعا تقلب الجو في الرياض وبشكل سريع أصبح أمرا ملحوظا
2- "مصائب قوم عند قوم فوائد" لاحظت أن بعض المدارس يوم الأربعاء الماضي ألغوا منذ الصباح اليوم الدراسي..اظن أن هؤلاء الطلاب خرجوا ممتنين للغبار.

3- انتشرت الكمامات الخفيفة بشكل ملحوظ،أبناء هذه المنطقة كانوا يواجهون العواصف بدون أي استعدادت،لأنهم تعودوا عليها،لكن الزمان تغير.
4- انتشرت صور الغبار الأولى وبشكل سريع على الإيميلات،لدرجة أن البعض لم يعلم أن خارج نافذته عواصف بهذا الحجم إلا من خلال الإيميل.

لا اريد أن اطيل..أحببتها تدوينة خفيفة ،مفتوحة لإنطباعات القراء عن أجواء الحبيبة الرياض.

هذي عقوبة .. لا تسيء الادب ..

المواقف في السنة التحضيرية في جامعة الملك سعود منظمة بحيث كل طالب له موقف محدد و برقم معين و يعطى بطاقة تدل على ان هذا موقفه ... انا استأجرت موقف بسعر رمزي ميزته انه قريب ... بس قبل يومين جيت وانا مستعجل عشان عندي حصة انجليزي (حقون الجامعة يسموها محاضرة بس انا الى الحين اسميها حصة !!) ...

دخلت المواقف ورحت الى موقفي و الا الاقي واحد موقف في موقفي ... انا حقيقة ما عرفت ايش اسوي ... اقدر مثلا اوقف في اي موقف ثاني بس وين ما وقفت حكون وقفت في موقف طالب ثاني !! رحت اشوف السكيورتي عشان (يكلبشو) السيارة (يكلبشو يعني يحطو حاجة تمنع السيارة انها تتحرك ... يعني زي كلبشات المساجين) ... قلت للسيكورتي : ( في واحد وقف موقفي فلو سمحتو كلبشو سيارتو ) ... قال : ( احنا في ثاني اسبوع ولسا الامور حوسة ... ما نكلبش سيارات) ...

قلت طيب ... انا بنفسي حكلبش هذي السيارة ... رحت وقفت ورى السيارة اللي سرقت موقفي ظلما وبهتانا .. وقفت بطريقة تمنعو انو يخرج الا اذا جيت (طبعا شكل سيارتي غلط واقفه في نص الشارع !!) ... بس ادبا مني حطيت ورقة على قزاز السيارة اللي موقفه موقفي : (هذا الموقف خاص بي ... اذا اردت الخروج الرجاء الاتصال على *******0500 ) ... دخلت الحصة متأخر وخايف ان راعي السيارة يصدم سيارتي (ولو صدمة خفيفة) ويطلع ... فاحتياطا اخذت رقم لوحتو (اما لو صدم سيارتي ... مني شايل هم الا آخذ ورقه اصلاح من شرطتنا الرهيييييبه ... السرييييييعه في اجراءاتها !! ) ...

طلعت بعد ساعتين ... وياللعجب ... مدري كيف قدر يطلع ... بس الحمد لله ان سيارتي ما جاها شي الا شويه بويه راحت بعد ما مسحتها بيدي !!

طيب ليش انا سويت كذا ؟

انا حقيقية (اعتبر نفسي) اني انسان متسامح ... بس في بعض الاشياء ما ينفع تتسامح .. يعني لو سامحت هذا الطالب اليوم ... بكرا حيجي ويوقف في موقف طالب ثاني ... ومن أمن العقوبة أساء الادب ...

انا اشوف ان لازم ما نتسامح مع الناس اللي تخالف النظام ... لان النظام نظام ... حتى لو تنازلت عن حقك الخاص لازم ماتتنازل عن الحق العام ... يعني اللي ينط كل السرا ويجي اول واحد في الصف لازم نوقف في وجهو ... اللي يجي من اليمين ويخش في الاشارة على كل خلق الله لازم مانخليه (انا احتسب الاجر لما امنع واحد يسوي هذي الحركات !!) ... طبعا احيانا عادي تخلي واحد يخش قدامك ... بس على الاقل نبهو انو سوا شي غلط ...

بس مو معناه اننا نمنعو اننا نصرخ في وجهو ... لا ... ممكن بكلمة حلوه... طبعا بعض الناس ما ينفع معاهم الا انك تنزل على راصو بالـ (عجره) ... اذا قدرت فافعل !! ... فالغاية (قد) تبرر الوسيلة ..

اللي يكسر النظام مو متربي على انو يعيش النظام ... فلو احنا ما علمناه النظام مين غيرنا يعلمو !!

الرياض الآن - اليوم

في يوم ما من أيام الرياض ... المشكلة في الربيع (طبعا ربيع الرياض ... لا يروح بالكم بربيع افلام الكرتون وقصص الاطفال ) ... المهم فجأة وبدون مقدمات طالعت في السما بعيد والا الاقي شي زي الاعصار ... دخلت الى مبنى ثم خرجت ... ولقيت الدنيا مقلوبة الدنيا لونها أصفر!! .. المرور تعطل ... ودوامات بعض الشركات الغيت .. رحلات مطار الملك خالد حولت الى مطارات مجاورة ... صار حادث اشتركت فيه اكثر من 35 سيارة ... وما خفي كان اعظم .. الجو ينقلك الى جو ثاني وما تحس انك في الرياض ..

ببساطة لانك ما تشوف شي !!

انا اشوف هذا الموضوع ما يستاهل كلام كثير بس لازم نغطيه لانو شي رهيييييييييب ... انا حقيقه انبسطت على هذي الاجواء !! ومزاجي رايق وقتها ...

يمكن لاني احب اي كسر للروتين مهما كان !!

ويمكن لاني أحب الضباب ( : ...

المهم هذي صور انتشرت على الايميل

الموجة في طريقها الى برج المملكة ..

الموجة بعد اقتحام برج المملكة

(وااااو .. حظو اللي كان قاعد في المملكة ... ياريت كان فيه شبابيك في برج المملكة كان الناس استمتعو بالنسيم !)

خلاص ... الموجة اقتربت اكثر واكثر لتغطي اكبر مساحة من الرياض

بس حقيقة منظر رهيييييب ... مخيييف ... من جد يوريك قدرة الله ... وين اللي يروحو سويسرا يقولو رايحين نتفكر في خلق الله ... تعال الرياض وحتتفكر من جد في خلق الله وعظمته سبحانه ( مع اني ما انصح : ) ) ... والله المنظر يخوف ... في هذا عبرة لعلنا نتوب ونرجع ونستغفر ...

ابعدو عن مواقفنا لو سمحتو !!

واحنا خارجين من احد المقاهي بعد ما شربنا شوية قهوة استوقفتني ورقة معلقة جمب الباب :

هههههههههه ... ياخي يعجبني اسلوب الاقناع : ( بإمكانكم ممارسة رياضة المشي ... الترفيه عن النفس ... وكسب الأجر) ...


أصحاب العمارة معاهم حق .. انا حأترك مشكلة المواقف عندنا ... ونروح لاحد حلول مشكلة المواقف .... المشي ...




في تقارير سابقة نشرتها مجلة الـ(نيوزويك) والمعدة من قبل جامعة هارفرد تحدثو كثيرا عن علاقة الرياضة وخاصة المنتظمة منها بالحالة النفسية ... فالرياضة كما أثبتت الابحاث تحسن المزاج والنوم وتحد من القلق (أتضح ان الرياضة قد يكون لها مثل تأثير الادوية المضادة للإكتئاب) وهذه التأثيرات لا تكون الا بسبب تأثيرها على عقلك ...فالرياضة تسبب في حدوث عدة تغييرات بيولوجية تجعل الخلايا العصبية اكثر نشاطا وتجعل الجسم يضخ كميات أكبر من من الدم الى المخ وبالتالي كمية اكسجين اكبر الى المخ فتحدث تغذية أفضل لخلايا المخ ... فيتم بناء خلايا عصبية جديدة في منطقة في الدماغ تسمى (قرن آمون) تكون مختصة بالتعلم والذاكرة والتي من وظائفها مثلا ربط الأسماء بالوجوه ... في التقرير يقولو : (إبدأ بتخيل خلايا عصبية سليمة تزدهر وتتفرع .. هل تجد ذلك حافزا ؟؟ ) ... فالرياضة بشكل عام تزيد من فعالية مخك وتحسن الذاكرة أيضا ..

بس احنا في الرياض وصعب على الواحد يمارس رياضة المشي يوميا ... ولهذا يقال (أو أقول) :
" قل لي أين تعيش أقول لك كيف صحتك " !!


وكنتيجة طبيعية وجد الباحثون أنك اذا كنت تعيش في مدينة مثل الرياض اللي تحتاج إلى سيارة علشان تروح للبقالة اللي تبعد عن بيتك (فشختين رجل) فأنا ابشرك بأنك معرض للاصابة بدرجة كبيرة بأمراض مثل السكر والضغط و أمراض القلب (فبم تبشرون) !! عكس المدن المصممة لتلائم المشي مثل لندن أو بوسطن فمعدلات هذه الامراض فيها أقل كما لاحظ الباحثون ..
بس احنا نقدر نغير حقيقة ان الرياض مدينة غير صحية ولو بدرجة قليلة ... بدال ما نتضارب على اقرب موقف من المحل او العمل ليش ما نوقف بعيد ونمشي ونمارس شوية رياضة ... او نمشي مع اصحابنا بدال ما نجلس في قهوة ... او نطلع بالدرج بدال ما نطلع بالمصعد .. يعني الواحد يقدر يمارس رياضة من دون ما يلبس ملابس رياضة ومن دون مايخصص وقت لها ... بس هذي النشاطات تحتاج الى وعي بأهمية الصحة والحركة عشان تنتشر في المجتمع ...




الحمد لله في اقبال متزايد على الرياضة في الرياض وخاصة المشي ... حتى ان الامانة قاعدة تجهز اماكن كثيرة للمشي (مثل شارع التحلية - شارع الملك عبدالله اللي تحت التطوير حاليا) ..والناس مستجيبة لهذي التطورات وهذا شي يفرح ...

ظاهرة .. ولا حظ سيء ...

المقهى هو مكان لقائنا الاول والاخير كسعوديين ... جا وقت صلاة العشا وجا حق المقهى وطردنا بطريقة مؤدبه .. بعد ما صلينا قررنا نغير جو بدال ( مقهى ... مقهى ... ثم مقهى ) ... قررنا نتمشى انا وصاحبي في الحارة اللي ورا بنده عند طريق مكة ... واحنا نتمشى جانا واحد معاه جيب فورد موديله تقريبا 98 (يعني سيارة كويسة) .. وقف جمبنا وفتح الشباك وقال : ( السلام عليكم شباب ... انا اخوكم من المنطقة الغربية و ...) المهم قعد يبربر بينما انا قعدت اطالع في المقعد اللي جمبو في الطفلين الصغار النايمين وارجع اطالع في وجه الرجال مره ثانية ... الرجال ايدايه سودا وعيونه حمرا كأنه مهرب مخدرات والكذب باين لانه يقول انا من الغربية ولهجتو تقريبا تشبه العراقيه ... احنا فهمنا المطلوب وما نبغى كلام كثير فاعطيناه شي عشان يمشي ... ومشي ...

هذي طريقة جديدة للشحاته ... Take away ... يعني ما يحتاج الشحات يتعب ويقعد عند باب المسجد ولا يوقف عند اشارة ولا يمسح قزاز سيارتك ... لا ... يلف بسيارة مريحة ومشغل المكيف ويوقف لما يلاقي واحد يمشي ويكلمو من الشباك حتى من دون ما يتعب نفسو وينزل لك من السيارة !! ... بس ينزل قزاز السيارة ...

مشينا خمسة دقايق والا يوقف جمس قديم على يسارنا ...

وينزل منه واحد واول ما بدا يتكلم عرفنا ايش يبغا ... فمشيناه ...

قالي صاحبي اللي كنت امشي معاه : ( في واحد اعرفو كان على خط السفر ... ووقف في محطة ... والا يوقف جمبو راعي مرسيدس بانوراما آخر موديل و ملابسه كشخه ... يعني شكلو واحد غني .. وقالو انا ابن سبيل انقطع في السبيل وما معايا فلوس ... بس صاحبنا على طول طلع خمس ميه وعطاها لراعي البانوراما وقاله معليش والله ما معايا غيرها !! ... مشي راعي البانوراما وجا راعي المحطة لصاحبنا : ( انتا مجنون ... هادا علي بابا كبييير ... هادا كل شويا يجي يلم فلوس ) ...

والله هذول ناس مبدعين ... يعني انا لو صار لي نفس الموقف حعطيه اللي في جيبي ... وحستحي من نفسي مثلا لو كان عندي 500 و اعطيه 100 ... لاني حقول لنفسي هذا راعي فلوس مو شحات تكفيه خمسة ولا عشرة .... طبعا هذا النصاب يستأجر بانوراما ب1500 ويطلع 10 اضعاف قيمتها في يوم واحد ( وياحظو يستمتع بسواقة S500 مجانا ليوم كامل ) ( : ...

المهم ... اكمالا للمسلسل ... كنت في طريق الملك عبدالله اليوم عند محل حلويات ... وانا طالع من المحل وكنت ابغا افتح السيارة عشان ادخل الكيك والا اشوف جمس احمر قديم يجي ناحيتي ... وقف جمبي وكان جمبو حرمه ...

قالي السلام عليكم ... قلت على طول لا اراديا : ( الله يعطينا واياك ) ... والحمد لله كان حدسي صحيح ومشي الرجال ...

ياناس انا فلست ... كل شويا يوقف واحد ويعطيني قصة ... يعني هذي ثالث مرة في يومين يصيرلي نفس الموقف ... هل صارت ظاهرة ؟؟ و الا حظي سيء هاليومين ( الظاهر اللي حيوقع معايا اليومين الجايه هو اللي حيصير حظو سيء) ...

الواحد يقول هذول محتاجين بس لو كانو محتاجين صحيح ليش ما يروحو للجمعيات الخيرية ؟؟

افضل حل ان تعطيهم مثلا ريال بنية الصدقة فتصير ترتاح من وجع الراس وتاخذ اجر في نفس الوقت ... بس المشكلة لو ما كان عندك صرف ( :

الساعة الحاسمة ... 12

اخرج الرياض هذي الايام الساعة 12 ..... هدوووووووووووء ....

الرياض مدينة الليل ... إلا أن القرار جا ومنع فتح أي محل بعد الساعة 12 ليلا .... (أتوقع في استثناءات بسيطة جدا ... بس مشكلة هذي الاستثناءات انها فتحت باب الرشاوي) ...

الحين اتخيل أني دكتور في الرياض وطلعت من الدوام الساعة وحده في الليل ... بطني تقرقر جوع والبيت نايمين ... أطلع في طريق الملك فهد وحيدا (موسوس) أدور أي مطعم ... حتى لو بقالة واسكت بطني بـ(لوزين) ... المصير معروف ... أرجع البيت وأربط على بطني حجرة وأنام على بطني أنتظر إلين يجي الصباح ... (وإن غدا لناظره قريب) ...

المشكلة ان هذا القرار يضر بأصحاب المحلات اللي يترزقو الله ... يعني واحد فاتح قهوة ويجيه الزباين عادة الساعة 11 ... مع القرار انضربت مبيعاته ... فصارت المحلات تحاول تكسب أكبر قدر من الوقت قبل ما تجيها الدوريه :

أنكاس كان يبغى يتقهوى مع بعض أصحابو قرابة الساعة 12 في الليل ... راحو للمقهى اللي في بالهم .. حطو رحالهم عند باب المقهى ... بس تذكرو أن القرار حيخلي راعي المحل يقفل بعد شويتين .. فقالو خلينا نسأل : ( متى تسكرو ؟؟) ... قالهم راعي المحل نسكر لما تجي الشرطة ..... ( يعني لو ماجات الشرطة محا يسكرو الا لو خرج المسيح الدجال) ...

هناك سببين رئيسيين وراء هذا القرار :

1- الأمن ... حتى الجرايم و المشاكل اللي تكثر في هي الاوقات تخف كثيرا ...

2- السعودة ...
(ايش !!! ايش دخل السعودة !!) ... كنت اتابع امس لقاء مع الاستاذ فهد القاسم على قناة العربية وقال : ( لن تتغير نسبة السعودة مالم تتغير ثقافة العمل لدى السعوديين ) ... ومعروف ان التأخير في الليل يخلي مكاتب الموظفين عبارة عن شوط ثاني من النوم !! فإغلاق المحلات الساعة 12 يخلي الناس (تنخمد) بدري فتزيد انتاجيتهم في العمل فيقبل اصحاب العمل بتوظيف السعوديين ...
ايضا يقولو ان السعودي عنده عائلة ولا ينفع يداوم بعد 12 بس انا اشوف هذا الكلام مو منطقي لان العمل عمل ... زيك ياسعودي زي غيرك ...

أنا مؤيد للقرار ... لازم نصير نشتغل زي الناس ... وقت النوم نوم ووقت الشغل شغل ... بس الخميس والجمعة مفروض تصير تفتح المحلات الين الساعة 2 مثلا لان السهر في الـ(ويكند) محا يؤثر على ادائنا ..

الله ستر ...

امي وأختي ومعاهم حرمة ثالثة كانو رايحين امس لسابع احد الاقارب ... المشكلة انهم اول مرة يروحو لبيت السابع ولا يعرفو الوصف كويس ... و غالبا الحريم يعرفو الطرق بس صعب عليهم يصلو لمكان جديد عليهم من اول مرة ... بس امي كانت معاهم وتدل شويا ...
وصلو للحي المقصود في شرق الرياض ... وامي قاعدة تاخذ الوصف ... الحرمة اللي توصفلها قالتلها : (احنا في بيت الدور الثاني عليه كشاف خارجي) ... المشكة ان امي لقت كل بيوت هذي الحرة على نفس الوصف ... المهم وصلو لبيت خربان وقديم ومكسر بس كان على نفس الوصف ... كلمو الحرمة يتأكدو منها هل وصلو للبيت الصحيح ... وهما في المناقشات الا يجي رجال راعي البيت هذا ويسمع الكلام بين امي وبين اللي توصفلها ... قالت وحده شجاعة من الحريم الثلاثة ليش ما نسأل هذا الرجال اذا كان هذا البيت صح ولا لا ؟؟ وقبل ما ينزلو الا يبعد هذا الرجال عن سيارة الحريم ويتجه الى باب الحوش .. ويفتح باب الحوش ويتجه الى باب البيت ... و يفتح باب البيت و يخليه مفتوح ...... ويدخل جوا البيت عشان يوهمهم ان هنا العزيمة ...
قالت الحرمة الشجاعة يلا انا حأنزل أسأله عشان نتأكد ... نزلت ونزلت امي واختي وراها ... ودخلو كلهم ورا بعض بقيادة الشجاعة من باب الحوش... تقدمو خطوتين ووصلو الى منتصف الحوش ... بس لما وصلو الى نص الحوش طلع عليهم الرجال فجأة من باب البيت ... الحريم لما طالعو في الرجال توقف الزمن عندهم فجأة وتجمد الدم في عروقهم ... رجال لابس فروة متلطم ونظراته لا توحي بأي خير ...

وفي حركة منظمة استدارو الحريم الثلاثة في نفس اللحظة وبدأو في الجري الى خارج البيت ... المشكلة انهم رايحين عزيمة يعني لابسين كعوب عالية ... يعني قاعدين يجرو بأسرع ما عندهم بالكعوب العالية و بالعبايات وبالشنط وبكامل اناقتهم ... (تخيلو المنظر وكأنهم ثلاثة نسخ من سوبرمان يجرو في الشارع)!! ... وفي ثواني كانو طلعو من باب الحوش وبدأو بإكمال الجري إلى السيارة ... كل وحده تحس ان هذا الرجال يلحقها وخلاص قرب يمسكها !! ونطو في الجمس ... ولكن كعادة الحريم المنظمات قعدو 5 دقايق ينظمو الدخول عشان كل وحده ترجع الى مكانها اللي كانت راكبة فيه !! وسكرو الابواب بقوة وانطلقو خايفين لا يلحقهم الرجال ...
ايش كانت نوايا هذا الرجال ؟ لهذي الدرجة الناس ما عندهم امانة ولا ضمير ؟ مع العلم ان هذا البيت شكلو ما فيه احد غير هذا الرجال فإيش كانت دوافعه ؟ ياليت امي واختي فصخو كعوبهم وضربوه على راصو بيها عشان يتأدب ... بس خيرها بغيرها ...

انا حشران !!

ماشي في اروقة الجامعة مع صاحبي ... وبما انني إنسان ... فلدي كل الاحتياجات الانسانية كأي إنسان آخر .. قلت لصاحبي : ( عن اذنك انتظرني دقيقة أبغا أروح الحمام لاني مرررا حشران ) ... قال باستنكار : ( إيش حشران ؟ عيب تقول حشران !! ) ... أنا مرا استغربت وحسبتو في البداية يستهبل بس طلع من جد .. قلتلو : (طيب ايش تبغاني أقول؟) ... قالي : ( قول احتاج دورة المياه ) ... يووه عالتعقيد ... مو احنا العرب معروفين بالبلاغة والاختصار ؟ ... اجل ليش اقول جملة طويلة عريضة فيها فعل وفاعل ومفعول به ومضاف ومضاف اليه بدال كلمة وحده تعبر عن كل هذي الحوسة ؟ ... كل هذا التعقيد علشان الـ(عيب) الاجتماعي اللي ما له اصل الا (اتباع الظن) و ( إنا وجدنا آبائنا على أمة) و بدون أي تحكيم للعقل !!

المهم طنشت الرجال ودخلت الحمام ... ودخلت مستعجل عشان صاحبي كان ينتظرني .. بس لما دخلت لقيت شي أخرني عن صاحبي :
مبنى السنة التحضيرية في جامعة الملك سعود افتتح قبل شهرين فقط ... وبالرغم من ذلك رفض هؤلاء إلا أن يضعو بصماتهم على حمامات الجامعة .. مسوين (منتدى) كل واحد يكتب الحي اللي ساكن فيه ويجي الثاني يكتب وصف لحي صاحبو بجملة مسجوعة ... مثلا :

الأول : ( أنا ساكن في البطحا... )
الثاني : ( يعني انتو تجو للجامعة بسطحا )
الثالث : ( أيش تقولون في السلي ؟)
الرابع : ( أهل السلي ... يحتاج لكم ضرب باللي )
الخامس : ( طيب ياجماعة انا في الورود)
السادس : ( حي الورود .. أشكالكم زي القرود )

سخااااااافه ... أنا قعدت أضحك مو عشان الكلام يضحك .... قعدت اضحك من السخافة الزايدة ( :

لما دخلت الحمام وقريت هذا الكلام كان لسا للتو فتحو هذا (المنتدى) وماكان فيه الا حوالي 3 مشاركات .. اتوقع بعد شهر يصير فيه سرا طويلة على هذا الحمام كل واحد يبغى يشارك في هذا المنتدى الابداعي !!

أحلى شي في الكتابات اللي في الحمامات انو لازم تلاقي واحد كاتب : ( عيب عليكم ياشباب لا احد يكتب على جدار الحمام ... انتو ما تربيتو !!) .. طيب ياذكي انتا ايش قاعد تسوي !!

والله حرام يالجامعة .. ومسكينة يالحمامات .. بس على فكرة ... وبكل بجرأة أقول ... وعلى الرغم من هذا العمل الاجرامي في حق حماماتنا والذي لا اوافق عليه اطلاقا ... حتى ان رؤيتي لهذه الخرابيش تذكرني بنقوش الانسان القديم على جدران الكهوف في العصر الحجري .. على الرغم من كل ذلك أقول جزاكم الله خير ياللي تكتبو في الحمامات !! الواحد يجي أحيانا طفشان من المحاضرة فيستأذن من الدكتور ويخرج الى أقرب دورات مياه ويضحك شويا في الحمام على هذي الخرابيط ويرجع للمحاضرة بروح جديدة ... وبسبب هذي الكتابات سرنا نقعد 5 دقايق في الحمام ... دقيقة لقضاء الحاجة و الاربعة الباقية تقرأ آخر المستجدات ... ولو كان عندك مشاركة أو تعقيب يمكن تمتد فترة جلوسك في الحمام الى عشرة دقائق !!

لسا فينا خير ...

كنت ماشي في طريق الملك فهد وبالتحديد قدام ( برج العنود) .. في وقت متأخر من ليلة امس يعني تقريبا الساعة 12 ونص بس الشارع ما كان فاضي بحكم الاجازة ...
على اليمين لقيت كرسيدا قديمة حالتها حالة والحمد لله على النعمة .. الكرسيدا متعطلة و راكبة فيها عائلة أجنبية .. الابو فاتح باب السيارة ماسك الدركسون بيد و باليد الثانية يدف السيارة مع أولادو الاثنين الصغار الضعاف اللي يدفو السيارة من ورا على امل انها تشتغل .. وما في أمل .. والله منظر الاب محزن .. تحس أنو شايل هم عائلة بأكملها ولا هوا قادر يسوي اي شي ...
انا ما تمالكت نفسي وأشرت يمين ووقفت بسرعة ورجعت بسيارتي للخلف الين ما وصلت للعائلة .. الاب توقف فجأة عن دفع السيارة وقاعد يطالعني بخوف يحسب اني حسوي شي له ولعائلته .. اشرت له : (تحتاج مساعدة في الدف) ... راح الاب ابتسم ابتسامة مرة فرحتني وأشرلي : (تعال) ... نزلت وما إن بدأت أدف جنب الاولاد الصغار الا وقفت قدامنا سيارة لكزس جديدة ونزل منها اثنين شباب ... اللي يشوف هذول الشباب ما يتوقع منهم الا كل شر !! شعرهم منفوش يخوف !! وشباب تحسهم حقون مشاكل و مغازلات ودوران في الشوارع وكلام فاضي .. نزلو من اللكزس بعد ما شافوني اساعد العائلة وشاركونا بحماس في دف الكرسيدا ...

دفينا ودفينا الين ما اشتغلت السيارة ... وركبو الاولاد الصغار السيارة ومشيت العائلة بفرحة .. قعدت اراقب الكرسيدا وهيا تبتعد عني و الا واحد من هذول الشباب يقولي : ( يعطيك العافية ) ويمشي .. من كلمة هذا الشاب حسيت اني سويت شي مرا كبيير .. ارتفعت روحي المعنوية بشكل كبير وانا في الحقيقة ما سويت شي وقعد طول الطريق الى البيت افكر في هذا الموقف ..
ياجماعة انا هذا الموقف مرا فرحني ... والله شبابنا فيهم خير بس يحتاجو احد يقودهم ... نحتاج الى مشارع تحمسهم وتشيلهم من فراغهم ... لحد يقول شبابنا ما فيهم خير .. هذا اول دليل .. احنا ما علينا الا ان نشتغل ودافع الخير عند الشباب حيدفعهم لمساعدتنا ومساعدة مجتمعهم ...

عادي .. انا في الرياض !!

فرحت لما لقيت واحد خارج من مواقف المستشفى .. وبسرعة وقفت مكانو في الموقف النظامي وبين الخطين الابيضين بالضبط .. قفلت المرايات عشان محد يصقعها .. وأخذت كل الاحتياطات وقفلت السيارة ومشيت .. ورحت زرت مريضنا –شفاه الله – .. وخلصت زيارتي وخرجت من المستشفى وأنا حاط خطة في ذهني أكمل بها باقي اليوم .. وصلت إلى المواقف وإلا الاقي واحد موقف بالعرض قدام سيارتي .. لا لا لا .. أنا مستعجل وهذا موقف قدامي ... وفي مواقف مستشفى كمان .. يعني لازم استنى نص ساعة على الاقل الين يجي راعي السيارة .. بس تقبلت الامر الواقع بصدر رحب .. فأنا في الرياض .. أجريت مكالمة استغلالا للوقت .. وفجأة ولحسن الحظ جاء راعي السيارة أسرع مما توقعت .. أشر لي بيده مع ابتسامة خفيفة وهي أكيد كافية لارضائي .. شغل السيارة سريعا وانطلق وكأن شيئا لم يحدث .. صحيح ...لم يحدث شيء !! وما الخطأ بأن يوقف سيارته في أرض الله الواسعة .. فالمساحة التي أمام موقف سيارتي ليست ملكا لي وليس بإمكانكي أن أمنع أحدا أن يوقف سيارته فيها !! إنها أرض الله الواسعة ..
وصلت إلى محطتي الثانية .. إلى البنك .. كنت أريد أن أودع مبلغا في حسابي .. ولكني ترددت .. لاني لقيت واحد حاط ورقه على مكان ادخال الفلوس : (المكينة خربانة ويمكن تآخذ منك الفلوس .. بس محا يدخل المبلغ الى حسابك !!) .. أنا ترددت في البداية لان فلوسي علقت مرة في المكينة وكلمت البنك وقعدت شهر علبال مانزلت في حسابي .. المهم جا واحد وقلتلو لا تودع .. شوف الورقه .. رد بعصبية : (يعني وين تبغى الفلوس تروح غير في حسابي .. هذا اكيد واحد يستهبل) .. قلت مالي دخل فيك بس ما اتوقع ان هذا استهبال .. ويدخل الرجال الفلوس .. وخلص أشغالو من الماكينة وقبل مايمشي قلتلو تعال لو سمحت .. تأكد أن المبلغ دخل حسابك قبل ماتمشي عشان اتطمن وأودع فلوسي .. قال : (ياخي بلا لعب وكلام فاضي تلاقيك انتا كاتب هذي الورقه عشان تضحك على الناس) والله قعدت أضحححك .. أيش انا فاضي اقعد أكتب أوراق وبعدين أقعد أستنا أشوف ردة فعل كل واحد يستعمل المكينة !!
المهم خلص الرجال وقررت ان اتوكل على الله واودع المبلغ لاني فعلت الاسباب وتأكدت ... وأتقدم خطوتين نحو المكينة .. الا يجي واحد طويييييل ما شفت وجهو اصلا من طولو ومعاه صاحبو ويدخلو من الباب وعلى الماكينة على طول متجاهليننا احنا اللي واقفين في الصف .. تقدمت نحو الماكينة وحطيت يدي وقلت لو سمحت انا جاي أول ... ويجي هذا الطويل ويعطني (كوع) تحذيري وتجريبي عشان أعرف كيف هوا قوي !! انا أكيد سكتّ ولا تكلمت ولا بكلمة .. والله سلامة البدن أهم من دقيقتين تنتظرها زيادة وأهم من مشكلة تدخلها مع ناس زي كذا (يفقعو وجهك) !! حاولت الانتقام بطريقة ثانية .. قلت للي ورايا بصوت عالي : (شكرا على احترامك النظام والصف ) بس الحمد الله الطويل ما يعنيه لا نظام ولا صف ولا احترام ولا كان دخلت في مشكلة كبيرة !!
الواحد في الحياة وفي الرياض خصوصا لازم يأقلم نفسو مع هذي المشاكل الاعتيادية والا سيعيش وهوا طول الوقت ضغطو مرتفع !! يعيني لو واحد قفل على سيارتك لازم تشكرو لو جا بسرعة ولا تأخر أكثر من ساعة !! ولو جا واحد ونط قدامك في الصف لازم تنظر له بنظرة الاشفاق والاحترام فهو مسكين يحسب نفسو عايش في غابة البقاء فيها لصاحب العضلات الاقوى !!
ملاحظة بسيطة : ( انا عن نفسي أحب ان أوصل رسالة لمخالف النظام انه يفعل شيئا خطأ حتى لا تنتشر مثل هذه العادات (الجاهلية) .. وأنصح كل واحد أيضا كذلك بأن يحاول بإصلاح المجتمع بعد أن يبدأ بنفسه أولا)

حركة حلوة .. بس لاتعيدوها !!

ماشي كعادتي في طريق خريص اللي مثل غيره من الطرق يسمى طريق سريع ولكنه أبطأ من البطيء .. والمشكلة هذا البطء وهذي الزحمة بدون سبب .. يعني مايكون فيه لا حادث ولا حتى (بسة) مدعوسة !! بس على حظي امس سبحان الله صار الطريق سريع ..
ماشي على الطرف اليسار والا شويا طالعت وماصدقت نفسي .. طالعت فوق .. ركزت في اللوحة بقوة ... ابغا اتأكد هل انا قاعد اقرأ شي حقيقي ولا يمكن لخبطت في القراءة .. لا والله صح ...

إيش ياجماعة .. انتو لخبطتو بين شارع ام القرى في مكة وخريص في الرياض !!

يعيني قد كذا مكة تشبه الرياض ؟؟

( ترى هذي بداية طريق خريص عشان كذا فاضي !!)

لا معليش ... هذا ..

حقيقة اعلان ذكي جدا منهم .. يلفت النظر بقوة .. انا جدا معجب بهذا الاعلان من الجمعية .. حتى ان هذا الاعلان صار حديث المجالس .. بس الله يجزاهم خير كان اعلانهم هذا حيسببلي ويسبب لغيري حوادث !! لاني اول ماشفت اللوحة ضغطت فرامل في نص الخط السريع لا اراديا عشان احظى بأكبر قدر من الوقت وركزت في اللوحة عشان احل لغزها مع ان ورايا كان فيه سيارات.. و كان يمكن اللي ورايا برضو يصقع فيني بسبب هذي الفرملة .. او انا اصقع في اللي قدامي بسبب عدم التركيز !!
اتخيل لاسمح الله اني لو سويت حادث كان كل الحادث بسببي ولن يتحمل احد اي تكاليف لاصلاح السيارة والنخلة الطايحة غيري !!
بس لو تخيلت نفسي في امريكا و جمعية التدخين هناك حطت نفس هذي اللوحة بس طبعا يغيرو بدال مايكتبو منى وعرفة يكتبو كنيسة القديس بطرس والفاتيكان !! وبالانجليزي طبعا .. لو شفت هذي اللوحة في امريكا و انشغلت بيها وسويت حادث لا سمح الله .. محا ادفع ولا ريال .. لا بل سأطالب بمليونين دولار مقابل هذا الحادث وما ترتب عليه من تغيبي عن العمل لمدة اسبوعين والاضرار النفسية والجسمية علي والتأثير النفسي على العائلة وقطتي الاليفة !! .. لكن السؤال هو : حأطالب ميييين ؟ هنا يكمن الجواب المثير .. سأرفع دعوى على جمعية التدخين لانها هي السبب في هذا الحادث ... لانها هي اشغلتني بإعلانها هذا .. وأكسب القضية .. وتتحول جمعية التدخين الى جمعية مديونة تحاول ان تجلب المال بأي طريقة .. فتروح الجمعية تفتح شركة توزيع سجاير مالبورو .. وبعد سنتين تغطي الجمعية ديونها وتبدأ تربح .. بس بعدين الجمعية يعجبها الوضع مع الارباح الهائلة .. ويقرر مدير الجمعية الاستمرار في هذا العمل التجاري و توزيع الدخان على الشعب الاميركي وبلا توعية وبلا كلام فاضي !!
شايفين ايش نتيجة الديمقراطية والحرية والعدل الزايدة ... انها تحول شركات مكافحة التدخين الى شركات دخان .. .. فلا للديمقراطية .. ولا للحرية ... ومن اليوم ورايح لحد يقول احنا مساكين نبغا ديمقراطية ...احنا وضعنا تماااااااااااام ...

هل يوجد فرق بين القنبلة الصغيرة والكبيرة ؟؟

عندي مشوار للحي الدبلوماسي .. الله يعييييين ...
من جد الله يعيييين .. توقف في تفتيش سرا طوييييييييييله ... معليش تفتيشين ... يكمن قدامك 20 سيارة .. والمشكلة من زين التفتيش اصلا !!
الحي الدبلوماسي عالم آخر .. تخيل شوارع ما فيها حفريات ... ولو تبغا تتأكد روح بنفسك بعد ما تدور لك على سبب مقنع تقوله للتفتيش عند مدخل الحي ... بس لو دخلت فستجد شيئا مختلفا .. ممكن تعيش جو اوروبا مع الاشجار المنتشرة في كل مكان .. والنظافة الزايدة .. بس النخيل وشوفه الشماغ وبعض المباني على الطراز القديم تخرب خيالك وترجعك لجو السعودية ! هناك ممكن تشوف وحده طالعه تسوي رياضة بشورت ... او طالعة تتمشى مع صاحبها في طرف الشارع .. مع انو نادر تشوف هذي المناظر بس لا تستغرب لو شفت !! سفارات الدول تعدي على يمينك يسارك وكل ما تعدي سفارة تجيك سفارة ثانية .. سيارة سفير زمبابويه الفاخرة تمر بجانبك والسفير يرمقك بنظرة احتقار خاصة بعد فوز اوباما !! الدوريات الامنية تدور في الحي طوال الوقت وتحس الجو مشحون ومو طبيعي .. هناك اذا كنت تريد ان تتمشى مع اولادك فبإمانك ان تذهب الى ساحة الكندي .. قهاوي منتشرة تطل على ساحة كبيرة مكشوفه يركض بها الاطفال .. اذا تبغا نادي خيل موجود .. ملاعب رياضية موجود ... مسابح مجهزة بأمواج اصطناعية .. مسابح عادية .. ولو عندك 30 الف ومنك عارف وين تصرفها تقدر تدخل ولدك في المدرسة اللي في الحي ... ما اود ايصاله .. انت في عالم مختلف ...
كنت رايح اسجل لاختبار انجليزي في المعهد الثقافي البريطاني في هذا الحي ... ووقفت مع العالم عند التفتيش ... وجا دوري وفتحت الشباك و اعطيت العسكري ابتسامة عشان اكسبه في صفي ويمشيني .. ونجحت الخطة ... بس قالي افتح الشنطة قبل ماتمشي .. ضغطت الزر .. وقتها تذكرت ايش كنت حاط في الشنطة ...تحسفت وقلت ياذكي ليش تخلي زي هذي الاشياء في الشنطة ..بس استنيت العسكري ايش حيقول ؟؟ حيلاحظ ولا لا ؟؟ بس للأسف لاحظ .. جا العسكري وقال : (ايش اللي في الشنطة ؟؟ ) .. قلت : (لا تخاف الشي الطويل اللي في كيس هذا حامل ثلاثي للكاميرا ) .. على بالي اني طلعت نفسي من الورطة و ازلت عني الشكوك عشان مايحسب ذاك الشي رشاش او بندقية .. بس قالي العسكري : (أجل عندك كاميرا؟؟) قلت : (ايه الشنطة الكبيرة فيها كاميرا .. انا هاوي تصوير وعندي كاميرا احترافيه .. ) قال : (اجل وقف قدام وولع الفليشر) ... ليه ؟؟ .. اللي معاه كاميرا يصير متهم !! طفيت السيارة على جمب وولعت الفليشر وشلت محفظتي ورحت للعسكري وقعدت استنا العسكري الثاني .. اخيرا تكرم بجزء من وقته وجا لي .. قال : (اجل معاك كاميرا !! ياعسكري .. خذه عالقوقيف ) ... انا صدقت بعد ماسمعت قصص تخوف .. قلت بكل براءة للعسكري : (ليش انا ايش سويت ؟ ) قال : (لا انا استهبل معاك .. بس نوديك عند الضابط) .. كويس ... اذا توقف الشغلة عند الضابط شي هين .. استنيت اللي حيوديني للضابط وهوا واحد طيب قالي : (ايش معاك ؟؟) .. قلت : (كاميرا) .. قال: (ايش نوعها دجيتال ولا عادي ؟؟) .. المهم خش معايا في الكاميرات وانواعها وشاف الكاميرا .. قالي : (خلاص حط الكاميرا في المقعد اللي جمبك عشان التفتيش اللي قدام مايوقفك !! ) .. حل حلو وسهل وبسيط !! بس بعض الناس يحبو يعقدو الامور ! أصلا لو انا واحد ابغا اصور جوا الحي ليش الفت الانظار بكاميرا كبيرة .. أسهلي اصور بكاميرا الجوال .. المهم حطيت المتهم البريء (الكاميرا) جمبي وعديت التفتيش الثاني بدون اي كلمة ..
انا قلت ان الكاميرا هي المتهم البريء .. نعم ... اصحاب الاهتمام بالنواحي الامنية سوو معادلة بسيطة بناء على طبيعة عملهم : ( بما أن القنبلة الكبيرة اشد خطرا من القنبلة الصغيرة !! فالكاميرا الاحترافيه الكبيرة اشد خطرا من كاميرا الجوال الصغيرة ! ) أليست الصورة الناتجة عن كاميرا الجوال نفسها في الكاميرا الاحترافية ؟؟ ولا لما تصور بالكاميرا الاحترافية تطلعلك اشياء ما تطلع في كاميرا الجوال ؟؟ ما ادري ليش هذه التفرقة مع انها تؤدي نفس الغرض ؟ ... المفروض بالمنظق يا الكاميرات صغيرها وكبيرها ممنوع ولا كلها تصير مسموح بها ... فلو تم تطبيق قانون منع الكاميرات على المنطق الصحيح مفروض يسألك في التفتيش : (عندك جوال ابو كاميرا ) وكأننا في زواجات حريم !!
واحد من اصحابي راح يبغى يصور برج المملكة مع صاحبو وفكر نفسو في امريكا بيصور برج الـ( امباير ستيت ) ... وقفو هوا وصاحبو تحت برج المملكة ونصبو الحامل الثلاثي وبدأو بالتصوير .. صورو كثييير .. كل مرة ياخذو اللقطة من زاوية .. وشويا جاهم (السكيورتي) حق المملكة .. قال تعالو

ياشباب .. قاعدين تسوو ايه .. وين مفكرين نفسكم ؟ تعال انت وياه ؟ وياخذهم على التوقيف ويخليهم ثلاث ساعات .. بتهمة ايش ... يصورو المملكة .. طيب ليش فرحانيين بالبرج ومخلينو طويل قد كذا .. يعني عشان نغمض عيوننا لما نشوفو !! لو ما تبغا احد يصور برجك غطيه بشرشف !! لا المشكلة كل العالم تصور بالجوال .. ولكن شتان بين كامير الجوال والكاميرا الاحترافية فهذي كاميرا وتلك ايضا كاميرا !!
اخيرا أنا من الآن عندي حلم .. زي ما حلم مارتن لوثر كنج وتحقق حلمه اخيرا بعد 40 سنة بفوز اوباما .. ها انا ذا أحلم : ( أحلم يوما ان اسير في شارع العليا لافرق بيني صاحب الكاميرا الاحترافيه وبين من لديه كاميرا جوال .. احلم ان نعامل في التفاتيش على اساس انسانيتنا لا على اساس الكاميرا التي نملكها .. احلم يوما ان يذهب ابني الصغير في باص المدرسة بجانب ولد لديه كاميرا جوال عادية وابني لديه كاميرا احترافيه يصور بها ما اراد ولا يقول له احد شيئا .. احلم ان نعامل بسواسية بغض النظر عن نوعية كاميراتنا .. حينها سوف نكون سواسية .. نحن أخيرا سواسية.. أشكر الله اننا أخيرا سواسية )

مطر في عاصمة القحط !!

يبدأ نفس السيناريو نفسه ينعاد كل سنة .. يتأخر نزول المطر بعدين نصلي صلاة الاستسقاء ... انا سمعت انو موعد صلاة الاستسقاء مدبر ومرتبط بتوقع خبراء الارصاد .. فنصلي الاستسقاء ولكن يخيب ظننا وتجي السحب المليئة بالامطار ولا تجود لنا بأي قطرة !! ... ولكن كرم الله واسع وتجود السحب بعد كم لفة على الكرة الارضية بمطر .. وتجود بكرم ..
المطر عندنا حدث غريب واستثنائي .. الدنيا كلها تتغير .. حتى الالوان تتغير .. كنا نشوف الوان الاشياء طول السنة محروقة بضوء الشمس القوي .. بس مع الغيم نشوف الاشياء بالوان اهدأ والطف .. واكيد هذي الالوان الهادئة تحسن مع مزاجاتنا .. يوم المطر اليوم الوحيد اللي ممكن تشوف حادث واللي صادمين يضحكو لبعضهم .. والناس في الشارع مبسوطة ومبتسمة وكأنو عندنا عيد .. بل بالفعل يوم المطر عيد ثالث لنا – لحد يقول مافي الا عيدين للمسلمين لاني اعرف هذي المعلومة – ( : ...
بس فرحة العيد هذي ما تدوم .. فلو صار المطر قوي ومستمر لكم يوم تبدا الناس تقرف من شي اسمو مطر ... زينا احنا ايام المدرسة نقول يازين ايام الجامعة متى تجي .. ياليتها تجي واصير اسوق ويصير عندي سيارة واصيراسعد انسان في العالم .. نخش الجامعة وسنتين والا هوا زهقان ويقول متى اتخرج واتزوج وخلاص ايش احسن من كذا .. يتخرج ويتزوج وينبسط اول شي .. بس هيهات !! هيا كلها كم سنة ويقول يازين ايام العزوبية ايام تطلع وقت ماتجي وتجي وقت ماتجي ومافي احد يزن فوق راسك – ممنوع الاتهام بأني من اعداء الزاوج - ...
ثاني ملاحظة للتغيرات اللي يحدثها المطر غير انشراح الصدور هي (متلازمة المطر والتسيب !!) ... عندنا في الجامعة مو بالسهولة عادة تلاقي موقف – باستثناء المواقف الخاصة بنا احنا السعوديين زي الارصفة – .. بس يوم عيد المطر تغيرت الاحوال ..الساعة 1 الظهر تلاقي موقف قريب وكمان نظامي .. تخيل !! بس هذا العرض ساري فقط خلال موسم الامطار .. والصورة خير برهان ..
وبعد ما سويت تحقيقاتي عرفت السبب ... الناس كلها في البر !! فجاتني فكرة بسيطة لحل مشكلة التسيب هذي .. أنا سمعت انو الحكومة من زمان كان لها مقر شتوي في الطايف .. ليش طيب ليش ما يسوو مقر (مطري) !! يعني اول ماينزل مطر تنتقل كل الوزارات الى الثمامة كل وزارة على طعس .... المدراس برضو كلها تنقل هناك ... بس فيه ملاحظة مهمة .. يجب ان يتم اختيار مدارس البنات على اعلى الطعوس عشان ما الاولاد (يقزوهم) بعيونهم الطويلة ... طبعا كل باصات المدارس حتى باصات الاولاد تستخدم لستر فصول البنات !! وفي وقت (بريك) الغدا تلاقي طلاب الجامعة صافين سرا طويييل عند طعس بعييييد فيه محل ( بر – ويه ) على وزن ( صب – ويه ) ... لعل الواحد يحظى بساندوتش الضب المشوي اللذيذ !! انا اشوف هذا حل حلو لهذي المشكلة ولا يصير لاتسيب ولا غياب بالعكس الناس تتحمس لدواماتها !!
في اول يوم للمطر درنا عشان نصور ونغطي حدث المطر المهم ... وفي احد الشوارع لقينا بحيرة كبيرة وغميقة مع ان المطر ما كان مرا كثير !! جا واحد راعي سيارة متحمس وخش جوا يشوف ايش الوضع وكيف الجو جوا هذي البحيرة العجيبة ومسكين غرزت سيارتو في المويه ولا قدر يطلع حتى السطحة واقفة خايفة تدخل .. هذي من جد بحيرة عميقة تنفع للسباحة .. انا اقول امانة الرياض لو تجهز هذي الاماكن لجذب السياحية لاهل الرياض على الاقل يصير نشوف مويه حقيقية ونسبح في مويه ربنا بدل مانروح عند اهل الشرقية ونطفشهم في كل اجازة .. يصير لنا كرامة واستقلال احنا اهل الرياض !!

تحذير: الكلام الجاي كلام بريء جدا بناء على استنتاج سخيف وليس له دخل بالسياسة لا من قريب ولا من بعيد ..
في موضوع (بريطانيين والله المعين) قلت انو البريطانيين مساكين هربو من المطر عندهم في بريطانيا ولما جونا جات موجة مطر شديدة على ابها بعد القحط ... وأمس لما نزل مطر كان غولدن براون للتو وصل الى الرياض .. ما لاحظتو شي غريب ؟ ما تلاحظو ان المطر وراهم وراهم واول ما يروحو مكان ينزل عليهم مطر !! فأعتقد وجود علاقة بين المطر والبريطانيين !! واذا كان استنتاجي صحيح ... اذن لو نبغا يجينا مطر خلينا نسمي نفسنا المملكة المتحدة العربية السعودية وبإذن الله يجينا مطر بالهبل !!

ملاحظة بعد الختام : كل صور هذا التقرير من تصويرنا .. عشان ماتطالعو بسرعة وتقلولو اكيد مطلعين الصور من النت .. ترا تعبانين عليها .. فتأملوها جيدا ( :

سعودي في المدرسة البريطانية !!

بسم الله الرحمن الرحيم
من اكثر الاشياء اللي كانت تسببلي رعشة في حصة الادب هي لفظ " مدرسة " ..
زي " مدرسة الكوفة " او " المدرسة الشامية " او حاجات زي كذا يقصدون فيها طبعا "طريقة " ...
بس صار لي موقف قبل فترة .. حاولت اعبر عنه باي لفظ غير " مدرسة " .. بس في الاخير اندحرت امام قوة وبلاغة اللفظ وكتبته ذليلا صاغرا مجبرا على ..... لا يكثر

كل مافي الموضوع اني احاول ( ارقع ) لعنوان المقال ... لاني اخترت كلمة ما احبها واحس اللي يقولها (يتفلسف بدون معنى!!)

القصة باختصار
زارنا في الرياض مجموعة شباب بريطانين مختصين بامور الشباب عندهم .. والهدف من زيارتهم الحوار مع الشباب السعودي بالاضافة الى انهم زاروا اماكن مختلفة في المملكة والرياض .. زي ماقريتوا في مقال شارع العروبة
واحد من هذي الاماكن كان ملعب ( green gulf ) في الثمامة ..
تحدوا الشباب بعض واتفقنا على ان نقيم مباراة قدم كتحدي او اثبات جدارة بين "المدرستين" .. (او لسا بدري عليها شوية!!) .. بين اللاعبين السعوديين والبريطانيين

راح اوصفلكم المبارة كما شاهدتها بصفتي ( خائن ) رسمي العب في صفوف فريق الاعداء كجناح ايسر ..
طبعا البريطانيين كانوا ناقصين ورحت انا وكم واحد معاهم ( كمالة عدد !!!) ...
ولكن يشهد الله انهم لقبوني ب زيدان : ) ... قالوا زيزو زي زيدان .. انا متاكد انهم يقصدوا تشابه الاسماء .. بس انا فسرتها على كيفي .. بما يمكن ان يرفع ثقتي بنفسي وقت المباراة !!
خاصة ان عندي محفظة لمناشستر يونايتد .. عشان كذا حطني المدرب ( سكوت ) - ( فلة اسمه لو قدر يطبقه .. طول الوقت يصرخ علينا !!) - ظهير اهجم وارجع على كيفي
طبعا ينطق اسمه باللهجة البريطانية الـ .... ( سكااااات ) مع حركات مو موجودة في اللغة العربية .. ولا في اي لغة اخرى حسب علمي
"سكوت" مارضى عن تمارين الاحماء السعودية .. قال ايش الكلام الفاضي هذا !!!
اخذنا في عشر دقايق تمارين احماء بريطانية عفشة اصيلة .. من مدرب بريطاني عفش اصيل دايم يزعق !!!!
الشي المخيف .. واللي فعلا هز ثقتي في نفسي حتى النخاع على قولهم... انه اجتمع الكابتن مع الفريق عشان نحدد المواقع ونلبس فنايل التدريب المرقمة ...
ماعندهم نظام طقها والحقها !!

انت فين تلعب ؟؟ باي رجل تشوت ؟؟ رابط جزمتك كويس ؟؟ كيف قدرتك عالتنفس ؟؟ واسئلة اخرى بعضها غبية كل هذا عشان يحدد موقعك في الملعب ..

من جد حسيت اننا حندخل حرب ..
تذكرت وقتها البساطة والفلة في ملاعبنا .. " ها ياشباب مين يحرس ؟؟؟" (طبعا بعد مالعبت مع البريطانيين حاقول " اييش ؟؟ وهي الشغلة فوضى ؟؟ لازم الحارس له معايير ومواصفات !!!!" )
وعندنا كمان " حنبدل بين الهجوم والدفاع كل شوي لاتخافوا " هذي تقال كتطمين للاعبين اللي اغلبهم فاهمين انو احسن شي الهجوم .. واي مكان غير الهجوم (اهانة !!)
طبعا لو اقولها للبريطاني يمكن يغمى عليه مسكين !! ايش نبدل بين اثنين من المراكز الاساسية الحساسة على ارض الميدان !!! صاحي انتا ؟؟

وقتها عرفت اني الآن مع الجانب الاقوى .. الجانب المخطط .. جانب منظم ..

اعطيت نظرة للفريق السعودي في الجهة الثانية ....

نظرة احتقار ..

كاني اقول " انتو مساكين " " مبسوطين بالهبالة اللي تسووها وتسمو نفسكم " لعيبة كورة ؟؟ دحين نوريكم الشغل" <<<< اسسسسمع مين يتكلم : q صار بريطاني خلاص : )
والله الحقيقة تحمست مرة معاهم .. حتى بداية الشوط الثاني كنت اصرخ احمس فريقي واقعد اسب في السعوديين !!! انبسط واحد اسمه جون وجا يشجعني على خيانة بلدي اكثر واكثر والغوص في هذا المستنقع القذر اعمق واعمق

جا الكابتن يوزع فنايل التدريب .. مافي زي عندنا كل واحد ياخذ اقرب رقم .. يمكن اثنين او ثلاثة يضاربوا على رقم 9 بعدين خلاص..
هنا لاااااا ياحبيبي .. كل رقم حسب موقعك في الملعب .. وقعدوا يبدلوا ويغيروا الين ضبط كل واحد مع الرقم بتاعه حسب البوزيشن حقه على ارض الميدان

شغل احتراف !!
: /
فلعلي اكون ثاني محترف سعودي في بريطانيا .. لا .. واحسن من (بعض الناس) .. انا لعبت مباراة كاملة : q
لعبت اخيرا مع المدرسة الاوربية في كرة القدم .. وبالتحديد المدرسة البريطانية .. صاحبة اقوى دوري في العالم
شفت الفروق الههههههههههاااااائلة بين المدرسة السعودية والمدرسة البريطانية ...
يمكن تأكدت انه مافي شي اساسا اسمه " مدرسة سعودية " ..
يمكن في ( طريقة سعودية ).. زي" طقها والحقها" .. و"مين يحرس يا شباب" ... وطرق اخرى تدل عالبساطة واللطافة والحنية والتلقائية اللي دايم نسمع عنها في السعوديين ولا عمرنا شفناها ..!!

بس رغم كل هذا

رغم كل التخلف السعودي ..

رغم كل التنظيم البريطاني ..

رغم اني انا ( شخصيا ) لعبت مع الجانب البريطاني ..

اثبت ابطالنا انهم اسود وانهم رواد طريقة طقها والحقها بفوزهم علينا بست اهداف مقابل خمسة !!! لاتنسوا ان الارض والجمهور والجو والطبيعة في صالح السعوديين

في اشاعة ان النتيجة تعادل 6 – 6 بس ما تأكدت منها

كانت تجربة غاية في الروعة حبيت انقلها لكم ..
وشكرا لفضاوتكم وقرائتكم لفضاوتي..

بريطانيين .. والله المعين ...

وفقا للبوتوكول الموقع بين الرياض ولندن يزور فريق من الشباب من كلا الدولتين بلد الآخر سنويا للتعرف على البلد وتقاليده والتحاور مع شبابه حول المشاكل المشتركة ...
عشرة أعضاء ومشرف هو الفريق البريطاني .. أول شي اللجنة المنظمة للزيارة ودوهم جدة ... انا استغربت وسألت المندوب السعودي المرافق لهم من رعاية الشباب : ( جدة !! مالقيتو تودوهم الا جدة !! بحر وعندهم زيو في بريطانيا .. من زين بحرنا اصلا .. وجدة مافيها شي جديد .. الرياض على الاقل فيها الثمامة ينبسطو ويطعسو ويشوو ويجربو شي جديد في حياتهم ..) قالي : (لا بالعكس مرا انبسطو في جدة .. خاصة في المتاحف ) ، قلتلو : (أي متاحف .. هيا جدة فيها متاحف ؟) .. قال : ( متاحف كثيييير ) وقعد يعددلي المتاحف اللي زاروها .. بيني وبين نفسي قارنت بيننا وبين دبي .. دبي لو عندهم محل يبيع حلويات يطلعوه في قنواتهم واعلاناتهم ويكبرو الموضوع ويخلو محل الحلويات مصنع اسلحة !! واحنا الله المستعان .. ولا من شاف ولا من دري !!
المهم بعد ماراحو جدة راحو لأبها .. والمساكين ماصدقو يهربو من الغيم والمطر (قالو رايحين السعودية شمس وحر ويالله من فضلك !!) الا وجاهم عقاب من السماء - للبريطانيين فقط - .. موجة مطر استمرت ثلاثة أيام .. المطر وراهم وراهم يدك رؤوسهم دكاً ... والمرافقين السعوديين للقروب البريطاني ماصدقو : ( مطر ... مطر ... مطر ) وذول البريطانيين يطالعوهم : (ايش فيهم ذول المهابيل كانهم اول مرة يشوفو مطر !!) ..
ثم جاؤو الى الرياض -عاصمة الثقافة العربية سابقا وعن جدارة بالتأكيد - ... وكانت ليلة البارحة الاحد الاجتماع بين مجموعة شباب سعوديين والقروب البريطاني في مركز الملك عبدالعزيز للحوار الوطني .. كان أهم شي في النقاش نظرة الغرب عموما والبريطانيين خصوصا للعرب والمسلمين ودور الاعلام فيها .. لانه هو السبب الاول - والاخير- في صنع تلك النظرة السلبية بسبب ما يروجه من الكراهيه والعداء للعرب والمسلمين وتضخيم أخطائهم .. والدليل على تضليل الاعلام لهم انهم بمجرد ان مكثو اياما قليلة تغيرت نظرتهم لنا بسرعة كبيرة كشعب محترم غير همجي كما يصورنا اعلامهم ..
داخل أحد الشباب السعوديين : ( ليس الدور مقتصر على الاعلام .. نحن ايضا لنا دور في صنع تلك النظرة السلبية ) وقال قصة صاحبو : كان يلعب (X-BOX) اون لاين مع واحد ولد من امريكا أهبل زي باقي الامريكان .. وسألو الامريكي : ( انتا من وين ؟ ) قال صاحبنا السعودي : ( انا من السعودية ) ، قالو الامريكي : ( وااااااااو .. من السعودية .. كيف شكل السعودية .. وين تعيشو في خيمة !!) قال السعودي : (نعيش في خيمة بس متطورة فيها كهربا وكمان انترنت !!) قال الامريكي : ( طيب عندكم مدرسة ) ، قال صاحبنا : ( ايه انا اروح الجامعة وهي عبارة عن خيمة كبيييييييييييرة ) قال الامريكي : ( طيب كيف عندكم سيارات ولا لا ؟) قال : (لا احنا نركب جمال ) وقعد صاحبنا يخرش

على الامريكي .. تخيلو لو اننا لسا على الجمال !! يصير طريق خريص فيه زحمة جمال وتجي الدورية عبارة عن فيل افريقي وتسد خط الخدمة !! لا والحريم يسيرو يسوقو - والعياذ بالله - بس بجمل مظلل تماما (مكتم) وماتشوف اي شي من جوا ويسموه (هودج) .. بس الحريم الراقيات ما يسوقو .. السواق (جوهر) يوقف المدام عند المملكة وينط يفتحلها باب الهودج!! ..

باص المدرسة جمل طويييييييييييييل 20 راكب ... وتجي معارض النسيم وتلاقي انواع من الجمال المستوردة من شتى بقاع العالم .. المحطات تصير براميل علف ومويه !! (احس اني طلعت عن الموضوع كثير خلينا نرجع) ....
بعد ماخلصنا المناقشات توجهنا للعشاء بوفيه وذبيحة وانبسطو الخواجات وقالو حنرجع بريطانيا بكروش !! اجل معانا حق اذا تدلدلت كروشنا قدامنا بشهادتهم !!
وانتهى اللقاء بصور تذكارية - كالعادة - ... وليس كل عادة عبادة !!
ختاما عندي لغز بسيط ... ( خواجه وجا لنا في الرياض ايش المطعم اللي حنوديه ياه بالتأكيد ؟ ) - هناك مطعم محدد -

السياحة في الرياض .. وااااااو

السياحة في الرياض .. وااااااااو

بالغلط .. والله بالغلط .. جلست قدام التلفزيون ... كان محطوط على القناة السعودية الاولى .. قناة بلدي الرسمية .. الله الله !!

لسبب ما .. قررت اني ما اغير القناة واصبر شوية لعل وعسى يطلع شي حلو .. خاصة ان تو بدأ برنامج عن السياحة

في وطننا الغالي المعطاء ومن هالكلام اللي يتقال طول الوقت في القناة الفلة .. ولحظي الحلو .. كان عنوان حلقة اليوم

الرياض 2 !!

ياسلام .. عندنا شي اسمه سياحة في الرياض .. مدري ليش غصبا عني ابتسمت .. تخيلت حال سائح اجنبي

مسكين تايه في طريق الملك فهد في عز الظهر يبغى يقضي اجازته في الرياض !!!!!!!!

شوفوا ايش اللي صار في البرنامج الفلة اللي المفروض انه يشدك ويحمسك لزيارة هذه المدينة الرائعة الخلابة

طلع المقدم مابينه وبين الكاميرا الا شبر ... ملصق وجهه مرة ومو طالع في الشاشة الا وجهه .. مدري ايش الحكمة ..

مقتطفات من الحلقة :

" بدانا في الحلقة الماضية رحلتنا السياحية الجميلة في عاصمة وطننا الحبيب الرياض "

"الرياض التي لن تكفيها حلقة او اثنتان .. او برنامج او اثنان .. بل تحتاج الى قناة .. او اثنتان !!" درس قواعد !!

" لكننا سنحاول ان نضغط على انفسنا ونضغط ونضغط ونضغط ونضطر الى الغاء ذكر الكثير والكثير والكثير من الاماكن السياحة الفاتنة في الرياض حتى يتسع لها برنامجنا الصغير " ... اها .. طيب !!!

" بدا صديقنا الشاب خالد رحلته السياحية في الحلقة الماضية .. حيث انطلق منذ الصباح يملاه النشاط والحيوية .. ويزيده من ذلك طقس الرياض العليل .. انطلق الى متحف صقر الجزيرة للطائرات " !!!!!!!!!!!!!!!!!!!! واااااااااااااو وناااااااااااسة .. ابغى اجي بليييييز !!!

" وفي هذه الحلقة سنكمل رحلتنا السياحية " ... اخيرا الحمد لله بعدت الكاميرا عن وجهه .. انتقلت الصورة الى صاحبهم الشاب خالد على قولته .. كان خالد يسوق .. والمصور مو قادر ياخذ الزاوية اللي بغاها .. قام حطوا الكاميرا على ركبة خالد وشغلوها ... الكاميرا تهتز .. وجايبة وجه خالد من تحت ... وصاير مرة قريب للكاميرا .. بس احسن من المقدم عالاقل !!

ايش يقول خالد " ااه انا جائع " يععععععععع حتى انتا لغة فصحى ؟؟ تكلف مو طبيعي .. كاني اقرا مجلة ميكي بصوت عالي .. تطلع القصة هبببببببلة

" اااه انا جائع .. ولكنني محتار .. نعم انا محتار .. اذا جعت في الرياض ستصبح بالتاكيد محتارا " يعني اذا جعت ماتصير جيعان .. لا تصير محتار ... ماما انا محتار حطو الغداء !!

اختار الفلة خالد مطعم ياباني .. مطعم معروف باكلاته اليابانية المقززة واسعاره الخيالية .. لويشغلوا انمي يمكن اروح : )

طبعا دخل وجلس على اكبر طاولة .. لحاله !! صاير شكله تحفة

طلب اكل ملأ الطاولة كلها ( طبعا مو الكل حياكل حتى المصورين ) ... والمشكلة لمن قام كل الصحون فاضية !!!!!!!!! على مييييييييييين !!!! خخخخخخخخخخخخخخخ

وطلع من المطعم بدون مايحاسب ..

اوكي مو مشكلة .. اقوم الصبح .. اروح متحف .. بعدين مطعم مقرف .. ممتاز .. استمر ... انت في الرياض

" ااه اشعر بالنشاط " ليش كل ما يتكلم يقول ااه ؟؟ قاعد يقرا من ورقة صدقوني

" سوف اذهب الى مكان لازاول بعض الرياضة " .. اللي استغربه انه طالع يتمشى في الرياض ومامعاه احد .. مين الموسوس اللي يتمشى لحاله ؟؟

اوكي فين راح ؟؟ نادي الفروسية !!! خخخخخخخخخخخخخ

ياعيال اللذين نادي الفروسية الاشتراك فيه مدري بكم ... وكل مرة تروح تدفع فوق الميتين ريال غير الاشتراك حق اول مرة .. وفحص طبي وقلق ... بالله اذا طفشت اروح اشترك في نادي خيل !!!!!

وبعد كم لفة عالحصان نزل وقال " هنا انتهت رحلتنا لمدينة الرياض .. اتمنى البقاء اكثر لاستطيع استكشاف هذه المدينة الرائعة "

يعني اللي فهمته الان ... انك اذا طفشت بالرياض ... قوم الصباح ... وروح متحف طيارات ماعندنا غيره ... وبعدين روح لمطعم تدفع فيه مايعادل سعر 15 وجبة من ماكدونالدز سوبر سايز وغالبا ماحتقدر تاكل شي .. واذا خلصت .. روح اشترك في نادي خيل ..

وااااااااااو ... سياحة في الرياض ...... ابغى اروح الرياض ......!!

وبعدين رجع المقدم اللاصق بالشاشة وعاد نفس الكلام " الرياض لاتكفيها حلقة او اثنتان .... "

اسمحولي احس اني ( حارجّع ) ..!!

معرض الجامعات الإسترالية