ساعة عشانك يا أرض ..

" ياعمي ايش فرقت تطفي لمبة الغرفة ساعة .. ماتأثر ياعمي ولا تسوي شي .. والله يضحكو علينا الغرب واحنا نصدق .. (حتى لو دخلو جحر ضب لدخلتموه) .. مخابيل انتو ؟؟ ناس ما تفكر بس تقلد العالم .. يعني ماقلنا لا تاخذو لا تستفيدومن الغرب .. لا نستفيد منهم بس مو في هذي التوافه !! "

هذا عينه من نقاش في الجامعة عن ساعة الارض الذي سينظم لاول مرة في السعودية ॥ كنت أسمع أطراف النقاش بينما كنت في آخر القاعة وقاعد اقرأ في احد المواد .. حماااس كان النقاش .. طبعا تركت اللي بين يدي و"قطيت" مع الجماعة ابغا اشوف ايش اخرتها ( : ..

ساعة الارض .. أقصد ساعة الارض حقتهم وليس الارض حقتنا ..
هما اللي اخترعو المشكلة خليهم يحلوها ... خليهم يستاهلو يتعبو ويعيشو في الظلام لساعة كاملة.. مين قال لهم يسوو سيارات تضر البيئة ؟؟ مين قال لهم يخترعو الكهربا ؟؟ خليهم هذا بما كسبت ايديهم .. وأخو الجهالة في الجهالة ينعم ( :

فكرة ان هذي الفعالية ستفيد الارض بشكل مباشر يشك فيه البعض .. لكن ما اعتقد ان هذا السبب الاساسي لهذه الحملة ..

الهدف هو ان كل واحد يحمل هم البيئة والارض ولديه الوعي الكافي يشارك في هذه الحملة ليوعي من حوله .. شعبنا يمكن يحسب المسيح الدجال قرب يطلع لما يشوف المملكة مطفية الانوار !! خليه يعرف ليش صار كذا .. خليه يعرف ان في شيء اسمو أرض وفي شيء اسمو بيئة ..

الهدف الثاني ان حتى المهتمين بالبيئة مع هذي الحركة سيدركون فجأة انهم نصابين !! كذابين كمان !! مزعجين الناس بالبيئة وبعدين لما تجي هذي الساعة حيعرفو بأي قدر كانو أصحاب شعارات .. يصرخ عن البيئة والسوني حق حمودي شغال 24 ساعة وحمدوي في بيت الجيران !! لمبة الملحق حقت الحمام من سنتين ما ارتاحت !! الجزيرة شغالة لشلة الجن المؤيدين للعدالة والتنمية .. كل انوار الغرف مفتوحة ومافي احد في البيت (ولا يمكن عشان يخدعو الحرامي لما يخرجو كأن في احد في البيت >> معذورين ) .. وغيرها .. حنلاقي اننا كثير من الاشياء الكهربائية شغالة بدون حاجة لها .. في هذه الحملة ممكن نكتشف بعضها ..

حلو نعيش مع العالم بهمومه وما نصير لحالنا ॥ لا نصنع العزلة بأدينا .. اخيرا حتشارك السعودية في يوم الارض هذي السنة ( :

في قروب عالفيس بوك ليوم الارض وصل الى اكثر من 1500 عضو

ياورا الرسم دواهي

امس كان مشروع كبير مع مجموعة اولاد وبنات الرياض التطوعية لنشر الاهتمام بالنظافة شارك فيه اكثر من 40 شاب في 3 فرق مقسمة على 3 حدائق ॥

وصلنا الحديقة مخرج 15 وبدأنا نوزع اكياس للنظافة على الناس القاعدة ॥ بشكل عام النظافة ليست سيئة بدرجة لا تحتمل لكن الفصفص عادم الدنيا ..

المهم واحد من الشباب اقترح اننا نعمل تلوين أوجه للأطفال الصغار يفرحو فيه .. عجبتنا الفكرة وراح اشترى الوان وبدأ هو يرسم على وجيه الاطفال واحنا "نتعلم" على وجيه الاطفال ( : يجيني واحد اقولو ايش تبغى ؟ تبغى ارسملك نجمة ؟ يقول طيب (طبعا ما اعرف ارسم الا نجمة.. وياليتها نجمة زي العالم) ... وأبدأ اشخبط على وجيه الاولاد .. متعة ( :

بعد فترة بدأت احترف النجمة وصرت اطلب من الولد يختار ايش ارسم له (خلاص صرت واثق) .. ياريتني ما تركت لهم حرية الاختيار !! شي يصد النفس .. جاتني نتائج الحرية : واحد يبغى وجهه نص ازرق ونص ابيض (كنت حسوي مقلب فيه وابدل الابيض بأصفر ) ... واحد ثاني يبغى علم فريق الشباب .. بس اللي يلفت النظر مجموعة الشباب الفاضيين في الحديقة جونا وقالنا كم واحد منهم نبغى رسمه (خيييير .. ناس فوق 18 ) .. قلنا طيب ليش لا مافيها شي .. قلت لواحد ايش تبغى قال ارسم اي شي .. قلت طيب بأرسملك شجرة (هههه ورطت الرجال ) .. قال لا لا .. يعني قلب مثلا .. قلت طيب ولا تزعل رسمت له على خد قلب وعلى خد شجرة (أصريت اني ارسم له شجرة ) .. بعدين قال ابغا حرف الـ E على جبهتي قلت طيب.. بعد ما خلصت جاني يجري بعد دقيقتين : " امسحها امسحها .. انا اسمي عبدالرحمن وانت راسم حرف E " قلت طيب انتا قلت لي ارسم هذا الحرف .. قال لا في حرف ثاني هوا اللي يبدأ فيه اسم عبدالرحمن ايش يقال له ؟؟

ابسط الاشياء مثل الرسم قد تعكس جانب من اهتمامات وتفكير الشباب .. ويا ليتها ما انعكست هذي الاهتمامات الرهيبة

انتبه من الاجنبي اللي جنبك .. تراه اجنبي !!

الاسبوع الماضي نزلت جريدة الرياض خبر عن اخر تعداد سكاني للرياض ..الصراحة انفجعت من الرقم ..صرنا تقريبا 5مليون !! اتذكر لما كنا ندرس جغرافيا كانو8مليون سكان القاهرة رقم مهول بالنسبة لنا ..مبرووك قربنا منهم ..مبرووك قربنا نصير نفس زحمتهم ..

أكثر ما لفت نظري التعليقات !! تشوف بعض التعليقات تقوم تسجد شكر لله على نعمة العقل ...ياليت عندنا مشروبات "روحية" في السعودية كان قلنا يمكن الجماعة شربو كثير ودخلو موقع الجريدة في آخر الليل ...بس ايش اسوي ...مافي مشروبات ولا فيه روح !!

شوفو بعض التعليقات

الله الله عالسلام ...الرجال سامع بالغزو ...سامع بهتلر وموسيليني ॥اول اسمع اننا لسنا في سلام !!

وهذا باين مسكين ماقدر ينام الليل يفكر في حال الامة وفي النسب المروعة ...جزاك الله خير ياعم على الحرص ...الامة ستنهض على يدك ياعزيزي

"كلها من هالاجانب الله يقلعهم هذا النظاميين والغير نظاميين دبل الدبل ..صراحة صرنا أغراب في وطننا هالاجانب قنابل موقوته ويجب ابعادهم أكلو الأخضر واليابس عل أبناء البلد.. مسيطرين على كل شي وابن البلد حده حارس أمن ..متى نعيش بسلام بدون هؤلاء الاجانب "

هذا معصب مرا ...أهم شي الاخلاق بس باين القضية ما تستحمل اخلاق ...فيها أخضر ويابس وقنابل (أما مادخلت مخي أكلو اخضر ويابس ...بالله احد يوريني وين الأخضر اللي أكلوه !! ) ...على سيرة قنابل اسهل طريقة نلفقلهم تهمة ارهاب ونرتاح منهم هذول اللي سيطرو على البلد ونشر الرعب والهلع والقنابل ..

"المقيمين أصبحو يقيمون وأسرهم بصفة دائمة في البلد بعضهم له 40سنة وأبنائهم يتودعدون بأخذ حث المواطنة وسيصبحون سعوديين شئتم أم أبيتم وسيصبح هناك خلل في التركيبة السكانية والله يخلي تجارة الفيز ويربح من يتاجر فيها والله يزيدكم من الأجانب ، متى نصحى ، متى نصحى حتى تضيع البلد مثل فلسطين"

هههههههههه اما هذا خلاني من جد أضحك ...من جد متى نصحى قبل ما نصير مثل فلسطين ...ايش شايفنا جايببين يهود ؟؟ والله كشفت مخطط استعماري خطير ...شكرا عالتنبيه

الملاحظ عندنا أننا نجيب الاجانب عشان يخدمونا ويعيشونا حياة 5نجوم بعدين نقول ما نبغاكم وخربتو بلدنا و ...و...و .....ما تبغاهم عزيزي المواطن ببساطه رجعهم لبلدهم .. ما في أحد ضربك على يدك وقال لازم تخلي سواقك الاجنبي ...ما تبغى الاجنبي تكرم سيادتك والبس لبس المطبخ وسوي كيك لعيالك ووصلهم كل يوم المدرسة الصباح ...

احنا عجيبين ...نحضر الدوام متأخرين ساعة ونمشي قبل بساعة ونفطر ساعة ونقرأ الجرايد ساعة ونقرا الايميل نص ساعة وبالاكراه نشتغل نص ساعة -وياليتها شغل تمام - وناخذ مرتين قد الاجنبي ونقول غزونا وأكلو الاخضر واليابس ...ياعمي كلو كلو الله يعطيكم العافية لولا الله ثم أكلكم كان لا احنا اكلنا ولا انتم ...

كل العالم يعتمد على الاجانب في مشاركة النهضة ...الا احنا نخاف منهم ونحتقرهم ونعتبرهم خطر يهددنا ...لازم نفهم أن الانسان اللي يجي من الخارج ويعطى راتب هذا مو تكرما منا وفضلا ومنة ...هذا حق له مقابل اللي يبذله ...وأنه أصلا ما جاء الا ليكمل نقص محتاجينه ..

مع آلة محطة !!

حلوة الحركات الصغيرة اللي ماتكلف شي وتزيد الحب والود في المجتمع ॥ خاصة لناس ما قيد احد كلمهم ولا عبرهم ولا اعطاهم وجه وكأنهم مو موجودين اصلا !! هذا اذا سلمو من شرنا ..

ما ادري ليش جا على بالي اشتري حلاوة توفي الجمعة الماضية !! فترة طويلة ما اشريتها بس افتكر اني كنت حريص اني اشتريها كل فسحة في سنوات الابتدائي ॥

المهم اني اشتريها ونسيتها .. بعد يومين كنت في محطة بنزين وقلت لراعي المحطة عبيلي 95 فل (احلى يا كاااش .. بس على فكرة ما ادري ليش الناس تعبي كل يومين بعشرة .. ما اظن ان في حراميا في الليل تسرق بنزين من خزانات سياراتنا !! والوقت اللي حتضيعو كل يومين توقف محطة يمديك بدالو تزيد فترة نومك نص ساعة اسبوعيا) .. عالعموم لما الرجال كان يعبي اكتشفت التوفي المختفية في جيبي ولقيت حبتين .. حطيت حبة في فمي وقلت ليش ما اعطي الرجال حبه !! المهم بعد ما عبا بنزين ناولتو الفلوس وفوقها حبة توفي .. الرجال سحب الفلوس من فوق حبة التوفي وجا يمشي (شكلو ما قيد احد أعطاه شي .. شك بالموضوع ( : !! ) .. قلتلو خذ حلاوة .. الرجال ما صدق وفجأة ضحك واخذها : ( شكرا .. شكرا ) ..
والله بعد ما شفت ردة الفعل قررت اني اشتري دايما توفي واخليه في درج السيارة علشان عمال المحطات ( واحيان علشاني ) .. 12 حبة توفي بريال .. تخيل قد ايش بريال واحد بس تقدر تفرح 12 عامل محطة .. تخيل كيف حيأثر هذا على العلاقة بيننا وبين العمال وكيف حيحسو انهم بين اخوانهم !! والله انهم مساكين ما أحد يعطيهم وجه ولا كأنهم بشر !! كأنهم مجرد آلات تصب بنزين ..

الإسعاف الطائر .. واللقافة الطايرة !!

دايما أسمع أننا لازم ما ننقل الشي الغربي الى بلادنا بدون ما نعدل عليه ॥ يقولو إننا لازم نراعي مجتمعنا ونعدل الشي اللي نجيبو بحيث يوائم المجتمع ॥ مع كذا كان كل هذا الكلام نظري ... الين صار اللي صار أمس !!

ومن إحنا صغار وكنا نتفرج على "ريسكيو 911 " وكيف يجي الاسعاف الجوي (طيررران من جد) ويروح ينقذ الحالة ॥ عندنا كانو حيحتفلو أمس بأن هذا المشهد حيتحقق أخيرا .. بس هيهات ... ما تمشي هذي الحركات والسماجات البايخة على الشعب السعودي !

أتخيل طيار الهلكوبتر فرحان ومتحسمس عشان ينقذ أول حالة له في دايري الرياض ॥ يقلع بسرعة ويهبط على طرف الدايري في الأرض الفاضية ويقول يا سلااام وصلت بعد 6 دقايق من الحادث بس .. أشوى أن مافي خريص فوق !! الفريق الطبي نزل بسرعة وراحو للمصاب واستغربو بقوة لما شافو مشهد غير مسبوق في المجتمع السعودي : الناس مو متجمعة حول الحادث .. المهم جابو المصاب بسرعة للطيارة .. ووقتها عرفو سر عدم تجمع الناس حول الحادث : الناس لقت شي جديد شد انتباهها أكثر من الحوادث اللي بتصير كل يوم >> الدنيا مقلوبه عنده الطيارة والناس كلها قاعدة تتأمل في هذا الشي العجيب اللي يقدر يطير زي طيور القنص !!

طيار الهلكوبتر دخل بسرعة للطيارة وهوا يزعق : (بعدووووو ) ॥ قعد على الكرسي وقال بسم الله وحط المفتاح و"شغل" الهلكوبتر .. جا الطيار يبغا يطير بس ماقدر الناس ملصقه حول الطيارة .. شكل الطيار حاول باستماته أنه يوخر الناس عن طيارته بس ماقدر .. 25 دقيقة وهوا يحاول يبعد الناس بس ماقدر ... في النهاية رضي بالامر الواقع وقال خلاص خذو مريضكم بأقرب سيارة إسعاف !!

وهكذا تنتهي القصة ببساطة ويذهب المصاب بسيارة الاسعاف .. والفضل بعد الله للقافة شعبنا هذي اللي تقطع القلوب وتجيب تشمع الكبود .. أنا أقترح على الهلال الأحمر انه يجمع كل طياراته ويصفها في الدايري الاسبوع الجاي الين ما يمصو كل اللقافة اللي في عروق الملاقيف هذول .. حتى لو اضطرو انهم يمثلو حوادث لان شعبنا ما يرضى باللقافة الا اذا كانت ذات اثارة مرتفعة !!

رابط الخبر على جريدة الرياض

الحق الملايين بتطير !!

كلمني صاحبي من الشرقية قالي عندي مشروع "حياتي" مهم وفي واحد ابغاك تقابلو اليوم عشان يعرض عليك الموضوع ॥ قطعت شغلة عندي بس عشان أشوف ايش هذا الموضوع لاني تحمست صراحة ॥ رحت في كوفي واسع وسقفو مرتفع ويفتح النفس .. كنت مستعجل وقلتلو بسرعة الله يخليك وقالي طيب (مع انو في النهاية ومع الاستعجال اخذ عرض الفكرة حول الساعة !!) .. بعد ما تعرفنا عالسريع مسك القلم وبدأ يكتب على الورقتين اللي جابها معاه .. بدأ يشرحلي فكرة "البزنس" هذا وقالي حتطلع بعد 3 سنين ومعاك مليون وميتين الف من هذا المشروع يعجبك ولا لا ؟؟ تحمست معاه .. قلت طيب اديني ايش الفكرة .. قال لا وأزيدك أن المشروع دا ما يحتاج تفرغ يكفيه كم ساعة في الاسبوع .. قلت والله شي كويس ..

هيا عبارة عن شركة آسيوية اسمها المخصر IQ تبيع لك منتجات من الانترنت تشتريها ويشحنولك البضاعة بالـ ( دي اتش ال) .. طريقة الربح في هذا المشروع كالتالي .. الشركة هذي ما لها أي فروع ولا اعلانات وتبيع في كل العالم وتعتمد في تسويقها على الزباين العاديين زيي وزيك .. ببساطة أنا حقول ليش الزباين يتحمسو يسوقو منتجات هذي الشركة : الشركة تعطي نسب كبيرة ومتضاعفة لو سوقت منتجها ..
ركزو معايا ... أجي أنا مثلا وعرض عليا شخص منتج هذي الشركة .. عجبني المنتج فأروح أدخل لموقع الشركة وأفتح لنفسي حساب في موقع الشركة واختار البضاعة واحط اسم المستخدم اللي دلني على المنتج .. المنتجات تبدأ من 600 دولار (يعني تقريبا 2400 ريال) فأنا اشتري المنتج ويروح للي دلني على المنتج 40 دولار (تقريبا 150 ريال ) .. أنا اروح اعرض المنتج على واحد ثاني وهوا يشتري وتجيني 150 ريال وتروح أيضا 150 ثانية للي دلني عالمشروع.. ولو صاحبي اللي دليتو على المنتج راح باع لـ6 اشخاص مثلا حتجي للشخص اللي باع لهم (150 * 6 = 900 ريال ) وتجيني انا 900 ريال لاني انا بعت للشخص اللي باع للـ6 أشخاص وتروح للشخص اللي باع لي 900 ريال .. هذي الفكرة بشكل مبسط الا انها اعقد من كذا عشان تضمن للشركة أبراحها ..
أنا تحمست للشغلة ॥ لاني خططت أني حأدفع 2400 ريال واعرف واحد من اصحابي فنان تسويق ماشاء الله ويحب الشغلة فأبيع عليه وهوا ينطلق ويشتغل ويبيع وبعد كذا أنا أبدأ اخذ ارباح وانا قاعد في البيت داخل الفيس بوك !! قلت للي قاعد يعرض عليا المشروع اني حسوي كذا ( أرمي الشغل على واحد فنان تسويق) بس قالي لو شفت أول ألف دولار دخلت حسابك حتبدأ تبيع لناس زيادة عشان تخلي الالف دولار ألفين !!

تحمست أكثر وفي الليل قلت لأخويا عالموضوع ॥ قالي في شيوخ حرموها بس ما يتذكر ايش وجه الحرام فيها لان الناس ما صارت تشتري منتجات الشركة عشان نفس المنتجات بس عشان تدخل في هذا البزنس!! أنا بعد كذا قعدت أفكر قلت معقول لو كان هذا البزنس حرام ولو ماكان حرام فهو بزنس غير منتج والناس أبدا محا تستفيد شي بالعكس كل واحد يربح من خساير الناس الثانية لان في النهاية لازم ناس حتخسر على حساب الناس اللي حتربح !! وغير كذا اوقات الشباب قاعده تضيع في شغلة غير منتجة !

هذا البزنس منتشر خاصة في جدة وبدأ ينتشر في مدن ثانية حتى ان قبل فترة كان في محاضرة عن المهارات في التسويق لهذا البزنس يقول اللي عرض عليا المشروع ان حضروه 1200 واحد !! والغريب انك تحس ان كأنهم نوادي سرية ففي كل مدينة لهم مقهى معروف خاص بيهم يتجمعو فيه !

يا زمن التماسيح ...

عن مجتمع الاولاد اللي عايش فيه أتكلم لاني ما ادري عن النص الثاني !!! بس اتذكر انه عندما كانت تقال هذي الكلمة المؤلفة من حرفين تتسع العيون و تدور العقول تفكر : " ايش يبغا هذا ؟؟ ايش يقصد ؟؟ " ... بس نادرا ما تتسع عيوننا او تدور عقولنا لان ما نسمع هذي الكلمة الا في السنة مرة في موقف مشبوه! احنا عمليين بدرجة كبيييرة جدا حتى ان ما عندنا وقت للعواطف ؟؟ ما ادري احنا نكره بعض ولا مو عارفين نعبر ؟؟

حرف الحاء + حرب الباء ... من الكبائر !! انتبه لا تقولها الا بعد الحيطة والحذر ... تفقد وتأكد ان ما في احد يسمعك ॥ وبسرعة قول الكلمة قبل ما يمسكك واحد متلبس بالجريمة ... حتى لو كان عندك شعور فطري اللي موجود عند اي انسان في العالم وتحب شخص انتبه لا تقول هذا الكلام الا بعد تمهيد طويل ... الحب يوضح من التعامل فما في داعي تقعد تسويلي رومانسي ! والافضل اذا تحب واحد حاول تلمحلو وتوصل المعلومة هذي بأي طريقة الا انك تقول كلمة السر ! عيب !

عايشين في بيئة حساسة جدا لهذي الكلمة ... فالواحد يسمع عن الحب ويحس انو محروم ما يحب مع ان حياة الواحد ما تستقر الا اذا حب وأدرك انو يحب !! حياتنا كلنا مليانه حب بس المشكلة اننا فاهمين الحب غلط ونخاف اننا نعبر عنو !! فكرت اني حطبق مفهوم الحب الحقيقي الشريف والواسع بكره فحشتري وردة حمرا ونطلع انا وسيارتي اللي احبها "لوحدنا" نخلو في البر ( : "واحد مررا فهم الموضوع تمام "

كأننا عايشين في صحراء قاحلة ... الكلمات الحلوة ما تنقال الا بالسر ॥ مع ان من سنة الرسول اننا نقول : " اني أحبك في الله " .. والقول الحسن من الاشياء اللي نتعبد الله فيها ..

شايف ان في تطور في قدرتنا على التعبير عن مشارعنا على حقيقتها بس لسا في حساسية ... مشكلة ان هذي الحساسية تخلينا نعيش مجتمع جاف من جهة وفي نفس الوقت سهلت هذي الحساسية للبناء العلاقات غير نبيلة تشغل الوقت والذهن !