ناخب اخيرا ( :

رحت لاقرب مركز تسجيل بطاقة انتخاب .. مخيم الجوالة في جامعة الملك سعود ..

تفاجأت ان المكان فاضي جدا ! اشوا ان الباب مفتوح بس

مع أن كل مسألة تسجيل بطاقة انتخاب ما اخذت بالكثير 4 دقايق من خروجي للسيارة الى رجوعي لها مرورا بفنجان القهوة اللي شربته .. الا انها أبطأ عملية تسجيل انتخاب وفقا للحساب التالي :

نفرض اذا واحد يخدمك مفروض تخلص في 5 دقايق ! اذا اثنين في 4 دقايق .. ما بالك اذا 7 فوق راصك يخدموك .. مفروض قبل مايشوفو وجهك تكون كل حاجة جاهزة ( :

بس بصراحة الوضع يخوف ! ما في الا انتا وربك معاك وقدامك 7 فوق راصك.. حسيتها مقابلة شخصية ! تحقيق ! شي زي كذا

فعلا ترتيب ممتاز جدا .. ما اسمها تجربة لاني ما صفيت سرا وسقطو عليا ناس .. ما اسميها تجرية لان ماشلت ملف علاقي .. ما اسميها تجربة لان التجربة تحتاج الى معاناة .. تحتاج الى تعقيد موظف حكومي وهذا اللي ماصار

اللي صار بالضبط :

لو سمحت انا ساكن في حي الرائد

تفضل .. بطاقتك لو سمحت

كلام جانبي مع واحد من السبعة الموجودين على بال واحد يعبيلي الورقة

تفضل وقع

مع السلامة

تسجيل بطاقة ناخب من السهولة كأنك تدخل بقالة وتشتري قارورة بيبسي وتطلع ॥

طلاب جامعة الملك سعود يقدروا يجو يسجلو في معسكر الجوالة حتى لو كان ساكن في خشم العان

( طبعا بعدين مايقدر يصوت الا في الدائرة اللي سجل فيها ) !

اهم شي يجيب بطاقة احواله ونفسه ( :

حتى في جحر أصغر ضب : أهلا بأبو متعب

حتى لو دختلو جحر ظب لوجدتوه : العلم السعودي وصورة الملك !

هذا الوضع باختصار في الرياض ..

الحمد لله على سلامة الملك وماعندي اي مشكلة بالاحتفالات.. بس الى حد وحسب الاولويات !

- اتوقع القصد من الاحتفالات افراح الشعب وزيادة انتمائه وحبه للوطن والملك طول الله عمره ! اتوقع كان هناك طرق ثانية تحقق نفس الهدف وبفعالية اكثر.. كطالب في جامعة الملك سعود مثلا ايش حيفيدني اشوف الاعلام الخضرا والصور في كل شبر من الجامعة : " الحمد لله على سلامتك يا بو متعب" ..عشرات اللوحات العملاقة والمعني بالامر في النهاية محا يطب الجامعة أصلا !! لو وفروا قيمة الاعلام والصور ووزعوها على الطلاب وقالو هذي هدية من ابومتعب فأنا ما احتاج احلف انهم حيفرحوا الف مرة اكثر من هذي القماشات المعلقة ..

- الحين نسبة كبيرنا من الشعب السعودي شباب .. مو المفروض تتوجه القرارات لهم حتى يكسب ودهم وانتمائهم ! ممتاز شوف ايش صار : دعم النوادي الرياضية بملايين وراحت على زيي اللي مايشجع ما استفاد حاجة وراحت الفلوس في جيوب الاداريين اوسيارات للاعبين ..

- معظم القرارات راحت للموظفين وطلاب الجامعات الى الحين على 990 ! المكافئة هذي يبغالها موضوع ثاني .. كل الدنيا ارتفعت اسعارها الا المكافئات لعل لعنة احد الالهة الاغريقية القديمة حلت عليها !

في النهاية اهلا بامو متعب .. لكن ياليت كانوا يفروحنا بحاجة تسوى .. وياليت بدل ما تعلقت الملايين على اللمبات كانوا حطوها في جيوبنا ..

في الاحوال المدنية .. شيء لا يصدق

الواحد يمر بلحظات مايصدق انه في الدنيا !! يشوف اشياء كثيره حتى على حلم !!

كنت أشيل هم لما اسمع كلمة "أحوال مدنية" .. لن هذي الكلمة انطبعت في قاموسي كالتالي :
ملف اخضر علاقي لونه لايسر الناظرين و يجيب الاكئاب ..تقوم الساعة 7 الصباح وتكون محضر عند باب الاحوال قبل ما العامل ينوي يقوم من السرير عشان تلحق رقم ينقذك انك تخلص قبل الظهر في احسن الاحوال ..زحمه تحس انك تطوف في الصحن !! موظفين تحس ان الدولة معطيتهم مكافأة على كل تكشيرة للمراجع ! الخ ..

لكن ما رأيته اليوم كان شيئا عجابا :

الساعة 1 الظهر كنت مع شاب لطيف في مقر الاحوال على موعدنا اللي حجزناه على الانترنت ..الحجز الزامي في مقر الاحوال اللي في المروج يعني تجي بدون موعد مالك مكان تطلع برا بكل هدوء ! الغريب انك ممكن تسمع صوت المكيف .. تخيل ! هدوء عجيب تحس انك داخل المكان الخطأ .. وقفنا على الصف قدامنا 2 .. موظف الاستقبال قاعد يستهبل مع اللي قدامنا وطلع في النهاية ما يعرفه .. نفسيه حلوة جدا .. " اهلا بالشباب" اخذ الاوراق حقت الموعد والصور واعطانا رقم قال خلاص تفضلو على التصويرانتظرو دوركم .. لاااااااااا بس كذا !

شويا كان التصوير بطيئ يعني انتظرنا حول نص ساعة بس يمكن معاهم حق عشان البصمات ..جا دورنا 125 ..تصورت واللي يصور نفسيته مرا حلوة ياخذ ويعطي معاك ..وراني الصورة بعد ما اخذها قال : " كيف عجبتك ؟" .. لاااااااااااا مرة ثانية .. ما اصدق
في اقل من ساعة واحنا طالعين ومخلصين كل حاجة !! واحنا طالعين سألنا الموظف عن النظام الجديد قال فرق يقول حتى نفسياتنا مفتوحة ماعندك زحمة ولا صجة ..

على الهامش :

"للأسف ما يزال فرع احوال الشميسي يقبع تحت حاله من الفوضى الرهيبة ..عقبالهم"

النظام لا يأتي الا بخير

اليوم الوطني .. من شوارعنا !!

أبغا فقط أفهم ..


عزيزي اللي ترقص نص الشارع والناس موقفة تطالع .. تتوقع معجبين مثلا !

عزيزي الكوول ..طالع كشخة صراحة بس ماتلاحظ انك حفيان .. مثلا !

عزيزي اللي تبخ بالبخاخ ..بخصوص تصرفاتك تحس انك ظريف مثلا ! – على فكرة اللطمة مع البخاخ رااااكبه-

عزيزي ياللي قاعد في نص الشارع ..مضيع الشانزيلزيه تتوقع!

جاني كم احساس مع المناظر الخلابة اللي شفتها :

- زي ما قال واحد ان اليوم الوطني محطوط خصيصا حتى يحمد أصحاب العقول على النعمة العظيمة التي ينعمون بها ! قربت إني أصدق من جد !

- اكتشفت ان شعبنا ماشافوا خير وحمدت الله على اليوم الوطني يعني ما أقدر اتخيل ايش ممكن يصير بكل هذي الطاقات لو مافي يوم وطني !

- حسيت أن الفقر اختفى من البلد أو أن أولويات الصرف عند الناس مضروبة !! فكر بس كم ربحت المصانع العالمية من يومنا الوطني !

صاحبي أنس عبدالرازق كان راجع من طريق الملك عبدالله وكان ينقل بعض المشاهدات والاقتراحات على الفيس بوك انقل بعضها :
"
اقترح ان يكون هناك اكثر من يوم للاحتفال وذلك لتخفيف هذه الدافعية للفرح عند الكثير من الناس ، مثلا احتفال بمناسبة ذكرى انضمام الحجاز لحكم الملك عبد العزيز واحتفال آخر بمناسبة ذكرة انضمام الجنوب للحكم ولآخر لبداية انضمام المنطقة الشرقية وهكذا بحيث يتعود الناس على الخروج والإحتفال

اقترح إضافة مادة لتعليم الرقص في المدارس لان الشباب مضيعين بقوة بالجانب هذا تلقى الإيقاع شرق وهو يرقص غرب وتلقى الجملة الموسيقية او اللحنية تبدأ وتنتهي وهو جالس في حركة لوب بدون مايراعي البداية او النهاية وهذا بلاشك يشوه شكل الاحتفال ( وبالمناسبة مسألة سوء الرقص كانت تقريبا مشتركة عند الغالبية العظمى)

في مشاهد تقهر وتخرب ابو الوناسة مثلا تلقى شاب مشخص و"مزكرت" ورابط العلم بشكل حلو وحاط ربطه على راسه بشكل انيق وقاعد يتمشى بالشارع وهو حافي! يعني مو لابس نعال - الله يكرمكم- صراحة هذا من اشد المواقف اللي قهرتني

اقترح صناعة علم خاص للمملكة العربية السعودية يستخدم في مثل هذه الاحتفالات كأن تستبدل كلمة (لاإله إلا الله محمد رسول الله) بكلمة (المملكة العربية السعودية) وبنفس الخط ونفس طريقة الكتابة ويبقى السيف مكانه بحيث شاهدنا اليوم امتهان كبير لكلمة التوحيد وللفظ الجلالة بالذات كانت تداس تحت الاقدام وفي كفرات بعض السيارات ولا شك ان هذا من الاشياء الغير جيدة ولا تتناسب مع طبيعة الاحتفال العامة "

مافي أي مشكلة انك تحتفل ... تخيل اليوم الوطني كله محاضرات تجلس وانتا هاجد وممنوع أي كلمة !! صار عقاب الهي هذا .. القصد افرح بعقل !

عن نفسي كنت ححتفل باليوم الوطني فعلا بشكل كبير لو مثلا اعطونا مكافئة اضافية في الجامعة ، رجعو البيبسي بريال مثل ما قال أحدهم ! اتوقع تعطي قيمة كبيرة لليوم هذا حركة مثل كذا يصير كل سنة ننتظر هدية بمناسبة اليوم الوطني ( : -يارب احد له تأثير يقرأ ويفهم أن مافي مانع تزاد المكافئة طول السنة عادي والله في ناس كثير محا تزعل-


كنت أفكر في السيارة وأنا اشوف الهبال حسيت انه يوم يستحق ولو بعض التقدير ..في بعض الناس مثل الفرق التطوعية في الشرقية استغلت هذا اليوم بشكل ايجابي وهذا شي كنت أفكر فيه وهو المفروض كيف اننا ممكن نستغل هذا اليوم وطاقات الشباب فيه ..كنت أفكر كمان لو صار في اليوم الوطني مؤتمر لأصحاب الطموحات والمشاريع والانجازات الشابة يعرضوا مشاريعهم وطموحاتهم ونجاحاتهم ! أي حاجة مفيدة تفيد مستقبلنا ..طبعا إلا دروس الرقص ما أأيد انس فيها ( :

اليوم الوطني مفروض يكون منطلق للمستقبل بدل أن يكون أغنية عن الماضي

5 ساعات من اجل تغيير الشعبة = جامعة حكومية

المكان الذي طالما دافعت عنه .. الذي طالما اعتبرته جزءا مني .. لقد خانني هذه المرة

جامعة الملك سعود الحبيبة .. ولا تزال الحبيبة ..

قدر الله علي ياجماعة وقررت اخذ ترم صيفي في مقررات الثقافة الاسلامة (سلم) .. التسجيل كان زي ما ابغاه وضبطت الجدول الحمد لله من الساعة 4 العصر الى 8 المغرب يومي السبت والاثنين ..

السبت اول يوم في الدوام ، الساعة 4 العصر موعد اول محاضرة :
دخلت وانا التقط انفاسي لاني كنت متأخر بعد ماضيعت مكان القاعة !! انتظرنا 30 دقيقة والدكتور ماجا !

الساعة 6 موعد المحاضرة الثانية :
دخلت القاعة بهدوء لاني ماضيعت المكان .. بعد 20 دقيقة انتظار دخل دكتور علينا وقال انتوا شعبة الدكتور العجلان ؟ قلنا ايه .. قال الدكتور اعتذر عن التدريس في الصيف والشعبة الغيت .. افرنقعوا !
شلت هم يومها لاني كنت مضبط جدولي اخذ المحاضرات في العصر لاني ما اقدر اخذها الصباح .. خفت مع اللخبطة اللي حاصلة اني احتاج اما ان اعتذر عن بعض ايام الدوام في الشركة او اني الغي ساعات من دراسة الترم الصيفي ..

يوم الاحد ، الساعة 8 صباحا :
واقف قدام باب واحد مسؤول عن الجداول في كلية التربية .. شرحتله الوضع للمرة الاولى ولم اكن اعرف انني سأعيد القصة مليون مرة في ذاك اليوم !
قالي في شخص مسؤول اسمه التويم في المبنى الثاني روح راجعه ..
وصلت مكتب الاستاذ التويم .. انتظرت اللي قدامي اللى ان خلص .. شرحت القصة للتويم وقال طيب حول لشعبة ثانية .. قلت له طيب الله يعافيك اطبعلي اوقات الشعب عشان اقدر اختار .. الحمد لله حصلت شعبة موجودة لنفس المادة في نفس وقت شعبتي الملغية ..

انا طالب على نياتي ولا افهم في نظام الجامعة كثير .. والموظف كل كلمه يطلعها بريال عشان كذا مستحيل يشرح لك اي حاجة بس يصدر اوامر وتحتاج انك تشحت سعادته عشان يعطيك كلمتين زيادة تفصيل وانا اكره شي اني اشحت موظف الدولة عينته لخدمتي .. ياريتني شحت بس !! (على فكرة تعلمت في نهاية اليوم انك ستخسر كثيرا ان لم تكلف نفسك عناء الشحتان من الموظف)

على بالي اني اقدر احول من البوابة الالكترونية (نظام التسجيل عن طريق الانترنت ) .. رجعت البيت وفتحت الانترنت والا الاقي الشعبة مقفلة ومليانة طلاب !! رجعت بسرعة للتويم في الجامعة : ياسيدي الشعبة مقفلة كيف تقولي روح سجل فيها !!
بشبه ضحكة رد علي : مين قال تقدر تحول من الانترنت ؟ اي كليه انت ؟
رديت : كلية الطب
رد علي : لازم تروح مكتب القبول والتسجيل وتاخذ احالة ..
وقتها فهمت اني لازم اروح هناك واخذ ورقة اسمها "احالة" من عندهم وارجع له مرة ثانية !! وسويت زي مافهمت ..

رحت الى بهو الجامعة ( للي يعرف جامعة الملك سعود فيها ممر طويل يسميه الطلاب المسعى من طوله - يظهرفي الصورة جزء منه-... احتجت في هذا اليوم المشؤوم ان اكمل عمرة كاملة تقريبا !!) ॥ وبعد ما سألت ووصلت للقبول والتسجيل انشرح صدري بعد ماوصلت من المشوار الطويل في حر الرياض ॥ دخلت بثقة وبدأت اشرح القصة واطالب بورقة "احالة" لكن الموظف قاطعني : وين ورقة الاحالة ؟ قلت له انا جاي اخذها وهذا اللي ابغاه !! قال لا الاحالة لازم تاخذها من كليتك ..

رجعت الى كلية التربية مرة ثانية وانا معصب في الطريق الطويل وقعدت افكر ليش عندنا الدوائر الحكومية متضاربين مع التقنية ॥ ياخي يرسله ايميل وانا جالس في المكتب وتخلص شغلتي !! ليش لازم الف كل الدنيا اجري بأوراقي !
وصلت للتويم وانا منفعل بعد ان عمل في الحر والتعب عمله .. لقيت مكتبه زحححمة .. يوجد طابور متعرج لا يحترمه الا القليل .. انتظرت الى ان جاء دوري : ياخي ليش ما اعطيتني ورقة احالة قالولي لازم ورقة احالة ؟ بضحكة تشابه الاولى وكأنه يقول في نفسه ايش الطالب المغفل هذا : انا ليش لما جيتني اول مرة سألتك من اي كلية انت ؟ ورقة الاحالة تاخذها من كليتك – كلية الطب- !!

ما ادري يحسبني متخصص في مادة "قوانين الجامعة " !! ايش يدري اهلي عن قوانينكم هذي .. اذا انا غبي اديني على قد عقلي واشرح شوي .. الرجال من الصباح وهوا قاعد يعطيني الغاز وانا افشل احلها وفي النهاية الضحية رجولي !

هذي المرة احتجت السيارة عشان اروح كلية الطب .. افضل كلية في التعامل بصراحة مع انهم مرمطوني لكن على الاقل تعامل جيد .. في كلية الطب قعدت حوالي ساعتين استخرج خطاب احالة .. دخلت على اكثر من 5 مكاتب لكبار مسؤولي الكلية .. شرحت قضيتي مرات كثيرة .. نشبت في حلق الموظف الطيب الجديد راعي شؤون الطلاب حتى انه انفجر في النهاية : ياخي مو تشوفني اعطيتك وجه وكلمتك تقعد تستغلني .. ما قيد مر علي طالب مزعج مثلك .. بس في النهاية اخذت اللي ابغاه اللي كان مستحيل اخذه لولا نشبتي في الموظف .. الموظف هذا طيب جدا وخواف لدرجة تضحك .. وانا قاعد عنده شوي ويحسسني انه مدير الجامعة .. مافي احد في شؤون الطلبة فقط التلفون دق مرتين او ثلاثة وكم واحد جاه ومع كذا يشتكيلي : ياخي الشغل ضغط جدا ! ولما كنت ابغا منه خطاب تغييرشعبه رد علي بانفعال : ياخي هذي مسؤولية كبيرة .. والله كنت حضحك في وجهه ( :

في النهاية مشيت الى بهو الجامعة ( جملة بسيطة تختصر معاناة مشي طويلة في حر الرياض) .. الموظين كانوا يصلوا .. مع ان الصلاة من فترة خلصت .. في النهاية سلمت الورقة الثمينة وتم تحويلي ..

كان في اختصار كثير في القصة ... لكن في النهاية اخذت عملية التحويل من شعبة الى شعبة من الساعة 8 الصباح الى 1 الظهر !! اجراءات طويلة وتحتاج منك لياقة عالية وبرودة اعصاب وقوة وجه واحيانا تحتاج انك تتنازل عن بعض كرامتك لاسمح الله .. نفسي اكسر اجهزة الموظفين المغبرة اللي لم توظف ابدا في خدمة الطالب واقطع اسلاك الانترنت اللي لم تستخدم الا في تصفح جريدة الرياض وكاريكتيرات الهليل ..

اتخيل اني كنت في جامعة راقية :
قبل ما اجي للمحاضرة اول يوم تجيني رسالة على جوالي : " عزيزي الطالب لظروف خارجة عن الاردة تم تحويلك الى شعبة رقم 1331 " !!

لكن مادام في ناس يقاتلون وراء الجامعة فأنا متفائل ( :

مني شايف حاجة !!

قال : " الحرارة واصلة 55 احنا بشر نقعد في هذا الجو ؟؟ " .. على قولة واحد ارحمني ياللي متربي في جنيف !! من يوم ما وجهك مفطوس وانتا عايش في الرياض ما جاك "تنفخ" على هذا الحر الا الحين !! بعدين ما احس عن الحر اللي يتكلموا عنه ! من مكيف الى مكيف .. افكر البس شتوي كل مكان ابرد من الثاني ..

واحد ثاني : " نطالب بتقليص ساعات الدوام في صيف الرياض !! " .. ياحبيبي قلي الرياض متى ما تكون صيف ؟ شهرين بالكثير !! على هذا الكلام ما اشتغلنا ولا سوينا شي !!


المشكلة يطالبوا ان ساعات الدوام تقلص على الموظفين الحكوميين اللي ما ذاقوا الحر .. والعمال كل ما امر الظهر الاقيهم شغالين تحت الـ55 .. وين يابشر حرام عليكم !

يمكن اننا ما قدرنا نتكلم وننقد شي براحتنا الا في هذا الموضوع .. خليهم "ينبسطوا" ويتكلموا شويه الشمس مالها دستور !!

فأنت هنا ....

سلام عليكم ...

إذا ركبت سيارتك ... و فتحت المكيف على الآخر ... ثم فتحت الشبّاك ... وانتظرت ٥ دقائق حتى يتبدل الهواء الحارق بهواء حار فقط ... ولم يخرجك في هذا الجو في الأساس إلا الإعلان الرسمي بأن درجة الحرارة هي ٤٩.٩ بدلاّ من ٦٠ الحقيقية حتى يستمر دوامك الحكومي ... إذاً أنت هنا !!!

إذا كنت تمشي بالسيارة في طريق سريع ... ثم توقفت الطرق لمدة نص ساعة ... ثم عادت للمسير ... ولم تتحرك إلا قليلاً حتى انشق الكفر بسبب حفريات أو سوء "سَفلَتَه" ... ثم خرجت لتغيير الكفر على جانب الطريق ... وأتتك "دورية" فتوقفت خلفك وبدأ الشرطي يصرخ لكي تسرع حتى كأنه سيغرّمك ..... إذا فأنت هنا !!!

إذا توقفت لدى مسجد او مستوصف في طريق عام و مكتظ بالمارة ... وتركت المسجل اليدوي الصغير في الكرسي الخلفي للسيارة ... ودخلت لمدة دقيقتين وخرجت ... ثم وجدت زجاج سيارتك مكسور والمسجل مرميٌ على الأرض خارج السيارة ... يحسبه السارق جوال ... فأنت هنا !!!

أما إذا كنت تسير في أحد الطرق السريعة ... وهطل المطر لمدة خمس دقائق ثم وجدت النفق الذي أمامك كأنه بحر لجّي ... فأنت هنا !!!

ثم تفتح المذياع وإذا بأحد المسؤولين يتفاخر بنزاهة وشفافيتهم هيئة الأرصاد المحلية ... و بأفضل المقاولين الذين يسفلتون أفضل الطرق ... ويتفاخر بأفضل جهاز مروري الذي يتمتع باللباقة و ذلك لأخذ جميع منسوبيه دورة في آداب الحوار وتقبل الآخر ... وبأفضل الجهات الأمنية التي توفر الأمن والأمان لكل المواطنين في كل أرجاء المعمورة حتى النائية منها ... وتتباهى بأفضل الشوارع تخطيطاً و تنظيماً وتصريفاً للمياه و أكثرها ملائمةً للحالات الحرجة ... وإذا سئل : كيف عرفت أنها الأفضل ؟؟ ... قال : لأننا دفعنا [ " إلخ أصفار " ١٠٠٠٠٠٠٠٠٠٠٠٠٠٠٠٠٠٠ ] عليها فكيف لا تكون كذلك ؟؟

إذاً فأنت حتماً حتماً حتماً هنا !!!

ومع كل ذلك فأنا أحب هذا المكان ليس له بذاته إنما لمن يسكن ها هنا ...

مرحباً بك ... فأنت في الرياض