الاثنين، 27 أبريل، 2009

بين العادات والدين !!

‎‎أهلا بكم في كورنيش جدة ..

جدة الآن ليست ملكا لأهلها ... جدة غرقانة بالسياح اللي من الرياض والشرقية ومن كل مكان من المملكة ... لو حصلت شقة ولو نص نظيفة فأنت محظوظ !!

قابلت صاحبي اللي جاي زيي من الرياض ...

ركب السيارة وبدأ يتكلم بغرابة :
أيش اللي يحصل هنا ... هل احنا في السعودية ولا جدة شي "شاطح" عن باقي المملكة ... ؟؟

وقعد صاحبي يحكيلي عن اللي شافه للتو على الكورنيش ... ما يحتاج اقول ايش شاف بس كان منظر مقزز وما نشوفو الا في الافلام او في المدن الاوروبية !!

سألني صاحبي ...
ليش جدة كذا ؟؟
ما كان عندي جواب ... احس انو سألني سؤال بديهي ما له جواب ...
زي لو سألك واحد : (ليش الرياض في السعودية )؟؟
بس برضو فكرت ...
ليش جدة غييير ... ليش جدة كذا ؟؟


جدة عبارة عن مجتمع خليط من ثقافات مختلفة ... أصولهم مختلفة ... ناس جاية من الهند ووسط آسيا ... ومن مصر والمغرب وغرب افريقا ... و اليمن وحضرموت وجنوب الجزيرة ... وأهل جدة الاصليين ... ومن كل مكان من العالم الاسلامي او حتى الغربي... فلما تدمج هذي الثقافات مع بعض ينمحي تقريبا العيب الاجتماعي وينكسر حاجز العادات والتقاليد ... ويبقى الدين والاخلاق والقيم والمبادئ والقليل من "العيب الاجتماعي " !!

تفسير بسيط ... ما ادري صح ولا غلط ... بس لو اعتبرناه صح ...

خلينا نطبق مبدأ العادات والتقاليد الاجتماعية على الرياض ..


العادات والتقاليد والعيب الاجتماعي شغالة بقوة في الرياض وهي المحرك الاساسي للكثير من مظاهر المحافظة والتدين لان الرياض منذ القدم كانت معزولة عن التأثيرات الخارجية .. فأصبحت العادات فيها شيئا مقدسا ... واصبحت العادات جزءا من الدين والدين جزء من العادات ...

وبسبب الانفتاح خفت حدة تأثير العادات على أهل الرياض ... وبما ان العادات مرتبطة بالدين صرنا نرى بعض المظاهر المخالفة للدين والتي لم يكن يمنعها من الظهور سوى العادات والتقاليد !!

الخير والتدين موجود بقوة وبكثرة في الرياض وما نقدر نجزم ان سببها العادات والتقاليد ... لكن اخاف ان مع الانفتاح نكتشف فجأة ان كثير من هذي المظاهر ليست سوى عادات ...

التربية لازم تصير على اساس الدين والقيم والاقتناع مو اساس العادات والتقاليد المفروضة لان العادات والتقاليد تتلاشى اما الدين والقيم هي التي تبقى !!


الجمعة، 24 أبريل، 2009

استعد لهذه السبع




حذر علمائنا المسلمين دوما من مضيعات الوقت،هذه وقفة مع مضيعات الوقت الحديثة في مدينتنا الرياض:



1 تمسكك زحمة في طريق خريص


2 أن تضطر لمراجعة الأحوال المدنية



3 أن تبحث عن إستراحة مناسبةللإيجار

4 أن يكون لك تعامل مع موظفي بنك الراجحي



5 أن تشتهي 3شاورما لحم من ماما نورة وتنزل لشرءاها



6 الدخول إلى قلب حي العليا مساءالأربعاءوالخميس



7 أن تذهب إلى مبنى قناة المجد للمشاركة في برنامج



الثلاثاء، 21 أبريل، 2009

محاضرة الدكتور بكار ..


بدون لوحات ارشادية لقيت نفسي قدام تفتيش سكن طلاب جامعة الملك سعود ... قلي (السيكيورتي) ديور (اي انعطف ( : ) ... وللأسف انحكت سيارتي من رصيفهم البايخ ) : ... شكلو كان عندهم اسمنت زيادة فصبو الرصيف بهذا الطول العجيب !! ...


المهم وقفت السيارة في المواقف الخارجية و دخلت من بين السيكيورتي وكان فوقهم لوحة اعلان عن المحاضرة ... دخلت سكن وقلت يمكن الاقي لوحة تدل على مكان المحاضرة ... للأسف ولا شي يدل على ان شي بيحصل !!
في النهاية وبمساعدة بعض الطيبين وصلت للمكان المستهدف ... مسرح الطلاب اللي مخبى ورى عمارات سكن الطلاب !!



عن أهمية القراءة كانت المحاضرة ولكن الدكتور عبدالكريم تطرق لامور عديدة

بالمختصر المفيد ححط اهم نقاط المحاضرة اللي عجبتني :


1- يجب ان ننوع قرائتنا في 3 مجالات :
أ‌- قراءة شرعية (تشكل 20 -25 % من قراءات الشخص)
ب‌- ثقافة عامة .. (فكر .. اقتصاد ... اعلام .. تاريخ ... وغيرها تشكل ايضا 20 -25 %)
ت‌- القراءة في التخصص ... ويجب ان تكون تكون 50 % على الاقل من قراءات الشخص .. والتخصص ليس شرطا ان يكون ما درسه الشخص في الجامعة وانما مشروع حياته الذي يرى انه سيخدم الامة به ..


2- الهدف من القراءة قد يكون منها :
أ‌- للتسلية ... ومعظم الاوروبين قرائتهم من هذا النوع وهو غالبا يرتكز على الروايات التي قد يكون بعضها مفيدا ولكن الاكتفاء بالروايات ليس بجيد ... الا ان الرواية جيدة للمبتدئيين فهي طريقهم لعالم الرواية ... انا عن نفسي ارى ان بعض الروايات افضل من بعض الكتب الجادة لكنها ليست كثيرة ويجب انتقائها و اشهرها الروايات التاريخية ..
ب‌- النوع الثاني من القراءة : لتحسين قاعدة الفهم والادراك والتحليل والاستنتاج ... ومن يقرأ هذه القراءة هم من يبلورون الافكار ليفهمو العالم بشكل افضل ..
ت‌- القراءة في موضوع لهدف تقديم شيء في هذا المجال (القراءة لإضافة المعلومات) .. والقراءة بنية النشر المكتوب او الشفوي ... لان الكتابة والنقل للموضوع يرتب افكارك .. فأفكار الانسان لا تتناسق الا عند الكتابة .. ولا فكر بدون انتاج فكري ...


3- تكلم الدكتور عن قضية الذكاء .. فالذكاء بمفرده لا يساوي شيئا ... فغبي مجتهد خير من ذكي متخاذل (من عندي ) ... مثلا راعي ابل في البر سولو اختبار IQ وطلع الرجال مقطع الذكاء حتى انو جاب درجة ذكاء احسن من انشتاين ... راعي الابل هذا حيقدر يكتب اسمو بدون ما يتعب ويتعلم الحروف ؟؟


4- العقل بطيء في استيعاب الواقع الجديد ... فمثلا لو نقلت ساعة غرفتك من وراء سريرك الى جانب الباب فستظل فترة لا تعي هذا الواقع الجديد وتنظر الى مكان الساعة القديم ... فالقراءة توعينا سريعا بوقائع العالم الجديد الذي يتغير يوميا وتزيد من قدرتنا على مواكبة العالم بإدراكه على حقيقته اللحظية ... (يحكيلي انكاس عن بعض من حريمهم الشيبان .... لساعهم عايشين في واقع وعالم ثاني : "شوف بنت فلان ايش سوت وبنت فلانة ايش عملت !! " تخيل نفس هذ العجوزة لابسة نظارة قرائتها وتقرا كتاب فريدمان " السيارة لكزس وشجرة الزيتون" !!) ...

5- هناك كتب لا يبغي ان يبذل وقت وجهد ومال في شرائها حتى حملها ... فهي تشوش ادراك المرء اكثر مما تفتح آفاق تفكيره وتعطيه صورة خاطئة عن العالم ... خاصة الكتب ذات الارقام والاحصائيات والتي يمكن التزوير فيها بكل سهولة. ( كنت اليومين الماضية في مؤتمر الغد وخلال اليومين سمعت ثلاث ارقام مختلفة لنسبة الشباب في السعودية ... المشكلة كل متحدث يقول النسبة بكل ثقة .. حتى ان واحد قال 70 % من المجتمع شباب ... وييييين ياعم !! ) .. فأقول ان الارقام يسهل اللعب فيها اما الحقائق والطبائع فهي غير قابلة للتزييف ...



وفي النهاية في عدة مبادرات ممكن تسويها لتفعيل دور القراءة ابتداء منك ونشرها في مجتمعك وعائلتك :
1- ابدأ بتخصيص نصف ساعة للقراءة يوميا كبداية ... (لو كنت تقرا اكثر فانتا واحد كويس ) !!
2- ابدأ بكتابة ما تهتم به من افكار حتى تستطيع ان تنظم معلوماتك وافكارك .. والمدونات ببلاش !!
3- تخصيص جزء صغير من الراتب للمصروفات (على اساس انك اب ) ... وتروح كل شهر تاخذ عيالك على المكتبة وتشترو كتب ومجلات حتى نعود اولادنا على ثقافة القراءة ...

الجمعة، 17 أبريل، 2009

جاية جاية ..

تكلم اليوم إمامنا في خطبة الجمعة عن السينما ... انا حقيقة اقدر هذا الخطيب لانو يتكلم في مواضيع يومية ومشاكل تشغل بال الناس وتهمهم ... ففي نفس الوقت اللي يتلكم فيه كثير من الخطباء عن المسواك يخطب هو عن تأثير الازمة العالمية والدروس المستخرجة منها !!

خطيبنا تكلم اليوم عن اخطار السينما الكبيرة والتي لا شك ان لها تأثير سيء كبير على المجتمع ..
.

لكن ممكن البعض يقول ان الافلام صارت الحين في بيت كل واحد ولا فرقت لو دخلت السينما للسعودية !!

انا اشوف ان في ثلاث اضرار وفوارق بين عرض الأفلام في القنوات والبيوت وبين ان تعرض نفس تلك الافلام في السينما :
1- الاختلاط والمشاكل اللي تترتب بسببه ....
2- المناظر والافكار السيئة عندما يتابعها الواحد في غرفته غير لما يتابعها مع 200 واحد ... لان مع مشاهدة هذي المناظر مع عدد كبير تجعل الناس يعتبروها شيئا عاديا وقد لا يتفاجؤا عندما يرواها مستقبلا في الشارع ...
3- تصير السينما بعد فترة جزء من ثقافتنا خاصة بعد ما تصير الكثير من طلعات العوايل والشباب قائمة على السينما .. (مافي مشلكة لو صارت السينما جزء من ثقافتنا اذا كنا ننتج السينما الخاصة بنا )

عزيزي القارئ :
هل تتوقع ان السينما قادمة عاجلا ام اجلا ؟
اذا كانت اجابتك نعم فأكمل القراءة ..
اذا كانت لا فلا انصحك بالمتابعة ..

طيب يعني انتا تتوقع ان السينما جاية جاية .. بعد سنتين ولا عشرة !!

طيب اذا كذا هل من الافضل ان نشغل وقتنا بمحاولة منع السينما من الدخول الى مجتمعنا ام المحاولة في خلق وتفعيل سينما اسلامية بديلة (سينما اسلامية اي سينما لا تحتوي على اي شيء يخالف الشريعة مهما كان موضوعها ) ؟؟

خطيبنا الله يحفظو قال ان من يدعي اننا سننشأ سينما محافظه فهو واهم !! لان السينما الجذابة كما قال احد منشئي السينما الالمانية تقوم على أمرين : الجنس والعنف !!

انا اخالف الشيخ واشوف ان ممكن تكون هناك افلام جذابة مثل الافلام الوثائقية او التاريخية المثيرة او حتى افلام فيها عنف !! واحس ان اهم شي في الفلم الجذاب هي الحبكة ... وأظن ان اللي ينطبق على الافلام السينمائية ينطبق على فن الرواية ... (هل نجحت الرواية المحافظة ؟؟ )

و تجربة ايران في السينما تورينا اننا نقدر نسوي سينما جذابة بدون بعض العناصر المهمة ..

انا احس اللي ما يشوف افلام حقيقة محروم من فائدة كبيرة ( لكن محمي من مخاطر اكبر ) ... فالافلام تحتوي على الكثير من المعلومات الثرية حتى انك تشوف شباب عاديين عندهم معلومات رهييبة ...

لازم نعطي طبقات المجتمع المحرومة من حسنات السينما حقهم من خلال سينما اسلامية محافظة والا سيتوجه الكثير منهم الى السينما الاخرى (اشوف كثير من الشباب المحافظين بدأ تقل حساسيتهم تجاه الافلام العالمية ) !!
في مبادرات شبابية رائعة لانتاج افلام سينمائية سعودية محافظة فازت بجوائز عالمية زي مجموعة
Creative cinema... بس المشلكة الدعم المادي قليل جدا لزي هذي المبادرات بسبب عدم وعي رجال الاعمال بأهميتها .. (اتوقع ان رجل الاعمال ممكن يحتسب الاجر في خدمة عمل سينمائي اسلامي)

اذا لم نتقبل السينما من الآن ونبني السينما الخاصة بنا اللي تقوم على قيمنا ستغمرنا السينما العاليمة عاجلا غير آجل ... وستغمرنا بأفكارها وقيمها غثها وسمينها ...

يا لله كل واحد يروح ويسويلو فلم
( :


الاثنين، 13 أبريل، 2009

تكفي 50 للسعودي ؟؟

أمس جاني أخويا الصغير يطلب مني فلوس عشان يعطي الحمالين اللي نزلو (الفرفيرة) للقبو في بيتنا ... كانو حمالين 2 من محل الالعاب اللي اشترينا منهم الفرفيرة ... طلعتلو 50 ريال اللي احسها اصلا كثيرة بس ماكان عندي صرف وهذول الناس ما تستخسر تعطيهم شي ... أخذ الخمسين وفتح عيونو بقوة وكأنو حيقول شي مهم ... قال : ( ترا الرجالين مو اندونيسينن ... تراهم سعوديين ) ... انا حقيقة استغربت ان السعوديين دخلو في هذي الوظائف اللي تطلب حمل اغراض ودخول بيوت ... بس قلتلو طيب وبعدين ... قالي : (هذول سعوديين ... يعني عادي 50 ريال ) !!

لا تعليق !!

الحين الشباب السعودي قاعد يدخل لمجالات جديدة كانت المجتمع يعتبرها عيب ... وهذا شي كويس .. حتى ان الحين الشباب اللي على الكاشيرات صارو واثقين من نفسهم وصار عادي يضحك وينكت معاك ...

بس لسا في حاجز بين المجتمع والشباب ... لسا كثير من الناس ما تحبذ تركب مع سعوديين لانه صعب يكاسرو في السعر خاصة !! لما تتعامل مع سعودي تاخذ مسألة العيب و (خوارم المروءة على قولتهم ) اما مع الاجنبي فتاخذ راحتك تماما ... والناس ما تحب مثلا سباك سعودي يدخل بيتها لانها ما ترتاح انهم يشوفو ويدخلو بيوتهم !! ويمكن لو شاف شي في البيت بالغلط يكون غير لو شافها سباك هندي مثلا !!


هل تتوقع يجي اليوم اللي يكون فيه السواق والشغالة سعوديين ؟؟

السبت، 11 أبريل، 2009

عندنا اشياء حلوة !!

الأربعاء الماضي كنا في طريقنا الى الشرقية ... وكان فيه اكثر من تفتيش على الخط وكانت التفاتيش شغالة وتعطي مخالفات للمسرعين (مو زي بعض تفاتيش الزينة في الرياض) ...


وانتا ماشي على الخط في أمان الله تلاقي اكثر من سيارة على الجانب المعاكس ينورو النور العالي مع ان مافي سيارة قدامهم ... ليش ؟؟


اللي يمسك خطوط كثير يعرف معناها ... انا في البداية ما كنت انتبه لهذي الظاهرة بس بعدين اللي راكب جمبي نبهني ... هذي معناها ان في تفتيش قريب جاي ... فانتبه وهدي السرعة عشان ما يلقطك الرادار مسرع !!
والله عجبتني هذي الحركة ... مع انها قد تكون فيها تعاون ضد القانون ولكن فيه جانب حلو ... السعودي والعربي عموما متعاون ( نشمي) بطبيعته .... يحب يساعد ويعاون الناس .. أي حادث يصير تلاقي زحمة مو طبيعية والشباب ينزلو وأحيانا كثيرة ينقذو أرواح ... والحلو ان في شباب ياخذو دورات اسعافات اولية عشان هذا السبب وتلاقي ناس حاطين في سياراتهم عدة مساعدة كاملة ...



مرة كنا طالعين لجدة بالسيارة وغرزت سيارتنا على جمب الخط ... ما عدت دقايق الا واثنين عرضو علينا الخدمة من بينهم عائلة فيها اب وام واولاد ...


بينما الغربيين قاعدتهم ( حالي حال نفسي ) .. يحكي الدكتور احمد زويل : لما كنت في اول ايامي في امريكا وطلعت للشارع وكان مغطى بالثلج وتزحلقت وطحت طيحة قوية .. انتظرت ان الشارع كلو يوقف ويساعدني زي ما انا متعود في مصر ... وأتفاجأ ان الناس والسيارات تمر من جمبي ولا كأن شي حاصل ...



حلو لو نهتم بميزتنا هذي وننميها ... الحضارة ليست اجهزة وتقنية فقط ... انها قيم واخلاق ...

الثلاثاء، 7 أبريل، 2009

اين تذهب هذا المساء 1

السلام عليكم ..



بعد ايام كثيرة من الطفش في شوارع الرياض ..



جات فعاليات ركاز لتغير الجو وتعطينا متنفس وتخلينا " نطلع لشي حلو ومفيد "



الاربعاء 8 ابريل .. الموافق 12 ربيع الاخر



دورة :: حيـــــاتي لهـــا معنــى ::




للمدرب .. :: سليمان العلي ::



من الساعة 5 عصرا الى 9 مساء



في مدارس الرواد ..



الحضور مفتوح للجميع رجال ونساء ..


ومجاناَ





أما الخميس ..



فموعدنا في صحارى مول



حيث اللقاء الجماهيري الرائع .. :: هذه بصمتي ::



للدكتور :: راشد الزهراني :: و الدكتور :: غازي الشمري :: والدكتور :: حميد الشايجي ::



وأيضا اللقاء المثير مع اول سعودي يصل قمة إيفرست ..



المنجز :: فاروق الزومان ::




من الثامنة والنصف .. حتى العاشرة ..



ايضا الحضور مفتوح للجميع للرجال والنساء







وبالنسبة لحبايبنا الكاتكيت .. يوم الجمعة مخصص لهم .. في صحارى مول .. فرقة ترفيهية للأطفال



من الثامنة والنصف .. حتى التاسعة والنصف ..






لا تضيع الفـرصـة .. وضع بصمتـك بحضـورك وإنجـازك



ومع ركاز .. يحلو الويكند ^_^


الأحد، 5 أبريل، 2009

وين توقف شبشبك ؟؟

منظر مألوف اننا نلاقي جيش من الشباشب اكرمكم الله وكأن قنبلة نووية للتو نزلت على ذلك الجيش الـ(شباشبي) ...
بالضبط هذا هو المنظر قدام باب كل أو خلينا نقول كثير من المساجد ...


أنا هنا ما ابغى اركز على السلبيات ... هنا نبغى نعالج هذي السلبية ..


كمسلمين يؤمنون بالدين كمنهج للحياة نعرف ان هذي الحوسة لا تمثل أبدا الخلق الاسلامي ...

المساجد كلها حاطة رفوف للشباشب بس تأبى شباشبنا الا ان تنبطح على الأرض (و شبشبي أولهم )
!!


اذا انتا مضايقك هذا الفعل وعدم المبالاة في النظام والترتيب إيش تسوي :


1- ابدأ بنفسك .. من اليوم لا ترضى لنفسك انك ترمي الحذاء قدام باب المسجد بطريقة همجية حتى لو كانت الركعة حتفوتك ... واحتسب انك تاخذ اجر بالتزامك بخلق الاسلام في النظام ....

2- بعد ما تحط حذاءك حاول كل مرة تشيل حذاء واحد من على الارض وتحطو على الرف ... طبعا راعي الشبشب حيدور على شبشبو بعد الصلاة الين ما يلاقيه في الرف ( على غير العادة ) ... وبهذي الطريقة ( قد ) تصل رسالتك الى راعي هذا الشبشب (لمن كان له قلب ) ...

لازم نساهم في تغيير مجتمعنا للأفضل ... واللي تعجبو الفكرة يحاول يقنع واحد من اصحابو بالفكرة ... واحتسبو الاجر ... هذا هو الخلق الاسلامي .... وهذا هو الدين الاسلامي الصحيح ... دين النظام ...

الجمعة، 3 أبريل، 2009

المطر وما يفعل !!

إن بعد العسر يسرا ... وبعد العج مطرا ...

ايش تأثير المطر علينا ؟؟ هل تغير شي في حياتنا اليومية ؟؟

1- في عادة حجازية أنهم يطبخو " رز بعدس " بمويه المطر ... طيب ليش رز بعدس بالتحديد ؟؟
الرز والعدس زمان كان ياخذ وقت طويييل في الطبخ ... بس موية المطر تخلي الطبخة تستوي بسرعة ... أظن عشان موية المطر مليانة نيتروجين !!
الحين صار الرز بعدس يستوي بسرعة حتى بالموية العادية وأتوقع ان هذا بسبب طريقة صناعية جديدة لتجفيف العدس أو مادة كيميائية فصار العدس ينطبخ بسرعة حتى بالمويه العادية ... بس العوايل الحجازية احتفظت بالتقليد هذا الى الآن وصار الغدا رز بعدس رسمي لما ينزل مطر ... حتى إننا نعرف ناس ما يطبخو رز بعدس الا لما ينزل مطر مع انهم يمكن يطبخوه بمويه عادية !
( (غدانا رز بعدس اليوم ( : )

2- في ناس مستحيل يقعد في البيت اذا شاف مطر .. على البر طوالي ...

3- في عادة ما ادري اذا موجودة ولا لا ؟ وهي ان العيلة تطلع تنظف الحوش بموية المطر بدل ما يستهلكو موية !!بس اتوقع ان الناس خاصة في الرياض مشغولة وما تهتم كثير بتوفير الاستهلاك (هذا لو كانو يغسلو احواشهم بنفسهم ) !!

4- بعض الاحيان تلاقي مساجد اول ما تنقط السما قطرتين يجمعو الصلوات(المغرب والعشا مثلا) !! طبعا كل هذا باجتهاد اهل المسجد فتلاقي مساجد تجمع وثانية ما تجمع !!
يعني مفروض المحلات ما تسكر لو فيه مطر باعتبار ان في ناس جمعو صلاتين ...
(المشكلة مافي نظام في هذا الخصوص ) ...

كل ناس اتوقع لهم عادة مرتبطة بالمطر ...
طيب انتا ايش يغير المطر في حياتك اليومية ؟؟ هل عندك عادة مرتبطة بالمطر !!

الأربعاء، 1 أبريل، 2009

ندوة للشيخ علي العمري ... قناة فور شباب


امس كان في ندوة ثقافية مصغرة أعلن عنها حمدان الحمدان في مدونته  ... استضافت هذي الندوة الشيخ علي بن حمزة العمري مؤسس قناة فور شباب ...

 

القاعة  (الحقيقة هيا غرفة مو قاعة) صغيرة وتشيل 30 واحد بالكثير وتملت تقريبا ... وتكلم الدكتور عن القناة (فور شباب) اللي صارت حولها ضجة كبيرة  ...

 الناس والمنتديات ماقصرت وطاحت في الشيخ والقناة حش وتقطيع ... اللي يقول قناة رقص ... وبعضهم ما عندو مشكلة وخش في نوايا القائمين عليها 

(طبعا ما وراهم شي هذول الناس الفاضية الا الكلام في الناس ... قاعدين ينظرو سيادتهم  - أصحاب الفضيلة - من غرفهم !! )

 


يقول الشيخ (حسب احصائية جديدة ) ان الشريحة الكبرى وهي 50% من الشباب  تتابع قنوات (هشك بشك) زي روتانا و شلة القنوات اللي زيها  ... و القنوات الاسلامية الموجودة حاليا قاعدة تستهدف شريحة لا تزيد عن الـ20%  ومتجاهلين الشريحة الأكبر من الشباب !! فهدف قناة فور شباب محاولة جذب هذي الشريحة من الشباب العادي  .... اللي مالهم أحد يجذبهم الا هذي القنوات (الجذابة حقيقة ) ... 

لو نبغا نجذب هذي الشريحة لازم نوصلنهم  قيمنا بطرق احترافية .... أما نفتح قناة  ونجيب محاضرة ونبغا أبو الشباب ينطق ساعة يتابعها !! (يمكن يسويها لو ارتفع عندو مؤشر الايمان بقصد أو بغير قصد !!)



الشيخ ركز على فقه الخلاف ... لان معظم النقد الموجه للقناة هي على أشياء مختلف فيها وهو يرى حلتها وفق رأيه الشرعي ...  وركز على أهمية احترام الآراء الفقهية و حكى حكايات عن احترام الشيخ ابن باز رحمه الله لمن يخالفه في  بعض القضايا الفقهية كالشيخ يوسف القرضاوي مثلا  ... وقال ان كثيرا من القضايا الفقهية لا تعرف العامة الا رأيا واحدا فيها مع ان كثير من العلماء الكبار قديما وحديثا لهم رأي آخر  ...  ولكن هذا الرأي لم يصلنا ... وإن وصلنا  وتبناه أحدهم انكر على صاحبه !!... ومن أكبر هذه القضايا الموسيقى و الحجاب الشرعي والاسبال !!



انا كان عندي تساؤل .. (ما طرحت هذا التساؤل على الشيخ للأسف لاني كنت معزوم ومشيت بدري ( كانت عشوة رهيييبة أكلت فيها الفقع لاول مرة في حياتي ... الفقع يشبه المشروم !!) ... المهم أنا ما سألت الشيخ أصلا لأني قاعد في آخر صف زي الطلاب المشاغبين في المدرسة فمالي داعي أرفع يدي وأسأل) ... المهم التساؤل هو :


هل الأخذ بالرأي الشرعي بجواز الموسيقى وظهور المرأة المحجبة سوف يجذب شريحة أكبر من تلك التي سينفرها ؟ 

وهل الموسيقى والمرأة  المحجبة بحد ذاتها عاملان جاذبان للشريحة العامة ؟؟