الجمعة، 24 يوليو، 2009

معقوووله !!

مفروض اني عالوعد بس هذا شي لازم اقولو الحين !!

قبل شهر تقريبا ... واحد من اصحابي غاب عن الجامعة وجا اليوم الثاني للاختبار ماوصل .. قالنا ان الشرطة مسكوه في الحجز 24 ساعة عشان شعرو طويل !! انا حقيقة انصدمت وما صدقت ابدا .. قلت لنفسي يمكن مسكو صاحبي عشان شغلة ثانية وقام يصرفنا عشان ما يبغا ينفضح !!

قلت الكلام هذا لاخويا ولبعض اصحابي قالولي لا هذا الكلام مو معقول .. يعني يمسكوه 24 ساعة وبعدين !! وأخذو المسألة ضحك واستهبال !! انا حقيقة قلت يمكن كلامهم يكون صح !

مع الوقت بدت الحكاوي تزيد ..

امس واحد صاحبي ثقة ولد طيب بس مسكين شعرو طويل .. مسكوه دورية في شارع التحلية وحجزوه 24 ساعة .. وفي النهاية ما حلقولو شعرو ... ولا خلولو شعرو زي الناس ... حلقولو مستطيل فوق جبهتو الين نص راصو !! يعين طلع الولد مشووووه !!

اخيرا صدقت الخبر مع اني لسا مني قادر اصدق .. بس هذا الواقع .. هل معقول كذا !!
دورية في اشهر شوارع العاصمة ليش ؟؟
للشعر الطويل .. حسيت اننا قاعدين في متوسطة بن خلدون !!
الاولويات عندنا معدوومة
انا اتوقع في اشياء اهم كثيييير من مسألة الشعر ... اللي تحت الشعر !!

الثلاثاء، 7 يوليو، 2009

اعلان
بسم الله الرحمن الرحيم
السلام عليكم

اعزائي متابعي كورنيش الرياض

أسلاك الكهرباء بدأت تئن وتتألم تحت شمس الرياض الحارقة .. وتحت طلباتها المتكررة قررنا ما يلي :

رحمة بها ... ولإحقاق الحق سنتوقف عن مضايقتها مؤقتا فهي تعاني من العذاب ما لا تتخيلون ...
ارتاحي يا أسلاك الكهرباء الى تنزل درجات الحرارة مع بداية العام ..
حينها سنبدأ تحميلك مواضيعنا –ثقيلة الدم والحرارة – التي قد يؤدي تحميلها في مثل هذه الظروف الى انفجار مرارتك ...

نراكم حينها ..
( :

الخميس، 2 يوليو، 2009

مطاراتنا .. الله يخلف علينا !!


في
مدونة نظم تكلم ياسر عن انتفاضة المطارات المرجوة بعد التقييم الاخير للمطارات السعودية على غرار ماحصل لجامعاتنا ... بكل فخر جات المطارات السعودية في ذيل قائمة من 192 مطارا عالميا ...

لكن بعد سفري الاخير الى جدة بدأت اشك في انتفاضة ولو على الاقل انتفاضة قريبة ...

انا لا أستغرب ابدا لو قعدنا متخلفين في ناحية من نواحي حياتنا او الخدمات العامة في بلدنا .. ولكن الغريب جدا ان تكون الخدمات قبل 25 سنة أفضل من الآن !! الناس تمشي قدام واحنا نرجع ورا ..

طبعا عانيت كثييير في اصدار تذاكر قبل فترة من مكتب الخطوط اللي في حي المروج .. وصلت الساعة 10 تقريبا ولسوء حظي مو شغال الا 5 او 6 كاونترات (اظن نص الموظفين قاعدين يفطرو فول في المكاتب الداخلية) ... في ظل هذا الوضع ومع ان الناس الموجودة قليل اضطررت اني انتظر الى صلاة الظهر ومافي اي شي يسليك او يخفف عليك الانتظار فحتى الجرايد بخلانين بها علينا... لما قمت اتوضا لصلاة الظهر جا واحد ناداني : " يالطيب تعال " ...قلت نعم قال "شوف ورا " .. واثر اني جالس على شوكلاته وما يحتاج اوصف نظرات الناس ... أكرر ان السعوديين نشامى وكثييير قالولي ترا وراك في شي وجابولي مناديل ومويه عشان امسح !! تمنيت ان ما يكونو الناس نشامى كذا لان كثرة النشامى أحيانا تزيد من الاحراج للشخص !!
في النهاية ابشركم على الاقل اني اخذت تذاكر ... والغريبة ان كل هذا بفلوسي .. ياناس انا ما ابغى منكم شي ببلاش !! مالكم اي منة او فضل علي .. هذي فلوسي بس ابغا منكم خدمة ...

اخذت امس " البوردنج " وتوجهت بسرعة الى بوابة 33 على اساس اني متأخر ... واثر الخطوط هيا المتأخرة ... انتطرت الى ان فتحت البوابة بس استغربت ان الناس تنزل تحت والعادة انهم يطلعو من فوق عن طريق الممر الى الطيارة مباشرة !! نزلت مع الناس تحت وانتظرنا قدام باب يهف منو هوا رهيييب .. هوا الرياض المنعش ... كأني بالضبط واقف في مطبخنا البارد و فتحة الفرن على وجهي ... استحملت شويتين الين دخلنا الباص ... راعي الباص كان يبغى يتأكد مين اللي ماسك كويس ومين اللي مو ماسك ..راح اعطانا "نتعة" كان حيطيح على اثرها العديد من الضحايا خاصة الحريم الواقفين بثقة بدون ما يتمسكو (مسوين ام الشباب ... ينفع اقول ام الشباب؟؟) !! ... وصلنا باب الطيارة .. واستغرق صعود الدرج 5 دقايق !! طبعا من شدة الحر (الكلام هذا في العصر) نسي السعودوون واحدة من قواعدهم في احترام الحريم وتقديمهم ... كل واحد مسك شنطتو وطلع بس يبغى يفتك من هذا الحر ... احمد ربي ان سفري كان العصر وبشرى للي سفرو في عز الظهر !!
الباصات ممكن مهي مشكلة بحد ذاتها ... بس ان المشكلة الكبيرة ان مسؤولين الخطوط باين ما فهمو ان الرياض في عز الظهر مو زي ربيع كاليفورنيا !!

خدمات السعودية بشكل عام مقبولة احيانا ...لكن المشكلة ان الخدمات بتتدهور والاسعار بتزيد ... كأننا بندفعلهم فلوس زيادة عشان يزيدو من سوء خدماتهم .. عالعموم الحمد لله ان فيه طيارات ومطارات ( :

نسأل الله ان تكون حادثتي بسبب ظروف وقتية للخطوط والا يستمر هذا الحال كثيرا .. خلينا نتفاءل