الخميس، 7 أكتوبر، 2010

في الاحوال المدنية .. شيء لا يصدق

الواحد يمر بلحظات مايصدق انه في الدنيا !! يشوف اشياء كثيره حتى على حلم !!

كنت أشيل هم لما اسمع كلمة "أحوال مدنية" .. لن هذي الكلمة انطبعت في قاموسي كالتالي :
ملف اخضر علاقي لونه لايسر الناظرين و يجيب الاكئاب ..تقوم الساعة 7 الصباح وتكون محضر عند باب الاحوال قبل ما العامل ينوي يقوم من السرير عشان تلحق رقم ينقذك انك تخلص قبل الظهر في احسن الاحوال ..زحمه تحس انك تطوف في الصحن !! موظفين تحس ان الدولة معطيتهم مكافأة على كل تكشيرة للمراجع ! الخ ..

لكن ما رأيته اليوم كان شيئا عجابا :

الساعة 1 الظهر كنت مع شاب لطيف في مقر الاحوال على موعدنا اللي حجزناه على الانترنت ..الحجز الزامي في مقر الاحوال اللي في المروج يعني تجي بدون موعد مالك مكان تطلع برا بكل هدوء ! الغريب انك ممكن تسمع صوت المكيف .. تخيل ! هدوء عجيب تحس انك داخل المكان الخطأ .. وقفنا على الصف قدامنا 2 .. موظف الاستقبال قاعد يستهبل مع اللي قدامنا وطلع في النهاية ما يعرفه .. نفسيه حلوة جدا .. " اهلا بالشباب" اخذ الاوراق حقت الموعد والصور واعطانا رقم قال خلاص تفضلو على التصويرانتظرو دوركم .. لاااااااااا بس كذا !

شويا كان التصوير بطيئ يعني انتظرنا حول نص ساعة بس يمكن معاهم حق عشان البصمات ..جا دورنا 125 ..تصورت واللي يصور نفسيته مرا حلوة ياخذ ويعطي معاك ..وراني الصورة بعد ما اخذها قال : " كيف عجبتك ؟" .. لاااااااااااا مرة ثانية .. ما اصدق
في اقل من ساعة واحنا طالعين ومخلصين كل حاجة !! واحنا طالعين سألنا الموظف عن النظام الجديد قال فرق يقول حتى نفسياتنا مفتوحة ماعندك زحمة ولا صجة ..

على الهامش :
"للأسف ما يزال فرع احوال الشميسي يقبع تحت حاله من الفوضى الرهيبة ..عقبالهم"

النظام لا يأتي الا بخير

السبت، 25 سبتمبر، 2010

اليوم الوطني .. من شوارعنا !!

أبغا فقط أفهم ..


عزيزي اللي ترقص نص الشارع والناس موقفة تطالع .. تتوقع معجبين مثلا !




عزيزي الكوول ..طالع كشخة صراحة بس ماتلاحظ انك حفيان .. مثلا !




عزيزي اللي تبخ بالبخاخ ..بخصوص تصرفاتك تحس انك ظريف مثلا ! – على فكرة اللطمة مع البخاخ رااااكبه-


عزيزي ياللي قاعد في نص الشارع ..مضيع الشانزيلزيه تتوقع!




جاني كم احساس مع المناظر الخلابة اللي شفتها :


- زي ما قال واحد ان اليوم الوطني محطوط خصيصا حتى يحمد أصحاب العقول على النعمة العظيمة التي ينعمون بها ! قربت إني أصدق من جد !


- اكتشفت ان شعبنا ماشافوا خير وحمدت الله على اليوم الوطني يعني ما أقدر اتخيل ايش ممكن يصير بكل هذي الطاقات لو مافي يوم وطني !



- حسيت أن الفقر اختفى من البلد أو أن أولويات الصرف عند الناس مضروبة !! فكر بس كم ربحت المصانع العالمية من يومنا الوطني !


صاحبي أنس عبدالرازق كان راجع من طريق الملك عبدالله وكان ينقل بعض المشاهدات والاقتراحات على الفيس بوك انقل بعضها :
"
اقترح ان يكون هناك اكثر من يوم للاحتفال وذلك لتخفيف هذه الدافعية للفرح عند الكثير من الناس ، مثلا احتفال بمناسبة ذكرى انضمام الحجاز لحكم الملك عبد العزيز واحتفال آخر بمناسبة ذكرة انضمام الجنوب للحكم ولآخر لبداية انضمام المنطقة الشرقية وهكذا بحيث يتعود الناس على الخروج والإحتفال


اقترح إضافة مادة لتعليم الرقص في المدارس لان الشباب مضيعين بقوة بالجانب هذا تلقى الإيقاع شرق وهو يرقص غرب وتلقى الجملة الموسيقية او اللحنية تبدأ وتنتهي وهو جالس في حركة لوب بدون مايراعي البداية او النهاية وهذا بلاشك يشوه شكل الاحتفال ( وبالمناسبة مسألة سوء الرقص كانت تقريبا مشتركة عند الغالبية العظمى)



في مشاهد تقهر وتخرب ابو الوناسة مثلا تلقى شاب مشخص و"مزكرت" ورابط العلم بشكل حلو وحاط ربطه على راسه بشكل انيق وقاعد يتمشى بالشارع وهو حافي! يعني مو لابس نعال - الله يكرمكم- صراحة هذا من اشد المواقف اللي قهرتني



اقترح صناعة علم خاص للمملكة العربية السعودية يستخدم في مثل هذه الاحتفالات كأن تستبدل كلمة (لاإله إلا الله محمد رسول الله) بكلمة (المملكة العربية السعودية) وبنفس الخط ونفس طريقة الكتابة ويبقى السيف مكانه بحيث شاهدنا اليوم امتهان كبير لكلمة التوحيد وللفظ الجلالة بالذات كانت تداس تحت الاقدام وفي كفرات بعض السيارات ولا شك ان هذا من الاشياء الغير جيدة ولا تتناسب مع طبيعة الاحتفال العامة "


مافي أي مشكلة انك تحتفل ... تخيل اليوم الوطني كله محاضرات تجلس وانتا هاجد وممنوع أي كلمة !! صار عقاب الهي هذا .. القصد افرح بعقل !
عن نفسي كنت ححتفل باليوم الوطني فعلا بشكل كبير لو مثلا اعطونا مكافئة اضافية في الجامعة ، رجعو البيبسي بريال مثل ما قال أحدهم ! اتوقع تعطي قيمة كبيرة لليوم هذا حركة مثل كذا يصير كل سنة ننتظر هدية بمناسبة اليوم الوطني ( : -يارب احد له تأثير يقرأ ويفهم أن مافي مانع تزاد المكافئة طول السنة عادي والله في ناس كثير محا تزعل-


كنت أفكر في السيارة وأنا اشوف الهبال حسيت انه يوم يستحق ولو بعض التقدير ..في بعض الناس مثل الفرق التطوعية في الشرقية استغلت هذا اليوم بشكل ايجابي وهذا شي كنت أفكر فيه وهو المفروض كيف اننا ممكن نستغل هذا اليوم وطاقات الشباب فيه ..كنت أفكر كمان لو صار في اليوم الوطني مؤتمر لأصحاب الطموحات والمشاريع والانجازات الشابة يعرضوا مشاريعهم وطموحاتهم ونجاحاتهم ! أي حاجة مفيدة تفيد مستقبلنا ..طبعا إلا دروس الرقص ما أأيد انس فيها ( :

اليوم الوطني مفروض يكون منطلق للمستقبل بدل أن يكون أغنية عن الماضي

الأربعاء، 21 يوليو، 2010

ساهر :شكرا لكن نبغا جيوبنا



شي جدا مفرح وجيد ان نسمع مثل هذه النتائج خلال فترة بسيطة جدا خاصة ان عندنا أزمة مستشفيات في أسرة العناية المركزة والطوارئ .. لكن أعتبر هذا الخطاب نوع من الرد لكل من احتج على نظام ساهر وانه نظف جيوب المواطن .. فالخطاب رسالة للمواطنين : ساهر لأجلكم ولحفظ أرواحكم ..


لكن هل دائما نظام ساهر يتواجد لحفط أرواحنا ؟


تستفزني بعض باصات وكاميرات ساهر بطريقة فظيعة جدا حتى حسيت قبل أمس اني صرت عدواني لما لقيت نفسي رافع النور العالي بعصبية على كاميراتهم لعل العمى يصيب عيون كاميراتهم .. بصراحة حاجة تقهر ! حاطين باص في اخر شارع العروبة اللي اظن انه من اربع سنوات ماصار فيه الا كم حادث تنعد على اليد ! اي واحد يعدي 70 تكافئه الكاميرا بصورة مجانية بفلاش يدخل الى قلبك قبل عيونك ! المشكلة كل ما ارجع البيت في الليل وما اكون مركز احظى بصورة من الباص الكريم ..





هل شي مقنع يقولوا نحافظ على روح المواطن يحطوا باصات في شوارع ما تصير فيها حوادث الا بالمعجزة ويحطوا السرعة 70 !! لو انزل اجري على رجولي احسن لي .. احس فيها نوع من "البزنس" ومثل ما تعرفوا النظام ماسكته شركة تجارية !

أحيي ساهر عندما يكون لمصلحة المواطن .. لحفظ روحه .. لالزامه بالقيادة الحضارية واحترام خطوط المشاة .. لإرجاع سيارته المسروقة .. ولكن ليس عندما تكون عبارة عن باص ايداع للشركة !

حسيت أيضا بالرائحة التجارية للنظام لما واحد قلي عن لفته رهيبة في النظام اللي يشبه ساهر المطبق في الامارات : عندهم اسلوب الجزرة وعندنا اسلوب "العجرة " .. هناك لو عليك مخالفة و سددتها خلال شهر يصير لك خصم 50 % .. عندنا تدفعها غصب اول شهر ولو مادفعتها تتدبل ! ياليت قومي يعلمون ..


كنت افكر بتقنية اتوقع تكون مفيدة جدا عندنا للتقليل من الحوادث :
اي واحد يقرب من السيارة اللي قدامه 5 متر وتكون السيارة ماشيه فوق ال80 ياخذ مخالفة ..لو يسووها احس انها حتكون فعاله جدا ..بس ما ادري هل تنفع برمجيا !


في النهاية ياريت يحافظوا على جيوبنا وارواحنا في نفس الوقت ..والله يهديهم ويخليهم يشيلوا الباص البايخ اللي جمب بيتنا حيفلسني !




الأربعاء، 14 يوليو، 2010

5 ساعات من اجل تغيير الشعبة = جامعة حكومية


المكان الذي طالما دافعت عنه .. الذي طالما اعتبرته جزءا مني .. لقد خانني هذه المرة

جامعة الملك سعود الحبيبة .. ولا تزال الحبيبة ..

قدر الله علي ياجماعة وقررت اخذ ترم صيفي في مقررات الثقافة الاسلامة (سلم) .. التسجيل كان زي ما ابغاه وضبطت الجدول الحمد لله من الساعة 4 العصر الى 8 المغرب يومي السبت والاثنين ..



السبت اول يوم في الدوام ، الساعة 4 العصر موعد اول محاضرة :
دخلت وانا التقط انفاسي لاني كنت متأخر بعد ماضيعت مكان القاعة !! انتظرنا 30 دقيقة والدكتور ماجا !




الساعة 6 موعد المحاضرة الثانية :
دخلت القاعة بهدوء لاني ماضيعت المكان .. بعد 20 دقيقة انتظار دخل دكتور علينا وقال انتوا شعبة الدكتور العجلان ؟ قلنا ايه .. قال الدكتور اعتذر عن التدريس في الصيف والشعبة الغيت .. افرنقعوا !
شلت هم يومها لاني كنت مضبط جدولي اخذ المحاضرات في العصر لاني ما اقدر اخذها الصباح .. خفت مع اللخبطة اللي حاصلة اني احتاج اما ان اعتذر عن بعض ايام الدوام في الشركة او اني الغي ساعات من دراسة الترم الصيفي ..




يوم الاحد ، الساعة 8 صباحا :

واقف قدام باب واحد مسؤول عن الجداول في كلية التربية .. شرحتله الوضع للمرة الاولى ولم اكن اعرف انني سأعيد القصة مليون مرة في ذاك اليوم !
قالي في شخص مسؤول اسمه التويم في المبنى الثاني روح راجعه ..
وصلت مكتب الاستاذ التويم .. انتظرت اللي قدامي اللى ان خلص .. شرحت القصة للتويم وقال طيب حول لشعبة ثانية .. قلت له طيب الله يعافيك اطبعلي اوقات الشعب عشان اقدر اختار .. الحمد لله حصلت شعبة موجودة لنفس المادة في نفس وقت شعبتي الملغية ..


انا طالب على نياتي ولا افهم في نظام الجامعة كثير .. والموظف كل كلمه يطلعها بريال عشان كذا مستحيل يشرح لك اي حاجة بس يصدر اوامر وتحتاج انك تشحت سعادته عشان يعطيك كلمتين زيادة تفصيل وانا اكره شي اني اشحت موظف الدولة عينته لخدمتي .. ياريتني شحت بس !! (على فكرة تعلمت في نهاية اليوم انك ستخسر كثيرا ان لم تكلف نفسك عناء الشحتان من الموظف)



على بالي اني اقدر احول من البوابة الالكترونية (نظام التسجيل عن طريق الانترنت ) .. رجعت البيت وفتحت الانترنت والا الاقي الشعبة مقفلة ومليانة طلاب !! رجعت بسرعة للتويم في الجامعة : ياسيدي الشعبة مقفلة كيف تقولي روح سجل فيها !!
بشبه ضحكة رد علي : مين قال تقدر تحول من الانترنت ؟ اي كليه انت ؟
رديت : كلية الطب
رد علي : لازم تروح مكتب القبول والتسجيل وتاخذ احالة ..
وقتها فهمت اني لازم اروح هناك واخذ ورقة اسمها "احالة" من عندهم وارجع له مرة ثانية !! وسويت زي مافهمت ..


رحت الى بهو الجامعة ( للي يعرف جامعة الملك سعود فيها ممر طويل يسميه الطلاب المسعى من طوله - يظهرفي الصورة جزء منه-... احتجت في هذا اليوم المشؤوم ان اكمل عمرة كاملة تقريبا !!) ॥ وبعد ما سألت ووصلت للقبول والتسجيل انشرح صدري بعد ماوصلت من المشوار الطويل في حر الرياض ॥ دخلت بثقة وبدأت اشرح القصة واطالب بورقة "احالة" لكن الموظف قاطعني : وين ورقة الاحالة ؟ قلت له انا جاي اخذها وهذا اللي ابغاه !! قال لا الاحالة لازم تاخذها من كليتك ..


رجعت الى كلية التربية مرة ثانية وانا معصب في الطريق الطويل وقعدت افكر ليش عندنا الدوائر الحكومية متضاربين مع التقنية ॥ ياخي يرسله ايميل وانا جالس في المكتب وتخلص شغلتي !! ليش لازم الف كل الدنيا اجري بأوراقي !
وصلت للتويم وانا منفعل بعد ان عمل في الحر والتعب عمله .. لقيت مكتبه زحححمة .. يوجد طابور متعرج لا يحترمه الا القليل .. انتظرت الى ان جاء دوري : ياخي ليش ما اعطيتني ورقة احالة قالولي لازم ورقة احالة ؟ بضحكة تشابه الاولى وكأنه يقول في نفسه ايش الطالب المغفل هذا : انا ليش لما جيتني اول مرة سألتك من اي كلية انت ؟ ورقة الاحالة تاخذها من كليتك – كلية الطب- !!


ما ادري يحسبني متخصص في مادة "قوانين الجامعة " !! ايش يدري اهلي عن قوانينكم هذي .. اذا انا غبي اديني على قد عقلي واشرح شوي .. الرجال من الصباح وهوا قاعد يعطيني الغاز وانا افشل احلها وفي النهاية الضحية رجولي !

هذي المرة احتجت السيارة عشان اروح كلية الطب .. افضل كلية في التعامل بصراحة مع انهم مرمطوني لكن على الاقل تعامل جيد .. في كلية الطب قعدت حوالي ساعتين استخرج خطاب احالة .. دخلت على اكثر من 5 مكاتب لكبار مسؤولي الكلية .. شرحت قضيتي مرات كثيرة .. نشبت في حلق الموظف الطيب الجديد راعي شؤون الطلاب حتى انه انفجر في النهاية : ياخي مو تشوفني اعطيتك وجه وكلمتك تقعد تستغلني .. ما قيد مر علي طالب مزعج مثلك .. بس في النهاية اخذت اللي ابغاه اللي كان مستحيل اخذه لولا نشبتي في الموظف .. الموظف هذا طيب جدا وخواف لدرجة تضحك .. وانا قاعد عنده شوي ويحسسني انه مدير الجامعة .. مافي احد في شؤون الطلبة فقط التلفون دق مرتين او ثلاثة وكم واحد جاه ومع كذا يشتكيلي : ياخي الشغل ضغط جدا ! ولما كنت ابغا منه خطاب تغييرشعبه رد علي بانفعال : ياخي هذي مسؤولية كبيرة .. والله كنت حضحك في وجهه ( :

في النهاية مشيت الى بهو الجامعة ( جملة بسيطة تختصر معاناة مشي طويلة في حر الرياض) .. الموظين كانوا يصلوا .. مع ان الصلاة من فترة خلصت .. في النهاية سلمت الورقة الثمينة وتم تحويلي ..


كان في اختصار كثير في القصة ... لكن في النهاية اخذت عملية التحويل من شعبة الى شعبة من الساعة 8 الصباح الى 1 الظهر !! اجراءات طويلة وتحتاج منك لياقة عالية وبرودة اعصاب وقوة وجه واحيانا تحتاج انك تتنازل عن بعض كرامتك لاسمح الله .. نفسي اكسر اجهزة الموظفين المغبرة اللي لم توظف ابدا في خدمة الطالب واقطع اسلاك الانترنت اللي لم تستخدم الا في تصفح جريدة الرياض وكاريكتيرات الهليل ..

اتخيل اني كنت في جامعة راقية :
قبل ما اجي للمحاضرة اول يوم تجيني رسالة على جوالي : " عزيزي الطالب لظروف خارجة عن الاردة تم تحويلك الى شعبة رقم 1331 " !!

لكن مادام في ناس يقاتلون وراء الجامعة فأنا متفائل ( :

الخميس، 24 يونيو، 2010

مني شايف حاجة !!

قال : " الحرارة واصلة 55 احنا بشر نقعد في هذا الجو ؟؟ " .. على قولة واحد ارحمني ياللي متربي في جنيف !! من يوم ما وجهك مفطوس وانتا عايش في الرياض ما جاك "تنفخ" على هذا الحر الا الحين !! بعدين ما احس عن الحر اللي يتكلموا عنه ! من مكيف الى مكيف .. افكر البس شتوي كل مكان ابرد من الثاني ..

واحد ثاني : " نطالب بتقليص ساعات الدوام في صيف الرياض !! " .. ياحبيبي قلي الرياض متى ما تكون صيف ؟ شهرين بالكثير !! على هذا الكلام ما اشتغلنا ولا سوينا شي !!


المشكلة يطالبوا ان ساعات الدوام تقلص على الموظفين الحكوميين اللي ما ذاقوا الحر .. والعمال كل ما امر الظهر الاقيهم شغالين تحت الـ55 .. وين يابشر حرام عليكم !

يمكن اننا ما قدرنا نتكلم وننقد شي براحتنا الا في هذا الموضوع .. خليهم "ينبسطوا" ويتكلموا شويه الشمس مالها دستور !!

السبت، 5 يونيو، 2010

فأنت هنا ....

سلام عليكم ...

إذا ركبت سيارتك ... و فتحت المكيف على الآخر ... ثم فتحت الشبّاك ... وانتظرت ٥ دقائق حتى يتبدل الهواء الحارق بهواء حار فقط ... ولم يخرجك في هذا الجو في الأساس إلا الإعلان الرسمي بأن درجة الحرارة هي ٤٩.٩ بدلاّ من ٦٠ الحقيقية حتى يستمر دوامك الحكومي ... إذاً أنت هنا !!!

إذا كنت تمشي بالسيارة في طريق سريع ... ثم توقفت الطرق لمدة نص ساعة ... ثم عادت للمسير ... ولم تتحرك إلا قليلاً حتى انشق الكفر بسبب حفريات أو سوء "سَفلَتَه" ... ثم خرجت لتغيير الكفر على جانب الطريق ... وأتتك "دورية" فتوقفت خلفك وبدأ الشرطي يصرخ لكي تسرع حتى كأنه سيغرّمك ..... إذا فأنت هنا !!!

إذا توقفت لدى مسجد او مستوصف في طريق عام و مكتظ بالمارة ... وتركت المسجل اليدوي الصغير في الكرسي الخلفي للسيارة ... ودخلت لمدة دقيقتين وخرجت ... ثم وجدت زجاج سيارتك مكسور والمسجل مرميٌ على الأرض خارج السيارة ... يحسبه السارق جوال ... فأنت هنا !!!

أما إذا كنت تسير في أحد الطرق السريعة ... وهطل المطر لمدة خمس دقائق ثم وجدت النفق الذي أمامك كأنه بحر لجّي ... فأنت هنا !!!

ثم تفتح المذياع وإذا بأحد المسؤولين يتفاخر بنزاهة وشفافيتهم هيئة الأرصاد المحلية ... و بأفضل المقاولين الذين يسفلتون أفضل الطرق ... ويتفاخر بأفضل جهاز مروري الذي يتمتع باللباقة و ذلك لأخذ جميع منسوبيه دورة في آداب الحوار وتقبل الآخر ... وبأفضل الجهات الأمنية التي توفر الأمن والأمان لكل المواطنين في كل أرجاء المعمورة حتى النائية منها ... وتتباهى بأفضل الشوارع تخطيطاً و تنظيماً وتصريفاً للمياه و أكثرها ملائمةً للحالات الحرجة ... وإذا سئل : كيف عرفت أنها الأفضل ؟؟ ... قال : لأننا دفعنا [ " إلخ أصفار " ١٠٠٠٠٠٠٠٠٠٠٠٠٠٠٠٠٠٠ ] عليها فكيف لا تكون كذلك ؟؟

إذاً فأنت حتماً حتماً حتماً هنا !!!

ومع كل ذلك فأنا أحب هذا المكان ليس له بذاته إنما لمن يسكن ها هنا ...

مرحباً بك ... فأنت في الرياض

الأربعاء، 12 مايو، 2010

حديقة الملك عبدالله اخر قائمة تحديثات "أكبر"


كعادتنا نحب " أطول " .." أعرض " .. " أكبر" .. الخ .. مثلا مطار الملك خالد أكبر مطار !! بس لا تسأل اكبر في إيش ؟ اكبر في الخربطة ؟ في الحوسة ؟ في المزاجية ؟ المهم انه اكبر مطار وبس ..


قبل فترة أعلنت وبكل فخر أمانة مدينة الرياض انه بقي سنتين ونصف على انجاز اكبر حديقة في العالم على مساحة 2 مليون متر مربع !! تقرأ المشروع يجيك شعور رائع مو طبيعي لانه حيكون معلم حضاري بمعنى الكلمة .. حديقة سيشار اليها عالميا .. حسب جريدة الرياض فالحديقة :

" في أرض صحراوية قاسية المناخ يجري العمل على تطويعها من خلال توفير الامكانات من حيث التحكم بنسب الهواء والرطوبة والتربة لتلائم العديد من النباتات الاستوائية والشتوية والرطبة التي سيتم جلبها من جميع مناطق العالم لتضمها حدائق الملك عبدالله في وسط بيئي مماثل لبيئاتها الطبيعية "


" تعيد حدائق الملك عبدالله في هذا المشروع الصورة التي كانت عليها النباتات في القرون القديمة في الجزيرة العربية لتقدم فكرة عن الحقب الزمنية التي مرت بها النباتات الطبيعية في بيئتها المحلية، وتنقل في الوقت ذاته رسالة تعريف عن البيئة التاريخية القديمة وتدرجاتها الزمنية التي مرت بها عبر متحف نباتي وحيواني يدمج التاريخ بالطبيعة، ويقدم لمحة تاريخية عن طبيعية المنطقة في الماضي السحيق "


"ويتيح المشروع البيئي الفرصة لاكتشاف وشرح التغييرات البيئية في العالم وشرح عملية التغيير المناخي والبيئي على كوكب الأرض واكتشاف العصور النباتية من العصر الديفوني مروراً بالعصور الطباشيرية وصولاً إلى العصر الحالي من خلال حدائق تعكس التغيرات المناخية في العالم، وتحكي مسيرة العالم النباتي والبيئي كحدائق الكربونيفيوس والجيروسية والطباشيرية والسينوزيكية والبليوسنية " متعوب على الكربونيفيوس والسينوزيكية ( : شي حلو ان الحديقة لها رسالة ثقافية من خلال المتاحف ..


" وتتكون حدائق الملك عبدالله العالمية من ست حدائق تشمل الحدائق النباتية وحديقة الوادي والحدائق العلمية والمائية والدولية والطبيعية. وتنقسم الحدائق الست إلى حدائق أصغر منها وتتفرع عنها كحدائق الطيور والفراشات والزواحف والزهور والضوء والصوت وحديقة للفيزياء والاكتشاف والمتاهة وحدائق خاصة بالأطفال ومتنزهات للعائلات والشباب ومرافق خدمية متكاملة من الأسواق والمسارح والجلسات والمقاهي والملاعب وغيرها، بالإضافة للعناصر التكميلية الأخرى كالساحات الرئيسية للاحتفالات والمناسبات ولإقامة المعارض والمهرجانات وأماكن الجلوس والتنزه ومبنى الإدارة والمشتل الزراعي والمساجد ومجمعات التكييف والكهرباء ومباني الأمن ومراكز التذاكر ومواقف للسيارات التي تتسع لأكثر من 50 ألف سيارة "


وفي حاجة غريبة حتحصل لاول مرة في الحديقة " حيث أُخِذ في الحسبان الأسر الكبيرة أو الصغيرة بالإضافة لمراعاة زوار الحديقة من الشباب " مع ان ما ادري وقتها حيكون في شي اسمو عوايل ؟


عالعموم حيكون شي رهيييب بإذن الله .. وأيضا قبل الاعلان هذا بكم يوم افتتح الامير سلمان مشروع وادي حنيفة بطول 80 كلم وبتكلفة 600 مليون ريال ! بصراحة ايضا شغل راقي وشي يفتح النفس




وعلى فكرة الامير اشاد بالمدونة في افتتاحه للوادي ( :



بس هذا الكلام كان قبل حوالي الاسبوعين وقبل امطار الرياض بأيام قليلة .. وطرح تساؤلات :
- هل نحن بحاجة الى هذه المشاريع والعاصمة غرقت قبل يومين بسبب عد كفاءة واكتمال نظام الصرف الصحي ؟
- هل هذا المشروع له الاولوية على مشاريع اخرى تنموية ؟ يعني هل تشبعت كل حاجات المواطن بحيث يصرف مليار على "حديقة" ؟


التساؤل الثاني ماكان مني .. كان من التعليقات في موقع الجريدة :


الاسبوع هذا كان عندنا بحث مع الجامعة ورحنا زيارة لاجل البحث في مدرسة في حي جنوب الرياض .. بصراحة انصدمت من واقع الطلاب .. كنت افكر دائما بالنهضة وان الامل في الجيل القادم بس الاحلام كلها تبخرت مع مشاهد طلاب هالمدرسة !! مو كان اهم انه يزيد الصرف على تطوير التعليم وتربية الطلاب والبحث بدل انشاء الحديقة ؟

لكن لحظة !! مشكلتنا ان ما احد يسلم نقدنا ورضا الناس غاية لاتدرك ..خلينا متوازنين قليلا .. احيي بقوة في نفس الوقت مثل هذي المشاريع الجبارة وان كانت ليست في اولوياتنا .. على كل حال الناس ما تسكت يعني لو ماصارت هالمشاريع قالوا : العالم حدايق ومشاريع ويالله من فضلك واحنا عايشين على هالثمامة !

الثلاثاء، 4 مايو، 2010

الرياض ما تخرش الميه !!

أشهد ان اللي بنا معامل الجامعة مخلص ,, كنا في عالم ثاني وماحسينا بشي الين طلعنا الساعة 2 والا الدنيا مقلوبة !

الشوارع مليانة ولوحات طايحة وشجر مقلع ... ناس غرقت وناس سبحت وناس فارشه على رصيف الدايري وقاعدة تصيد سمك ,, او ظبان !

مو غريبة ان الشوارع تغرق في ظرف ساعتين ؟
المطر كان كثيف بشكل غير مسبوق ,, الرياض كثير قد جاتها امطار قوية ومتواصلة بس من زمان ما غرقت زي كذا ,, اتذكر اخر مرة غرقت الرياض مثل هذي المرة أيام التمهيدي (يعني قبل 14 سنة تقريبا) وقتها وقفوا المدارس زي هذي المرة واتذكر كيف طرنا من الفرح لما وصلنا المدرسة وقالوا لنا مافي دوام رحنا انا واخواني كل واحد فتح "اللنش بوكس" وبدأنا نفطر في السيارة وبدأت بعلبة الكاكولا الصغيرة (كنا غير صحيين) ( :


بوصول مغرب امس كانت الصور والفديوهات مليانة في الانترنت والناس بدأت تروح تساعد ... تجمعوا شباب وقروبات تطوعية وبدأوا بمساعدة الناس والسيارات الغرقانة .. شي حلو لما تشوف سرعة الاستجابة .. لما تبادر الناس ويكونوا هما الاعلاميين وهم المنقذين وهم الكل في الكل ..

لكن احس ان الناس كبرت الموضوع شويا ,, بيتنا جمب الجامعة وعندي اختبار فما خرجت امس ولاشفت اللي حصل بس اليوم الصباح رحت اشوف ايش اللي صار ..


الدايري الشمالي ما كان فيه قطرة مويه ..


الصورة اللي تحت تبين امس كيف كان الشارع واليوم كيف صار (صورتين لنفس الشارع امس واليوم )





يعني التصريف ماكان سيء بتلك الدرجة ,, ما اقول ان الوضع تماااام بس الوضع أيضا ليس دمار ,, بس الناس نزلت نزلة قوية عالفساد ,, طيب يستاهل الراجل المسكين المدعو "فساد " كل هذا ؟؟
قد نعتبر ما حصل شي شبه طبيعي ممكن يحصل في اي دولة (قبل يومين غرقت مدينة امريكية بسبب امطار ) ,, في البداية ماكنت مقتنع بالكلام ان اللي حصل فساد واعتبرته شي طبيعي ممكن يحصل في اي دولة ,, لكن لما تقارن الاموال المصروفة مع النتائج يحق لك تزعل ,, الامانة بالفلوس المصروفة تقدر تربط على كل بيت "سفينة " نجاة احتياطية استعدادا لليوم الذي ستعود فيه الجزيرة مروجا وانهارا ,,

لما تسمع تصريحات متعالية تتمنى ان يحاسب المسؤولين على فشلهم الاداري وكبرهم الغير مبرر (مدونة سم ون) ,, اللي حصل عبارة عن خليط من سوء تخطيط وسوء متابعة وصيانة وقد لا ينجوا الفساد وينضم الى القائمة ...


فيديو انقاذ سائق شاحنة بعد غرق الشاحنة في احد "المسابح"

انقاذ اطفال غرق باصهم


حصل خير في النهاية كسبناها اجازة يوم وسمعنالنا كم نكته : ( هروب 600 سمكة من عمو حمزة والشرطة تطارد قرش في طريق الملك فهد – مكرمة ملكية : صرف سروال سباحة + لستك لكل مواطن وننوه ان نفخ اللستك من مسؤولية المواطن) غيرنا جو وصارت حاجة مثيرة رفعت ادرينالين عروق هل الرياض ..

الخميس، 15 أبريل، 2010

أكبر مطار في العالم بدون نظام !!


في كل دول العالم ممكن نسمع كلمات مثل " نأسف بسبب خلل فني خارج عن الارادة " .." بسبب خلل تقني غير متوقع " .. " عطل مفاجئ " .. ممكن الواحد يسمع هذا العذر و يتقبله لانه خارج عن ارادة البشر المساكين .. فاحتمال يكون فأر جائع قاعد "يمرمش" سلك الكهرباء الين ما جاب اجله .. احتمال يكون خطأ فردي أدى الى المشكلة .. أما ان يحصل الخلل بالارادة وبشكل ممنهج ومعد له مسبقا و بشكل غير مفاجئ فأهلا بك الى عالمنا ..



ادارة أكبر مطار في العالم مطار الملك خالد الدولي " أطال الله عمر المطار وعافى ادارته" أعلنت وبكل فخر تحديث نظامها الالكتروني ॥ متأكد انهم سهروا نهارات كثيرة لإعداد إنطلاق هذا البرنامج ॥ اهم جزء من الاطلاق الذي يفضله اي مسؤول " قص الشريط .. مع اني ما ادري من وين يقصوا شريط برنامج الكتروني ؟؟ " .. المهم مع قص معاليه للشريط بدأت المشاكل " الغير متوقعة أبدااا !!" .. يومين .. تخيلوا
يومين والنظام الالكتروني عطلان في أكبر مطار دولي في السعودية ..بالعربي يومين والمطار عبارة عن محطة باصات " ومو أي محطة باصات!! ..بس بصراحة أحيي ادارة المطار على بصيرتها النافذة انهم اختاروا تطوير النظام بالذات مع اول يوم من بدأ الاجازة ! ولما اتصل المسافرون الغاضبون بالمسؤول قال لهم المشكلة ليست في النظام لكن في عدم وجود تدريب كافي للعاملين في النظام الجديد .. ليته سكت ..
(لاتفوتكم خطة تطوير المطار على قناة صح باستهبالهم المجنون )




مشكلة التدريب هذي ذكرتني بقصة ثانية في الاخطاء " الخارجة عن الارادة " ..في الحي اللي نسكن فيه بشرونا بكل فخر وحماسة : " مبرووك عليكم حتكونوا أول حي في المملكة العربية السعودية كلها يدخل له ال"واي ماكس" ..شي رهيب لما يقولك في "المملكة العربية السعودية كلها" تحس انك بطل ..سرعة الانترنت عندكم ستصل الى 100 ميغا بايت ..".. تفاجأنا ان حتى خط التلفون العادي مايشتغل !! قالوا لنا لازم نخلص تركيب الواي ماكس في الحي عشان نفتح خطوطكم .. قلنا " صبر جميل " .. وخذلك اكثر من 4 شهور من الصبر الجميل الين مايركبوا الواي ماكس .. شكيت انهم غيروا رأيهم وقرروا يخلونا أول حي عالمي يملك مفاعله النووي الخاص .. المهم في نهاية القصة عرفنا سبب الخطأ " الخارج عن الارادة " واللي استمر حول نصف السنة .. شركة الاتصالات ارسلوا مهندسيها يتدربوا على تركيب الواي ماكس في المانيا واخذوا دورة مكثفة وفي النهاية رجعوا وماعرفوا يضبطوه !! يمكن الالمان نصابين !



وعلى سيرة الاتصالات السعودية ماننسى مشكلة الفواتير اللي قعدت فترة طويلة يمكن حوالي 5 شهور ما انحلت بسبب انهم غيروا نظام الفوترة .. ركبوا مثل المطار نظام فوترة جديد ولسبب أو لآخر النظام "ضرب" عليهم وحاس فواتير العالم وخلا كثير من الناس "وانا منهم" يستجير بموبايلي ...

الناتج ان المواطن البسيط حيكره شي اسمه " تطوير " .. " تجديد" وحيرفع شعار "قديمك نديمك لو الجديد أغناك" .. " الله لا يغير علينا"

السبت، 10 أبريل، 2010

أهل الرياض اكثر اهل الارض انفتاحا


اتوقع انك ما دخلت تقرأ الموضوع الا وانتا تفكر : " الولد بكامل قواه العقلية وهوا يكتب التدوينة !!"


قبل فترة بسيطة أقيم معرض الكتاب في الرياض وتزامن أيضا مع مجموعة كبيرة من النشاطات فجات مجموعة لا بأس بها من الشباب إلى الرياض من الشرقية والغربية وغيرها
أسبوع او اقل من الاسبوع في الرياض قضاها هؤلاء كانت كفيلة بـ"درزن" مقالات و حالات "Status" عالفيس بوك كلها من : " باب ما جاء في ذم الرياض واهلها " ..ما بقي شي في الرياض الا تشرشح خاصة و خاصة تعامل اهلها وانهم منغلقين ولا يعرفوا يتفاهموا !!
ناخذ جدة المدينة "المنفحتة" على قولة أهلها ..الكل يقول اهل جدة منفتحين متفهمين لانهم عالبحر وفي ناس وسفن تروح وتجي فتختلط الثقافات وتقل الحواجز بين البشر ..هذي المدينة جدة من يوم ما خلقها ربنا وهي على البحر ॥ يعني ربنا اعطاها هدية لاااازم انهم يكونوا منفتحين بطبيعة الجغرافية ويحمدوا ربهم على كذا ..
الرياض من يوم ما خلقها ربنا وهيا هيا نفس الصحراء الرهيبة ونفس الطعوس ونفس اللون البني القاتم ॥ مسكينة هالمدينة مساكين اهلها ) :
على كذا اهل جدة او الشرقية ما بذلوا على ميزتهم أي جهد يذكر ॥ بالرغم من ذلك تقدمت الرياض وانفحت كثيرا وتغيرت نفسيات أهلها بدرجة كبيرة وحققوا قفزات رائعة في التغيير الاجتماعي الايجابي في ال100 سنة الاخيرة وينتظرهم الكثير ॥ أهل الرياض لديهم قابلية كبيييرة في التغيير حيث انهم قاربوا ان يصلوا في خلال 100 سنة نتاج الاف السنين مما لدى المدن الاخرى ॥

"إصحكم والرياض " ( :

الجمعة، 2 أبريل، 2010

لو يمسكو إدارة المصمك للقرية النجدية؟؟

اتذكر اخر مرة زرت فيها متحف المصمك لما كنت تقريبا في نص الابتدائي .. زماااان حوالي قبل 10 سنين.. كالعادة لما ترجع وتزور مكان زرته في الصغر تسأل نفس السؤال : " ما كان كبييير ؟ "

التغير الثاني اللي اختلف علي في المصمك كان صدمة بالنسبة لي .. صدمة حضارية ثقافية تاريخية سميها اللي تسميها .. صدمة كبيرة عندما تأتي لتزور المصمك وما تلاقيه اصلا !!

كان باقي ربع ساعة على صلاة الظهر واحنا داخلين من البوابة .. حارس البوابة قال ادخلو بس اطلعو بسرعة ولا تطولو قلنا "سم طال عمرك " مع ان ربع ساعة ما تكفي جدار واحد من جدران المصمك .. لكن هذا كان ظني الخاطئ ... 5 دقايق وطفشت


الاماكن التاريخية تستمد جمالها من التجاعيد .. من عدم الانتظام .. من العشوائية التي تعبر بك زمن الخطوط المستقيمة والاشكال الهندسية شديدة الانتظام الى زمن اكثر تسامحا يعطي تلك الاشكال مجالا بأن تثور قليلا عن الاستقامة المتطرفة ..

هيئة السياحة نحسبهم والله حسيبهم كان عندهم نية حسنة .. سمعوا بالدول صاحبة المعالم التاريخية وسمعو بشغلة يسموها ترميم الاثار ... قالو جيد .. خلينا نتطور زي العالم ونهتم بمعالمنا القديمة "هيا كلها معلمين على بعض" .. أعطو مهمة المشروع لاداري كبير خريج كلية الطيران "احتمال يكون خريج أي كلية ثانية بس مستحييييل خريج كلية الاثار " .. توسموا في هذا الرجل انه لن يسرق اكثر من 5% من قيمة المشروع فقالو توكلنا على الله وسلمو المشروع لصاحبنا ..

صاحبنا بدأ بحماس شديد .. جا على الجدران وقشع كل تعاليم الماضي وغبار الملك عبدالعزيز وحط صبة جديدة لامعة .. شال الارضيات المتعرجعة وركب حجر مستوي تماما ..


ما كفاه كذا وراح حط كل شي ممكن يشتت ذهنك ويبعد فرصة ان هذا معلم تاريخي ...طفايات الحريق الحمراء فاقعة لونها في كل مكان ولاتسر الناظرين ...كاميرات المراقبة وحرص صاحبنا ان ينتقي اكبر نوع كاميرات مراقبة وجدت في التاريخ حتى تصير الكاميرات جزء من المتحف ...برادات الموية النيكل .. الكراسي اللي حاول يجيب اكثر نوع "موديرن" واكثر نوع مايركب مع الجو التاريخي ... فتحات بيارة الله يكرمكم ما فيها اي حس فني .. الانوار "سبوت لايت " !! ما ادري ايش سوا بالضبط بس حااااس الدنيا وقلب المصمك فوق تحت ..

جزاه الله خيرا على ما بذل لنهضة الامة وتاريخها ...بعد ما خلصنا انا وصاحبي رحنا نتغدا في القرية النجدية وهناك فعلا حسيت بالتاريخ !!! لو يمسكو ادارة المصمك للقرية النجدية ؟؟

السبت، 20 مارس، 2010

ساعة عشانك يا أرض ..


" ياعمي ايش فرقت تطفي لمبة الغرفة ساعة .. ماتأثر ياعمي ولا تسوي شي .. والله يضحكو علينا الغرب واحنا نصدق .. (حتى لو دخلو جحر ضب لدخلتموه) .. مخابيل انتو ؟؟ ناس ما تفكر بس تقلد العالم .. يعني ماقلنا لا تاخذو لا تستفيدومن الغرب .. لا نستفيد منهم بس مو في هذي التوافه !! "


هذا عينه من نقاش في الجامعة عن ساعة الارض الذي سينظم لاول مرة في السعودية ॥ كنت أسمع أطراف النقاش بينما كنت في آخر القاعة وقاعد اقرأ في احد المواد .. حماااس كان النقاش .. طبعا تركت اللي بين يدي و"قطيت" مع الجماعة ابغا اشوف ايش اخرتها ( : ..


ساعة الارض .. أقصد ساعة الارض حقتهم وليس الارض حقتنا ..
هما اللي اخترعو المشكلة خليهم يحلوها ... خليهم يستاهلو يتعبو ويعيشو في الظلام لساعة كاملة.. مين قال لهم يسوو سيارات تضر البيئة ؟؟ مين قال لهم يخترعو الكهربا ؟؟ خليهم هذا بما كسبت ايديهم .. وأخو الجهالة في الجهالة ينعم ( :

فكرة ان هذي الفعالية ستفيد الارض بشكل مباشر يشك فيه البعض .. لكن ما اعتقد ان هذا السبب الاساسي لهذه الحملة ..

الهدف هو ان كل واحد يحمل هم البيئة والارض ولديه الوعي الكافي يشارك في هذه الحملة ليوعي من حوله .. شعبنا يمكن يحسب المسيح الدجال قرب يطلع لما يشوف المملكة مطفية الانوار !! خليه يعرف ليش صار كذا .. خليه يعرف ان في شيء اسمو أرض وفي شيء اسمو بيئة ..


الهدف الثاني ان حتى المهتمين بالبيئة مع هذي الحركة سيدركون فجأة انهم نصابين !! كذابين كمان !! مزعجين الناس بالبيئة وبعدين لما تجي هذي الساعة حيعرفو بأي قدر كانو أصحاب شعارات .. يصرخ عن البيئة والسوني حق حمودي شغال 24 ساعة وحمدوي في بيت الجيران !! لمبة الملحق حقت الحمام من سنتين ما ارتاحت !! الجزيرة شغالة لشلة الجن المؤيدين للعدالة والتنمية .. كل انوار الغرف مفتوحة ومافي احد في البيت (ولا يمكن عشان يخدعو الحرامي لما يخرجو كأن في احد في البيت >> معذورين ) .. وغيرها .. حنلاقي اننا كثير من الاشياء الكهربائية شغالة بدون حاجة لها .. في هذه الحملة ممكن نكتشف بعضها ..

حلو نعيش مع العالم بهمومه وما نصير لحالنا ॥ لا نصنع العزلة بأدينا .. اخيرا حتشارك السعودية في يوم الارض هذي السنة ( :


في قروب عالفيس بوك ليوم الارض وصل الى اكثر من 1500 عضو


السبت، 13 مارس، 2010

ياورا الرسم دواهي

امس كان مشروع كبير مع مجموعة اولاد وبنات الرياض التطوعية لنشر الاهتمام بالنظافة شارك فيه اكثر من 40 شاب في 3 فرق مقسمة على 3 حدائق ॥

وصلنا الحديقة مخرج 15 وبدأنا نوزع اكياس للنظافة على الناس القاعدة ॥ بشكل عام النظافة ليست سيئة بدرجة لا تحتمل لكن الفصفص عادم الدنيا ..

المهم واحد من الشباب اقترح اننا نعمل تلوين أوجه للأطفال الصغار يفرحو فيه .. عجبتنا الفكرة وراح اشترى الوان وبدأ هو يرسم على وجيه الاطفال واحنا "نتعلم" على وجيه الاطفال ( : يجيني واحد اقولو ايش تبغى ؟ تبغى ارسملك نجمة ؟ يقول طيب (طبعا ما اعرف ارسم الا نجمة.. وياليتها نجمة زي العالم) ... وأبدأ اشخبط على وجيه الاولاد .. متعة ( :

بعد فترة بدأت احترف النجمة وصرت اطلب من الولد يختار ايش ارسم له (خلاص صرت واثق) .. ياريتني ما تركت لهم حرية الاختيار !! شي يصد النفس .. جاتني نتائج الحرية : واحد يبغى وجهه نص ازرق ونص ابيض (كنت حسوي مقلب فيه وابدل الابيض بأصفر ) ... واحد ثاني يبغى علم فريق الشباب .. بس اللي يلفت النظر مجموعة الشباب الفاضيين في الحديقة جونا وقالنا كم واحد منهم نبغى رسمه (خيييير .. ناس فوق 18 ) .. قلنا طيب ليش لا مافيها شي .. قلت لواحد ايش تبغى قال ارسم اي شي .. قلت طيب بأرسملك شجرة (هههه ورطت الرجال ) .. قال لا لا .. يعني قلب مثلا .. قلت طيب ولا تزعل رسمت له على خد قلب وعلى خد شجرة (أصريت اني ارسم له شجرة ) .. بعدين قال ابغا حرف الـ E على جبهتي قلت طيب.. بعد ما خلصت جاني يجري بعد دقيقتين : " امسحها امسحها .. انا اسمي عبدالرحمن وانت راسم حرف E " قلت طيب انتا قلت لي ارسم هذا الحرف .. قال لا في حرف ثاني هوا اللي يبدأ فيه اسم عبدالرحمن ايش يقال له ؟؟

ابسط الاشياء مثل الرسم قد تعكس جانب من اهتمامات وتفكير الشباب .. ويا ليتها ما انعكست هذي الاهتمامات الرهيبة

الجمعة، 12 فبراير، 2010

انتبه من الاجنبي اللي جنبك .. تراه اجنبي !!


الاسبوع الماضي نزلت جريدة الرياض خبر عن اخر تعداد سكاني للرياض ..الصراحة انفجعت من الرقم ..صرنا تقريبا 5مليون !! اتذكر لما كنا ندرس جغرافيا كانو8مليون سكان القاهرة رقم مهول بالنسبة لنا ..مبرووك قربنا منهم ..مبرووك قربنا نصير نفس زحمتهم ..




أكثر ما لفت نظري التعليقات !! تشوف بعض التعليقات تقوم تسجد شكر لله على نعمة العقل ...ياليت عندنا مشروبات "روحية" في السعودية كان قلنا يمكن الجماعة شربو كثير ودخلو موقع الجريدة في آخر الليل ...بس ايش اسوي ...مافي مشروبات ولا فيه روح !!


شوفو بعض التعليقات



الله الله عالسلام ...الرجال سامع بالغزو ...سامع بهتلر وموسيليني ॥اول اسمع اننا لسنا في سلام !!





وهذا باين مسكين ماقدر ينام الليل يفكر في حال الامة وفي النسب المروعة ...جزاك الله خير ياعم على الحرص ...الامة ستنهض على يدك ياعزيزي


"كلها من هالاجانب الله يقلعهم هذا النظاميين والغير نظاميين دبل الدبل ..صراحة صرنا أغراب في وطننا هالاجانب قنابل موقوته ويجب ابعادهم أكلو الأخضر واليابس عل أبناء البلد.. مسيطرين على كل شي وابن البلد حده حارس أمن ..متى نعيش بسلام بدون هؤلاء الاجانب "

هذا معصب مرا ...أهم شي الاخلاق بس باين القضية ما تستحمل اخلاق ...فيها أخضر ويابس وقنابل (أما مادخلت مخي أكلو اخضر ويابس ...بالله احد يوريني وين الأخضر اللي أكلوه !! ) ...على سيرة قنابل اسهل طريقة نلفقلهم تهمة ارهاب ونرتاح منهم هذول اللي سيطرو على البلد ونشر الرعب والهلع والقنابل ..





"المقيمين أصبحو يقيمون وأسرهم بصفة دائمة في البلد بعضهم له 40سنة وأبنائهم يتودعدون بأخذ حث المواطنة وسيصبحون سعوديين شئتم أم أبيتم وسيصبح هناك خلل في التركيبة السكانية والله يخلي تجارة الفيز ويربح من يتاجر فيها والله يزيدكم من الأجانب ، متى نصحى ، متى نصحى حتى تضيع البلد مثل فلسطين"

هههههههههه اما هذا خلاني من جد أضحك ...من جد متى نصحى قبل ما نصير مثل فلسطين ...ايش شايفنا جايببين يهود ؟؟ والله كشفت مخطط استعماري خطير ...شكرا عالتنبيه




الملاحظ عندنا أننا نجيب الاجانب عشان يخدمونا ويعيشونا حياة 5نجوم بعدين نقول ما نبغاكم وخربتو بلدنا و ...و...و .....ما تبغاهم عزيزي المواطن ببساطه رجعهم لبلدهم .. ما في أحد ضربك على يدك وقال لازم تخلي سواقك الاجنبي ...ما تبغى الاجنبي تكرم سيادتك والبس لبس المطبخ وسوي كيك لعيالك ووصلهم كل يوم المدرسة الصباح ...

احنا عجيبين ...نحضر الدوام متأخرين ساعة ونمشي قبل بساعة ونفطر ساعة ونقرأ الجرايد ساعة ونقرا الايميل نص ساعة وبالاكراه نشتغل نص ساعة -وياليتها شغل تمام - وناخذ مرتين قد الاجنبي ونقول غزونا وأكلو الاخضر واليابس ...ياعمي كلو كلو الله يعطيكم العافية لولا الله ثم أكلكم كان لا احنا اكلنا ولا انتم ...



كل العالم يعتمد على الاجانب في مشاركة النهضة ...الا احنا نخاف منهم ونحتقرهم ونعتبرهم خطر يهددنا ...لازم نفهم أن الانسان اللي يجي من الخارج ويعطى راتب هذا مو تكرما منا وفضلا ومنة ...هذا حق له مقابل اللي يبذله ...وأنه أصلا ما جاء الا ليكمل نقص محتاجينه ..

الجمعة، 29 يناير، 2010

مع آلة محطة !!

حلوة الحركات الصغيرة اللي ماتكلف شي وتزيد الحب والود في المجتمع ॥ خاصة لناس ما قيد احد كلمهم ولا عبرهم ولا اعطاهم وجه وكأنهم مو موجودين اصلا !! هذا اذا سلمو من شرنا ..

ما ادري ليش جا على بالي اشتري حلاوة توفي الجمعة الماضية !! فترة طويلة ما اشريتها بس افتكر اني كنت حريص اني اشتريها كل فسحة في سنوات الابتدائي ॥



المهم اني اشتريها ونسيتها .. بعد يومين كنت في محطة بنزين وقلت لراعي المحطة عبيلي 95 فل (احلى يا كاااش .. بس على فكرة ما ادري ليش الناس تعبي كل يومين بعشرة .. ما اظن ان في حراميا في الليل تسرق بنزين من خزانات سياراتنا !! والوقت اللي حتضيعو كل يومين توقف محطة يمديك بدالو تزيد فترة نومك نص ساعة اسبوعيا) .. عالعموم لما الرجال كان يعبي اكتشفت التوفي المختفية في جيبي ولقيت حبتين .. حطيت حبة في فمي وقلت ليش ما اعطي الرجال حبه !! المهم بعد ما عبا بنزين ناولتو الفلوس وفوقها حبة توفي .. الرجال سحب الفلوس من فوق حبة التوفي وجا يمشي (شكلو ما قيد احد أعطاه شي .. شك بالموضوع ( : !! ) .. قلتلو خذ حلاوة .. الرجال ما صدق وفجأة ضحك واخذها : ( شكرا .. شكرا ) ..
والله بعد ما شفت ردة الفعل قررت اني اشتري دايما توفي واخليه في درج السيارة علشان عمال المحطات ( واحيان علشاني ) .. 12 حبة توفي بريال .. تخيل قد ايش بريال واحد بس تقدر تفرح 12 عامل محطة .. تخيل كيف حيأثر هذا على العلاقة بيننا وبين العمال وكيف حيحسو انهم بين اخوانهم !! والله انهم مساكين ما أحد يعطيهم وجه ولا كأنهم بشر !! كأنهم مجرد آلات تصب بنزين ..

الأحد، 24 يناير، 2010

الإسعاف الطائر .. واللقافة الطايرة !!


دايما أسمع أننا لازم ما ننقل الشي الغربي الى بلادنا بدون ما نعدل عليه ॥ يقولو إننا لازم نراعي مجتمعنا ونعدل الشي اللي نجيبو بحيث يوائم المجتمع ॥ مع كذا كان كل هذا الكلام نظري ... الين صار اللي صار أمس !!



ومن إحنا صغار وكنا نتفرج على "ريسكيو 911 " وكيف يجي الاسعاف الجوي (طيررران من جد) ويروح ينقذ الحالة ॥ عندنا كانو حيحتفلو أمس بأن هذا المشهد حيتحقق أخيرا .. بس هيهات ... ما تمشي هذي الحركات والسماجات البايخة على الشعب السعودي !


أتخيل طيار الهلكوبتر فرحان ومتحسمس عشان ينقذ أول حالة له في دايري الرياض ॥ يقلع بسرعة ويهبط على طرف الدايري في الأرض الفاضية ويقول يا سلااام وصلت بعد 6 دقايق من الحادث بس .. أشوى أن مافي خريص فوق !! الفريق الطبي نزل بسرعة وراحو للمصاب واستغربو بقوة لما شافو مشهد غير مسبوق في المجتمع السعودي : الناس مو متجمعة حول الحادث .. المهم جابو المصاب بسرعة للطيارة .. ووقتها عرفو سر عدم تجمع الناس حول الحادث : الناس لقت شي جديد شد انتباهها أكثر من الحوادث اللي بتصير كل يوم >> الدنيا مقلوبه عنده الطيارة والناس كلها قاعدة تتأمل في هذا الشي العجيب اللي يقدر يطير زي طيور القنص !!


طيار الهلكوبتر دخل بسرعة للطيارة وهوا يزعق : (بعدووووو ) ॥ قعد على الكرسي وقال بسم الله وحط المفتاح و"شغل" الهلكوبتر .. جا الطيار يبغا يطير بس ماقدر الناس ملصقه حول الطيارة .. شكل الطيار حاول باستماته أنه يوخر الناس عن طيارته بس ماقدر .. 25 دقيقة وهوا يحاول يبعد الناس بس ماقدر ... في النهاية رضي بالامر الواقع وقال خلاص خذو مريضكم بأقرب سيارة إسعاف !!



وهكذا تنتهي القصة ببساطة ويذهب المصاب بسيارة الاسعاف .. والفضل بعد الله للقافة شعبنا هذي اللي تقطع القلوب وتجيب تشمع الكبود .. أنا أقترح على الهلال الأحمر انه يجمع كل طياراته ويصفها في الدايري الاسبوع الجاي الين ما يمصو كل اللقافة اللي في عروق الملاقيف هذول .. حتى لو اضطرو انهم يمثلو حوادث لان شعبنا ما يرضى باللقافة الا اذا كانت ذات اثارة مرتفعة !!

رابط الخبر على جريدة الرياض

الجمعة، 15 يناير، 2010

الحق الملايين بتطير !!

كلمني صاحبي من الشرقية قالي عندي مشروع "حياتي" مهم وفي واحد ابغاك تقابلو اليوم عشان يعرض عليك الموضوع ॥ قطعت شغلة عندي بس عشان أشوف ايش هذا الموضوع لاني تحمست صراحة ॥ رحت في كوفي واسع وسقفو مرتفع ويفتح النفس .. كنت مستعجل وقلتلو بسرعة الله يخليك وقالي طيب (مع انو في النهاية ومع الاستعجال اخذ عرض الفكرة حول الساعة !!) .. بعد ما تعرفنا عالسريع مسك القلم وبدأ يكتب على الورقتين اللي جابها معاه .. بدأ يشرحلي فكرة "البزنس" هذا وقالي حتطلع بعد 3 سنين ومعاك مليون وميتين الف من هذا المشروع يعجبك ولا لا ؟؟ تحمست معاه .. قلت طيب اديني ايش الفكرة .. قال لا وأزيدك أن المشروع دا ما يحتاج تفرغ يكفيه كم ساعة في الاسبوع .. قلت والله شي كويس ..

هيا عبارة عن شركة آسيوية اسمها المخصر IQ تبيع لك منتجات من الانترنت تشتريها ويشحنولك البضاعة بالـ ( دي اتش ال) .. طريقة الربح في هذا المشروع كالتالي .. الشركة هذي ما لها أي فروع ولا اعلانات وتبيع في كل العالم وتعتمد في تسويقها على الزباين العاديين زيي وزيك .. ببساطة أنا حقول ليش الزباين يتحمسو يسوقو منتجات هذي الشركة : الشركة تعطي نسب كبيرة ومتضاعفة لو سوقت منتجها ..
ركزو معايا ... أجي أنا مثلا وعرض عليا شخص منتج هذي الشركة .. عجبني المنتج فأروح أدخل لموقع الشركة وأفتح لنفسي حساب في موقع الشركة واختار البضاعة واحط اسم المستخدم اللي دلني على المنتج .. المنتجات تبدأ من 600 دولار (يعني تقريبا 2400 ريال) فأنا اشتري المنتج ويروح للي دلني على المنتج 40 دولار (تقريبا 150 ريال ) .. أنا اروح اعرض المنتج على واحد ثاني وهوا يشتري وتجيني 150 ريال وتروح أيضا 150 ثانية للي دلني عالمشروع.. ولو صاحبي اللي دليتو على المنتج راح باع لـ6 اشخاص مثلا حتجي للشخص اللي باع لهم (150 * 6 = 900 ريال ) وتجيني انا 900 ريال لاني انا بعت للشخص اللي باع للـ6 أشخاص وتروح للشخص اللي باع لي 900 ريال .. هذي الفكرة بشكل مبسط الا انها اعقد من كذا عشان تضمن للشركة أبراحها ..
أنا تحمست للشغلة ॥ لاني خططت أني حأدفع 2400 ريال واعرف واحد من اصحابي فنان تسويق ماشاء الله ويحب الشغلة فأبيع عليه وهوا ينطلق ويشتغل ويبيع وبعد كذا أنا أبدأ اخذ ارباح وانا قاعد في البيت داخل الفيس بوك !! قلت للي قاعد يعرض عليا المشروع اني حسوي كذا ( أرمي الشغل على واحد فنان تسويق) بس قالي لو شفت أول ألف دولار دخلت حسابك حتبدأ تبيع لناس زيادة عشان تخلي الالف دولار ألفين !!


تحمست أكثر وفي الليل قلت لأخويا عالموضوع ॥ قالي في شيوخ حرموها بس ما يتذكر ايش وجه الحرام فيها لان الناس ما صارت تشتري منتجات الشركة عشان نفس المنتجات بس عشان تدخل في هذا البزنس!! أنا بعد كذا قعدت أفكر قلت معقول لو كان هذا البزنس حرام ولو ماكان حرام فهو بزنس غير منتج والناس أبدا محا تستفيد شي بالعكس كل واحد يربح من خساير الناس الثانية لان في النهاية لازم ناس حتخسر على حساب الناس اللي حتربح !! وغير كذا اوقات الشباب قاعده تضيع في شغلة غير منتجة !

هذا البزنس منتشر خاصة في جدة وبدأ ينتشر في مدن ثانية حتى ان قبل فترة كان في محاضرة عن المهارات في التسويق لهذا البزنس يقول اللي عرض عليا المشروع ان حضروه 1200 واحد !! والغريب انك تحس ان كأنهم نوادي سرية ففي كل مدينة لهم مقهى معروف خاص بيهم يتجمعو فيه !

الأحد، 3 يناير، 2010

يا زمن التماسيح ...

عن مجتمع الاولاد اللي عايش فيه أتكلم لاني ما ادري عن النص الثاني !!! بس اتذكر انه عندما كانت تقال هذي الكلمة المؤلفة من حرفين تتسع العيون و تدور العقول تفكر : " ايش يبغا هذا ؟؟ ايش يقصد ؟؟ " ... بس نادرا ما تتسع عيوننا او تدور عقولنا لان ما نسمع هذي الكلمة الا في السنة مرة في موقف مشبوه! احنا عمليين بدرجة كبيييرة جدا حتى ان ما عندنا وقت للعواطف ؟؟ ما ادري احنا نكره بعض ولا مو عارفين نعبر ؟؟

حرف الحاء + حرب الباء ... من الكبائر !! انتبه لا تقولها الا بعد الحيطة والحذر ... تفقد وتأكد ان ما في احد يسمعك ॥ وبسرعة قول الكلمة قبل ما يمسكك واحد متلبس بالجريمة ... حتى لو كان عندك شعور فطري اللي موجود عند اي انسان في العالم وتحب شخص انتبه لا تقول هذا الكلام الا بعد تمهيد طويل ... الحب يوضح من التعامل فما في داعي تقعد تسويلي رومانسي ! والافضل اذا تحب واحد حاول تلمحلو وتوصل المعلومة هذي بأي طريقة الا انك تقول كلمة السر ! عيب !

عايشين في بيئة حساسة جدا لهذي الكلمة ... فالواحد يسمع عن الحب ويحس انو محروم ما يحب مع ان حياة الواحد ما تستقر الا اذا حب وأدرك انو يحب !! حياتنا كلنا مليانه حب بس المشكلة اننا فاهمين الحب غلط ونخاف اننا نعبر عنو !! فكرت اني حطبق مفهوم الحب الحقيقي الشريف والواسع بكره فحشتري وردة حمرا ونطلع انا وسيارتي اللي احبها "لوحدنا" نخلو في البر ( : "واحد مررا فهم الموضوع تمام "

كأننا عايشين في صحراء قاحلة ... الكلمات الحلوة ما تنقال الا بالسر ॥ مع ان من سنة الرسول اننا نقول : " اني أحبك في الله " .. والقول الحسن من الاشياء اللي نتعبد الله فيها ..

شايف ان في تطور في قدرتنا على التعبير عن مشارعنا على حقيقتها بس لسا في حساسية ... مشكلة ان هذي الحساسية تخلينا نعيش مجتمع جاف من جهة وفي نفس الوقت سهلت هذي الحساسية للبناء العلاقات غير نبيلة تشغل الوقت والذهن !