الأربعاء، 28 أكتوبر، 2009

ياساهر الليل !!

نظام ساهر وما ادراك ما نظام ساهر ... على اسمو والله .. محا يخلينا ننام بس حنقعد نفكر كيف نسدد المخالفات اللي جاتنا ... اول ما تعدي 120 يصكوك بمخالفة !!

مع ان النظام له ميزات كثير منها انو يتعرف على اللوحات اللي تمشي يعني يقدرو بسرعة يلقطو السيارات اللي ملبغ عليها انها مسروقة بالكاميرات بس حيتعبنا احنا الناس العاديين اللي ما لنا ومال البلاوي الله لا يبلانا !!

انا اعترف ان السرعة خطر ... بس الضغط والسكر اللي من الزحمة برضو مو بيقتل ناس كثير؟؟ ابشركم اني اتوقع تطلع امراض جديدة مع نظام ساهر ... الزحمة تزيد فيعني بدال ما يموت واحد من حادث يموتو 10 من الضغط ...
العالم والصناعة والسيارات بتتطور واحنا لساعنا على 120 ... السيارات صارت تجيب 300 واحنا 120 ... المانيا بتفتح خطوط بدون حد سرعة واحنا 120 ..

المشكلة مو بالسرعة المشكلة كيف احنا نسوق ... نفسي بس يمسكو اللي يسقط في الاشارات ... يمسكو اللي يسقط بقوة على الناس ... اللي يقطعو اشارات ...

برأيي انك تسوق بسرعة مو معناها ان سواقتك مو متحضرة او خطرة ... انك تسوق بعفاشة وتغلط على خلق الله هذا التخلف والخطر بام عينو حتى لو انك ماشي 20 !!

الأحد، 18 أكتوبر، 2009

نشاطات بكرة الاثنين ..

بعد ما رجع طلاب الابتدائي هذا السبت ... بدأت كل الامور في الرياض تعود لطبيعتها من جديد .. الزحمة رجعت ... وبدأت الفعاليات من جديد ... اكتشفت انهم اهم ناس في البلد ..

الاسبوع هذا في فعاليتين ممتازة للي يستطيع الحضور ... المشكلة انها كلها بكرة " الاثنين " :

الاولى : تستضيف مكتبة الملك عبدالعزيز في مقرها في مركز الملك عبدالعزيز التاريخي الشيخ سلمان العودة ضمن سلسلة محاضرات " تجاربهم مع القراءة " ... زي ماقلنا يوم الاثنين ... من الساعة السابعة والنص الى ما يخلصو وما ادري متى صراحة حيخلصو !! الحضور مفتوح للرجال والنساء ... و ابشركم ترى موجود بوفيه معجنات وعصيرات بعد المحاضرة للجيعانين ( : ... انصح بالمحاضرة انا حضرت العام الماضي في نفس السلسلة مع الدكتور خالص جلبي وكانت حلوة وكان فيها توصيات على كتب حلوة ..

الثانية : تبدأ " ديوانية دار الامة " فعالياتها غدا ... الديوانية هذي ديوانية ثقافية شبابية للمهتمين بالثقافة والفكر ... الديوانية كل ثلاثاء باستثناء هذا الاسبوع الاثنين اللي حيستضيفو فيه الباحث الفرنسي باسكال مينوريه -باحث في مركز الملك فيصل للدراسات والبحوث الإسلامية- والندوة عن دراسة اجتماعية للشباب من الساعة 8 وربع الى 10 وربع ... وهذا رابط القروب على الفيس بوك للي يبغى معلومات زيادة ...

لا تخلو القطار يفوتكم ( :

السبت، 10 أكتوبر، 2009

خليها " ..... "

" لوجود عملاء جاري خدمتهم ... سوف يستغرق الرد عليك عشرطعشر دقيقة " .. دايما تصيرلي فأحط الجوال على السبيكر وانتظر الى ان يتكرمو ويتمننو ويردو على اتصالي وتساؤلي ... يا ناااس انا عميل وتخدموني بفلوسي ... لا معليش !! احنا هنا ما عندنا هذا المبدأ اللي يقول اخدمني بفلوسي ... هنا تدفع فلوس عشان تكشيرة موظف او لطعة سماعة !! احمد ربك انهم يخدموك اصلا ..

على العموم اليوم صارت مفاجأة وردو على طووول !! بعدين تذكرت ايش اللي حاصل ... اليوم الموظفين يهشو ذبان ... باين الحملة نجحت على الاقل ان عدد كبير من الناس التزمت بيها وخف الضغط بوضوح على 902 ..
تطور الوعي بحقوق المستهلك المسكين الغلبان هالسنتين كثييير .. الناس انبسطت وأخذتها حلا كل ماصار شي قالو يلا : " خليها تخيس " ... يلا ... " خليها تصدي " .. يلا .. خليهم يتعلمو اننا بشر لنا عقول ... نقدر نفهم على الاقل !! بس ما ادري هل استجابة الناس لزي هذي الحملات عشان حقوقهم ولا " خلينا نجرب " زي سالفة المظاهرات !! حملة مقاطعة الاتصالات السعودية صار فيها نقلة نوعية شوية .. مقاطعة شي استخدامو اساسي ويومي وكل شرائح المجتمع تستهلكو ... ومقاطعة ايضا سريعة وخفيفة " مقاطعة ابو يوم" اللي تمكن قدر اكبر من الناس تشارك فيها ..
هذي الحملة صارت اساسا عشان اللخبطة اللي حاصلة في نظام الفواتير حقت الشركة ... في رأيي مو المشكلة ان تصير في لخبطة في النظام .. المشكلة في تجاهل وعدم تقدير للعميل صراحة ... المفروض شركة الاتصلات على الاقل تعلن شي رسمي ان في لخبطة وتقدم اعتذار " يدونا 1000 دقيقة مجانا مثلا " .. اعتذرو على الاقل يا أوادم ... من كثر اللخبطة الحاصلة صاحبي حول من الاتصالات لموبايلي من سنتين والحين جاتو رسالة من الاتصالات بفاتورة 30 ريال !! أهلا وسهلا ( : ...

انا عن نفسي طلبت التحويل لموبايلي من اسبوع ... هيئة الاتصلات يبغالها 8 ايام عمل علشان يحولو الجوال من الاتصلات لموبايلي .. حشا حسيت اني طلبت نقل ملكية الشركة بكبرها !!

شي جدا ممتاز ان الناس صار عندها وعي و تعلمت كيف تضغط لتاخذ حقوقها بشكل سلمي جدا وبدون شوشرة .. وهذا المفروض ..

الاثنين، 5 أكتوبر، 2009

الله يرحم ابونا ابو مطرقة خشب كان رجال طيب !

قعدت افكر في اجدانا اللي عاشو في العصر الحجري ... كيف حياتهم كانت بريئة ومسالمة الى حد كبير ... اتوقع ان الأرض تترحم عليهم صباح مساء وعلى الايام الحلوة اللي عاشتها تحت حكومتهم الرشيدة ... كان الانسان الطيب يقوم الصباح يزرع الارض ويحرثها ... ولو صار هذا الانسان مررا شرير ومخربها وما كان نباتي يمكن يصيد غزال لعائلتو الكريمة ويشويه ويتغدو عليه تحت ظل شجرة ... ايااااام حلوة ( :

الحين لك الحق يا أرض انك تتألمي ووتحسري على حبيايبك الطيبيين وأيامهم الحلوة ... الارض يرتفع ضغطها لما نقول عن اجدادنا انهم متوحشيين نقول " الانسان في العصر الحجري" ... ياللي عايشين الحين تراكم ماخذين في نفسكم مقلب .. انتم البشر الوحشيين وياطيب الحجريين ... انتو ما تستحقو لقب الانسان المتحضر ..انتو ما ينقال عنكم الا سفاحين ... اياديكم تتلطخ كل يوم بدمي الأخضر !!

لو نفكر شوية في حياتنا اليومية ... أقدر اشبه نفسنا بآلة تقوم الصباح لتخلف ورائها أطنان من المخلفات ... هل سألت نفسك يوم من الايام انا ايش سويت لهذي الارض ؟؟ يا عمي خلاص بلاشي تحرج نفسك ... مو لازم تسوي شي ... اذا حسيت في انك مذنب على الاقل حاول تكف شرك :

كل يوم الواحد اكيد يدخل بقالة والا يشتري اي شي ... يطلع من المحل بكيسين ولا ثلاثة وبعد ساعتين الاكياس والعلب تنرمي في الزبالة وتقعد الارض تعاني من كيسك هذا ملايين السنين الين حضرة الكيس يتحلل بعد ما "يبط كبد الارض" ... يا انسان ياطيب ما فكرت انك تحب الارض و تتلطف وتنتظر سيارة الزبالة تمر على بيتكم وتجمع البلاستيك في صندوق والاوراق في صندوق وتعطيها للعامل وتقولو هذا ورق وهذا بلاستيك يصير العامل وبيد باردة وقدام عيونك يكبها في الشاحنة مع باقي الزبايل ويعلمك كيف المرة الجاية تسوي نفسك مهتم بالبيئة !! احنا في السعودية ( :

عشان كذا احنا يبغالنا ما نورط نفسنا من البداية في هذي الاشياء لانك لو استهلكت شي في هذي البلد محا يروح لاعادة تدوير ... حينضم الى جبال المخلفات اللي ما لها غير الله ثم الزمن !!في فكرة سهلة وبسيطة وما تكلفنا اي شي .. الفكرة ببساطة اننا يوميا بنترك مخلفات اشياء ما نحتاجها ... مثلا رحت البقالة وطنت في راصي ابغا حبتين لبان ابو بسة "طبعا هذا الاسم المحترم " .. اديت الرجال الفلوس راح حطلي اللبان في كيس ... حبتين لبان في كيس زي كأنك زي ما يقولو " ترمي سرك في بير " ... تضيع الحبتين في الكيس .. طيب ليش الكيس ياعمي !! زي كذا احيانا نقدر نستغني عن الكيس بكل بساطة : اشتريت واحد حليب المراعي شيلو في يدك ... لو كل واحد قدر يوفر يوميا كيس كان وفرنا في اليوم ملايين الاكياس !!
في أفكار كثير ممكن تساعد اننا نصير اقل شراهة في الفتك بالارض .. ممكن نتكلم مرة ثانية عن بعضها ..