الثلاثاء، 31 مارس، 2009

تحت رحمة الغبار

ما زلنا في الرياض خلال هذه الأسبوعين...نتلاقى مع الغبار أحيانا ونفترق أحيانا
سأكتب هنا عن بعض آثار الغبار على الحياة اليومية :
1- بلا شك أن نفسيات الناس هنا تتأثر بالغبار بشكل عام،تقابل كثير من الناس،فأول ما تقابله تكون الكلمة الأولى:ايش قصة الجو هذا؟!!...طبعا تقلب الجو في الرياض وبشكل سريع أصبح أمرا ملحوظا
2- "مصائب قوم عند قوم فوائد" لاحظت أن بعض المدارس يوم الأربعاء الماضي ألغوا منذ الصباح اليوم الدراسي..اظن أن هؤلاء الطلاب خرجوا ممتنين للغبار.
3- انتشرت الكمامات الخفيفة بشكل ملحوظ،أبناء هذه المنطقة كانوا يواجهون العواصف بدون أي استعدادت،لأنهم تعودوا عليها،لكن الزمان تغير.
4- انتشرت صور الغبار الأولى وبشكل سريع على الإيميلات،لدرجة أن البعض لم يعلم أن خارج نافذته عواصف بهذا الحجم إلا من خلال الإيميل.

لا اريد أن اطيل..أحببتها تدوينة خفيفة ،مفتوحة لإنطباعات القراء عن أجواء الحبيبة الرياض.

الثلاثاء، 24 مارس، 2009

تجربتي مع القراءة - د.خالص جلبي

اليوم كان فيه محاضرة للطبيب والمثقف الدكتور والكاتب في جريدة الاقتصادية خالص جلبي ... وكانت محاضرة نظمتها مكتبة الملك عبدالعزيز تكلم فيها الدكتور عن تجربته مع القراءة ...

حقيقة عجبوني مكتبة الملك عبدالعزيز ... تعرفو ليش ؟؟
لأنهم عارفين قيمتهم وقدرهم وعارفين كم واحد حيجيهم ... فحطو المحاضرة في قاعة صغيرة ومرتبة


(للأمانه في صف كراسي ورا)


... مو زي بعض المحاضرات اللي يحسبو ان 100000 واحد حيجي فيحطو الفعالية في مسرح الاوبرا وآخر شي ما يجو الا عشرة ... خمسة منهم هما منظمين المحاضرة ... واثنين اصحاب المحاضر ... واثنين جايين للبوفيه ... وللأمانه واحد جاي يستفيد !!

المحاضرة كانت حلوة وممتعة ... وأبرز مافيها :


أفكار حول فن القراءة :
1- الكتاب الجيد هو : " الكتاب الذي تخرج بروح وتفكير آخر بعد قراءته " .
2- إعادة قراءة الكتاب الجيد : حتى يهضم ويصبح جزءا ثابتة في تركبيتنا المعرفيه .
3- يجب ان نقرأ ونؤسس انفسنا في كل فرع معرفي ... ثم نتعمق فيما يستهوينا ... حتى نقوي قوة الربط والاستشهاد والاستنتاج الصحيح ..
4- استخدام القلم وتدوين الافكار الجيدة مع ارقام صفحاتها في اول صفحات الكتاب الفارغة ..
5- اذا لم نفهم موضوعا فلنحاول الرجوع اليه بعد النوم .... فالعقل يعمل ويحلل المعلومات أثناء نومنا ...
6- قانون ديكارت : " لا تقرأ ما يكتب عن العظماء – ولا بأس - ... بل اقرأ ما خطته ايديهم " ...


وهناك بعض الافكار الأخرى :


- حتى نصنع طفلا قارءا ... علينا ان نبدأ معه اولا بالقصص المصورة ... ثم الروايات المشوقة ...

- كانت مشكلة الثقافة سابقا في شح المعلومات ... والآن المشكلة في فيضان المعلومات !!

- نحن نحتاج الى العقل النقدي اكثر من النقلي ... ونستطيع ان نبني ذلك عن طريق القراءة في الآراء المتباينة (مع التسلح بسلاح المناعة الفكرية) ... لذلك يرى الدكتور انه يجب ان لا يصبح هناك منع او رقابة الا على الكتب الاباحية ..

- "عندما يعمل العقل ... ينعدم العنف " ...



والدكتور جزاه الله خير طرح أسماء كتب أساسية مهمة وهي اللي غيرت تفكيره ( يسميها "كتب صادمة " ) ... وهي كثيرة ... بس منها كتاب محمد اقبال " تجديد التفكير الديني " اللي قراه الدكتور 20 مره ... مقدمة ابن خلدون ... رحلة ماجلان ... تاريخ البشرية ... سيرة حياة عبدالرحمن بدوي ... طبائع الاستبداد ومصارع الاستعباد لعبد الرحمن الكواكبي ... وغيرها ...


وطبعا ... اختتم اللقاء ببوفيه .... واللي لولاه ما جيت ولا جا عشرات زيي ( :

الأحد، 22 مارس، 2009

اجنبي في الرياض !!

يحكي لي مدرسي المصري عن معاناتهم كأجانب في السعودية ... طبعا ما بقي ناحية الا وفيها معاناة حكالي عنها ... من الدراسة الابتدائية الى الجامعية ... الى الجيران والبيئة الاجتماعية ... وطبعا الجانب الاقتصادي والتفرقة في الرواتب ...... والمسلسل مستمر ...


بس حكاني قصتين خلتني كل ما اتذكرها اضحك ...

مدرسي هذا ساكن في سكن ما وجمبو جيران (لا والله ) ... المهم يقول ولد امام المسجد جا لأولادي ماسك عصاية ... ( تتوقع يضربهم !! ولا يكسر روسهم !! ) .. لا ما يقدر لانو اصغر من اولاد مدرسي .. وأولاد مدرسي ماشاء الله عصبة وهوا واحد ... طيب ايش سوا ؟؟
مسك العصاية وقعد يجري وراهم بالعصاية : ( هش هش يامصري ... هش يامصري هش ) ... وقعد يجري وراهم وكأنهم غنم ابوه !!


والقصة الثانية يحكيها عن زميلو المدرس المصري ... يقول كان في مشكلة بسيطة بينو وبين واحد سعودي ... والسعودي معصصصصصصب ... بس مو عارف ايش يقول !! راح طالع فيه يحاول يطلع شي يتمهزأ فيه بس مالقي ... قال : ( أنت .. أنت ... أنت ... أنت يا مصري ) !!
يقول مدرسي وهوا يضحك طيب انا مصري .... وبعدين ؟؟ ولا مصري معناها جني خبيث !! ولا ابليس ملعون !!

تخيل نفسك انك اجنبي ... هل تتمنا انك تعيش في السعودية ؟؟
اقل الحقوق ... الاحترام ..
(القصص منقولة بتصرف)

الخميس، 19 مارس، 2009

هذي عقوبة .. لا تسيء الادب ..

المواقف في السنة التحضيرية في جامعة الملك سعود منظمة بحيث كل طالب له موقف محدد و برقم معين و يعطى بطاقة تدل على ان هذا موقفه ... انا استأجرت موقف بسعر رمزي ميزته انه قريب ... بس قبل يومين جيت وانا مستعجل عشان عندي حصة انجليزي (حقون الجامعة يسموها محاضرة بس انا الى الحين اسميها حصة !!) ...
دخلت المواقف ورحت الى موقفي و الا الاقي واحد موقف في موقفي ... انا حقيقة ما عرفت ايش اسوي ... اقدر مثلا اوقف في اي موقف ثاني بس وين ما وقفت حكون وقفت في موقف طالب ثاني !! رحت اشوف السكيورتي عشان (يكلبشو) السيارة (يكلبشو يعني يحطو حاجة تمنع السيارة انها تتحرك ... يعني زي كلبشات المساجين) ... قلت للسيكورتي : ( في واحد وقف موقفي فلو سمحتو كلبشو سيارتو ) ... قال : ( احنا في ثاني اسبوع ولسا الامور حوسة ... ما نكلبش سيارات) ...

قلت طيب ... انا بنفسي حكلبش هذي السيارة ... رحت وقفت ورى السيارة اللي سرقت موقفي ظلما وبهتانا .. وقفت بطريقة تمنعو انو يخرج الا اذا جيت (طبعا شكل سيارتي غلط واقفه في نص الشارع !!) ... بس ادبا مني حطيت ورقة على قزاز السيارة اللي موقفه موقفي : (هذا الموقف خاص بي ... اذا اردت الخروج الرجاء الاتصال على *******0500 ) ... دخلت الحصة متأخر وخايف ان راعي السيارة يصدم سيارتي (ولو صدمة خفيفة) ويطلع ... فاحتياطا اخذت رقم لوحتو (اما لو صدم سيارتي ... مني شايل هم الا آخذ ورقه اصلاح من شرطتنا الرهيييييبه ... السرييييييعه في اجراءاتها !! ) ...

طلعت بعد ساعتين ... وياللعجب ... مدري كيف قدر يطلع ... بس الحمد لله ان سيارتي ما جاها شي الا شويه بويه راحت بعد ما مسحتها بيدي !!

طيب ليش انا سويت كذا ؟

انا حقيقية (اعتبر نفسي) اني انسان متسامح ... بس في بعض الاشياء ما ينفع تتسامح .. يعني لو سامحت هذا الطالب اليوم ... بكرا حيجي ويوقف في موقف طالب ثاني ... ومن أمن العقوبة أساء الادب ...

انا اشوف ان لازم ما نتسامح مع الناس اللي تخالف النظام ... لان النظام نظام ... حتى لو تنازلت عن حقك الخاص لازم ماتتنازل عن الحق العام ... يعني اللي ينط كل السرا ويجي اول واحد في الصف لازم نوقف في وجهو ... اللي يجي من اليمين ويخش في الاشارة على كل خلق الله لازم مانخليه (انا احتسب الاجر لما امنع واحد يسوي هذي الحركات !!) ... طبعا احيانا عادي تخلي واحد يخش قدامك ... بس على الاقل نبهو انو سوا شي غلط ...

بس مو معناه اننا نمنعو اننا نصرخ في وجهو ... لا ... ممكن بكلمة حلوه... طبعا بعض الناس ما ينفع معاهم الا انك تنزل على راصو بالـ (عجره) ... اذا قدرت فافعل !! ... فالغاية (قد) تبرر الوسيلة ..

اللي يكسر النظام مو متربي على انو يعيش النظام ... فلو احنا ما علمناه النظام مين غيرنا يعلمو !!

السبت، 14 مارس، 2009

معرض الكتاب (3) ... جاي عشان تشتري ؟؟

وأخيرا وبعد اسبوعين تقريبا من (معمعة) معرض الكتاب .. اقفل المعرض ابوابه وشال كتبه وطرد زواره ..
والله حسيت انها لحظات حزينة وهما يشيلو الكتب ويرصوها في الكراتين والمعرض صار فاضي ... تحس كأنك تودع واحد قاعد يحتضر
..


طيب ليش الناس قد كذا منهبلين على المعرض ؟ هل هم بالفعل جايين يشترو كتب علشان يقروها ؟ ولا يكسرو ظهور الحمالين في تحميلها وايادي الشغالات في تنظيفها ؟


في مدونة نظم استبشر ياسر بأن الاقبال على المعرض يؤدي الى انتشار ثقافة القراءة .. طيب ايش دوافع اللي جايين العرض اللي على اساسها نعرف انهم حيقرأو ولا لا ؟ هل الدافع يدل على انهم حيقرو اللي اشتروه ؟ ولا اشترو تفاديا للحرج انهم يخرجو من المعرض واياديهم فاضية ... فاشترو مجلد ميكي الجديد ؟

فالسؤال : ليش الناس يجو للمعرض ؟


1- المعرض يؤدي لبعض الناس وظيفته الاساسية ... شراء الكتب الجديدة او المخفضة ... او حضور المحاضرات الثقافية ... او توقيع الكتب على الاقل من المؤلفين .. هذول الله يكثر منهم ... وهذول هما اللي مفروض انهم يحللو قيمة اللي اشتروه ..

2- اذا جيت تتمشى في الرياض ومعالك عائلة وين تروح بالدرجة الاولى : تروح للمول ... طيب بعد اسبوعين قررت تتمشي مع اولادك مرا ثانية وين توديهم ... المول ... بعد شهر ... مول ... مول ... فمعرض الكتاب يعتبر فك ازمة لبعض العوائل ... مكان تمشية جديد ..

3- معرض الكتاب يعتبر مهرجان اجتماعي .. تشوف اللي ما شفتهم من سنوات ... تشوف مثقفين و رجال مجتمع معروفين ... أو حتى أقربائك اللي ماتشوفهم إلا في زواجاتنا الرهيبة ... فالمعرض صار بمثابة (حفلة شاي) للبعض اللي يتمشو ويسلمو على الناس ويتنقلو من حديث لحديث ومن مجموعة لأخرى ..

4- بعض الناس يجو المعرض اتباعا للقاعدة : (مع الخيل يا شقرا) ...


عشان كذا صار المعرض عبارة عن خليط اجتماعي من مختلف الطبقات ... ومو كل اللي جاي ناوي يشتري ويقرا ... حتى ان الشباب والبنات صار لهم (مآرب أخرى) :

*يقول لي انكاس انو كان مار من قدام البوابة ولا يشوف سيارة شبح راكبة فيها حرمة ... السيارة الشبح كانت موقفة وسادة الطريق على باقي السيارات اللي وراها ... الحرمة فتحت الشباك ونادت (السكيورتي) الين جا عندها وقالت : ( ايش وضع الهيئة اليوم مع العباية المخصرة ؟؟ ) .... ههههه ... لا تعليق ...

*كنت ماشي مع احد الشباب في المعرض والا مرت من قدامنا وحدة ما اسميها لابسة عباية ... اسميها لابسة مشلح ... العباية محطوطة بطريقة المشلح عشان توري الناس الـ(بالطو) الابيض ... تبغا تقول للناس : ( يا ناس ... انا في كلية الطب ... او انا دكتورة !!) ... شكرا لك ووصلت رسالتك ... بس للامانة الحرمة مسترة ولابسة حجاب كويس ...
على سيرة الطب في واحد كان دايما يروح المملكة لابس لبس الدكاترة (بالطو) ... طبعا عشان يستعرض .. والرجال يتفنن كل مرة بالـ(بالطو) الابيض عشان يصيد من الطبقة اللي يبغاها ... الين ما صادوه مرة زملاؤه من كلية ادارة الأعمال وهو متلبس بالجريمة !!

بس على كل حال انا متفاءل ان الناس تجي معرض الكتاب على اي حال ... ومهما كانت مقاصدهم ... فأول مرة يجو بدون سبب وجيه لكن المرة الجاية قد يجو لسبب وجيه .. أهم شي صار في (ثقافة الكتاب) ...


آخر شي تذكرت موقف ضحكني ... كنت واقف عند دار اطالع كتبها والا جمبي حرمتين يتكلمو مع بعض ... تقول لصاحبتها : ( شوفي ذول المهابيل ... مهتمين بالسحر والشعوذة والكلام الفاضي ) ... قعدت اضحك ... وفكرت من جد ايش دخل السحر بمعرض الكتاب ؟


الثلاثاء، 10 مارس، 2009

الرياض الآن - اليوم


في يوم ما من أيام الرياض ... المشكلة في الربيع (طبعا ربيع الرياض ... لا يروح بالكم بربيع افلام الكرتون وقصص الاطفال ) ... المهم فجأة وبدون مقدمات طالعت في السما بعيد والا الاقي شي زي الاعصار ... دخلت الى مبنى ثم خرجت ... ولقيت الدنيا مقلوبة الدنيا لونها أصفر!! .. المرور تعطل ... ودوامات بعض الشركات الغيت .. رحلات مطار الملك خالد حولت الى مطارات مجاورة ... صار حادث اشتركت فيه اكثر من 35 سيارة ... وما خفي كان اعظم .. الجو ينقلك الى جو ثاني وما تحس انك في الرياض ..
ببساطة لانك ما تشوف شي !!






انا اشوف هذا الموضوع ما يستاهل كلام كثير بس لازم نغطيه لانو شي رهيييييييييب ... انا حقيقه انبسطت على هذي الاجواء !! ومزاجي رايق وقتها ...
يمكن لاني احب اي كسر للروتين مهما كان !!
ويمكن لاني أحب الضباب ( : ...



المهم هذي صور انتشرت على الايميل

الموجة في طريقها الى برج المملكة ..



الموجة بعد اقتحام برج المملكة

(وااااو .. حظو اللي كان قاعد في المملكة ... ياريت كان فيه شبابيك في برج المملكة كان الناس استمتعو بالنسيم !)




خلاص ... الموجة اقتربت اكثر واكثر لتغطي اكبر مساحة من الرياض

بس حقيقة منظر رهيييييب ... مخيييف ... من جد يوريك قدرة الله ... وين اللي يروحو سويسرا يقولو رايحين نتفكر في خلق الله ... تعال الرياض وحتتفكر من جد في خلق الله وعظمته سبحانه ( مع اني ما انصح : ) ) ... والله المنظر يخوف ... في هذا عبرة لعلنا نتوب ونرجع ونستغفر ...

السبت، 7 مارس، 2009

نعبي بنزين ولا نشتري كتب ؟


- اشتريت مجموعة لا بأس بها من المعرض،وسأعرضها لاحقا كما فعل شارع العروبة.

- المعرض غاااالي وناااار..يعني الواحد ما يمديه يشتري 4او5 كتب الا وهو دافع له 200ريال واحيانا اكثر،تصوروا: كتاب 488 صفحة شريته ب60 ريال،وواحد تاني ب50،وواحد جزءين صغار ب80 ريال
،هذا وهم يقولوا انهم اجروا عملية الخصم على اسعارهم-المشترطة من المعرض- وهي 25% !!!
انا سمعت انهم اصلا يرفعون اسعارهم قبل ارسال قوائمهم للمعرض لكي تبقى مرتفعة بعد عمل الخصم الخاص بالمعرض،وانا اصدق ذلك بشكل كبير والسبب سيتضح في الفقرة التالية.

- دار الشروق : هذه الدار أمرها عجيب...كتبها عند الدور الأخرى ارخص من اسعارها عندها، تصوروا: كتاب "تاريخنا المفترى عليه" عندهم ب45ريال،وعند دار النشروالتوزيع ب30ريال،و كتاب "موجبات تغير الفتوى" عندهم ب15ريال وعند غيرهم ب10ريال،بل كتاب انيس منصور"في صالون العقاد"عندهم ب75ريال وزميل لي اشتراه سابقا من العبيكان ب35 ريال بس،وهم الذين باعوا سيرة المسيري ب100ريال
مو معقول..هذه الدار تريد أن تكسب بطريقة استغلالية.

-يوم الجمعة كان أول يوم خاص بالرجال، لما رحت لقيت بعض النساء واقفات عند البوابة برا،ولا ادري هل الخبر ما كان واضح ولا ايش؟ولا املوا انهم يدخلوهم؟بس كان وضعهم صعب..لأنهم ينتظرون بالخارج وقت طويل دون نتيجة

انا مع سعة المعرض الحالية،ارى ان المعرض يكون متاح للجميع طوال الوقت..قد بعضهم يضرب مشوار طويل وآخرتها يلقوا الابواب موصدة امامهم.

- المعرض ليس فقط لشراء الكتب،بل فرصة كبيرة للقيا الأصدقاء والذين لم ترهم منذ مدة طويلة،وفي مكان راقي بين الكتب.

-الشراء هااائل في المعرض،ينقل لي احدهم ان رئيس مركز دراسات الوحدة العربية يقول: مانبيعه في معارض السعودية يعادل كل ما نبيعه في المعارض الأخرى..طبعا ليس المهم الشراء ولكن أن نقرأ

الأربعاء، 4 مارس، 2009

معرض الكتاب (2)


تواعدنا انا وصاحبي ان نكون هناك مع افتتاح معرض الكتاب للعامة (يعني من دون دعوات زي امس الثلاثاء) ... الساعة 10:30 يفتح المعرض أبوابه ... وصلت هناك الساعة 11 .. على طريق الامير عبدالله في بوابتين للمعرض ... الاولى مقفلة ... الثانية عليها زحمممممممه ... الناس موقفه في طريق الملك عبدالله بس انا قلت لازم اوقف جوا وصفيت مع الزحمة ... الى ان وصلت الى العسكري ...



قلتلو معرض الكتاب ... قالي لا ياحبيبي هنا مركز الصناعات الوطنية (طيب حطو لوحات ياشطار) .. المهم قلتلو في مواقف جوا في الدور الارضي وانا ابغا اوقف فيها وبعدين امشي للمعرض ... قالي والله المواقف ( فل ) ... قلت طيب انا مصدقك ... سويت (U-TIRN) وقعدت ادور مواقف زي بقيه خلق الله في طريق الملك عبدالله ... مشيت ... مشيت ... ووصلت الى مركز الامير سلمان ولا فيه مواقف !! بعد مركز الامير سلمان لفيت يمين على اساس اوقف هناك ... جيت اوقف ولا اشوف سيارة فيها حريم (طبعا ... السواق يسوق) ورايحه من ورا مركز الامير سلمان حيث لا طريق من هناك ... بس شفت السيارة تدخل في (خرابة .. بر ... أرض فضا .. أو يمكن نسميها طريق غير معبد) ... المهم انا قلت هذول حريم والحريم ما شا الله ما يجربو شي الا بعد ما يتأكدو .. فمشيت وراهم ...









مشينا فترة في طريق وعر الى ان وصلنا الى مواقف كبيرة .. وقفنا في المواقف اللي كانت فيها اماكن فاضية وكانت قريبة جدا من المعرض ...






مفروض يحطو لوحات عشان الناس تعرف وين مواقف المعرض بدال ما يوقفو في نص الشارع في طريق الملك عبدالله !!
المهم اللي يبغا يروح للمعرض لا يدخل من البوابة اللي على طريق الملك عبدالله لانها اصلا مو بوابة معرض الكتاب وكمان زحمة ... في بوابة تدخلها من طريق عثمان بن عفان – رضي الله عنه - ...




دخلت المعرض ... الميزه الاولى هي ان السقف عالي وتحس المكان يفتح النفس .. التهوية ممتازة ... في كمبيوترات بحث بكمية معقولة ... بس نصيحة لوجه الله لا توقف ورا كمبيوتر واقف فيه واحد معاه ورقة .. وقفنا ورا واحد معاه ورقه .. انتظرنا شويا والا يقلب الورقة على الصفحة اللي بعدها وتقريبا كان لون الورقة اسود من كثر الكتابة ... حتى اننا رحنا تمشينا وصلينا ورجعنا (يعني نص ساعة ) ورجعنا للرجال هذا ولقيناه لساعو معتكف على الكمبيوتر !!






انا جولتي الاولى ما اشتريت شي من القائمة اللي اعددتها ولكن اشتريت كتابين عجبتني :
الاول : لفهمي هويدي بعنوان " عن الفساد وسنينه " ... ويحلل فيه هويدي ظاهرة الفساد في مصر ... ويقول ان الفساد موجود في كل دول العالم ولكن السؤال هو مامدى انتشاره وهل تتم التعامل معه وفق القانون ؟ انا حقيقة اشتريت هذا الكتاب خصيصا بعد ما توفرت لي مؤخرا فرصة الاطلاع على مدى الفساد والرشاوي المنتشرة هنا اللي كنت اظنها غير موجودة بحكم اننا (دولة الشريعة) على قولتهم ... وانا يهمني كثير ما يكتب عن مصر لان كثير من الظواهر اللي بدأت تنتشر عندنا كانت منتشرة في مصر ... واحنا (على حسب رأيي) نمر في حقبة اجتماعية مرت بها مصر ...
الكتاب الثاني : مجموعة قصصية " عبق النافذه " لمحمد البشير ... وسبب شراؤه انني مهتم بالسينما السعودية والكتاب معاه DVD لمجموعة أفلام سينمائية سعودية مصورة من قصص هذا الكتاب ..

كنت ابغا اشتريت رواية الطيب صالح -الله يرحمو - "موسم الهجرة الى الشمال " ... وبعد ما لقيتها اخيرا في دار العودة " لقيت نسخة 2006 تقرف وتصد النفس كأنها جايه من مطابع نابليون ...

احلى شي يقولي انكاس انو لما قرب وقت الصلاة جات الهيئة تصرخ ( الصلاة ... الصلاة ) ... بعدين أذن ولسا الهيئة تدور وتصرخ ... الناس راحت تصلي وبقي شوية ناس تدور ... راح رجال الهيئة ومسك راعي معرض لبناني على جمب فقلو اللبناني : ( انا لحياه الله مسيحي) !! مفروض هذا معرض عالمي تجي فيه دور نشر من أماكن مختلفة من العالم العربي وفي منهم غير مسلمين وفي مسلمين مسافرين وجايين من دول ثانيه ... مفروض يكون فيه اذان وتوقف عن البيع والهيئة تراقب توقف البيع ولكن مو بطريقة الصراخ !!

بس المعرض بشكل عام ممتاز وخاصة ان الصباح فاضي وما تجي الا الناس اللي تبغى تشتري ..

الثلاثاء، 3 مارس، 2009

معرض الكتاب (1)

السلام عليكم ايها الناس ...



معرض الكتاب بدأ اليوم ... طبعا ... وأخيرا ... وعلى غير المتوقع ... انتقل معرض الكتاب الى الموقع الجديد !! بعض الاحيان استيعاب الخريطة اصعب من الكلام !! المكان طريق الملك عبدالله قبل الدايري وبعد طريق عثمان بن عفان - رضي الله عنه-


حرام خرب الجو .. اول تحس بطعم طلب العلم خاصة مع الحر والزحمة ( : ... الحين كأنك تتمشى في سوق !!





ما اقول الا "سبحان مغير الاحوال"






انا ما ابغا اطول ...





كل شي تبغوه عن المعرض تلاقوه هنا ...













في شي مرا عجبني اللي هوا تبحث عن الكتاب اللي تبغاه الكترونيا من الموقع قبل ما تروح للمعرض ... والله تطورنا !!