الثلاثاء، 30 يونيو، 2009

احلى...ادعس 180 ومن تحت الطيارات

اكيد سبق أن مرت بك طائرة من فوقك سواءا كنت تمشي أو وأنت في سيارتك..لكن هل جربت أن تعبر من تحت طائرات متوقفة؟

يبدو سؤالا غريبا ( :



قريبا سيتمكن سكان الرياض والزائرين لها من تجاوز صفة طويلة من الطائرات المصطفة في القاعدة..عبورا من اسفلها وبأقصى سرعة ممكنة


الحكاية .. أن الهيئة العليا لتطوير الرياض اقرت مشروع مد شارع العروبة(عفوا عالتعدي على ملكيات زميلي الكاتب شارع العروبة (: ) من نهايته في الغرب الى طرفه الأخير في الشرق والذي يسمى شارع الغافقي،وكان يفصل بين الضفتين القاعدة الجوية،ولكن لحاجة سكان الرياض المتزايدة سيتم انشاء طريق يصل الضفتين،ويمر بانفاق منها 3 تحت مدرجات الطيارات.

الجمعة، 26 يونيو، 2009

والله احنا من هنا .. صدقنا والله سعوديين

احيانا لا يكون العجيب الفعل بحد ذاته ... وانما السياق والبيئة اللي يتم فيها الفعل ...
انك تقرأ كتاب في الشارع مو عجيب .. بس العجيب انك تسوي ذا الشي في السعودية !! انك تسوق سيكل وعمرك خمسين قد ما يكون غريب ... بس غريب لو انك هنا !!

اليوم ما سوينا شي غريب في برجر كنج شارع الضباب .. بس الغريب اننا سوينا هذا الشي في السعودية ...
بعد ما دخلنا حضراتنا وطلب كل واحد هبرجره المفضل ... قعدنا واكلنا ... جينا ما شيين قلت خلينا نسوي مبادرة حلوة ... خلينا نسوي شي جديد ... بما ان عددنا اكثر من7 فكانت الطاولة عبارة عن حوسة عظيمة ... قلنا ليش ما نسوي زي ما يسوو الناس في دول العالم المتحضرة !! يلا شباب ... كل واحد شال الصينية (او التبسي بالحجازي او الطوفرية بالنجدي اذا مني غلطان) ... المهم كل واحد شال حقتو وكبيناها في الزبالة (للمعلومية الاصل ان هذي الزبايل مصممة ان كل واحد يحط فيها الزبالة بنفسو فيها والا ليش حاطينها في نص المطعم !!) ... المهم نظفنا المكان ودخلت اغسل يدي وطلعت .. والا لقيت الرجال الفبيني بمنظر عجيب ... مو مصدق عيونو ... يروح ويرجع ويقول Thank you … Thank you ... قعدت اضحك وهوا يبتسم ويعيد Thank you ... وصرنا كأننا امراء راح فتحلنا الباب بنفسه واحنا طالعين وودعنا عند الباب !!

اقدر اقول من ردة فعل الرجال ان لو له 5 سنين في السعودية فأول مرة يصير له هذا التصرف العجيب !! بتصرفاتنا هذي قاعدين نعطي للاجانب الشغالين عندنا نظرة سلبية جدا عن المسلمين والعرب والسعوديين ( كسلانين .. عجازين ... همجيين ..الخ ..) ... مو واجبنا اننا نكون احسن من كذا كمسلمين حثنا ديننا عالنظام والترتيب والرحمة !!

احلى شي لما اجيت اقول لواحد من اصحابي يلا نشيل التباسي قال : ( تدري انك كذا تقطع ارزاق ناس !! ) ... انا عارف انو يستهبل بس بالفعل في ناس تزعل لو شلت زبالة من الارض وتقولك : (عارف انك كذا تقطع ارزاق ناس ... خلي الزبايل في حالها )... لا ويرمي الزبالة بنية انه يوفر سبيل رزق لعمال النظافة ... اقول بس خليكم ساكتين ... والله ناس ما تقدر الا انك تسمع كلامها وتضحك .. غير كذا ما ينفع ... غلطان تناقش هالناس .. غلطان تاخذ كلامها على محمل الجد ...

الأحد، 21 يونيو، 2009

مبرووووك ... الرياض رسميا تحت رحمة الصيف

(تق ... تق ... تق )
1 new message
From : zezo


" لو تعلق عليها في الكورنيش

اليوم هو بداية دخول فصل الصيف رسميا ، وسط توقعات بارتفاع غير مسبوق بدرجات الحرارة "


شكرا عمي زيزو ... اهم شي ذاكر كويس

"""""""""""""""""""""

قال اليوم بداية دخول فصل الصيف رسميا ... قال ... الصيف ياعمي زيزو داخل في الرياض من يوم ما عرفت الدنيا ... يا خذ اجازة اضطرارية لايام معدودة في السنة ليعود السنة اللي بعدها بحر اكثر ... انا انصح الصيف والحر نصيحه لوجه الله .. ياحر شوفلك ناس غيرنا ... ياحر الناس هنا زي "الضبان" ... يستخبو طول النهار تحت المكيفات ولا تحت رحمة مكيفات السيارات ويطلعولك في الليل .. ما تحس بالقهر !! ما تحس ان محد يعبرك هنا .... ياحر روووح اوربا ... روح امريكا .. هناك والله حيصير "أكشن " ... حيصير لك حساب وصوت ... الناس تنقلب حياتها .. يمكن يموت كم واحد ( انتبه وقتها حيصنفوك مع القاعدة ) ... بس شفلك صرفه من جد ... شوف ناس غيرنا ...

اهل الرياض يازيزو يقدرو يتحملو هذا الحر بشكل عجيب وكأنهم بشر غييير ... بس تدري ان اهل الرياض محظوظين في الصيف ويمكن مستوى الايمان عندهم يرتفع ؟؟ اكيد ... كل يوم درس ايماني في تذكر يوم الحساب والوقفة ونعوذ بالله من حر النار ... في الرياض مع هذا الطقس الفظيع انقلبت عند الناس الموازيين ... يعني كم أحس بالفرحة لما أفتح الشباك الصباح وأشوف غبار .. وااااااااو ... بالرغم ان الجو كتمة بس أكيد حيكون يوم حلو لأن درجة الحرارة حتنزل كم درجة الى40 ...

انتبه ... في شي خطير حيصير هذي السنة يا صاحبي ... شركة الكهربا منزلة كم اعلان ان ياناس اقتصدو والا حتنقطع عليكم الكهربا ..واااا لو انقطعت الكهربا حتصير مصايب !! عشان كذا قفل سخانات بيتك لانك ما تحتاج سخانات خاصة اذا خزان مويتكم فوق البيت ... تصدق ان في الدش عندي الموية العادية في الظهر ممكن تكون أكثر حرارة من موية السخان (يعني لو ابغا موية باردة احط على موية السخان ) !! اقتراح ثاني ممكن يكون بايخ بس اتذكر اني شفت شي زي كذا في قصص ميكي : لو تبغا تطبخ بيض تقدر تطبخ على رخام الحوش !! شوف لو قفلت الكهربا لا سمح الله انا ما ابغا افقدك طول حياتي ... عشان كذا يا تكمل باقي الصيف في مسبح وتستعمل (السنوركل ) او انك تشفلك اي مكان ثاني في الدنيا ... تصدق خلاص سيارتك تنفع تكون مكان ممتاز ما تموت من الحر فيه ... بس انتبه لا تحط اي شي بلاستيك في السيارة ولا حيتحول الى كائن عجيب في اليوم اللي بعدو ...

يعني هذي توصيات سريعة مع التهنئة بالدخول الفعلي لفصل الصيف ... وتتقمر بالعافيه يا صاحبي ( اووو اسف ياعمي) ( :

الاثنين، 15 يونيو، 2009

اشتري جملة مراوح الآن..وبعها مفرقه


علم "كورنيش الرياض" من مصادر خاصة في شركة الكهرباء
أننا مقبلون على صيف مليء بالإنقطاعات الكهربائية،في أنحاء مختلفة من المملكة
وقد بدأت الأنباء تتوارد عن انقطاعات في مكة والرياض والقصيم
اقرأ هنا وهنا
وهنا شركة الكهرباء تعترف بصعوبة المشكلة
وهنا مواطنون يعتقدون أن المشكلة لم تعد تحتمل مجرد الكلام
كورنيش الرياض ينصحك بالتالي:
1-لا تعتمد على شركة الكهرباء وحلولهم،ابدأ بتجهيز محيطك
2- اكثر من شرب السوائل،استعدادا لأي حر لن تطيق له صبرا
3- اشتري مروحة يدوية،فهي تبرد،وفيها احساس بتقاليد اجدادانا
4- اجعلها فرصة للإتعاظ،فالحر البسيط يذكر بالدار الآخرة وعقابها
5- لا تشتم بلدك،فهي في النهاية بلدك،ومن يعمل فيها هم من بني جلدتك،ولكن
اجعلها فرصة للتفكير:ما هو دوري في تحسين نوعية الحياة في وطني..افعل ذلك وأنت تشرب
عصير ليمون بارد

السبت، 13 يونيو، 2009

وين الجاي حيكون ؟؟

وانا واقف في اشارة في شارع الامير تركي مع صاحبي ... جمس جمبنا نزل القزاز ودقلنا بوري ... اثنين شباب صغار الدخان طالع من سجايرهم ومسترخيين على المقعدة ويكلموني : ( وين مستشفى دله ؟؟) ... بحكم طريقة كلامهم ... والشارع اللي انا فيه ... عرفت انهم فكروني من رواد هذا الشارع بحكم سيارتي وحبو يتعرفو عليا باستهبال ... فرديت عليه : ( دور في طريق الملك فهد تلاقيها ) ... قال : ( وين في طريق الملك فهد ؟؟) ... فتحت الاشارة في هذا الوقت واللي جمبي كان يبغى يتدخل ويوصف بس انا قطعت السالفة وقلت :(عاد انتا دور هناك الين تلاقيها ) ... قال بعصبيه لانه ما توقع الرد : ( هيه ... ايش ادور هناك !!) ... سكينا الشباك ومشينا وبعدين قعدت اشرح للي جمبي ...

التحلية اول ما فتح كان "نخبة الشباب الضايعة" تروح هناك تتمشى وتستعرض سياراتها وتتقهوى ويستهبلو ويعملو كل اللي في راصهم ... بعد فترة بدأت الطبقة اللي أقل من هذول الشباب تغزو هذا الشارع ... فالنخبة هذي طفشت من اختلاط الطبقات وحاولت تنقل الى مكان خاص بيهم ... يصير يتعرفو على بعض بسهولة ويستعرضو براحتهم بدون ما يكون هناك ناس غير مرغوب فيهم في المكان ... في الفترة الاخيرة بدأت هذي المجموعة تنتقل الى أماكن جديدة ... شارع الامير تركي ... ومؤخرا ولبعض الفئات المحدودة صارت تروح للحي الدبلوماسي ... ( على فكرة في الفيس بوك في تجمع لرواد طريق الامير تركي الاول !!)

الشباب هذي تبغا مكان غير مختلط الطبقات ... لان هذي الطبقة غالبا اهتمامتها واحدة و مستواها الاجتماعي قريب من بعضها فيصير هناك الواحد يتعرف على اي واحد في مكان التجمع بدون الحاجة الى تعب لانهم بكل بساطة لديهم الدليل على ان بينهم الكثير من الاشياء المشتركة : " انني من تجمع هذا الشارع " ... ما اتوقع ان اي واحد يدخل في هذا المجتمع بسهولة بس لو دخل حيلاقي العلاقات متشابكة وحيتعرف على كل رواد الشارع بمجرد انه تعرف على احدهم ... انا اسمي هذول الشباب " الطبقة الريادية" لانهم هم الذين يحددو الجديد لمثل هذي التجمعات الى ان "يتلوث" هذا المكان فينتقلو الى مكان جديد !!

لكن يظل التحلية يحتفظ بالكثير بسبب ترتيبه الرائع وشهرته والكم الرهيب من المطاعم والمقاهي ... بس نصيحة للي رايح التحلية : ( جهز أذانيك كويس ... يمكن ترجع للبيت وطبلتك مفقوعة اذا كنت تتمشى على رجولك في الشارع او مسوي مستمتع بالجو وجالس في جافا تايم عالشارع – من زين الجو اصلا- !!)

الجمعة، 5 يونيو، 2009

لا تفكر .. اكتب

يبدو ان ثقافة الكتابة عندنا تلقائية جدا ... القلم تلاقيه في الجيب العلوي للثوب غالبا عند كل واحد ... ويستل قلمه في اي مناسبه ليكتب تعليقه في اي مكان و مهما كان التعليق او التنبيه وبتلقائيه شديده .. فكل ما ندخل حمام اكرمكم الله لازم تلاقي عبارة ناصح : " وما من كاتب الا سيفنى ويبقي الدهر ما كتبت يداه " ... انا اول ما اشوف هذي العبارة اقعد اضحك بدون سبب مع اني لحالي في الحمام (اكيد لحالي) ..



هاليومين انتشرت ظاهرة في معظم الصرافات .... ملصقات تسديد القروض من ناس بدائيين وبطريقة غير منظمة وما يحتاج انك تكتشف بدائية رجال تسديد القروض هذي الى جهد كبير ... فالطريقة الهمجية اللي ملصقين فيها الاعلان تخليك تشك انهم نصابين ... على الصراف الواحد تلاقي اكثر من 15 ملصق من كل جهة وبأسامي مختلفة (واحدة ابو احمد والثانية ابو خالد ولا ابو مشعل ) والمشلكة ان كلها نفس التصميم فالواحد يشك يا ان هذا عمل نصب واحتيال منظم يدخل فلوس كويس او انه نفس الرجال بس مسوي ذكي !! طريقة همجية حقيقة في الاعلان وكأن مافي شي اسمه انترنت او اعلان في الجرايد ... لو كان العمل ما تدور حوله الشكوك ليش ما اعلنو بطريقة رسمية !!
بس عجبني اللي طلع قلمه بالتلقائيه اللي قلت عليها وبدأ يكتب على كل الملصقات اللي على الصراف :


جزاك الله خير ياعمنا بس كيف عرفت انه حرام ... مع اني اتوقع انهم نصابين !!


اما المنظر الثاني اللي ما عرفت افسره ابدا وبأي طريقة منطقية ليش هذا الرجال سوا كذا :


هذي قاعة في جامعة الملك سعود يستخدمها المركز الوطني للقياس والتقويم في اجراء اختبارت قياس لطلاب ثالث ثانوي ...
الرجال كاتب على الجدار وعلى يسار الجدار مباشرة الصبورة ... راح الرجال وبدل ما يكتب على الصبورة راح كتب عالجدار ... واللي يزيد الطين بله ان اللي كاتب هذا مسؤول في اختبار قياس ... يعني رجال واعي مو شاب مراهق يخرب !!
بس الله يخلف على بعض العقول !!