الثلاثاء، 15 ديسمبر، 2009

اليوم..وقت للدهشة



المكان : مقهى الحلم .. على طريق الملك فهد.. قبل برج المملكة اذا كنت متجه للشمال، خلف يوم القهوة

جاءت الأخبار : أن هذا العرض كل ما قدم في مكان..طلب الحضور بعدما اصابتهم الدهشة،ان يتبعه عرض آخر مباشرة
لا تفوت على نفسك حضور هذه التجربة..فربما تكون ملهمة

قروب الفيس بوك
http://www.facebook.com/home.php?ref=home#/group.php?gid

الدعوة عااامة


السبت، 12 ديسمبر، 2009

مسكين ما عندو بي بي !! اتوقع يستحق الزكاة !


" "إذا كنت جالسا بين مجموعه من الناس وكانو جميعا مطأطئي الرأس وأنت الوحيد رافع رأسك فلا تعتقد انك الوحيد المتفائل السعيد .. بل انت الوحيد الذي ليس لديه بلاك بيري "





هذا كلامهم .. يمكن كلامهم صح !! بس برضو لو كل اسبوع متأخر على اصحابك عشان الحادث الجديد اللي سويتو فأنت الوحيد الذي لديه بلاك بيري !! لو كل اصحابك اللي داخلين جو شات في المحاضرة بالبلاك بيري خبصو في الامتحان وانتا مسكين الوحيد اللي معطي الدكتور وجه وطلعت الدرجات فلا غرابه في الفرق لانك الوحيد الذي لا يملك بلاك بيري !! واذا كنت الوحيد الذي يكون بكامل تركيزه مع من حوله وصافي الذهن فأبشرك بأنك لم تشتري بلاك بيري بعد .. اذا كل اخبارك من النوع البايخ و "ساري الصلاحية لمدة ساعة" وبعد ما تنشرالخبر للي حولك تقول اسف كانت اشاعة بلاك بيري فلا نستغرب ان تكون دائما صاحب "أضحل" معلومات فأنت تملك بلاك بيري .. اذا كان عندك وقت كثييير وطفشان ولا عندك شي مشغل حياتك فينفع لك بلاك بيري بقوة .. اذا كنت من الناس اللي تحب تسوي نفسها مشغولة ومهمة وكل شوية تطلع الجوال وتقول "اوووه" وتبدا تكتب فأنصحك بالبلاك بيري .. اذا تحب الوان قوز قزح فأنصحك بلاك بيري بولد ولا تقصر كل يوم حط لون مرة ازرق فاقع ومرة زهري يفقع عيون الناظرين .. والقائمة تطول !!



طلع "التوت الاسود" وطلعت معاه العديد من الاكتشافات الجديدة :
- اكتشفنا ان الشعب السعودي خفيف دم وعندو امكانية على الابداع السريع في النكتة .. مثلا بعد ما حصل في جدة يقولك في محششين قاعدين على سطح عمارة وجا هلكوبتر الدفاع المدني يشيلهم قام صرخ واحد من المحششين : هيييه خلي خويك يطفي المروحة ترى روسنا رطبة ( :
اكتشفنا ان الاشاعة تسري في دمنا زي مسرى الشيطان في دم ابن ادم -
-اكتشفنا ان عندنا وقت أكثر من براميل النفط .. المشكلة ان مع هذا الاكتشاف الى الحين كل واحد يقول ياخي والله مشغووول .. مافي وقت .. حاضر صدقتك عمي ..
-اكتشفنا ان الشعب يحب التكنولوجيا وممكن يستخدمها طوالي في خدمة اهدافه السامية زي اللي في الصورة

تحليلي لانتشار البلاك بيري هو ان "الطبقة الراقية" بدأت تشتريه لان كان عبارة عن شبكة مغلقة بينهم .. طبعا بدأ باقي الناس تشوف هذا "الريموت كنترول" في ايدي هذي الناس وقالت خيلنا نجرب .. انتشر اكثر واكثر .. في ناس اشترتو بدون سبب على اساس انو كشخة وعلى بالها انها صارت كشخة لما شالت بلاك بيري عليه "كفر" اخضر فاتح .. بس في ناس معاها حق مقتنعة بميزاته انه ممكن يكون أرخص ويوفر الفاتورة - على اساس المسجات لاصحابهم اللي عندهم بلاك بيري ببلاش - والايميلات تجيك طوالي والانترنت مشبوك .. يعني يستفيدو منو ويحللو قيمتو !!



طيب البلاك بيري "موضة " وتعدي ؟؟
انا اتوقع ان في ناس مو ممكن تعيش بدون بلاك بيري بعد الان الا لو طلعت تقنية احسن منها .. زي الماسنجر مع قدمو الا ان في ناس ما قدرت تسيبو ! اما الناس الباقية الشقرا ورا الخيل" فهم ينتظرو الصرخة القادمة عشان يصرخو معاها !"




الخميس، 10 ديسمبر، 2009

بريال .. كااااااان !

في هذا اليوم التاريخي الاربعاء 22 ذو الحجة 1430 ارتفع سعر الذهب الاسود للشعب المدعو بيبسي الى ريال ونص !! القرار فجائي حتى ان راعي البقالة قالي غريبة ما رفعو السعر مع الأزمة الماضية حقت ارتفاع الاسعار كان يمكن وقتها معاهم حق والناس عذرتهم ؟؟ بالفعل توقيت غريب ॥ احس ان المطاعم محا تصدق خبر وترفع الاسعار على اساس ان سعر المشروب زاد ؟ الايام الجاية حنشوف ! نخاف بما ان البيبسي من قيادين منتجات ابو ريال ورفع سعرو ترتفع معاه منتجات ثانية بعد ما فتحلهم الباب !


الليلة كانت ليلة الكوكاكولا .. الناس حولت ليها لانها لسا بريال بس !! كنت افكر مشروع تجاري انك تشتري كراتين كوكاكولا الين ما ترتفع وتبيعها بربح يمكن يوصل 50 % لان زي ما قالي راعي البقالة ان شركة كوكاكولا بدأت توقف التوزيع فحيقل المعروض ويرتفع السعر !! لو ان الشركة انتظرتلها شهر على هذا السعر حيكون تسويق جيد جدا لها يمكن الناس تبدأ تتعود على طعمها ( الغريبة اننا من الدول القليلة اللي يعتبر فيها البيبسي المشروب الاول قبل اخوه الكوكا !!)


الناس بسرعة بدأت تتساءل كيف حنتعامل مع هذي الازمة !! مو الازمة ان السعر ارتفع ॥ الازمة ان صار في نص .. يعني بالعربي ادراج سياراتنا حتتملى بعلك نوفا ابو نص لو ما انحلت الازمة هذي ! هل حنصير نتعامل بالقروش زي باقي العالم بسبب السيد بيبسي ؟؟


السؤال اللي من جد محير صاحبي في جامعة البترول وعندهم ماكينة بيبسي الى الحين بريال ॥ مو عارف ايش حيصير ॥ حيخلو البيبسي بريال ونص يعني من المكينة يدخلو قروش ولا ترجع باقي ؟ قالو يمكن يحطو البيبسي بريالين ويحطو لك خيارين يا نوفا اومناديل ॥ انتا بالخيار !

الأحد، 6 ديسمبر، 2009

أنكر تؤجر ..

قبل فترة كان يحكيلنا واحد من اصحابنا عن الصراع الدائم بينو وبين اصحابو لما يقطعو الشارع !! أصحابو عمليين يهمهم الوقت جدا ودايما يستشهدو بـ"الوقت كالسيف" فعشان كذا ما يقدرو يسامحو صاحبي ليش يقطع الشارع من خط المشاة ويضيع 25 ثانية !! يقولهم يا ناس هما حاطين خطوط المشاة ليييه ؟؟ وكل مرا يحصل نفس الشي يروح راعي النظام يقطع من خط المشاة وأظن هوا الوحيد اللي يمر من خط المشاة لان باقي الناس ممكن تقطع الشارع من أي مكان الا هذا الخط !!

صاحبي - يمكن لا شعوريا- بيسوي شي مهم جدا و أساسي بل أول خطوة في التغيير .. "الانكار" ..

العالم عندنا ماشيه بطريقة نقدر نسميها همجية في كثير من الاحيان أو غير حضارية إذا نبغا نقول بعبارة أكثر أدبا .. أنا مقتنع أن اول شي يبغالنا نصلحو فينا هو احترام النظام ورفع الذوق العام واحترام الاخر ...

طيب واللي يبغا يحاول يصلح هذا الشي يسوي ايش ؟؟ يسوي دفتر مخالفات اخلاقية ويوزع عالناس مخالفات ؟؟ تقريبا هوا شي زي كذا !

اذا نبغا نغير شي لازم نمر اول شي بمرحلة الانكار ... لازم الناس تحس ان اللي بتسويه غلط ..اذا كان خيالك واسع تقدر تتخيل ان كثير ناس مهي معترفة ان اللي قاعده تسويه غلط ! .. او معترفة بس تعتبرها شي عادي وجزء من ثقافتنا لان ما احد بيقولك شي لما تغلط !!الناس اللي تفتح شباك السيارة وبكل سهولة ترمي الشي في الشارع يعتبروه شي –مقبول- لان الناس اللي حولها ما قالت شي .. يعني تصرف مقبول من المجتمع ! اللي يطلع من الجمب في الاشارات ويطلع قدام الناس محد قالهم شي .. !!
دايما يقلك اللي يطلع برا السعودية يصير ملائكة بعد ما كان حاجة ثانية .. ليه ؟ لان المجتمع اللي هناك ينكر بقوة اذا سوا صحابنا شي من العمايل السودا اللي بيعملها هنا فيهجد من ردود فعل المجتمع ويحترم نفسو .. ايضا الانسان بطبعو يحب الشعور بالانتماء وان السلوك اللي يسويه يماشي باقي المجتمع فيحاول لما يكون هناك يثبت بأي طريقة انو زيهم يعرف ياكل همبرجر ويرمي الكيس في الزبالة ! فلو تغيرت عندنا طبقة كبيرة من المجتمع كثير من الناس بتتغير عشان تحس بالانتماء (خاصة لو كانت الطبقة اللي تغيرت هي الطبقة الراقية) ..