الخميس، 15 أبريل، 2010

أكبر مطار في العالم بدون نظام !!


في كل دول العالم ممكن نسمع كلمات مثل " نأسف بسبب خلل فني خارج عن الارادة " .." بسبب خلل تقني غير متوقع " .. " عطل مفاجئ " .. ممكن الواحد يسمع هذا العذر و يتقبله لانه خارج عن ارادة البشر المساكين .. فاحتمال يكون فأر جائع قاعد "يمرمش" سلك الكهرباء الين ما جاب اجله .. احتمال يكون خطأ فردي أدى الى المشكلة .. أما ان يحصل الخلل بالارادة وبشكل ممنهج ومعد له مسبقا و بشكل غير مفاجئ فأهلا بك الى عالمنا ..



ادارة أكبر مطار في العالم مطار الملك خالد الدولي " أطال الله عمر المطار وعافى ادارته" أعلنت وبكل فخر تحديث نظامها الالكتروني ॥ متأكد انهم سهروا نهارات كثيرة لإعداد إنطلاق هذا البرنامج ॥ اهم جزء من الاطلاق الذي يفضله اي مسؤول " قص الشريط .. مع اني ما ادري من وين يقصوا شريط برنامج الكتروني ؟؟ " .. المهم مع قص معاليه للشريط بدأت المشاكل " الغير متوقعة أبدااا !!" .. يومين .. تخيلوا
يومين والنظام الالكتروني عطلان في أكبر مطار دولي في السعودية ..بالعربي يومين والمطار عبارة عن محطة باصات " ومو أي محطة باصات!! ..بس بصراحة أحيي ادارة المطار على بصيرتها النافذة انهم اختاروا تطوير النظام بالذات مع اول يوم من بدأ الاجازة ! ولما اتصل المسافرون الغاضبون بالمسؤول قال لهم المشكلة ليست في النظام لكن في عدم وجود تدريب كافي للعاملين في النظام الجديد .. ليته سكت ..
(لاتفوتكم خطة تطوير المطار على قناة صح باستهبالهم المجنون )




مشكلة التدريب هذي ذكرتني بقصة ثانية في الاخطاء " الخارجة عن الارادة " ..في الحي اللي نسكن فيه بشرونا بكل فخر وحماسة : " مبرووك عليكم حتكونوا أول حي في المملكة العربية السعودية كلها يدخل له ال"واي ماكس" ..شي رهيب لما يقولك في "المملكة العربية السعودية كلها" تحس انك بطل ..سرعة الانترنت عندكم ستصل الى 100 ميغا بايت ..".. تفاجأنا ان حتى خط التلفون العادي مايشتغل !! قالوا لنا لازم نخلص تركيب الواي ماكس في الحي عشان نفتح خطوطكم .. قلنا " صبر جميل " .. وخذلك اكثر من 4 شهور من الصبر الجميل الين مايركبوا الواي ماكس .. شكيت انهم غيروا رأيهم وقرروا يخلونا أول حي عالمي يملك مفاعله النووي الخاص .. المهم في نهاية القصة عرفنا سبب الخطأ " الخارج عن الارادة " واللي استمر حول نصف السنة .. شركة الاتصالات ارسلوا مهندسيها يتدربوا على تركيب الواي ماكس في المانيا واخذوا دورة مكثفة وفي النهاية رجعوا وماعرفوا يضبطوه !! يمكن الالمان نصابين !



وعلى سيرة الاتصالات السعودية ماننسى مشكلة الفواتير اللي قعدت فترة طويلة يمكن حوالي 5 شهور ما انحلت بسبب انهم غيروا نظام الفوترة .. ركبوا مثل المطار نظام فوترة جديد ولسبب أو لآخر النظام "ضرب" عليهم وحاس فواتير العالم وخلا كثير من الناس "وانا منهم" يستجير بموبايلي ...

الناتج ان المواطن البسيط حيكره شي اسمه " تطوير " .. " تجديد" وحيرفع شعار "قديمك نديمك لو الجديد أغناك" .. " الله لا يغير علينا"

السبت، 10 أبريل، 2010

أهل الرياض اكثر اهل الارض انفتاحا


اتوقع انك ما دخلت تقرأ الموضوع الا وانتا تفكر : " الولد بكامل قواه العقلية وهوا يكتب التدوينة !!"


قبل فترة بسيطة أقيم معرض الكتاب في الرياض وتزامن أيضا مع مجموعة كبيرة من النشاطات فجات مجموعة لا بأس بها من الشباب إلى الرياض من الشرقية والغربية وغيرها
أسبوع او اقل من الاسبوع في الرياض قضاها هؤلاء كانت كفيلة بـ"درزن" مقالات و حالات "Status" عالفيس بوك كلها من : " باب ما جاء في ذم الرياض واهلها " ..ما بقي شي في الرياض الا تشرشح خاصة و خاصة تعامل اهلها وانهم منغلقين ولا يعرفوا يتفاهموا !!
ناخذ جدة المدينة "المنفحتة" على قولة أهلها ..الكل يقول اهل جدة منفتحين متفهمين لانهم عالبحر وفي ناس وسفن تروح وتجي فتختلط الثقافات وتقل الحواجز بين البشر ..هذي المدينة جدة من يوم ما خلقها ربنا وهي على البحر ॥ يعني ربنا اعطاها هدية لاااازم انهم يكونوا منفتحين بطبيعة الجغرافية ويحمدوا ربهم على كذا ..
الرياض من يوم ما خلقها ربنا وهيا هيا نفس الصحراء الرهيبة ونفس الطعوس ونفس اللون البني القاتم ॥ مسكينة هالمدينة مساكين اهلها ) :
على كذا اهل جدة او الشرقية ما بذلوا على ميزتهم أي جهد يذكر ॥ بالرغم من ذلك تقدمت الرياض وانفحت كثيرا وتغيرت نفسيات أهلها بدرجة كبيرة وحققوا قفزات رائعة في التغيير الاجتماعي الايجابي في ال100 سنة الاخيرة وينتظرهم الكثير ॥ أهل الرياض لديهم قابلية كبيييرة في التغيير حيث انهم قاربوا ان يصلوا في خلال 100 سنة نتاج الاف السنين مما لدى المدن الاخرى ॥

"إصحكم والرياض " ( :

الجمعة، 2 أبريل، 2010

لو يمسكو إدارة المصمك للقرية النجدية؟؟

اتذكر اخر مرة زرت فيها متحف المصمك لما كنت تقريبا في نص الابتدائي .. زماااان حوالي قبل 10 سنين.. كالعادة لما ترجع وتزور مكان زرته في الصغر تسأل نفس السؤال : " ما كان كبييير ؟ "

التغير الثاني اللي اختلف علي في المصمك كان صدمة بالنسبة لي .. صدمة حضارية ثقافية تاريخية سميها اللي تسميها .. صدمة كبيرة عندما تأتي لتزور المصمك وما تلاقيه اصلا !!

كان باقي ربع ساعة على صلاة الظهر واحنا داخلين من البوابة .. حارس البوابة قال ادخلو بس اطلعو بسرعة ولا تطولو قلنا "سم طال عمرك " مع ان ربع ساعة ما تكفي جدار واحد من جدران المصمك .. لكن هذا كان ظني الخاطئ ... 5 دقايق وطفشت


الاماكن التاريخية تستمد جمالها من التجاعيد .. من عدم الانتظام .. من العشوائية التي تعبر بك زمن الخطوط المستقيمة والاشكال الهندسية شديدة الانتظام الى زمن اكثر تسامحا يعطي تلك الاشكال مجالا بأن تثور قليلا عن الاستقامة المتطرفة ..

هيئة السياحة نحسبهم والله حسيبهم كان عندهم نية حسنة .. سمعوا بالدول صاحبة المعالم التاريخية وسمعو بشغلة يسموها ترميم الاثار ... قالو جيد .. خلينا نتطور زي العالم ونهتم بمعالمنا القديمة "هيا كلها معلمين على بعض" .. أعطو مهمة المشروع لاداري كبير خريج كلية الطيران "احتمال يكون خريج أي كلية ثانية بس مستحييييل خريج كلية الاثار " .. توسموا في هذا الرجل انه لن يسرق اكثر من 5% من قيمة المشروع فقالو توكلنا على الله وسلمو المشروع لصاحبنا ..

صاحبنا بدأ بحماس شديد .. جا على الجدران وقشع كل تعاليم الماضي وغبار الملك عبدالعزيز وحط صبة جديدة لامعة .. شال الارضيات المتعرجعة وركب حجر مستوي تماما ..


ما كفاه كذا وراح حط كل شي ممكن يشتت ذهنك ويبعد فرصة ان هذا معلم تاريخي ...طفايات الحريق الحمراء فاقعة لونها في كل مكان ولاتسر الناظرين ...كاميرات المراقبة وحرص صاحبنا ان ينتقي اكبر نوع كاميرات مراقبة وجدت في التاريخ حتى تصير الكاميرات جزء من المتحف ...برادات الموية النيكل .. الكراسي اللي حاول يجيب اكثر نوع "موديرن" واكثر نوع مايركب مع الجو التاريخي ... فتحات بيارة الله يكرمكم ما فيها اي حس فني .. الانوار "سبوت لايت " !! ما ادري ايش سوا بالضبط بس حااااس الدنيا وقلب المصمك فوق تحت ..

جزاه الله خيرا على ما بذل لنهضة الامة وتاريخها ...بعد ما خلصنا انا وصاحبي رحنا نتغدا في القرية النجدية وهناك فعلا حسيت بالتاريخ !!! لو يمسكو ادارة المصمك للقرية النجدية ؟؟