أمس جاني أخويا الصغير يطلب مني فلوس عشان يعطي الحمالين اللي نزلو (الفرفيرة) للقبو في بيتنا ... كانو حمالين 2 من محل الالعاب اللي اشترينا منهم الفرفيرة ... طلعتلو 50 ريال اللي احسها اصلا كثيرة بس ماكان عندي صرف وهذول الناس ما تستخسر تعطيهم شي ... أخذ الخمسين وفتح عيونو بقوة وكأنو حيقول شي مهم ... قال : ( ترا الرجالين مو اندونيسينن ... تراهم سعوديين ) ... انا حقيقة استغربت ان السعوديين دخلو في هذي الوظائف اللي تطلب حمل اغراض ودخول بيوت ... بس قلتلو طيب وبعدين ... قالي : (هذول سعوديين ... يعني عادي 50 ريال ) !!
لا تعليق !!
الحين الشباب السعودي قاعد يدخل لمجالات جديدة كانت المجتمع يعتبرها عيب ... وهذا شي كويس .. حتى ان الحين الشباب اللي على الكاشيرات صارو واثقين من نفسهم وصار عادي يضحك وينكت معاك ...
بس لسا في حاجز بين المجتمع والشباب ... لسا كثير من الناس ما تحبذ تركب مع سعوديين لانه صعب يكاسرو في السعر خاصة !! لما تتعامل مع سعودي تاخذ مسألة العيب و (خوارم المروءة على قولتهم ) اما مع الاجنبي فتاخذ راحتك تماما ... والناس ما تحب مثلا سباك سعودي يدخل بيتها لانها ما ترتاح انهم يشوفو ويدخلو بيوتهم !! ويمكن لو شاف شي في البيت بالغلط يكون غير لو شافها سباك هندي مثلا !!
هل تتوقع يجي اليوم اللي يكون فيه السواق والشغالة سعوديين ؟؟
هناك 6 تعليقات:
على حالتنا هاذي أتمنى هذا الكلام يصير ...
إذا سالتني ليش أقول لك
أولا إنه وصلت حالة بعض الناس في الفقر إلى درجة لا تحتمل في السعودية من السعوديين !!!
يعني إذا ما كان بيشتغل في شي ذوي معدل دخل منخفض أو " عيب " على ما يقولون بيبدأ يسرق ويسبب فساد وأزمة في البلد ... وهذا آخر شي نحتاجه في وضعنا الحالي
مع العلم إنه بعض السعوديين سلكوا هذا الإتجاه مع الأسف للأسباب اللي ذكرتها
ثانيا خفض نسبة الإستقدام والعمالة اللي ذبحتنا وذبحت الدول العربية بشكل خاصة إلا درجة إنه المواطنين الأصليين يعتبرون أقلية !!!! ووضع فكرة في رأس الشاب السعودي ألا وهي إما الجد وشدة الحيل في الدراسة والعمل وغيره والا هذه الأشغال فيصير عامل محفز له
أشكرك على التدوين الرائع
شكرا نفر
نفس اللي كنت ابغا اقوله !!
اضافه الى الجانب الأقتصادي المهم من خلال المحافظه على الأموال تدور في البلد بدل ان تصدر للخارج ..
عامل التحفيز ايضا مهم .. اما اننا نصير أقليه فيمكن قصدك دول زي الامارات وقطر ..
انا اشوف اننا لو صار مافي اي اجنبي ايضا لها بعض النتائج السلبيه مثل تدني الأعتراف بالآخر او التقليل من شأنه وان كانت أقل من ايجابياتها بكثييييير !
اضافه ممتازه
مرحبا..
للأسف انو التجارب السيئه للسعوديين تغلب على تجاربهم ومواقفهم الزينه!ـ
يعني عمرنا ما قرينا بالجرايد او شفنا بالتلفزيون شكر للشباب السعودي او تحفيز لهم يخلي الاغلبيه العاطله تتجه لمجالات مختلف بينما لو شخص واحد فقط من العشرات سوا غلط واحد بناء على اخلاقو سواء كان سواق تكسي او على الكاشير تنتشر السالفه يصير الناس عندهم فوبيا (سعودي!!)ـ
ادري طولت وكثرت كلام..
تقبل مروري وتعليقي .ـ
أكيد أقصد الدول الخليج العربي الثانية ..
ومن ناحية إنه ينعدم الأجانب عندنا ما أتوقع تصير أبداً ...
اسجل مروري
مافيها شي يصيرو
بس قلي اعطيتهم الخكسين بس
وووووووووووو والله فشيله كان زدتهم
؟؟؟؟؟؟؟؟؟؟؟؟؟؟؟؟؟؟؟؟
على فكره خلي بالك اليوم اللي بيصير الحمال والشغاله اندونيسيين خلي البقشيش 500
:)
انا اتوقع انو راح يجي اليوم اللي بيكون السواق سعودي..(شغاله ماتوقع) لأنه وبكل بساطه لو تناظر يمين ويسار بتلاقي سواق سعودي(لكن عند الشيوخ)فـ مجرد وقت وتلاقي عند شيوخ وغير شيوخ.وغير كذا الآن فيه سعوديين سواويق نظام(اتصل نصل)يعني تدق عليه تقول انا بالمكان الفلاني تعال ودني يجيك ويوديك
شاكر لك الطرح
إرسال تعليق