الاثنين، 27 أبريل 2009

بين العادات والدين !!

‎‎أهلا بكم في كورنيش جدة ..

جدة الآن ليست ملكا لأهلها ... جدة غرقانة بالسياح اللي من الرياض والشرقية ومن كل مكان من المملكة ... لو حصلت شقة ولو نص نظيفة فأنت محظوظ !!

قابلت صاحبي اللي جاي زيي من الرياض ...

ركب السيارة وبدأ يتكلم بغرابة :
أيش اللي يحصل هنا ... هل احنا في السعودية ولا جدة شي "شاطح" عن باقي المملكة ... ؟؟

وقعد صاحبي يحكيلي عن اللي شافه للتو على الكورنيش ... ما يحتاج اقول ايش شاف بس كان منظر مقزز وما نشوفو الا في الافلام او في المدن الاوروبية !!

سألني صاحبي ...
ليش جدة كذا ؟؟
ما كان عندي جواب ... احس انو سألني سؤال بديهي ما له جواب ...
زي لو سألك واحد : (ليش الرياض في السعودية )؟؟
بس برضو فكرت ...
ليش جدة غييير ... ليش جدة كذا ؟؟


جدة عبارة عن مجتمع خليط من ثقافات مختلفة ... أصولهم مختلفة ... ناس جاية من الهند ووسط آسيا ... ومن مصر والمغرب وغرب افريقا ... و اليمن وحضرموت وجنوب الجزيرة ... وأهل جدة الاصليين ... ومن كل مكان من العالم الاسلامي او حتى الغربي... فلما تدمج هذي الثقافات مع بعض ينمحي تقريبا العيب الاجتماعي وينكسر حاجز العادات والتقاليد ... ويبقى الدين والاخلاق والقيم والمبادئ والقليل من "العيب الاجتماعي " !!

تفسير بسيط ... ما ادري صح ولا غلط ... بس لو اعتبرناه صح ...

خلينا نطبق مبدأ العادات والتقاليد الاجتماعية على الرياض ..


العادات والتقاليد والعيب الاجتماعي شغالة بقوة في الرياض وهي المحرك الاساسي للكثير من مظاهر المحافظة والتدين لان الرياض منذ القدم كانت معزولة عن التأثيرات الخارجية .. فأصبحت العادات فيها شيئا مقدسا ... واصبحت العادات جزءا من الدين والدين جزء من العادات ...

وبسبب الانفتاح خفت حدة تأثير العادات على أهل الرياض ... وبما ان العادات مرتبطة بالدين صرنا نرى بعض المظاهر المخالفة للدين والتي لم يكن يمنعها من الظهور سوى العادات والتقاليد !!

الخير والتدين موجود بقوة وبكثرة في الرياض وما نقدر نجزم ان سببها العادات والتقاليد ... لكن اخاف ان مع الانفتاح نكتشف فجأة ان كثير من هذي المظاهر ليست سوى عادات ...

التربية لازم تصير على اساس الدين والقيم والاقتناع مو اساس العادات والتقاليد المفروضة لان العادات والتقاليد تتلاشى اما الدين والقيم هي التي تبقى !!


هناك 18 تعليقًا:

غير معرف يقول...

تحليل رائع

Abdullah AlSayed-AlHashem يقول...

جميل جدا

تحياتي لك ولتحليلاتك

استمر

غير معرف يقول...
أزال المؤلف هذا التعليق.
غير معرف يقول...

تحليلك في نظري في غير محله لانك بنيت نظريتك على اساس انه جدة هي اللي بتشجع الناس على عمل ما لا يليق
التحليل الصحيح بيكون انه السياح جايين على بلد ما في مين يعرفهم على اساس انهم في بلدهم بيستحو من اهلهم و في من يعرفهم
في جدة هم اغراب و مالهم من يردهم
و نسيو المثل "يا غريب خلك اديب
و الدليل انك لو سافرت بلد اجنبي و لقيت سعودي يشرب او يرقص مع بنات و قلت له ليش تسوي كدا بيقولك ما احد يعرفني و ان سافر بلد و لقي احد من بلده يلتزم الادب عشان سمعته ما تخرب

حاول تجي جدة في غير وقت الاجازات تلاقي جدة محترمة و غالبية اهلها متدين و محترم و ما تلاقيهم على الكورنيش
كل الناس اللي على الكورنيش جايين من الرياض و غيرها

غير معرف يقول...

صحيح جدة عبارة عن خليط من ثقافات مختلفة
و حتى الرياض
و حتى المنطقة الشرقية
من يوم ما بدات الطفرة و البلد ثلثها اجانب
و بعدين كل الثقافات لها مقياس من العيب الاجتماعي
فلا تحاول تفرض مقياسك على الكل

إنكاس يقول...

ياسيدي
التدوينة بتاعت العروبة مركزة على ان التدين في جدة مبني على قيم الدين،بينما في الرياض مبني على العادات،ولذا لو انهارت العادات لانهارت المحافظة،لذا ما كان يقصد اهانة اهل جدة(ولا الرياض كمان) بس يمكن ايراده للقصة اول الموضوع اربك رسالة التدوينة هذي.
هذا فهمي وللعروبة توضيح رأيه، ومرحبا بك

شارع العروبة يقول...

saudi dawn
أهلا بك
اتفق مع تحليلك الأول ان السياح يسوو أشياء غلط لانهم غربا بس لو كان هذا السبب الرئيسي لسلوكهم ليش ماظهرت هذي السلوكيات في سياح الرياض !!

بس انا حقيقه اقدر أهل جده وتدينهم وحتى اللي أشكالهم صياعه والله فيهم خير كثير فإحنا مانحكم على الناس من مظاهرهم بس !!
وتدين جده وانفتاحها غير الرياض ولا احد ينكر
انا مو قصدي بالقصه شي
انا نقلت اللي سمعت وأكيد ورا القصه دلالات !!



شكرا انكاس على التوضيح وكلامك مضبوط ..

غير معرف يقول...

جميل موضوعك :)

اولا كان ودي تكتب جدة غير في ايش تحديدا! اش المظاهر اللي شافها خويك وخلته يقول جدة شيء شاطح!!

أنا عشت طول حياتي في جدة والآن أدرس في الشرقية, مالاحظت هذاك الفرق الكبير في طريقة الحياة في المنطقتين! يمكن عشاني مسكين ومالي في اللف والدوران :D لدرجة اني ماطبيت ملاهي الشلال والصيرفي ابدا ^-^

لا انكر ان اهل جدة (في الغربية بشكل عام) قابليتهم للتغيير (سلبا او ايجابا) أكثر من غيرها في بقية المناطق, ويمكن السبب زي ماذكرت هو التنوع في التركيبة السكانية (على فكرة اخوك اصوله حضرمية ^-^) إضافة الى محدودية مفهوم (العيب) عند أهاليها!
صحيح فيه تنوع في الشرقية والرياض, لكن كان دخولهم شيء طاري, بعكس جدة اللي أغلب سكانها أصولهم من شتى بقاع المعمورة! فالتنوع فيها أصل!

بالنسبة للتدين, أتفق معاك! قد تكون بعض التقاليد كأنها تعاليم دينية! وهي ظاهرة ليست محصورة في منطقة بعينها! قد تكون في كل العالم الاسلامي! ولكنها نسبية من منطقة لأخرى!

تحيتي لك :)

حيادية يقول...

انا عشت في جده وفي الرياض ونفس الموجود في جده موجود في الرياض بس الفرق انو في جده علني وفي الرياض بالمستخبي يعني زي ماإنتوا عارفين انو المطاعم والكافيهات كلها مقفلة (والله يعلم اش بيسير فيها )وما تقدر تشوف في الرياض شي علني لانو الهيئة منتشرة ورغم انتشارها ما منعت من ظهور الفتيات بدون حجاب وبكامل زينتهن اما الشباب فلا اعلم هل هم بنات او اولاد (اذا ما شفتهم روح المولات عشان تشوف )..
اما بالنسبة للسياحة في الرياض ما هي مقومات السياحة لديها ؟؟الرياض مدينة عمل فقط ..
اما بالنسبة للخليط السكاني فحال الغربية ينطبق على الوسطى والشرقية والشمالية كما ان هناك عوائل ذات اصول عريقة جدا في جميع المناطق ليست حكراً على منطقة دون اخرى..
أرجو الحيادية في الكتابات دون التحيز..
تحياتي لكم..

غير معرف يقول...

أشكر موضوعك وتعليقك بس انا عن نفسي اتفق تماما مع saudi dawn لانه مع كل الاحترام لاهل الرياض ، بس السياح هم اللي بيجوا وبيعملوا الفضايح لانه على بالهم سافروا لاس فيقاس مو جدة وكثير منهم يجوا على اساس الفلة والبسطة وانه من جد جدة غييير !!! لكن اتمنيت يحدد صديقك اللي شافه فهلا عشان نقدر نحكم على اللي شافه بس بصفة عامة جدة محترمة وانا من عشاق جدة،، صحيح جدة فيها حرية اكثر بس عمر الحرية ما كانت سيئة طالما انها كانت بحدود واللي مو عاجبه جدة سهل جدا يحول تذكرته وسفره لابها او المدينه ويفكنا من هالسخافات ، مع احترامي للكل.

شارع العروبة يقول...

أولا المشهد اللي شافو خويي عبارة عن حركات بين واحد و بنت قدام الناس ومافي داعي نقول ايش صار !!

اما انك نقلت جدة الى الشرقية فكلها مدن ساحلية وفيها اشياء مشتركة بس ما افتليك عن الشرقية شي واتفق معاك ان التنوع فيها اصل اما الرياض فطارئ جديد ... وكلامك صحيح ان في كل مكان في اختلاط بين العادات والدين بس اللي تختلف نسبة التداخل ..

حيادية ..
كلامك صيحيح تماما على ان المظاهر اللي نستغربها في جدة نلاقيها في الرياض بس في اماكن محددة زي المولات مثلا ...

و اكيد بعض السياح هما اللي يشوهو صورة جدة بزيادة ... لاني حقيقة مني ساكن في جدة ولا ادري ايش الوضع ايام الاجازات ... بس برضو ما خلا السياح يسوو هذي الحركات الا ان الجو يساعد .. ولا ليش ما راحو عرعر مثلا !!

الحرية كويسة بس لها حدود ما تتعدى الذوق العام ... اذا ربي ابتلاك مو تروح تعمل اللي تبغاه قدام خلق الله كلهم !!

شكرا ..

miss-nana يقول...

كلامك منطقي
بس كل شخص يتصرف من منطلق خلفيته و تربيته
و الله يهدي الجميع

غير معرف يقول...

شارع العروبة:
تسالني ليش ما يتصرف سياح الرياض زي سياح جدة؟
اولا مين سياح الرياض؟
يا اجانب يا ناس رايحيين الرياض زيارة اهل او عندهم شغله في دائرة حكومية
يعني مو رايحين يتمشو و فاضيين و مالهم احد يستحو منهم
يعني نظريتي برضه سارية المفعول
و بعدين ما عمرك سمعت ان السياح السعوديين اسوأ سياح؟

ممكن تشرحلي ايش الدلالات اللي فهمتها انت من ورا قصة خويك؟

غير معرف يقول...

الملحوظ ان هناك هجوم كاسح على المنطقه الغربيه خاصه جده من اخواننا الي في المنطقه الوسطى ماادري ليش بس تعالوا خلونا نحلل
1.هل هذا غيره من موقعها الجغرافي ولأنها تتمتع بما لا تمتع فيه الرياض
2. هل لأن اهالي جده هم اوائل المناطق السعوديه في تقبل الطرف الاخر
3.هل لآننا نحترم بعض ونعرف نتناقش وناخذ وندي مع الإبقاء على روح الموده
4. هل لأننا اكثثر المناطق احتراما للاجانب (اقصد الي الوسطى تعتبرهم اقل منهم ) زي المصريين واللبنانيين والهنود والباكستان وغيرهم
5. هل لأن معظم اهالي جده لايهتموا بالشعر النبطي يستبدلو الحروف المنقوطه بغيرها الغير منقوط
6.او لأننا نتبع مذهب اسلامي معتمد معتمد في جميع انحاء العالم الاسلامي غير الرياض
7.هل لأننا نستمتع بأغاني عمر دياب أكثر من خالد عبد الرحمن
8. يمكن لأننا نعتبر انفسنا متحضرين بافكارنا وباعمالنا مو بفلوسنا
9. يمكن كمان عشان احنا ما نستحي وحريمنا ياكلو مع رجالهم ( الزوج والاولاد) في سفره وحده ومن صحن واحد
10.اممممم او يمكن عشان رجالنا مو رجال في نظرهم يريحوا اهلهم ويقضو حاجاتهم
11.يمكن عشان احنا رجالنا ماعندهم غيره ولا مروه وينادي اخته باسمها قدام الاجانب
12.او يمكن عشان اهل جده ما يفرقو بين الي يبيع في السوق والرجال السعوديين وبين السواق الهندي والنادل المصري في غطاء الوجه

أو يمكن ان اهالي جده هم اقل مجتمع في المملكه الحبيبه عنده ازدواجيه

كله جايز وما ادري هل كلامي يحتمل شيء من الصحه او كله غلط انا بس بافكر بصوت عالي

شارع العروبة يقول...

اول شي ترا للي يبغا يشوف التدوينه من وجهة نظر ثانية فهي مدح لاهل جدة !!!


SAUDI DAWN

معاك حق في نوعية السياح ... بس ليش هذي النوعيات من الناس ماتروح
الشرقية !!
اتوقع لان جدة اكثر المدن السعودية انفتاحا ... فالسياح يجو ويخربو سمعتها .. على حساب انفتاحها !!

شفت صاحبي من جدة وسألتو عن الموضوع خاصة اني ما اسكن جدة الا في الاجازات وقالي : ( جدة وقت الدراسة غير اوقات الاجازة ... الصورة التي تراها عن جدة في الاجازات ليست صورتها الحقيقة ...واللي تشوفو من هذي الحركات فهي من ناس جايين من خارج جدة )

الصورة وضحت اكثر ...


غير معرف ...

ههههه ... حلوة رقم (11)

كلامك تمام ... فكر بصوت عالي براحتك لان معاك حق ... بالعكس اخلاق اهل جدة احسن كثير (طبعا بشكل عام) وتعاملهم احسن كثير خاصة مع الاجانب ... يتقبلو الاخر وهذا شي جدا جيد ...
اشكرك على الاضافة الحلوة ..

غير معرف يقول...
أزال أحد مشرفي المدونة هذا التعليق.
aljumanah يقول...

بصراحة جدة فعلا تختلف..

أنا عشت في الرياض فترة والآن أنا في جدة..

الرياض رغم الانفتاح ورغم إنه في كثير عادات تجاوزوها.. إلا أنه لسا الغلط يصير في الخفاء.. وقليل الي يطلع برا..

بس المشكلة في جدة.. انو خلاص صار كل شي " وكل شي بمعنى الكلمة " صار عيني عينك..

بصراحة هذي السنة كانت مرة صعبة لأني تفاجأت بالوضع الي هنا..

أول سنة لي في الجامعة وأتفاجأت من تفكير البنات وتفاخرهم بالغلط وحكاياتهم الي ماكنت أتخيل في يوم راح تصير في السعودية..

يمكن تحس إني ببالغ.. بس أنا بالعكس ماوصفت شي.. لو تاخذ لفة سريعة على مقاهي جدة.. راح تنصدم فعلا..
أنا ما دخلت دي الأماكن بس يكفيني العينة الي أشوفها في الجامعة.. والي أشوفها لما أكون في التحلية..!

(( وأنا هنا مابتكلم عن مجتمع الشباب.. بتكلم عن مجتمع البنات))

وبالرغم من كل هذا.. أهل جدة فيهم شي يميزهم جدا.. وهو انه كل أحد فيه خير يقدر يشارك في أعمال الخير ويحضر محاضرات وأنشطة مهما كان شكله ولبسه.. أهم شي مخبرك ايش.. ويشتغلوا على هذا الشي.. وتلقائيا بتغير المخبر راح يتغير المظهر..
لكن في الرياض المظهر يقف حاجز بينك وبين انك تنضم لأهل الخير.. الملتزمين لهم سيمة وحدة.. والي يخالفهم فيها راح يتعرض لأنواع النقد ومايعتبروه صار انسان كويس إلى مايغير لبسه وشكله..
عشان كذا تلاقي تفاوت كبير وانقسام ملحوظ في أهل الرياض..
بينما ماتلاحظ هذا الشي في جدة..


أتفلسفت كثير.. لكن البوست جا ع الوتر..

=)

غير معرف يقول...

أردت فقط أن أدلي بتعليق سريع لأقول أنا سعيد لاني وجدت بلوق الخاص بك. شكرا