الجمعة، 28 أغسطس، 2009

اعلان : قربت نهاية اجازة المدونة .. ياحظنا بيكم ..

السلام عليكم يا جماعة ..
في تدوينة كتبناها اول الصيف قلنا اننا حنوقف في فترة الصيف .. بس باين ان رسالنتا ما كانت واضحة جدا .. احنا انشاء الله راجعين مع بداية الدراسة يعني بعد العيد بإذن الله بثلاثة اسابيع تقريبا ..

بالمناسبة خلينا اقول قصة صارتلي قبل يومين ..

كنت بأشوف واحد من أصحابي ما شفتو من فترة .. بعد ما شربنا قهوة وخلصنا مشيت مع صاحبي الين سيارتو .. لقينا مجموعة شباب باين انها كانت ناوية توقف بالعرض وتسكر على سيارة صاحبي قام صاحبي بسرعة كلمهم قبل ما يمشو ويسيبوه ينتظر !! صاحبي طلع بسيارتو ... ورحت لسيارتي ..

وصلت لسيارتي العزيزة وصار اللي ما كنت اتمناه .. واحد واقف ومسكر عليا تماما .. حاولت اني اطلع بأي طريقة بس الرجال مسكر تسكيره لا نجاة منها الا بأن يأتي سموه الكريم .. قلت خلاص ننتظر مافيش مشاكل لان غالبا اللي موقف غلط ما تزيد عن 5 دقايق ويجي .. قلت خليني أتجهز فشغلت السيارة والمكيف وطلعت برا السيارة .. انتظرت 5 دقايق .. 10 دقايق .. قلت خليني ادور في القهوة المقابلة يمكن الاقي صاحب السيارة اللي ناسيها ... حسيت الصراحة أني داخل القهوة اشحت : "لو سمحتو السيارة الشفرلييه حقتكم " .. " لو سمحت سيارتك الشفرلييه " !! ..

15 دقيقة .. بس مو معقولة الرجال لسا ما جا .. خاصة اني مستعجل ابغا الحق على محل قبل ما يسكر .. ما لقيت اي شي يسليني لا كتاب ولا مصحف ولا حتى سيارات زي الناس اتفرج عليها ( : ... قلت لازم اسوي شي ... وجات على بالي فكرة خطيرة وقلت خليني أجرب !! طلعت جوالي ودقيت 905 : " السلام عليكم لو سمحت ابغا رقم المرور" .. قلي 993 .. قلت شكرا .. ( في البداية كنت حأتصل على 999 بس قلت يا عمي حذول ما لهم دخل .. والله مشكلة ال99 هذي تلخبط !! ) .. المهم دقيت 993 :

انا : " السلام عليكم .. "
993 : "وعليكم السلام "
انا : " لو سمحت انا الحين واقف وفي واحد مسكر على سيارتي وله حوالي نص ساعة ولا جاني .. هذا أعمل فيه أيش !! " .. انا حقيقة توقعت ان الرجال يهزئني ولا يفكرني أستهبل عشان كذا حاولت أنطق الجملة بعصبية !! ..
993 : " قال طيب أيش رقم اللوحة .. وين مكانك ؟ "
أعطيتو رقم اللوحة ووصفت مكاني ... وقالي خلاص انتظر ..

انا حقيقة ما صدقت ان الرجال تفاعل معايا وسجل رقم اللوحة .. فرحت جدا وقعدت اتخيل راعي السيارة الشفرلييه يجي ويحصل الدورية عند سيارتو وبعدين يترجاني ويتأسف .. وفكرت اسامحو ولا لا لما تجي الشرطة !! وبعد تفكير قررت اني اسامحو لو جات الشرطة لاني أهم شي اني كنت ابغا اوصل له رسالة ان اللي سويتو غلط وان القانون معايا ويحميني ..

بس طبعا ما يحتاج أقول ان راعي السيارة جا قبل الشرطة ( هذا اذا كان للشرطة نية انها تجي ) !! .. المهم انا شفت الرجال متجه للسيارة .. رجال كبير ومحترم ومعاه زوجتو كمان .. بعد كم نظرة مني فهم الخطأ .. قال : " ياخي والله انا آسف جدا .. والله آسف .. بعدين انا في هذا المحل كان دخلت وسألت عني " .. لا يا شيخ حدخل ودور عليك كمان !! قلتلو : " يمكن تكون هنا ويمكن هناك ويمكن في القهوة وانا ايش يدريني !! .. انتا بس حط نفسك في مكاني .. " .. انا المشكلة ان عندي عقدة اني ما أقدر أهزأ واحد لو معاه زوجتو او اولادو لان احس ان كرامتو تنزل قدامهم حتى لو كنت جدا معصب .. المهم الرجال ركب السيارة .. ومشي ومشيت .. وانتهت النص ساعة بـ"أنا آسف" وخلاص !!

هناك تعليقان (2):

نظم يقول...

المشكلة إذا انتهت النص ساعة أو الساعة وبدون حتى ما يقول آسف، بالعكس أحيانا تكون نظارته تقول ياخي وش فيها إذا استنيت شوي ..
ياخي والله إن الشعب السعودي بحاجة لدوره مكثفة في الأخلاق.

حنـــــــ وردهـ ـــــــــــــــــان يقول...

كل عام وانتوا بخير ورمضان مبارك عليكم
واحمد ربك انه ما جا المرور
احد ينادي المرور عشان سياره مسكره عليه
:)