اليوم الوطني .. من شوارعنا !!

أبغا فقط أفهم ..


عزيزي اللي ترقص نص الشارع والناس موقفة تطالع .. تتوقع معجبين مثلا !

عزيزي الكوول ..طالع كشخة صراحة بس ماتلاحظ انك حفيان .. مثلا !

عزيزي اللي تبخ بالبخاخ ..بخصوص تصرفاتك تحس انك ظريف مثلا ! – على فكرة اللطمة مع البخاخ رااااكبه-

عزيزي ياللي قاعد في نص الشارع ..مضيع الشانزيلزيه تتوقع!

جاني كم احساس مع المناظر الخلابة اللي شفتها :

- زي ما قال واحد ان اليوم الوطني محطوط خصيصا حتى يحمد أصحاب العقول على النعمة العظيمة التي ينعمون بها ! قربت إني أصدق من جد !

- اكتشفت ان شعبنا ماشافوا خير وحمدت الله على اليوم الوطني يعني ما أقدر اتخيل ايش ممكن يصير بكل هذي الطاقات لو مافي يوم وطني !

- حسيت أن الفقر اختفى من البلد أو أن أولويات الصرف عند الناس مضروبة !! فكر بس كم ربحت المصانع العالمية من يومنا الوطني !

صاحبي أنس عبدالرازق كان راجع من طريق الملك عبدالله وكان ينقل بعض المشاهدات والاقتراحات على الفيس بوك انقل بعضها :
"
اقترح ان يكون هناك اكثر من يوم للاحتفال وذلك لتخفيف هذه الدافعية للفرح عند الكثير من الناس ، مثلا احتفال بمناسبة ذكرى انضمام الحجاز لحكم الملك عبد العزيز واحتفال آخر بمناسبة ذكرة انضمام الجنوب للحكم ولآخر لبداية انضمام المنطقة الشرقية وهكذا بحيث يتعود الناس على الخروج والإحتفال

اقترح إضافة مادة لتعليم الرقص في المدارس لان الشباب مضيعين بقوة بالجانب هذا تلقى الإيقاع شرق وهو يرقص غرب وتلقى الجملة الموسيقية او اللحنية تبدأ وتنتهي وهو جالس في حركة لوب بدون مايراعي البداية او النهاية وهذا بلاشك يشوه شكل الاحتفال ( وبالمناسبة مسألة سوء الرقص كانت تقريبا مشتركة عند الغالبية العظمى)

في مشاهد تقهر وتخرب ابو الوناسة مثلا تلقى شاب مشخص و"مزكرت" ورابط العلم بشكل حلو وحاط ربطه على راسه بشكل انيق وقاعد يتمشى بالشارع وهو حافي! يعني مو لابس نعال - الله يكرمكم- صراحة هذا من اشد المواقف اللي قهرتني

اقترح صناعة علم خاص للمملكة العربية السعودية يستخدم في مثل هذه الاحتفالات كأن تستبدل كلمة (لاإله إلا الله محمد رسول الله) بكلمة (المملكة العربية السعودية) وبنفس الخط ونفس طريقة الكتابة ويبقى السيف مكانه بحيث شاهدنا اليوم امتهان كبير لكلمة التوحيد وللفظ الجلالة بالذات كانت تداس تحت الاقدام وفي كفرات بعض السيارات ولا شك ان هذا من الاشياء الغير جيدة ولا تتناسب مع طبيعة الاحتفال العامة "

مافي أي مشكلة انك تحتفل ... تخيل اليوم الوطني كله محاضرات تجلس وانتا هاجد وممنوع أي كلمة !! صار عقاب الهي هذا .. القصد افرح بعقل !

عن نفسي كنت ححتفل باليوم الوطني فعلا بشكل كبير لو مثلا اعطونا مكافئة اضافية في الجامعة ، رجعو البيبسي بريال مثل ما قال أحدهم ! اتوقع تعطي قيمة كبيرة لليوم هذا حركة مثل كذا يصير كل سنة ننتظر هدية بمناسبة اليوم الوطني ( : -يارب احد له تأثير يقرأ ويفهم أن مافي مانع تزاد المكافئة طول السنة عادي والله في ناس كثير محا تزعل-


كنت أفكر في السيارة وأنا اشوف الهبال حسيت انه يوم يستحق ولو بعض التقدير ..في بعض الناس مثل الفرق التطوعية في الشرقية استغلت هذا اليوم بشكل ايجابي وهذا شي كنت أفكر فيه وهو المفروض كيف اننا ممكن نستغل هذا اليوم وطاقات الشباب فيه ..كنت أفكر كمان لو صار في اليوم الوطني مؤتمر لأصحاب الطموحات والمشاريع والانجازات الشابة يعرضوا مشاريعهم وطموحاتهم ونجاحاتهم ! أي حاجة مفيدة تفيد مستقبلنا ..طبعا إلا دروس الرقص ما أأيد انس فيها ( :

اليوم الوطني مفروض يكون منطلق للمستقبل بدل أن يكون أغنية عن الماضي