الاثنين، 17 نوفمبر، 2008

احنا معقدين .. كل هذا عشان نصب قهوة ؟؟

بسم الله الرحمن الرحيم

اتكلم بصفتي كسعودي .. وسعودي فقط ..
ياما تعفر وجهي تعجبا من العادات الغريبة اللي اسمعها او اقراها عن بعض الشعوب ..
وفي منها اشياء كثيرة بدون سبب واضح ( بالنسبة لنا عالاقل ) !!

مثلا

في فرنسا ايضاً يمنع على أي خنزير ارتداء ملابس تشبه نابليون !!؟؟ ( الحمد لله .. عندنا نابليون حقنا ومو نابليون لبسهم واحد !! )
وفي كندا ممنوع تنظيف الجروح أمام الأطفال !!؟ ...
هههههه احنا نخليهم يذبحون تيوس !!!!!!!

وفي تورنتو يمنع سحب أي \'حصان ميت\' في شارع يونج ستريت!!؟
( في أحد سواها من قبل )؟

بس احلى وحدة
وفي النمسا يمنع أكل الايسكريم أمام البنوك!!؟
( اذا عرف السبب بطل العجب )؟

من جد اذا عرف السبب بطل العجب





لكن اللي باعلق عليه .. موقف عندنا في السعودية .. موقف واحد .. فيه من العادات والقوانين الغريبة مالله به عليم ..
احنا ماننتبهله ... الين نلقى موضوع في مدونة يابانية يضحكوا علينا ويقولوا بالله ايش تفسير الكلام هذا !!!

كيف عادات استقبال الضيوف عندنا من دخولهم للبيت الين خروجهم بعد العشاء ؟؟

يا اخوان اللي جربها يعرف انها مأساة .. اللي يصير هو الولد اللي يصب القهوة ويصير ( القهوجي بتاع الليلة دي ) يحتاج انه يكون في قمة اداءه العقلي وتركيزه حتى ينجح في المهمة الموكلة اليه ( ومايفشل ابوه ) !!!

يوم العزيمة .. الباب لازم يكون مفتوح .. هذا دليل للترحيب واننا نتبع سياسة الباب المفتوح .. عشان كذا بعد العزومة تكتشف في حوشكم انواع البسس ( القطط ) الجديدة !! انت تعزم البشر وبستكم تعزم صاحباتها .. في مشكلة ؟؟
واول مايوصل الضيف لازم تكون واقف عند الباب .. عالارض مو عالدرج .. لان عالدرج يعتبر تكبر عالضيف وانك تشوف نفسك اكبر منه !!!
وصل الضيف ودخلته .. انتبه .. قبل مايقعد لازم تكون واقف وراه معاك دلة القهوة وعدد من فناجين القهوة ..
( عدد فناجين القهوة تحسب بالطريقة التالية عدد الضيوف اللي ماصبيتلهم × 3 ليش ؟؟ الله اعلم)

اول مايجلس الضيف .. ويجلس الوالد .. هنا خذ وقفة .. اقعد احسب ..او خمن ... مين ياترى اكبر ؟؟

في العادة اذا ضيف عادي .. لازم تبدا تصب القهوة لابوك اول .. وهو طبعا بيقولك ( لا عند فلان ) وتروح لفلان ( لا ابد .. عندك ) وترجع لابوك ( لا لا والله ابد عندك ) وتروح لفلان .... الين توصل في النهاية لواحد منهم ..
لكن اذا ضيف (كبير ) سواء شايب .. او مهم كمنصب .. تروح تبدا من عنده .. وانت عارف وواثق انه بيقولك ( عند الوالد ) وبتروح للوالد ( لا لا عندك ) ....

فنطلع بخلاصة انك تبدا عند الوالد الا اذا الضيف كبير او مهم ...

حلو حتى الان ؟؟ اوكي

نبدا بالصب على بركة الله .. ابدا وبلطف .. امسك الدلة بيدك اليسرى .. وبالفناجين بيدك اليمنى .. وقرب من وجه الرجال وانت تصب .. يعني لاتصب وانتا ماسكه عند صدرك كأنك تقول ( حقتي حقتي )
حاول قدر الامكان اظهار مهارتك وحرفتك بانك اثناء تدفق القهوة تبعد الفنجان عن الدلة .. مدري ليش .. عشان توري الضيف انك تصب قهوة خالصة ؟؟
وفي حركات صغيرة احترافية .. تصقع الفنجان بعد ماتمليه صقعه خفيفة بفم الدلة بدون ماتهتز القهوة .. وياليت لو تجي مع الصقعة هزة راس كمان !! اوف

السؤال اللي يطرح نفسه هنا وبقوة .. قد ايش اعبي الفنجان ؟؟
في اي منطقة في العالم .. الزيادة تعني الاكرامية .. عكس النقص ... الا هنا !!! كل مانقصت كان احسن واكثر كرما !!
الان لو حسبنا عدد الليترات الموجود في فنجان القهوة كم يطلع ؟؟
قم بهذه التجربة : احضر علبة بيبسي 400 مل ... وعدد كبير من فناجين القهوة .. وابدا صب
حيمتلي معاك فناجين كثيييير ..
فلنقل ان سعة فنجان القهوة 20 مل مثلا ...
هنا حرام وعيب وجريمة وكارثة اذا عبيت كثير في الفنجان .. ناهيك عن تعبيته بالكامل فهذه مسألة حياة او موت .. لكن اذا صبيتله مثلا 15مل فانت اهنته اهانة عظيمة !!! كيف تعبي الفنجان ؟؟؟ حاشا لله !!




المتفق عليه بين العلماء انك تصب 7-10 مل لتر لرجال طول وعرض قد الجمل !!!! ( 7 مل لتر ) والله قليل !!!! فين الكرم في الموضوع !!!

مهمتك للخمس دقايق القادمة انك توقف وماتقعد .. ماسك دلة القهوة بيدك اليسار .. وعيونك كالنسر تتربص فناجين الضيف والوالد .. وتتربص طريقة مسكتهم للفنجان .. وتدقق كيف ينزل الفنجان بعد مايرشف منه << حلوة يرشف اذا نزله بطريقة ثم مسكه بشكل متوازن هذا يعني انه لسا ماخلص ال 7 لتر بتاعته !! واذا خلص .. يصعب شرحها بالكلام .. ولكن في حركات معينة يسويها الضيف عشان تنتبه انه خلص وتقفز تصبله 7 لتر ثانية المشكلة والقلق الاكبر يبدا يستهبل !!! فانت تشك بالموضوع !! الرجال طول .. وما تدري خلص ولا لا .. تروح تمشي متجه له وانت تدعي يارب ان قرارك صحيح وانه خلص عشان ما ( يطيح وجهك ) ... وعينك تحاول تسرق اي لمحة من الفنجان .. المجلس كبير ... مشيتك واتجاهك واضح .... ولمن توصل وتتضح نيتك .. تشوف الفنجان لسا مليان !!! قهرررررررررررررر ... لا ومن الحقارة مايعطيك اي نظرة ولا يطل فيك كانك ماخلقت !! .. تقوم ترجع ادراجك صاغرا ذليلا لمكانك وتظل واقف في انتظار اشارة من هالـ ( سيد ) المؤقت اللي صرت عبد عنده تقف رهن اشارته الدقائق الطوال !!

وبعض الضيوف النجسين يستمتع بهاللعبة .. يميل الفنجان ويسوي حركات .. عشان تجي واثق تبغى تصب .. يقوم يوريك انه مليان يا اهبل !! ويرفعه لفمه وعلى طرف شفتيه ابتسامة خبيثة انك ( وقعت ) في هالفخ البايخ !!
لان شكلك مو حلو تقطع المجلس متجه لواحد وبعدين توصل وترجع على طول بدون فايدة !! تحس نفسك مسخرة

.ياما تسير مواقف محرجة وتحتاج الى مخ قهوجي صاحي .. القهوجية في السعودية " تنفع تخصص جامعي !! او رسالة ماجستير

المهم

اخونا كورنيش .. قهوجي مبتدئ .. جاي لاهله ضيوف اليوم .. نشوف ايش صار له

الضيف الاول ماشي تمام .. وهو دايما سهل وواضح .. زي اول سؤال في الاختبار ..

بعد فترة .. الضيف ميل فنجانه بطريقة انه خلص .. لمن راح كورنيش يبغى يصب .. سمعوا واحد تنحنح عند الباب .. كورنيش الان في الطريق للضيف القاعد ... ابوه صارخ ( يالله حيوه .. تفضل تفضل ) .. كورنيش تقريبا وصل للضيف القاعد .. ابوه يقول ( رح قلط الضيف يا ولد) ... لحظة حرجة جدا .. الضيف الجالس بدأ يرفع يده بالفنجان ... الضيف اللي بره قال (بسم الله .. ياولد ) .. ماذا يفعل كورنيش ؟؟ هل ياخذ فنجان الضيف الجالس ويبدا يصب ؟؟ الشغلة هذي حتاخذ وقت !! الضيف بره عند الباب !!! .. هل يروح يدخل الضيف ويطنش القاعد ؟؟ لا مايقدر !! الضيف يده فعلا بالهواء ماسكة الفنجان !!!
كورنيش قليل الخبرة ماعرف مع الربشة ايش يسوي.. اخذ فنجال الرجال القاعد وطنشه !!! وراح معاه الدله والفنجان الوسخ عشان يلحق يقلط الضيف ..

ماانتهت المشكلة
الضيف واقف لاصق بالباب .. لمن جاء كورنيش يسلم كان هوا فوق الدرج .. بدا السلام .. حس بالاحراج .. شاف نفسه اطول من الضيف .. حاول ينزل نفسه .. قام دف رجله تحت الدرج عشان يقصر نفسه شوي !!! رجله دعست على رجل الضيف .. تحرك الاثنان حركة عنيفة شوي ... طاح عقال كورنيش .... وااااافضيحتاه!!
عدى الموقف .. ودخل الضيف الجديد .. وبعد السلام جلس .. كورنيش بطل .. وراه على طول بالفنجان ..حافظ القواعد .. قام صبله ... ومد يده بالفنجان ... وايش شاف !!!!! بقايا من القهوة على طرف الفنجان !!!!
ومر فلاش سريع في عقل كورنيش !!! تذكر ان الفنجان اللي معاه هو فنجان الضيف القديم اللي اخذه وطلع !!! والان صب فيه للضيف الجديد !!! ... يعععععع (قالها في نفسه طبعا ) ... تراجع شوية يبغى يشوف ايش حيصير للضيف الجديد وهويدعي من كل قلبه يارب ماينتبه ان الفنجان مستخدم !!!
وبعد لحظات شاف الضيف شرب واكل المقلب وهو يضحك ومو داري عن الدنيا .. ارتاحت نفس كورنيش .. وتنهد بعمق .. وفي هذه اللحظة .. لمحت طرف عينه الضيف القديم .. فاذا به قاعد يزغر فيه بنظرات نارية !!! معناها انا عارف ياكلب ان هذا فنجاني لاني شفتك تطلع مامعاك الا هو .. والان قوم صبلي والا حافضحك !!!! فتجحط عيون كورنيش ويحاول عبثا ازدراد لعابه وهو يوسع ياقه ثوبه!!! ثم يقوم كالعبد الذليل الخايف من الفضيحة .. ياخذ فنجان .. ويروح يصب للضيف القديم ... فيربت الضيف القديم على كرشته ارتياحا .. وصار واثق انه ( تمكن) من القهوجي لاخر السهرة .... اثناء كورنيش مشغول يصب في واحد انتبه !!! الضيف الجديد !!! ليش القهوجي يجيب للضيف اللي قبلي فنجان جديد ؟؟ ... وليش لمن استقبلني عند الباب كان معاه دلة وفنجان .. وبحسبة بسيطة .. يفهم الضيف الجديد ان فنجانه اللي شرب نصه هو فنجان اللي جمبه !! ويلتفت بشويش !! ويحس بمغص في بطنه وهو يشوف الضيف يرتشف قهوته الجديدة من الفنجان الجديد بكل ارتياح !!! .. يلتفت الضيف الجديد على كورنيش ويرميه بافظع نظرات عرفت تظهرها العين البشرية .. يتحرك بشويش وهو معلق عينه على كورنيش .. وعلى وجهه علامات ازدراء وقرف .. يحط الفنجان بشويش عالطاولة .. وهو نصه مليان .. ويقول بس !!!!!

رأيي طبعا ان كورنيش ورط نفسه في مستنقع قذر والحل الوحيد انه ينتحر وخلاص..




ملاحظات ومقترحات :
اقترح ان تكون الفناجين شفافة تماما .. عشان يبان من بعيد هل فضي ولا لسا .. وعشان ماتقع ضحية للضيوف المتسلطين .
دائما احرص انك تشيل فنجانين عالاقل طوال الوقت .. حتى لو لخبطت بين الفناجين يصير عندك بديل جاهز.
دائما ابتسم عشان تذكر الضيوف انك بني ادم .. ممكن يغلط ويصب شوية زيادة .. او يصب لغيرك مع انك خلصت قبله !!
وهنا باذكر موقفين خطروا على بالي ..
الاول كنت انا وولد عمي في عزومة كبيرة في بيتنا .. اشتغلنا صب شاهي وقهوة زي الفل .. وطلعوا الضيوف الحمد لله .. طبعا من التعب .. رحنا قعدنا عالكنب .. ولد عمي قعد مكان واحد من الشخصيات المهمة .. كبير في السن طبعا .. قعدنا نتكلم ونحش في الرجال اللي كانوا موجودين .. ولد عمي نسى نفسه ومد يده على فنجان الشاهي مليان نصه اللي قدامه .. وارتشف رشفة !!!!!!
انا صعقت !!! وبسرعة هتفت : هذا الشاهي حق " فلان " !!!!!!!
فاذا به يصرخ و يبصق الشاهي بكل قرف ويقذف الفنجان بكل ما اتاه الله من قوة ويركض للحوش وينسدح عند خرطوم الموية ويقعد يغسل لسانه ربع ساعة !!!!!!
انتبه لان هذا قد يحصل بعد العزايم المتعبة ..

الموقف الثاني حصل لاخوي شارع العروبة .. افضل انه هو يكتبه ... لو سمحت يا مستر شارع اكتبه في التعليقات

لاتفوتكم قصته

وبالمناسبة .. هنا ذكرت شيء مما يحصل في عزايم الرجال..

اتمنى اعرف ايش يصير في دهاليز الحريم .. هل عندهم نفس التقاليد ؟؟!!

اتمنى اسمع جواب من المختصات


دمتم بود

هناك 17 تعليقًا:

fat7i يقول...
أزال أحد مشرفي المدونة هذا التعليق.
شارع العروبة يقول...

اما انا قصتي قصة .. مع اني ما اوافق كثير على كل الكلام لاني احس هذا عادات حلوة محا تحس بقيمتها الا اذا فقدتها .. بس انا عارف اسلوبك يامخرج عشرة انك تبغى تسلط الضوء بنقد ولكنك لا تقصد هذا النقد القوي .. فلا اتوقع انك ترفض هذي العادات !! انا عن نفسي احب اضيف الرجال لاني بالضيافة اتعرف على رجال مهمين في المجتمع ..

كان عند الوالد ضيف محامي كبييير جدا اول مرة يجي بيتنا وانا المسكين ماسك وزارة الضيافة في بيتنا بعد تقاعد اخوي المبكر ..
المهم بعد القهوة اللي صار فيها بالضبط نفس ماقلت يامخرج 10 وبعد التمر والحلاوة .. انسحبت وانتظرت ربع ساعة وبعدين دخلت بتبسي الشاهي .. حطيب التبسي قدام الضيف ومسكت يد الابريق .. والا الضيف يمسك يدي ويقول لا والله تخليه انا بصب الشاهي .. ونتعازم .. وارفع الابريق واحس انو خفيف بزيادة .. طلع الابريق فاضي مافيه شاهي ... والضيف يشد وانا اشد ... وانا اقول خليني في حالي في شي ناقص .. لا هو مرا مصر .. واخيرا انتصر علي وامسك بالابريق الفاضي ورفعه يحاول يصب ويكتشف الكارثة .. ( الابريق فاضي .. ها !!) هو الرجال راعي مزح .. قعد يستهبل شوي وانا مستحي ومحرج جدا .. قدرت انسحب ورحت قلت لامي ترى الابريق فاضي وانا المسكين الضحية ..
تمت تعبية الابريق بالشاي وقالت لي امي شيل ودي الشاهي .. انا ماصدقت .. صار عندي عقدة .. مسكت الابريق عشان اتأكد بنفسي .. ما تأكدت الا بعد ماشفت فنجان الشاهي مليان .. ورحت وانا خايف برضو انو يكون الابريق فاضي مع اني تأكدت بالتجربة .. جا الضيف وقالي ها اكيد حطيتو شاهي .. قلت ايه والحمد لله صبيت فنجان ضاهي للضيف بكل احراج ..
قعدت اضحك على هذا الموقف كثيير .. الين الحين اضحك كل ماتذكرت هذا الموقف ...

مخــرج 10 يقول...

ليش فاهمين غلط ؟؟

يمكن زودت نبرة الكلام.. فحسبوني الناس ارفض هالعادة

ابدا.. بالعكس والله اني احبها..

بس اقصد لمن تشرح لغير السعودي كيف تقاليد صب القهوة حينفجر راسه من التفاصيل الصغيرة اللي لازم ياخذ باله منها عشان يصير قهوجي محترف

ولا انا من اشد المتمسكين بهالتقليد

شارع العروبة يقول...

( بس انا عارف اسلوبك يامخرج عشرة انك تبغى تسلط الضوء بنقد ولكنك لا تقصد هذا النقد القوي .. فلا اتوقع انك ترفض هذي العادات !! )
هذا اللي قلته وطلع صح عليا !! اصلا لما تشرح لاجنبي محا يصدق العلاقة العكسية بين الكرم وانك تصب قليل للضيف !!

مخــرج 10 يقول...

قهوتكم عندي بكرة : )

jana يقول...

انا زعلااااااااااانه من اهل الرياض تفتحون كرنيش ولا تعزمونا احنا المساكين في الجبيل ملينا مناضر الكثبان الرمليه

Unique يقول...

مدونتكم جميلة مرة ودمها خفيف
خاصة انها تطل على كورنيش الرياض
وصيد الضبان مزدهر باين عليه

تقبلا مروري

مخــرج 10 يقول...

jana كورنيش الرياض .. حيث لا كورنيش ولا رياض !!

ايش تبغي بالرياض ؟؟ والله اتمنى اعيش بالجبيل او ينبع .. ( اذا ما حصلي المدينة المنورة طبعا : ) )

عندكم الفانتير اروق واحلى شاطئ بالشرقية


uniqe سعداء جدا بمرورك .. شرفنا بين الفينة والاخرى .. وبالمناسبة .. ( احنا ثلاثة )
^_^

عالمي اطفالي يقول...

مدونتكم رائعه وانا عندي بعض الأضافات اذا تبغوها ارسلها مثل صندوق الدردشه
وعداد الزوار وكتاب الضيوف
وممكن تشوفها في مدونتي الثانيه
http://hanawardah.blogspot.com/

غير معرف يقول...

اول مرة اقرا راي الاولاد في صب القهوة واستقبال الضيوف ..
اما عندنا في القسم النسائي يوووووووووووه الله من القصص والعبر ووووو
بس جزء صغير تخيل لو وحدة مو واحد اكتشفت سالفة تبادل الفناجيل لن تكتفي بنظرة شريرة واااااااااااو

تحياتي استمتعت بالقراءة

غير معرف يقول...

ههههههههههههه

الحريم عندهم مصطلح مختلف في وصف المضاربات العنيفة !!

سمعت مرة اختي تكلم صاحبتها عن مضاربة في مدرستهم : ( تصدقي صار ضرب بالكعوب وشد شعر !!!!!)

ههههههههههههه

اما شد شعر .. حل سهل : )
طريقة سهلة للسيطرة على (الخصمة!!)

شارع العروبة يقول...

هههه .. احس البنات عالم آخر عايشين في المريخ .. انا مني متخيل كيف مدارس وجامعات البنات وكيف يضاربو وكيف عزايمهم..
انه عالم اخر

نايف يقول...

you are 5bl
يعني انت Crazy

<<--- هذا الراقل تقطعت براطمه من الضحك

والله المعآناه تفوووح من هالتدوينه

خل عنك انا الله بالشني كل جمعة يجي امام المسجد " ابوحاتم "و قسم اني اقول حق امي زهبي دلتين قهوة من الحين ..
وحده له خصوصي على جنب احتريه بس يجي !!!
يلعن شكل شيطانه ستعطش فجنال !!
وكل فنجال 10 مل !!
يعني وش نظامه الأخ !!
تطيح ايدي وهو مايهز الفنجال ..
واحيانا ألمح له " الطع ابوووه اذا خلص الفنجان ولا كاني اشوفه "
واحيانا عقب مااخذ الفنجان : بوحاتم بغيت الشاهي بسكر ولا بدون !! " << مسوي مايعرف وش يشّرب



الموهيم ...
انت بطل كح كح

مخــرج 10 يقول...

ههههههههههههه

الحمد لله سبق واجهت زي ابو حاتم ... بس بعضهم يقولي " خلي الدلة عندي " .. هذا نفسي ابوس راسه واقوله " ابوك في الجنة "

^_^

شرفت يا نايف

غير معرف يقول...

أعجبني ما كتبته في التعليق :
(( ليش فاهمين غلط ؟؟

يمكن زودت نبرة الكلام.. فحسبوني الناس ارفض هالعادة

ابدا.. بالعكس والله اني احبها..

بس اقصد لمن تشرح لغير السعودي كيف تقاليد صب القهوة حينفجر راسه من التفاصيل الصغيرة اللي لازم ياخذ باله منها عشان يصير قهوجي محترف

ولا انا من اشد المتمسكين بهالتقليد ))

و تمنيت أنك كتبته في نفس الموضوع

لأن بعض الشباب للأسف صار يظن أنك حتى تصير شخصية و لك راي مستقل لا زم تثور على العادات و التقاليد و تمسح فيها الأرض بمعنى آخر أنتوا ليش معقدين عادي استقبل الضيوف في العزايم و انا لابس جينز و ماله داعي كل ما دخل شايب في البيت احب راسه يكفي ( هاي ) وليش تزعجزنا في العيد ندور على بيوت الناس من صباحية ربنا خلونا ننام و الليل نسوي حفلة و نشوف الأهل و الأصدقاء( يا عيني ) و من هالكلام
مع أنه من المعروف أن لكل شعب و أمه عادات و تقاليد يفتخرون فيها و يتمسكون فيها في الأكل و الشرب و الضيافة و غيرها و بعضها يمكن يكون معقد أكثر من عاداتنا بألف مرة
لا و اللي يرفع الضغط لما يجيك هذا إذا سافر برا أو حتى هنا و يهتم بادق التفاصيل و الاتيكيت في المطاعم حتى يصير شخصيه ( بسم الله عليه ) و يقولك لازم تبدأ بكذا بعدين كذا و انننننتبه تخلي الشوكة و السكين متقاطعتين اذا انتا ما خلصت الأكل و من هالكلام
يعني (( أسد علي و في الحروب نعامة ))

ᾺḶ ßàţőul Ṁổḧḁṁṁḛḓ•Ḵ يقول...
أزال المؤلف هذا التعليق.
Hunted TK يقول...

يا جحش. الفنجال ما تعبيه لانك اذا عبيته بمعنا اشرب قهوتك وانقلع عند اهل الجنوب.وعند اهل الشمال العكس. المشكله لما يجيك واحد ما يعرف العلوم والسلوم وما تربا عليها ويجي ينتقد زي الثور