الجمعة، 16 يناير 2009

المقاطعة ... والخرافة ...

في اليومين الماضية جاتني رسايل كثير على الجوال والايميل كلها تقول ان بعض المطاعم والمقاهي الامريكية مثل ستاربكس وماكدونالدز خصصت بعض أرباحها في الاسبوعين الجاية لدعم اسرائيل ... وتقول هذي الرسايل ان المصدر هو البي بي سي وانا مالقيت في البي بي سي اي شي ... انا دائما اشك في هذي الرسايل لانها غالبا تكون اشاعات طلعها واحد متحمس للقضية ويبغا يحمس الناس ويلهب مشاعرهم فيطلع أخبار محرضة مثل هاذي والناس مع العاطفة الشديدة تجاه ما يحدث تصدق الخبر وترسل هذا الخبر على طول لكل القائمة اللي عندها بدون ما تتأكد ... أنا مؤيد للمقاطعة ولكن ليس على اساس خرافات و اشاعات ... لان مثل هذي التحركات كالمقاطعة تحتاج أن تنبني على قناعة وأخبار ثابتة مؤكدة والا اذا كانت الاخبار مشكوكة يصير الواحد يقاطع بدون اهتمام لانه اصلا مو مقتنع اقتناعا كاملا لان المعلومات اصلا غلط ...

عشان كذا انا ما قاطعت في البداية لان هذي خرافات ... بس لما سمعت ان البنتاغون دعم اسرائيل بدفعة اسلحة وبعد موقف امريكا في تصويت مجلس الامن الاخير .. قلت لازم يصير لنا تأثير ولازم نضغط على السياسة الامريكية ... نعم نقدر نحن المغلوبون على امرنا التأثير على سياسة أمريكا حتى لا تدعم اسرائيل وحتى يصير موقفها حياديا ... ولكن كيف ؟

كثير من الشركات اللي عندنا في السعودية اللي اصلها امريكي مثل ماكدونالدز ستاربكس و هارديز وتشلز وغيرها الكثير تكون فاتحة عندنا على اساس عقد
الفرنشايز .... والشركات الاخرى مثل شركات السيارات اللي تبيع منتجاتها عندنا ... هذي الشركات لو قاطعناها حتأثر على الاقتصاد الامريكي ... والاهم من كذا تأثر على رجال الأعمال اللي لهم تأثير قوي في السياسة الامريكية ... فكردة فعل لرجال الأعمال بعد الخسائر التي تسببها المقاطعة لتجارتهم سيضغطو على رجال السياسة الامريكيين ليعدلو موقفهم حتى ترجع تجارة هؤلاء التجار على ما كانت عليه ..

لازم ما نستهين بسلاح المقاطعة ... المسلمين أكثر من مليار ولو قاطع نصهم فحيكون هناك ضغط كبير من رجال الاعمال الامريكيين على السياسة الامريكية حتى يضمنو استمرار ارباحهم خاصة مع الأزمة المالية الحالية ..

ياريت يكون لكل واحد دور ... ياريت ما نوقف متفرجين كأننا نتفرج على فلم ... لازم نتحرك ... نأثر ... لازم يصير لنا إحنا المسلمين حساب ...

هناك 7 تعليقات:

غير معرف يقول...

لا حبيبي
شي مؤكد

وزعوا هنا علينا في بريطانيا نفس الشي
فتطمن من ذي الناحية مررة

أما إذا كنت تحب ستار بكس وذي الأشيا
و جاي تتعذر بالمصدر

فعلى الدنيا السلام !!

يعني خلينا نكون واقعيين
متى قد كنا نتثبت من أي شي ؟!!
دايمن نصدق أي شي و ننقلو
لكن لما يتعلق الأمر بشهوتنا ورغبتنا

يجي شغل التثب و هات المصدر
اطلعوا منها بالله

اللي عنده أي شي يجي هنا
majidyat.net

هذا الإعلان بذاك يا زيزو XD

غير معرف يقول...

تعال يا ماجد

اول شي ليش اشم نبرة هواش في كلامك ؟؟
المقال يقول قاطعوا مو لا تقاطعوا

ثاني شي ((( مو انا اللي كاتب المقااال )))

ثالث شي .. اذا كنا عمرنا مانتثبت من شي زي ماقلت .. هذا يعني انه خلاص مانثبت من شي ؟؟وان اللي كنا نسويه صح ؟؟

رابع مدري خامس .. انا تبثت من ماكدونالدز.. واقتنعت انه مايدعم اسرائيل ولا بشي .. لكن من ناحيةامريكا .. طبعا ماكدونالدز امريكي ومقاطعته حتأثر على اقتصادهم .. بالتالي اقتصادنا ..

وحياكم في الموقع اللي كتبه
ولاتنفجعوامن صوت الرصاص

^_^

شارع العروبة يقول...

ايش وزعو عليكم في بريطانيا ياحبيبي ؟؟
(أما إذا كنت تحب ستار بكس وذي الأشيا
و جاي تتعذر بالمصدر

فعلى الدنيا السلام !!)

وعليكم السلام ورحمة الله وبركاته ... ايش انا قتلت نفس ولا اكلت ربا !!

بعدين زي ماقال زيزو أنا ماقلت اني ضد المقاطعة بس ضد المبدأ اللي نبني عليه المقاطعه ..

ماجد انتا مو في ينبع ؟؟

غير معرف يقول...

المقاطعة سلاح جيد
للاسف اليهود والامريكان تفوقوا علينا واغلب الصناعات والمنتجات تابعة لهم
لكن لا يثنينا ذلك عن المقاطعة ولو بالشيء اليسير

Noora يقول...

المقاطعه سلاح فعال جدا
ولكن تعالوا اقلكم موقف صار لي
قلت لاولادي اتركوا هذا الحلاوى وهذي اللبانه وهذي الكوكيز وهذا المطعم وغيره وغيره لانها امريكيه
قالوا هو ليش كل شي حلو ونحبه امريكي !!!!!!!!!!
اسعفوني بإجابه

شارع العروبة يقول...

احححححح ....
والله سؤال في الصميم ... الواحد تجيه صدمه من بعض الاسئلة البريئة من الاطفال !! يقف حائرا ولا يستطيع الاجابة ..

لو كان الولد صغير بس يفهم شويا كان يمكن اقولو: عشان هما يشتغلو فيسوو حلويات طعمة ... يلا انشاء الله تكبر(يابابا) وتسوي حلويات اطعم من حلوياتهم .. بس يبغالك تبدا كل يوم تحل واجباتك وتذاكر كويس ...

ما أدري احس انها ماتنفع بس هذا اللي جا على بالي !!

يالله يا عالم اسعوفنا بإجابة !!

غير معرف يقول...

great post!!
I share you point of view regarding the buycott