المقهى هو مكان لقائنا الاول والاخير كسعوديين ... جا وقت صلاة العشا وجا حق المقهى وطردنا بطريقة مؤدبه .. بعد ما صلينا قررنا نغير جو بدال ( مقهى ... مقهى ... ثم مقهى ) ... قررنا نتمشى انا وصاحبي في الحارة اللي ورا بنده عند طريق مكة ... واحنا نتمشى جانا واحد معاه جيب فورد موديله تقريبا 98 (يعني سيارة كويسة) .. وقف جمبنا وفتح الشباك وقال : ( السلام عليكم شباب ... انا اخوكم من المنطقة الغربية و ...) المهم قعد يبربر بينما انا قعدت اطالع في المقعد اللي جمبو في الطفلين الصغار النايمين وارجع اطالع في وجه الرجال مره ثانية ... الرجال ايدايه سودا وعيونه حمرا كأنه مهرب مخدرات والكذب باين لانه يقول انا من الغربية ولهجتو تقريبا تشبه العراقيه ... احنا فهمنا المطلوب وما نبغى كلام كثير فاعطيناه شي عشان يمشي ... ومشي ...
هذي طريقة جديدة للشحاته ... Take away ... يعني ما يحتاج الشحات يتعب ويقعد عند باب المسجد ولا يوقف عند اشارة ولا يمسح قزاز سيارتك ... لا ... يلف بسيارة مريحة ومشغل المكيف ويوقف لما يلاقي واحد يمشي ويكلمو من الشباك حتى من دون ما يتعب نفسو وينزل لك من السيارة !! ... بس ينزل قزاز السيارة ...
مشينا خمسة دقايق والا يوقف جمس قديم على يسارنا ...
وينزل منه واحد واول ما بدا يتكلم عرفنا ايش يبغا ... فمشيناه ...
قالي صاحبي اللي كنت امشي معاه : ( في واحد اعرفو كان على خط
السفر ... ووقف في محطة ... والا يوقف جمبو راعي مرسيدس بانوراما آخر موديل و ملابسه كشخه ... يعني شكلو واحد غني .. وقالو انا ابن سبيل انقطع في السبيل وما معايا فلوس ... بس صاحبنا على طول طلع خمس ميه وعطاها لراعي البانوراما وقاله معليش والله ما معايا غيرها !! ... مشي راعي البانوراما وجا راعي المحطة لصاحبنا : ( انتا مجنون ... هادا علي بابا كبييير ... هادا كل شويا يجي يلم فلوس ) ... والله هذول ناس مبدعين ... يعني انا لو صار لي نفس الموقف حعطيه اللي في جيبي ... وحستحي من نفسي مثلا لو كان عندي 500 و اعطيه 100 ... لاني حقول لنفسي هذا راعي فلوس مو شحات تكفيه خمسة ولا عشرة .... طبعا هذا النصاب يستأجر بانوراما ب1500 ويطلع 10 اضعاف قيمتها في يوم واحد ( وياحظو يستمتع بسواقة S500 مجانا ليوم كامل ) ( : ...
المهم ... اكمالا للمسلسل ... كنت في طريق الملك عبدالله اليوم عند محل حلويات ... وانا طالع من المحل وكنت ابغا افتح السيارة عشان ادخل الكيك والا اشوف جمس احمر قديم يجي ناحيتي ... وقف جمبي وكان جمبو حرمه ...
قالي السلام عليكم ... قلت على طول لا اراديا : ( الله يعطينا واياك ) ... والحمد لله كان حدسي صحيح ومشي الرجال ...
ياناس انا فلست ... كل شويا يوقف واحد ويعطيني قصة ... يعني هذي ثالث مرة في يومين يصيرلي نفس الموقف ... هل صارت ظاهرة ؟؟ و الا حظي سيء هاليومين ( الظاهر اللي حيوقع معايا اليومين الجايه هو اللي حيصير حظو سيء) ...
الواحد يقول هذول محتاجين بس لو كانو محتاجين صحيح ليش ما يروحو للجمعيات الخيرية ؟؟
افضل حل ان تعطيهم مثلا ريال بنية الصدقة فتصير ترتاح من وجع الراس وتاخذ اجر في نفس الوقت ... بس المشكلة لو ما كان عندك صرف ( :
هناك 3 تعليقات:
انا برضه نفس الفكرة
مرة جاني واحد على كراون فكتوري
وقال انا من الغربية.......
السؤال ليش معلقين على انهم من الغربيه؟؟؟
ههههههههههههههه
اما اللي جاك على بانوراما
عموما اتوقع انها ظاهرة .. وايضا حظك سيء .. اوان شكلك طيب مرة والناس يقصدوك
معليش هذا واحد يحكيلي عن البانوراما انا ماصرلي هذا الموقف ... والحمد لله انو نبهني ولا انا على نياتي ... يعني مرة لاحظت ان واحد يلاحقني الين ما وصلت البيت .. وقف جمبي ونزلي وقالي انا من قبيلة كذا وكذا واعطاني نسبو كامل ... وقال والله استحي اطلب بس جاي اقدم على الجيش واحتاج لان انقطع بي السبيل ..
بس انا احس انو صادق ... قاعد يحلف عليا ان اعطيه رقم حسابي عشان يرد لي المبلغ ..
إرسال تعليق