الاثنين، 5 أكتوبر 2009

الله يرحم ابونا ابو مطرقة خشب كان رجال طيب !

قعدت افكر في اجدانا اللي عاشو في العصر الحجري ... كيف حياتهم كانت بريئة ومسالمة الى حد كبير ... اتوقع ان الأرض تترحم عليهم صباح مساء وعلى الايام الحلوة اللي عاشتها تحت حكومتهم الرشيدة ... كان الانسان الطيب يقوم الصباح يزرع الارض ويحرثها ... ولو صار هذا الانسان مررا شرير ومخربها وما كان نباتي يمكن يصيد غزال لعائلتو الكريمة ويشويه ويتغدو عليه تحت ظل شجرة ... ايااااام حلوة ( :

الحين لك الحق يا أرض انك تتألمي ووتحسري على حبيايبك الطيبيين وأيامهم الحلوة ... الارض يرتفع ضغطها لما نقول عن اجدادنا انهم متوحشيين نقول " الانسان في العصر الحجري" ... ياللي عايشين الحين تراكم ماخذين في نفسكم مقلب .. انتم البشر الوحشيين وياطيب الحجريين ... انتو ما تستحقو لقب الانسان المتحضر ..انتو ما ينقال عنكم الا سفاحين ... اياديكم تتلطخ كل يوم بدمي الأخضر !!

لو نفكر شوية في حياتنا اليومية ... أقدر اشبه نفسنا بآلة تقوم الصباح لتخلف ورائها أطنان من المخلفات ... هل سألت نفسك يوم من الايام انا ايش سويت لهذي الارض ؟؟ يا عمي خلاص بلاشي تحرج نفسك ... مو لازم تسوي شي ... اذا حسيت في انك مذنب على الاقل حاول تكف شرك :

كل يوم الواحد اكيد يدخل بقالة والا يشتري اي شي ... يطلع من المحل بكيسين ولا ثلاثة وبعد ساعتين الاكياس والعلب تنرمي في الزبالة وتقعد الارض تعاني من كيسك هذا ملايين السنين الين حضرة الكيس يتحلل بعد ما "يبط كبد الارض" ... يا انسان ياطيب ما فكرت انك تحب الارض و تتلطف وتنتظر سيارة الزبالة تمر على بيتكم وتجمع البلاستيك في صندوق والاوراق في صندوق وتعطيها للعامل وتقولو هذا ورق وهذا بلاستيك يصير العامل وبيد باردة وقدام عيونك يكبها في الشاحنة مع باقي الزبايل ويعلمك كيف المرة الجاية تسوي نفسك مهتم بالبيئة !! احنا في السعودية ( :

عشان كذا احنا يبغالنا ما نورط نفسنا من البداية في هذي الاشياء لانك لو استهلكت شي في هذي البلد محا يروح لاعادة تدوير ... حينضم الى جبال المخلفات اللي ما لها غير الله ثم الزمن !!في فكرة سهلة وبسيطة وما تكلفنا اي شي .. الفكرة ببساطة اننا يوميا بنترك مخلفات اشياء ما نحتاجها ... مثلا رحت البقالة وطنت في راصي ابغا حبتين لبان ابو بسة "طبعا هذا الاسم المحترم " .. اديت الرجال الفلوس راح حطلي اللبان في كيس ... حبتين لبان في كيس زي كأنك زي ما يقولو " ترمي سرك في بير " ... تضيع الحبتين في الكيس .. طيب ليش الكيس ياعمي !! زي كذا احيانا نقدر نستغني عن الكيس بكل بساطة : اشتريت واحد حليب المراعي شيلو في يدك ... لو كل واحد قدر يوفر يوميا كيس كان وفرنا في اليوم ملايين الاكياس !!
في أفكار كثير ممكن تساعد اننا نصير اقل شراهة في الفتك بالارض .. ممكن نتكلم مرة ثانية عن بعضها ..

هناك 6 تعليقات:

asma Qadah يقول...

الفكرة الأخيرة هي اللي بتسير معايا غالباً، لما أكون محتاجة لبان أو موية أو عصير أشربه في طريقي ليش لازم كيف؟ الله يخلي الشنطة يااااااااااااكبرها وخلقة مليانة أغراض معقولة ما توسع لقارورة موية والا عصير؟ بعض شنط الحريم ممكن حتى تحط فيها سندويتش صب واي :؛
قبل سنتين تقريباً بدأت عندنا حكاية الأكياس القماشية، أول شيء كانت المحلات الكبيرة هي اللي تستعملها أو تبيعها بـ٣ريال عند باب المحل عشان تشيلها وانت تتسوق ومنها تحط أغراضك وانت ماشي بدل أكياس النايلون؛ يعني كدا وفّرت على المحل انه يجيب عربيات أو سلال زيادة (بدل اللي يخرب من كتر الاستعمال) ومنها انت جمعت أغراضك كلها في كيس (أو شنطة) وحدة بدل كترة الحاجات وممكن تنسى غرض في محل وغيره، وكمان حافظت ع البيئة.
دحين سارت الأكياس هدي موضة تتوزع في الحفلات بدل البلاستيك العادي وكمان تتغلف بها الشنط والجزم الله يكرمكم وحتى سارت تتوزع لما تشتري كمية من منتج معين..

فاكر لما كانوا يتقرفوا من الأفريقيات (الحجات) اللي في مكة وجدة انه كيف كانوا يجمّعوا علب البيبسي ويودوها المصنع؟ سرت أحسهم مثقفين أكتر مننا حتى لو كانوا همّ مو قصدهم كدا :)

غير معرف يقول...

أنا أحيي فكرة هذه المدونة التي تدعم الحقائق ( كورنيش الرياض حيث لاكورنيش ... ولا رياض !!!! ) و بصراحة للتو اكتشفتها من الأصدقاء معي على تويتر ، و أتمنى أن آتي معكم في يوم من الأيام لكي أصيد ضبًا في الكورنيش : ( كورنيش الرياض حيث لاكورنيش ... ولا رياض !!!! ) . . التحية . .

Unknown يقول...

كلام جميل بالفعل .. لكن أقولها و سأقولها .. بدون معامل لـ إعادة التكرير لن نفعل الشيء الكثير .. لأننا نحن نستخدم أشياء كثيرة في حياتنا و من ثم نرميها .. مثل كراتين الأشياء الجديدة .. الأجهزة الكهربائية القديمة .. و القائمة تطول .. صحيح أن الكم كيس أو الكم علبة عصير ممكن أنها تسوي شي كثير .. لكن في النفس الوقت حنا بـ حاجة لـ النظر لـ أمور كثيرة ..
و لك التحية عزيزي .. :)

Noora يقول...

اول شي كل عام وانتوا بخير
والله زمان عن تدويناتكم
ثانيا اقولكم انا صديقة البيئه ايش اسوي
بس لا تعصبوا ........
اذا رحت محل او سوبر ماركت واعطاني اغراضي في كيس واحد اقول له .....
حطها في كيسين ثلاثه ليش انت بخيل
:( :( :(

شارع العروبة يقول...

أسماء انتو شنطكم تشيل بلد !! صادقين لما يقولو الحضارة الانسانية دورات الحين قاعدين نرجع لاشياء سبناها على اساس اننا تطورنا !! ابشرك الحجات الى الحين مثقفات ( :

غير معرف ... شكرا لمرورك .. تشرفنا بيك
( :

احمد ... يلا يابطل على يدك انشا الله ... المرة الجاية لما تروح تشتري تلفزيون قول للرجل : " لو سمحت واحد تلفزيون بدون كرتون " ( :


حنان وردة ... ياساتر !! يمكن الرجال مهتم بالبيئة !!

شكرا لكم جميعا

إنكاس يقول...

والله شي ما كنت منتبه له(فكرة الاكياس)
حماك الله لصالح الارض