يحكى عن الذوق العام !!

الاسبوع هذا جمب شارع التحلية كان في حفريات لاصلاح ما أخربه الدهر والشعب ... كان العامل الهندي يبغا يوقف السير شويا عشان يخلي "الدركتر" يخش ويكب تراب .. طبعا لان "اللي يسمع كلام الهندي مخفه " شوف الشعب إيش سوا ... محد رضي يوقف مع ان الرجال انكسرت يدو وهوا يأشر ... اللي يقهرني أكثر مو إن السعوديين ما يوقفو ... "يمكن" السعوديين معاهم حق ... بلدهم ومو مفروض أحد يرفع عليهم يد بأمر فوق ترابها .. اللي قهرني من جد إن حتى السواقين تطبعو بطباعنا و صارو " أقويا عين" ولا احد رضي يتنازل عن انو يكون آخر واحد يمر .. كل واحد يقول إيش معنا جات عليا أن اللي أوقف خلي اللي ورايا يوقف !! ولا صاحبنا يقول انا مشغول خليه يمشيني بس انا لان عندي مباراة سوني فاصلة مع حميَد ولد عمي ..
أنا وقفت على جمب بس أبغا اشوف المنظر وأشوف ايش خاتمتها ... بعد شوية الرجال يئس من الوضع وبطل يأشر وراح أخذ استراحة ألين ماشاف ولد عمو الهندي سواق التكسي مقبل فنط وقال في نفسو : ( ايييوا هذي الناس اللي ممكن يجي منها خير ) فراح أشر للتكسي ...
وللأسف وقف التكسي وضيع من وقتو 20 ثانية وصار اكثر وطنية مننا .. تحية كبيرة للشعب الهندي العظيم اللي لولاه ما تصلح شارع فلا عندنا عمال ولا عندنا احد يسمع للعمال .. ونجي بعدين نقول الوطنية .. ونجي نقول شوارعنا خربانه !!

سر الأسرار !!

استغربت اخيرا من اكتشافي البايخ ان سبب زحمة الطرق السريعة عندنا يكون احيانا سبب نفسي !! اي والله شايف كيف كل هذي الزحمة كثير من الاحيان يكون السبب نفسي وبس ..

القصة وما فيها اننا الناس المحترمة عندنا فيها حالة نفسية عجيبة ... في نكتة يقولو في مرة سوو حظر تجول راحو كل الناس طلعت تشوف ايش صاير !!
الشارع ماشي في امان الله وبكل سلاسة (طبعا بكل سلاسة تتضمن السقطات الرهيبة والتكبيسات اللي تعمي بالطبع) ... يجيك اثنين مركزين في السواقة ما يكلمو بالجوال طبعا ولا يكتبو رسايل ويسوقو سرعة قانونية بس لامرد لقدر الله فيصيرلهم حادث ... طبعا الشرطة عندها نظام متطور جدا تقول خليك في مكان الحادث الين تجي الدورية عشان يحكمو في الحادث ومعاهم حق ... المهم تقوم السيارتين اللي سوت حادث ما تتحرك عن الخط اليسار في الدائري يستنو الشرطة ويطلعو برا السيارات يشمو هوا ومن الطفش ممكن يخترعو مضاربة يقضو فيها الوقت ( أقترح في الخطوط السريعة يصير في مراكز ترفيه للي سوى حادث وينتظر الدورية) ...

بعد دقيقتين على حدوث الحادت : مفروض ما تصير زحمة شديدة لان الشارع لسا باقي فيه 3 سيدات فاضية ... بس هنا تجي النفسية الحلوة عندنا ... كل واحد يمر لازم يوقف عند الحادث ويلقي طلة قد تطول عن " النظرة الاولى " بكثير ... يتأمل ايش صار للسيارة الاولي ويخمن كم يكلف التصليح ... بعدين الثانية وبعدين يقعد يخمن مين الغلطان ( الشعب صار عندو قوة تحليل قوية .. كل يوم يتدرب على تحليل 3 او 4 حوادث) .. بعدين بتأكد اذا ما احد انصاب او صارلو شي لاننا بصراحة مع هذي اللقافة شعب نشمي ... المهم بعد دقيقتين يتحول الشارع اللطيف السريع الى علبة سردين !! حسبي الله على اللقافة ... زي ما قالو لوكانت اللقافة شخصا لقتلته .. ولعلقته عبرة على لمبة الدايري ...