الجمعة، 6 نوفمبر، 2009

سر الأسرار !!


استغربت اخيرا من اكتشافي البايخ ان سبب زحمة الطرق السريعة عندنا يكون احيانا سبب نفسي !! اي والله شايف كيف كل هذي الزحمة كثير من الاحيان يكون السبب نفسي وبس ..

القصة وما فيها اننا الناس المحترمة عندنا فيها حالة نفسية عجيبة ... في نكتة يقولو في مرة سوو حظر تجول راحو كل الناس طلعت تشوف ايش صاير !!
الشارع ماشي في امان الله وبكل سلاسة (طبعا بكل سلاسة تتضمن السقطات الرهيبة والتكبيسات اللي تعمي بالطبع) ... يجيك اثنين مركزين في السواقة ما يكلمو بالجوال طبعا ولا يكتبو رسايل ويسوقو سرعة قانونية بس لامرد لقدر الله فيصيرلهم حادث ... طبعا الشرطة عندها نظام متطور جدا تقول خليك في مكان الحادث الين تجي الدورية عشان يحكمو في الحادث ومعاهم حق ... المهم تقوم السيارتين اللي سوت حادث ما تتحرك عن الخط اليسار في الدائري يستنو الشرطة ويطلعو برا السيارات يشمو هوا ومن الطفش ممكن يخترعو مضاربة يقضو فيها الوقت ( أقترح في الخطوط السريعة يصير في مراكز ترفيه للي سوى حادث وينتظر الدورية) ...

بعد دقيقتين على حدوث الحادت : مفروض ما تصير زحمة شديدة لان الشارع لسا باقي فيه 3 سيدات فاضية ... بس هنا تجي النفسية الحلوة عندنا ... كل واحد يمر لازم يوقف عند الحادث ويلقي طلة قد تطول عن " النظرة الاولى " بكثير ... يتأمل ايش صار للسيارة الاولي ويخمن كم يكلف التصليح ... بعدين الثانية وبعدين يقعد يخمن مين الغلطان ( الشعب صار عندو قوة تحليل قوية .. كل يوم يتدرب على تحليل 3 او 4 حوادث) .. بعدين بتأكد اذا ما احد انصاب او صارلو شي لاننا بصراحة مع هذي اللقافة شعب نشمي ... المهم بعد دقيقتين يتحول الشارع اللطيف السريع الى علبة سردين !! حسبي الله على اللقافة ... زي ما قالو لوكانت اللقافة شخصا لقتلته .. ولعلقته عبرة على لمبة الدايري ...

هناك 3 تعليقات:

عبدالله يقول...

قبل امس صار لي حادث في احد طرق الخدمه وياساااتر على الأشكال اللي مرت علي , كل من مر وقف وقاعد يناظر ويخمن مثل ماقلت , ولأن الحادث كان غريب شوي , فينزلون يسألون كيف صار الحادث ؟؟ عسا ماحد جاه شيئ ؟ واللي يجيك ظريف ويقول انصحكم جيبو نص حبة بخاري وابلعوا ليين يجون المرور , وفيه واحد نزل وقيم بعدين قال ترا الخطأ عليك !!

آآخ بس

شارع العروبة يقول...

ههههه والله شي يضحك ... ياخي ناس رهيييبة ... احلى شي اللي قالك الغلط عليك وراعي البخاري ( : !!

يالله الحمد لله عالسلامة

إنكاس يقول...

كثير من هؤلاء اللي يوقفون..يحب يشوف التفاصيل عشان يلقى له سالفة يسولف فيها على خوياه في السهرة

بعدين انا مره شفت 2 متصادمين في تقاطع حساس داخل احد الاحياء
فوقفوا ينتظرون المرور بكل انبساط وفرشوا لهم فرشه جنب سياراتهم وجلسوا عليها..واظن جابوا شاهي بعد