الأحد، 3 يناير 2010

يا زمن التماسيح ...

عن مجتمع الاولاد اللي عايش فيه أتكلم لاني ما ادري عن النص الثاني !!! بس اتذكر انه عندما كانت تقال هذي الكلمة المؤلفة من حرفين تتسع العيون و تدور العقول تفكر : " ايش يبغا هذا ؟؟ ايش يقصد ؟؟ " ... بس نادرا ما تتسع عيوننا او تدور عقولنا لان ما نسمع هذي الكلمة الا في السنة مرة في موقف مشبوه! احنا عمليين بدرجة كبيييرة جدا حتى ان ما عندنا وقت للعواطف ؟؟ ما ادري احنا نكره بعض ولا مو عارفين نعبر ؟؟

حرف الحاء + حرب الباء ... من الكبائر !! انتبه لا تقولها الا بعد الحيطة والحذر ... تفقد وتأكد ان ما في احد يسمعك ॥ وبسرعة قول الكلمة قبل ما يمسكك واحد متلبس بالجريمة ... حتى لو كان عندك شعور فطري اللي موجود عند اي انسان في العالم وتحب شخص انتبه لا تقول هذا الكلام الا بعد تمهيد طويل ... الحب يوضح من التعامل فما في داعي تقعد تسويلي رومانسي ! والافضل اذا تحب واحد حاول تلمحلو وتوصل المعلومة هذي بأي طريقة الا انك تقول كلمة السر ! عيب !

عايشين في بيئة حساسة جدا لهذي الكلمة ... فالواحد يسمع عن الحب ويحس انو محروم ما يحب مع ان حياة الواحد ما تستقر الا اذا حب وأدرك انو يحب !! حياتنا كلنا مليانه حب بس المشكلة اننا فاهمين الحب غلط ونخاف اننا نعبر عنو !! فكرت اني حطبق مفهوم الحب الحقيقي الشريف والواسع بكره فحشتري وردة حمرا ونطلع انا وسيارتي اللي احبها "لوحدنا" نخلو في البر ( : "واحد مررا فهم الموضوع تمام "

كأننا عايشين في صحراء قاحلة ... الكلمات الحلوة ما تنقال الا بالسر ॥ مع ان من سنة الرسول اننا نقول : " اني أحبك في الله " .. والقول الحسن من الاشياء اللي نتعبد الله فيها ..

شايف ان في تطور في قدرتنا على التعبير عن مشارعنا على حقيقتها بس لسا في حساسية ... مشكلة ان هذي الحساسية تخلينا نعيش مجتمع جاف من جهة وفي نفس الوقت سهلت هذي الحساسية للبناء العلاقات غير نبيلة تشغل الوقت والذهن !

هناك 3 تعليقات:

عبدالرحمن . يقول...

موضوع مهم جدا يا عزيزي .

فعلا الحبّ صارت كلمة مشبوهة عندنا ، بل حتى الواحد لو تقول للواحد أحبك ، يقول استح على وجهك خلّك رجّال .

بينما في الحقيقة الحياة كلها حبّ ، ولا حياة بلا حبّ .

وفيه ناس يشوهون صورة الحب ، مثل اللي يغازلون وبحبّك ومش عارف إيه ، هاذولي خارج نطاق الحب أصلا ، والحب ما يشملهم ، لأن الحب يطلق على الشي الصادق .

أيضا الحب العذري والحب المش عارف إيه أحس إنه خرابيط ، الحب هو الحب بسّ : )

ع العموم الموضوع ذو شجون يا عزيزي .

[ أحبّك لا تفسير عندي لصبوتي ،
أفسّر ماذا والهوى لا يُفسّر . ]

بحبّك ؛)

AM I am يقول...

فكّرتني بواحد يقولي كان مع مطاوعة وقال لصديق عزيز عليه ياحبيب ئلبي ياقمر انتا ادّيني صحن المشاوي اللي جنبك... بعدها اظطر لأن يدخل في جلسات تحقيق مع مشرفين حلقة التحفيظ ليتأكدوا بأنه ليس لوطيا ولا يقصد بهذه الكلمة معنى سيئا...

واحدى عجائب الكلمات التي قالها له احد المشرفين لوانكم يالحجز عندكم قلة الحيا دي عادي ترى عندنا بنجد غير!!!!!


هذا وهم مطاوعة وعاقلين كيف الناس التانية؟؟؟

Noora يقول...

اسمحلي اقولك عن النص الثاني .
البنات من سن 13 تبدأ البنت تتصبح وتتمسى على كلمة حب وتاكل وتشرب حب وهنا يجي دور الأهل في اشباع رغباتها وعواطفها بالكلام الحلو لأنه (الكلام الحلو ) منتهى غايتها.
وطبعا بتحب في خيالها مو لازم يكون فيه شخصيه حقيقه تستقبل كل هالكم من الحب والا احترق الشخص المستقبل لهذا الحب :) :)
وعن التعبير عااادي بنعبر ,الا لازم نعبر والا مانكون بنات :)