الجمعة، 10 فبراير، 2012

يوميات سعوزلندي 2 #_______#


بــــسم الله الرحمن الرحيم !!
هذا رابط الجزء الأول من التدوينة  http://kriyadh.blogspot.com/2012/02/blog-post.html

"
"
طيب قبل ما أبدأ بالجزء الثاني ودي أعطيكم درس "قوانين القراءة عندي !"
الرموز التالية تعني:
( # ) = أي شي بعد هالرمز هو التخيلات الي كانت بمخي بذيك اللحظة أو( سالفة شاطحة !)
( + ) = تراها فقشة !! يعني خارج النص!P:
( << ) = تعليق ( تخيلوا دايم انه واحد قزم قاعد يغمز وانتم تقرون التعليق! )

القوانين تنطبق على التدوينة السابقة ^_^

الجزء الثاني -----------------------------------------------------------------------------------
" وصلنا !! ...وياليتنا ماوصلنا !!! #_# " 


شوي وجاتني عجوز قالت ودوه الترحيل!!!!!!!!!!!!!!!!!!!!
^^ 
#انا أول ماسمعت الترحيل حسيت بوضع البنقلاديشي الي يتبهذل مع كفيله !!! خلاص من اليوم ورايح أنا مع حقوق العمالة !!#

 قمّطت الصراحة!! بغيت أتكلم بس تذكرت أنا لسه ما أعرف انجليزي لازم أسوي نفسي غبي ..<< يا عيني على الثبات عالمبدأ><

 سألتها بكلام مقطع: وش السالفة ؟؟
 قالت: تعال معي ...
 خويي بغى يجي يفزعلي قلتله رح دور العايلة الي دافعين لها بصالة المطار وقلهم لا يروحون....
 نشوفك بعدين ...

دخلوني مكان الله لا يوريكم !! <<وترا السالفة صدقية وخوياي يشهدون صدقي !!!

صالة كبييييييرة !  فيه مختلف الجنسيات عشان يرحلونهم ..

.# (( تخيلت اني داخل سجن زي حق الأفلام!! كلهم خوال.... اول مجرم عاليمين قاعد يلحس سكين عند البوابة ...والجهة الثانية فيها أعمى مفصخ !! قاعد يصارخ وهو يركض،،، و فجأة يطب عليك واحد يلحّس برجلك ويقول: ماااابييي ترحيييييييل !! ))
^
خخخخخخخخخخخخخ لاعاد تتخيل تكفى.#

نرجع للواقع!

أنا سويت نفسي غبي مرة ثانية وسألت الشرطية : الحين وين عايلتي الي بأسكن معها؟؟
 #على أساس اني فهمت ان هذي صالة المطار!...ذكي صح؟ ^_* #

..ناظرت فيني وقالت تعال معي ... دخلتني مكتب عشان يفتشوني...
 أنا عصبت الصراحة قلتلها: ليش تفتشوني عشان جوازي أخضر!!!! روحوا دوروا عن عايلتي وهم بيرونكم أوراق المعهد ...
قالوا : اقعد ولا تلمس شي ... !
وكلموا الكونترول عشان يراقبني من الكاميرات <<حسبوني ما أفهم انقليزي واني ما فهمت وش قالوا...
اول ما راحوا قعدت شوي وأنا عارف انهم يراقبون ... !
انتظرت !
انتظرت !
انتظرت !
قلت شكلهم مطولين ...قمت صليت ركعتين وهم يراقبون وقعدت أدعي ان ربي يطلعني من هالأزمة ... ؛(

ورجعت قعدت ...


#بعدييين لما علمت اخوياي بالسالفة سألوني: كنت متوضي ؟
 خخخخخخخخخخخخخخخ آظن صلاة الخوف آفتوا فيها ولا ؟ !!!!! #


جاوني بعد شوي وقالوا لقينا عايلتك وحنا آسفين ..
 قاطعتها وقلت: لا عادي من حقك لأني مامعي أوراق تثبت اني بمعهد ...<< أهني فيك الروح الرياضية أخوي!!!!!! توك تتكلم><

قالوا: خلاص رح خذ شنطتك والله معك ...

والله وطلعت لصالة المطار ولا هذه الأم ومعها ولدها ...والله يوم شفتهم اني فرحت ...بغيت أفجر وأخمها !!! من الربشة + خميت ولدها!! خخخخخخخخخخ
والله كان وضعي مو سليييييييم !!

 والله وياخذوني ويركبوني السيارة وأجي بأركب لقيت نفسي بمكان السواق !!!
قالتلي : ما تقدر تسوق الا ومعك رخصة ...!
 هههههههههههه أنا ركبت غلط لأن سياراتهم بنيوزيلندا معكوسة !!!الي يسوق يمين ... قلتلها لا آسف بس لخبطت ... << هذي أولها.

وحركنا متجهين للبيت..

^^
التكملة حتكون في التدوينة الثالثة و.......<<اقووووووول زر بس!!!! كمل وانت ساكت ! ><

سم طال عمرك -_- !

 أنا خقيت صراحة على المناظر والطبيعة الي هم عايشين فيها... لا وأسواقهم يدخلون شباب !!!!




بعد فترة مش بطالة وحنا نمشي ويدق جوال الأم ...
عطته ولدها لأنه ممنوع تكلم وهي تسوق << ياعيني عالإلتزام النظام ...
 وينقز الولد ويقول لأمه وقفي وقفي !!!!!!!!!
 أنا انفجعت .... وقام الولد يتكلم بسرعة ما فهمت منه شي ... ناظرتني الأم وقالت دقوا المطار علينا وقالوا تراك نسيت جوازك وتذاكر الرجعة!!!!!!! << هذي الثانية .

أنا خلااااااااص..........!
 ماقدرت أتفاعل مع الحدث تعبت وأنا اتحسف من كثر الفهاوة ...
 والله ورجعنا للمطار ونزلت أنا ونزل معي ولدها ( جاك ) قلت له تسابق .. قال قدام ..
وركضنا وفزت عليه طبعاً !!!<< تعرفوووون لياقة ^_*
حسيت اني من زمان ما ركضت... رحت وخذيت الجواز ورجعت السيارة .. وارتحت وخمدت ....

وصلنا البيت !


^^
التكملة حتكون في التدوينة الثالثة و.......<<اقووووووول زر بس!!!! كمل وانت ساكت ! ><

سم طال عمرك -_- !


الوقت الحين ٦:٠٠ المغرب وأنا تعبان أبي أنام أدور السرير بس....

.. قابلت أبو العايلة ...
 أول ما  قابلته قال:  وين شعرك راح ؟؟!! شكلك شلته مع الحر خخخخخخ ..!!!!!

#أنا فهيت!! .. قلت ذا من وين عرفني؟؟ ...#

سألته: كيف عرفت ان شعري كان طويل ؟؟؟

قال : ابوك ارسلنا صورتك ..  << آهاا قول كذا .

بدوا يسولفون عن السعودية وأنا مالي خلق !!! >< وجوووعااااان

سويت نفسي ما أعرف انجليزي مرة ثانية.... وارتحت صراحة !!

قالتلي الأم: تبي شاي؟؟ ( +قلتلها: لا أبي توووت !! خخخ سماچة ! )

أنا مالي خلق وتعبان وجوعان وكل شي>< !!! وهذا تجي تقولي تبي شاي !!!
قلتلها: لا شكراً :)

^^
بالنهاية ترا "شاي" لها معنى ثاني !! خخخخخ بأعلمكم بعدين !!

بعد ماقلتلهم مابي شاهي وأنا توني جاي من السفر وأبي أرتاح...
ودوني غرفتي ...حطيت شنطتي وروقت وانسدحت عالسرير...

والله وأصقعها نومة على كيف كيفك زي حقت الطيارة وانا جاي!!
ونمت!
ونمت! ونمت! وفجأة!!!!

لقيت شي يرفسني ويدفدني !!!!!! أنا مالي خلق أفتح عيوني !!قلت: يا جاك وخر لأرجفك !!!!
والترفيس مستمر!!! ....أنا قمت من الروعة والرجفة الي حصلتلي...أدور يمين يسار مافي أحد....( + وأتذكر كلام أبوي: انتبه من الزلازل وأنا أبوك !! )
O_O
O_O
O_O
وعرفت انه الي رجفني زلزال! ... والله كان شعور يخوف...ويحسسك انك ما عندك لاحول ولا قوة ... أنا من الخوف ما عاد ذقت طعم النوم......
و دام الوضع كذا! ...الليلة ذيك راحت كلها تهجد .....خخخخخ


 ٨:٠٠ الصبح نزلت تحت ولاقيهم قايمين ...

( صورة لبيتهم )



بيتهم شي خورافي مرة مرة مرة حلو .....
وأكيد عيال حارتهم يحبون بيتهم عشان فيه سوني...وزومبي وحماس ... ونقيزة بعد !!!!!

واقعد اسولف مع ولدهم جاك عمره ١١  وقعدنا نسولف على خفيف وفجأة لقيت نفسي ألعب سوني مع اخوياه ...... خخخخخخ طحنا ميانة طوالي!
 من زود ما فلها معي وشافني وناسة... نادى اخوياه كلهم...
 والله وأجمعلك خمس بزارين بالبيت << من دوني طبعاً... مو بزر أكيد!

حسيت ان الأم والأبو انرفع ضغطهم شوي من البزارين والإزعاج الي سويته بالبيت ...

انا من باب المبادرة أثابني الله قلتلهممشينا نلعب كوورة ...
وطلعنا ولعبنا وخقوا على لعبي

# مع احترامي للشعب النيوزيلندي بس ياخوي يخقون على كل شي ...الكائن الحمضياتي عندهم يعتبر شي واااااو زين بالسوني والكورة ومعي آيباد !!! ..والله مادروا اننا محترفين هالأشياء من الفضاوة الي عندنا :(
#


مرت بضع ساعات  <<  متعوب عليها بضع ^_*
 وجا وقت صلاة الظهر ... وفي نص الحماس واللعب .. قلتلهم معليش بأروح أصلي صلاة الظهر... استغربوا قالوا ليش تصلي.... قلت : عشاني مسلم ... وحنا لازم نصلي حخمس صلوات باليوم !!
..
واستمر اليوم كله نفس النظام ... الين راحوا اخوياه لبيوتهم .. رجعنا البيت وراني القراج حقهم ...

هلا بالعياااااال ..!! ما تصدقون أنا وش شفت ...!!

أبوه عنده دباب سباقات... والولد عنده اثنين O_O..كبااار بعد...لا وأبوه عنده لومينا ss v8 أظن اسمها رويال << ذي للكابريس يالطيب !


نادتنا أمه قالت : يا عيال الشاي!! ..<< لاحظوا انها قالت يا عيال.. خخخخخ
أنا فهيت وبقوة !!! وش ذالشاي الي طالع لي كل شوي؟؟؟ !!! ...<< ترا لها سالفة ذي :)
قلتلها: مابي شاي أبي عشاء!!
ضحكت وقالت : طيب !

طبعاً وش أقول عن عشاهم !! حاجة خطييييييرة بشكل ما تتصوره 
أكلهم ألذ من سواخن << مطعم مشهوور بالحفريات! .<<الحفريات= راجع التدوينة الي قبل :)

رحت أنام ...
ونمت .... 
خلاص نمت ترا!!

^^
أكملكم الباقي ان شاء الله في الجزء الثالث من التدوينة :)
دمتم بود... ولاتنسون شاهيكم P:


FOLLOW ME ON TWITTER : @A7MAD_AR

هناك 3 تعليقات:

غير معرف يقول...

خطيييير لاا توقف

غير معرف يقول...

مبدع وشيق وعجبني فيك ثباتك وافتخارك بمبادئك الاسلامية.

اخوك علاء

ومتاااابع

بن برك يقول...

اسلوبك رائع و ممتع و مضحك :))
جتني فكرة: جرب تصور نفس ما كتبته فيديو و انت تقوله بحمااااس، بس جرب، و شوف ايش احسن.

و بكل الاحول استمر بالكتابة .. يا بضع من الابداع !