الاثنين، 6 فبراير، 2012

يوميات سعوزلندي #________#


 #________#
بسم الله الرحمن الرحيم .....




في البداية !! ترا راح أتكلم عامي << أقصد بعامّي يعني لغة شواارع بحتة P:

أحب أعرف عن نفسي : أنا أحمد بن خالد ^_^ أمثّل جماعتي فيذا !!! ^_^

ساكن في حفريات !! ( يسمونها الرياض ! #_# )



هذه تدوينة دونتها في رحلتي لنيوزيلندا الصيف السابق ^_^ حبيت أشاركم بعض القصص 
والمواقف الي حصلتلي هناك ....

سوف أنقلكم إلى عالم آخر من خلال هذه التدوينة حيث المواقف من نظرة مختلفة نسبياً عن باقي الناس ...
وكيف أن شخص سافر من بلاد "الحفريات" إلى بلاد بعيدة جداً عن "الحفريات"...
سترون فيها تخبطاته ! أحزانه ! و"فهـــاوته" !( -__- )<< وهي الأغلب !

إليكم الجزء الأول --------------------------------------------------------------------------------
" الرحلة إلى نيوزيلندا :| "


زي ما يعرفون كثير من الناس ... اني رايح نيوزيلندا ( كرايستشيرش ) تحديداً مدينة الزلازل ...



وعشان تكونوا في الصورة خط الرحلة كان: الحفريات !> دبي> بانكوك> سيدني> نيوزيلندا

ودعت أهلي وتوكلت على الله وتوجهت لمطار الملك خالد << تمسك الدايري سيييييدا يجيك عاليمين !! P:


ركبت الطيارة من الرياض الساعة ٣ الفجر تقريباً... جنب مقعدي واحد كان معي بالمدرسة أعرفه معرفة بسيطة بس!...
المهم طحنا ميانة وقعدنا نسولف . طول الرحلة.
"
"
"
وصلنا دبي...!!! ( ٦.ص)
صراحة مطار دبي أفضل المطارات الي مريت عليها بحياتي << حدك جوازات البحرين يالطيب #_#...

نزلنا من الطيارة وافترقنا أنا والأخ المحترم هو رايح للندن وأنا لآخر الأرض .!
قعدت أتمشى بمطار دبي والسوق حقهم... وأنا لسا معي فلوس سعودية << مسوي عز ...

والله وأقرب محل صرافة عملات ...
عطيتها قروشي عشان تحولها لدولارات وأنا أدربي راسي لاحظت بعدين انها ماخذه مني٢٠ دولار بنت الذين ><
....وكملت تمشية وطبعاً بما اني خطير كان شكلي الصراحة كأني رجل أعمال بس صغير
(رجل أعمال صغير !!! ايييه كثرلي منها! )

دخلت محل و أشر علي المدير ويجيني اثنين ...
الزبدة أنا انكبت لازم أشتري شي دام كذا <<< سياسة غربية والعياذ بالله....
\
قلتلهم أبي سمارت كڤر للآيباد ... والله ويجيبولي اياه بس ماعندهم الى لون اخضر!! وفاتح بعد ..
 خذيت نظرة سريعة على الألوان ولقيت ماعندهم رمادي!!
استغليت الفرصة وقلتلهم أبي رمادي مابي اخضر ..!! 
والله وينطلق الفلبيني للمحل الي جنبه ويجيبلي اياه !!!! <<< لا أبو لا أبوك شكله عرف اني ماعندي سالفة .. قلت بنفسي : تبي لعب وصخ نلعبلك لعب وصخ !!!!
قلتله أبي جلد مو العادي ..ها ها ها .. فبهت الذي كفر !!!!! والله وافقع!!!
وشوي قاعد اسمع صوت خفيف حق النداء للرحلات ... واروح اقرب لوحة فيها الرحلات ...
وطلعت النداء الأخير لرحلتي !!!!!!!!!!!!!!!!!
والله ويشمر ولد الرشيد ويحط الملابس بفمه ويدق سلف ... وبنفس الوقت أدعي على الفلبيني الوصخ ... 

الحمد لله وصلت قبل ماتقلع ودخلونا صالة انتظار الرحلة ...
وشوي مسكت المضيفة المايك وبدت تتكلم ،أغلب الموجودين مافهموا وش قالت ..
. رحت سألت عجوز جنبي قلت عسى كل شي تمام <<< لاحظوا ان لسا شكلي رجل أعمال... 
والله وتفز العجوز وقالت اصبر بأجيبلك خبر ...!!!!! هلا بالعيااااال ( أنا قاعد أكتب الحين  وأنا بالطيارة المتوجه الى سيدني وجنبي واحد معرررررق  فترا بأحط حرتي هنا..)

المهم والله وتجيني وتقولي ان المضيفة قالت راح يكون الدخول بالترتيب ... وتسألني أنت وين رايح قلت رايح نيوزيلندا ... قالت رايح بيزنس صح ؟؟ << والله قالتلي كذا ...
انا عجبني الوضع ^_^ قلت : لا والله سياحة ...
قالت :لحالك؟؟ قلت :وش أسوي طفشان ..<< وأنا ماكذبت أنا رايح بفيزة سائح ... 

سألتني انت من وين ... قلت السعودية ... والله وضاعت علومها العجوز ..
 قالت وااااااااااااااااااو how odd .
قلتلها لا والله مو غريب ولا شي والله وأبدا أعطيها ..
. اني انا مخترع وابوي مخترع وعندنا  بيبسي <<< هههههههه

وكل ماتكلمت ربطتها بالإسلام بأن هذي تعاليم الدين ...


.......
دخلنا الطيارة المتوجهه الى بانكوك تايلاند ... على الساعة ٨:٠٠ الصبح واروح وأدور مكاني واحط الشنطة واجلس ... شوي وجا كائن حمضياتي ( سعودي ) ويتكي جنبي ...
الانسان الكويس هذا  والله ان ربي ارسله لي شخص أخلاق وفوق كذا يدرس بجامعة في نيوزيلندا
يقاله عبد الله العطاس .. والله واطق أهلها ميانة وابدأ أسأله والله علمني أشياء مهمة الصراحة جزاه الله ألف خير....
 واقلعنا متوجهين الى بانكوك مدة الرحلة ٥ ساعات ونص ...سولفنا الين طفينا وخلاص نبي ننااااام انا قايم من امس وهو نفس النظام... واول ماحطينا روسنا ... 
ويشتغل بزر في المرتبة الي قدامنا يصايح وااااااغ واااااااغ << وااااغ جابته في عينك بلف شكلك خلينا ننام !!!!!

.. ونبدا نسكته نشغل ألعاب ونوريه يسكت شوي .... ونقول الحمد لله ... ويفقع صياح مرة ثانية ...
وعلى كذا الين وصلنا بانكوك ...
 المطار يجيب النووووووووم حاطين نوور أبيض وأول ما دخلنا وتفتيش ... ونطلع من تفتيش وبرضو تفتيش ... وحنا كنا ناوين ناخذ كافي نصحصح شوي . وبالنهاية قعدوا يفتشونا الين رجعنا نفس البوابة ونفس الطيارة ياليتنا مانزلنا ...><

وأقلعت الطيارة متوجهه لسيدني الي قاعد أكتب لكم في الساعة الأخيرة قبل وصولنا لها ...
علماً ان مدة الرحلة ٩ ساعات !!! 
طيب وش الي صار في الساعات الأولى ..؟؟

أقلعنا من بانكوك لقينا العايلة الي كان معهم الطفل نزلوا<< الله يعين بانكوك على صياحه !.
 ونزلوا ناس كثير فيها ... و المقاعد صارت فاضية ...  ونناظر ببعض أنا وعبدالله قلت قدام قال قداااام ...

 والله ونفتح الكراسي على الطريقة السعودية ونسدح أبوها نومة .
انا قمت بعد خمس ساعات وشفت منظر جمييييل جدا ... لقيت العالم كلها مفتحين الكراسي زينا ونايمين هههههههههههههههههه
وأخيراً أثرنا في الغرب ... << طموحك !

والله ويجيني احساس بضيقة في صدري ... جاني شعور الغربة والخوف الي يضيق الصدر ... وأبدا أفكر بأشياء تخوف بشكل غير طبيعي والله وافتح الآيباد ولاقي القرآن خير رفيق .... والله اني وانا قاعد أسمعه كأني أول مرة أسمعه.... المخ كان محتاج لكلام ربه بذيك الفترة ..... حسيت براحة واطمئنان وان عيون الناس نايمة وعين ربك لا تنام ...

....... بأكمل كتابة اذا أقلعت الطيارة لنيوزيلندا ...الحين بأنزل مطار سيدني الله يعين عاد الحكومة الأسترالية متشددة .. ...

أقلعنا من أستراليا ... الله يعين ...
 الطيارة امتلت في الرحلة الي بين أستراليا ونيوزيلندا يعني مافي نوم ...

سألني خويي :وين أوراقك ؟؟
قلتله أي أوراق ؟؟
 قال أوراق المعهد !!!
 قلت : ماجبت معي أوراق المعهد << لأن أبوي هو الي تواصل معهم وأرسلوله أوراق القبول ولا خذيتها أنا ...

خويي مسك راسه و أنا حسيت اني سويت شي غبي جداً ...
 وقال : شف قلهم انك سائح ولا ترى بينشبولك بس لا ترتبك انتبه ...
قلت طيب .. والله وابدأ أدرب نفسي عشان على الأقل أدخل بعدين أدبر وضعي ... وحنا في الطيارة عطونا ورقة اسمها ( ورقة الوصول ) نعبيها ونعطيهم اذا جينا المطار .. وساعدني عبدالله جزاه الله خير وأنا أعبيها ... وصلنا المطار وضبطت وضعي خلاص على أساس اني سائح ...

 دخلنا وخلونا نصف سرا طوييييييل .. وحنا ما لنا خلق لنا يوم ونص وحنا بالطيارة
...
وصلنا للحظة الحسم ... جا دوري وكان المشرف المناوب "أنثى!!"

 ... على طول قبل ما تاخذ أوراقي وقبل كل شي سألتني انت جاي تدرس ؟؟
 أنا من الربشة قلت ايه !!!! <<<ليه لييييه قلت اييييه ومزعجنا وسائح وحالة ...
 سألتني عطني جوازك وأوراق المعهد ؟؟ 
عطيتها الجواز وسكت سويت نفسي ما أفهم انجليزي << خطير صح ؟ 
قالتلي: وين أوراق المعهد ؟؟ طيب أوراق المدرسة ...

أنا قعدت أدربي راسي بعدين قلت : ااااه فهمت .. وعطيتها التذكرة والبوردينج حقت أستراليا!! ههههههههههه والله اني ذيب ...^_^
 هي عصبت وضغطت زر جنبها ... قالتلي لو سمحت وقف على جنب ...ضاعت علوووومي !!! بديت أعرق من الخوف !!! الحين ندخل البحرين ومامعنا شي ونخااف !! عاد كيف وأنت بآخر الأرض!!!!!!!!!!!

^^
 تعرفون باقي القصة بالجزء الثاني من التدوينة :)

دمتم بود ...



هناك 7 تعليقات:

Sari يقول...

وين الباقي؟ حط رابط ولا اي شي
^^^^ تحمسس مع السالفه <يقلدك ههههه

غير معرف يقول...

الله يحفظك ويتمم عليك اخلاقك .. دمت مبدعا متألقا .. محبك

غير معرف يقول...

^^ انا صاحب التعليق اللي فوق
علاء جميل فقهيا

غير معرف يقول...

والله حمستنا وعلقتنا ،،

ننتظر الجزء الثاني ،،
:)

حفرية مخضرمة #__# يقول...

الجزء يوم الجمعة القادم بإذن الله !!
:)

عبد العزيز يقول...

و الله قصتك رهيبه
فيها خوف و فيها حماس و فيها فرفشه و فيها لحظات تحبس الأناس ... و فوق كل هذا مفيده

أنا مدري كيف طبيت لمدونتك ... و عندي أختبار و سهرانه أقرى ...

الله يوفقك يارب وييسر لك أمورك

غير معرف يقول...

hi!,I like уour writing very much! percentage we
communіcаtе еxtra about your pоst on АOL?
I neeԁ an expert in this space to гesolve mу pгoblem.
Maybe that is you! Taking a look forward to look you.
Here is my web page ... laptops special