الاثنين، 13 أكتوبر، 2008

أحسن الله عزاكم بعيدكم

"كأنه عزاء" هذا أول رد بتسمعه لو سألت كثير من شباب الرياض عن العيد
طبعا .. لا والأبلى الزواجات ، ليلة العرس من اسمها عرس وفرح وسرور لكنها تنقلب في الرياض الى هم وغثا وليلة
ثقيلة طينة على كثير من المدعوين،اول ما يستلم الواحد بطاقة الدعوه للعرس يتمعر وجهه من القرف،ايييييييييه: احجز ليلة لا تسهر ولاتطلع ولا تسوي اي شي ورح سوي واجبك الاجتماعي،لا ومن زين البطاقة،محذرينك فيها تجيب اطفال او جوال بكاميرا-للستات طبعا- (رجع سوق جوال اللي بدون كاميرا بسبة العروس)،وتلقى العروس الحديثة كاتبين لك بكل دلع فلان يجر مدري يمعط يد ست الحسن وسندريلا طريق خريص فلانه..الى آخره من عباراتهم اللي بدوا يزيدون همنا فيها

طبعا حتروح كالعادة وتلبس وتتعطر -لاحظ وانت مالك نفس- ثم تدخل تصف في سرا زي اي سرا مخبز عشان تسلم على بطل الحفلة وفارس الليلة المعرس،ثم تروح تنطق في كرسيك وتبدأ تناظر في اللي رايح واللي جاي-قعدة اي قهوة في الشارع تؤدي الغرض- وان رزقك الله بأحد جنبك تعرفه وتسولف معه والا سكت ولهيت بجوالك..(طبعا من الصعب اصطحاب كتاب معك أو مجلة نيوزويك لتمضية الوقت)

الفرج يجي لما تسمع كلمة الانقاذ( اقلطوا حياكم الله عالعشاء) -وطبعا هنا تنبيه لجميع السكان خارج الرياض : هذي احلى فقره في العرس - تروح تزاحم وتجلس مع 4-5 انفار ينظرون اليك شزرا كأنك جاي بدون دعوة،وتأكل كم قطعة لحم وموزة-لا ادري عن سبب تماسك ثلاثية الموزة والتفاحة والبرتقالة في عروسنا الى الآن- ،طبعا احيانا يكون القرف اكبر اذا حطوه بوفيه مفتوح،لأنه يصير مثل كل امورنا اللي نجيبها من برا: تلفيق لاهو زي مايزينونه الناس برا ولا قعدنا عاللي نعرفه،فتصير لخبطه وتصف سرا طويل ثاني،وتضيع ليلتك طوابير،طابور للمعرس وطابور للأكل

طبعا بعد الاكل تنط على سيارتك وتلحق على سهرة خوياك او تروح للبيت-يمكن يمديك على برنامج ممتع ينسيك اللي حصل-،واذا عندك حريم بترجعهم من العرس فقد زاد قرفك قرفا،ورزق الله اقرب كوفي شوب زبونا

فيه ناس اول ينتظرون حريمهم بصكة بلوت على ارضية القصر-يستثنى هنا الفنادق- وحتى هالاشياء الممتعه بدت تختفي حفاظا عالبرستيج يعني..

طبعا العيد بدى يصير زي العروس وقت ممل ..لا تستطيع ان تقضيه في الرياض الا بالتبرطخ -توضيح:كلمة تعني الاستلقاء دون أي هموم جادة أو حتى قدرة على التفكير-،اكثر شي بدى ينتشر هو ان الجيران يفرشون سفرة بعد الصلاة يحطون فيها اللي قدرت عليه مطابخهم واحيانا شغالاتهم،وهي حاجة كويسه بس الشاب اذا صار مواصل وسهران بسبة نظام رمضان يكون ماله نفس وتلقاه زي الفنترينه راسم هالابتسامه بدون ما يشعر

بعض الناس يروح يدور ويسلم على اقربائه ومعارفه وهم بدورهم يدورون وكل واحد يروح لديوانية الثاني والثاني يجي لديوانيته في عملية دوران منت عارف وش اولها ووش آخرها..اهم شي انو كل واحد يتأكد انه شاف الثاني

اكثر ناس ينبسطوا في العيد بالرياض هم الاطفال ،والسبب هي الشروخه والطراطيع اللي يشترونها بالهبل وينبسطون فيها..بس الله يهديهم يهبلون بنا حنا،عن نفسي واحد من عيال بنت عمتي جا بيوجه صاروخ وانا كنت العب طائرة بالاستراحه فانحشت عنه وخلاني اركض بشكل سريع من جهة لجهة لأني ماني عارف اي جهة بيوجه هالصاروخ لها

هالعيد تغدينا كالعاده مع عيال أعمامي وما جاء عمي اللي هو كبير العائلة لأنه ماله نفس،فعذرته فهو بعد كل هالعمر وصل لخلاصة تجربته عن عيد الرياض
ثم قام اخوي وعيال عمي يتفلسفون في قضايا شتى ..مشكلة المسعى والعمرة في رمضان-ازمة اسواق المال الامريكية-احتمالية الضربه على ايران
طبعا ما وصلوا الى قرارات في هالقضايا المطروحه
ثم تغدينا وراح كل واحد لحال سبيله وحمد ربه



العيد في الرياض كيف تفرح فيه؟ او كيف يفرح فينا؟ يبي لها إعادة نظر

هناك 3 تعليقات:

شارع العروبة يقول...

(طبعا من الصعب اصطحاب كتاب معك أو مجلة نيوزويك لتمضية الوقت)


حتى تبغى تجرجر النيوزوييك معاك في الاعراس .. لاتجيب الإكتئاب لفريد زكريا وبعدين يبطل يكتب .. خلي النيوزوييك في البيت (فجنة النيوزوييك أي مكان إلا الزواجات)!!!

مخــرج 10 يقول...

فـ جنة

يعني ان جنة النيوزويك في اي مكان

فهمت يا انكاس ؟؟

إنكاس يقول...

اي فهمت
بس انا لقيت نافذة ضوء لهذه المشكلة
الازمة المالية بتضرب الناس وتخليهم يحطوا زواجات عائلية ويريحونا