الخميس، 20 نوفمبر 2008

حركة حلوة .. بس لاتعيدوها !!


ماشي كعادتي في طريق خريص اللي مثل غيره من الطرق يسمى طريق سريع ولكنه أبطأ من البطيء .. والمشكلة هذا البطء وهذي الزحمة بدون سبب .. يعني مايكون فيه لا حادث ولا حتى (بسة) مدعوسة !! بس على حظي امس سبحان الله صار الطريق سريع ..
ماشي على الطرف اليسار والا شويا طالعت وماصدقت نفسي .. طالعت فوق .. ركزت في اللوحة بقوة ... ابغا اتأكد هل انا قاعد اقرأ شي حقيقي ولا يمكن لخبطت في القراءة .. لا والله صح ...









إيش ياجماعة .. انتو لخبطتو بين شارع ام القرى في مكة وخريص في الرياض !!




يعيني قد كذا مكة تشبه الرياض ؟؟

( ترى هذي بداية طريق خريص عشان كذا فاضي !!)




لا معليش ... هذا ..


حقيقة اعلان ذكي جدا منهم .. يلفت النظر بقوة .. انا جدا معجب بهذا الاعلان من الجمعية .. حتى ان هذا الاعلان صار حديث المجالس .. بس الله يجزاهم خير كان اعلانهم هذا حيسببلي ويسبب لغيري حوادث !! لاني اول ماشفت اللوحة ضغطت فرامل في نص الخط السريع لا اراديا عشان احظى بأكبر قدر من الوقت وركزت في اللوحة عشان احل لغزها مع ان ورايا كان فيه سيارات.. و كان يمكن اللي ورايا برضو يصقع فيني بسبب هذي الفرملة .. او انا اصقع في اللي قدامي بسبب عدم التركيز !!
اتخيل لاسمح الله اني لو سويت حادث كان كل الحادث بسببي ولن يتحمل احد اي تكاليف لاصلاح السيارة والنخلة الطايحة غيري !!
بس لو تخيلت نفسي في امريكا و جمعية التدخين هناك حطت نفس هذي اللوحة بس طبعا يغيرو بدال مايكتبو منى وعرفة يكتبو كنيسة القديس بطرس والفاتيكان !! وبالانجليزي طبعا .. لو شفت هذي اللوحة في امريكا و انشغلت بيها وسويت حادث لا سمح الله .. محا ادفع ولا ريال .. لا بل سأطالب بمليونين دولار مقابل هذا الحادث وما ترتب عليه من تغيبي عن العمل لمدة اسبوعين والاضرار النفسية والجسمية علي والتأثير النفسي على العائلة وقطتي الاليفة !! .. لكن السؤال هو : حأطالب ميييين ؟ هنا يكمن الجواب المثير .. سأرفع دعوى على جمعية التدخين لانها هي السبب في هذا الحادث ... لانها هي اشغلتني بإعلانها هذا .. وأكسب القضية .. وتتحول جمعية التدخين الى جمعية مديونة تحاول ان تجلب المال بأي طريقة .. فتروح الجمعية تفتح شركة توزيع سجاير مالبورو .. وبعد سنتين تغطي الجمعية ديونها وتبدأ تربح .. بس بعدين الجمعية يعجبها الوضع مع الارباح الهائلة .. ويقرر مدير الجمعية الاستمرار في هذا العمل التجاري و توزيع الدخان على الشعب الاميركي وبلا توعية وبلا كلام فاضي !!
شايفين ايش نتيجة الديمقراطية والحرية والعدل الزايدة ... انها تحول شركات مكافحة التدخين الى شركات دخان .. .. فلا للديمقراطية .. ولا للحرية ... ومن اليوم ورايح لحد يقول احنا مساكين نبغا ديمقراطية ...احنا وضعنا تماااااااااااام ...


هناك 6 تعليقات:

مخــرج 10 يقول...

هذا اهون من غيره !!

يجيك اعلان بوستر قد ايش كبره .. العنوان بخط كبيييير .. ( واللي حيشرف الحفل بخط اكبررررررررر )

اما المكان والموعد والتفاصيل المهمة باصغر ما يمكن !!

سبق صار كلام حول هالموضوع مع مسؤولين .. كثير مقتنعين انها فعلا سبب للحوادث

احلى ناس اللي يحطولك ( استغفر الله ) ولا ( صلى الله على محمد ) .. عشان لو مت يكون اخر كلامك خير .. وعالجنة سيييييدا

الله يكثر لنا من شعبنا الرهيب المحب للخير

إنكاس يقول...

انا شفتها
وشوشت بنفسي على تفكيري عشان ما افكر فيها
لأني متعود عالهبل بتاع اللوحات..لو حاولت تفكر في بعضها بمنطقية بينضرب المنطق نفسه عندك
سيبها على الله

غير معرف يقول...

عليك لحسة مخ !!
مدري كيف ^_^

الحين طيب شدخل لوحة في خريص في انك تعارض الديمقراطية هاااه << ليبرالي سابّق

شوف حبيبي انا من شفت لوووحة كبر الفيصيلة مكتوب فيها :
صحيح ان 20 الف شخص يموتون سنوياً بسبب التدخين ,,
ولكن هنالك 20 مليون شخص يستمتعون يومياً مع مالبورو

وانا اقول هيش الديمغراطية ياعمي << باللهجة العراقية


الموهيم بخصوص هالحملة ..
والله زقرت ..
بس انا متعقد من اي رحلة يشرف عليها مطاوعة .. حتى من رحلات 1 متوسط والعقدة معي ..
احس لو تنتفس يقووولن اشششش استغفر ربك واسمع اشيخ وهو يحدث عن فجاءة الموت ولاتطلع صوت فاااهم << وجه بن فهره معصبّ


فــ اتمنى التوفيق لهذه الحملة
ولكن ليبتعدو عن المثالية الافلاطونية
فلا بأس بقليل من " حرية الحركة " في تنظيم الرحلة



الله يسآمحك خليتني امسك خط الدمام السريع معك !!

الموهيـم ..
انا بوصراحة تشدني اللوحات واجلس أتامل وابحلق على راحتي << ثلاث ارباع طلعاته مع الشباب وحاط هم السواقه في مخباته



مدونتك خطيرة وزقرت
واحلى شي الهيدر .. حركة :)

شارع العروبة يقول...

نايف والله ما ادري كيف دخلت هالدخلة العجيبة على رحلات (المطاوعة) مع اني لا اوافقك افكارك .. بس مو همنا ..
اشكرك على مرورك ..

غير معرف يقول...

اهلين شارع العروبة
هم حاطين اللوحة واعتقد مافي فكرهم انو احد بيطالع فيها ، مادروا من وين جيتهم انت..

بس حلو الديمقراطية تسبب التدخين:)

Unknown يقول...


صور حب روعة صور حب للعشاق
صور حرف N , خلفيات حرف ان بالانجليزي رومانسية 2014 , تصميم حرف n 2015
صورحرف s 2014 , خلفيات حرف s للعشاق 2014 , تصاميم حرف s حب وغرام 2014
احلا واجمل صور اسماء بنات 2014 اجمل صور اسماء بنات 2014
اسماء ذكور اسلامية 2014, معاني اسماء مواليد اولاد اسلامية جديدة ومعانيها 2015
اجمل اسامي بنات 2014,اسامي بنات روعة 2014 اسامي بنات جديدة
لعبة حرب الملوك الاسطورية
لعبة ضوء القمر سوناتا ومهمة القضاء على الذئاب المتوحشة في الغابة المخيفة
لعبة الحرب العالمية للجنود المحاربين في أراضي المعارك الطاحنة
لعبة القتال المستمر والصراع الأسطوري مع نمور الإرهاب والقضاء عليهم بالأسلحة القوية
لعبة القضاء علي افراد العصبات المتشردين داخل القاعدة
لعبة حرب القاعدة النارية للكبار