الخميس، 19 مارس 2009

هذي عقوبة .. لا تسيء الادب ..

المواقف في السنة التحضيرية في جامعة الملك سعود منظمة بحيث كل طالب له موقف محدد و برقم معين و يعطى بطاقة تدل على ان هذا موقفه ... انا استأجرت موقف بسعر رمزي ميزته انه قريب ... بس قبل يومين جيت وانا مستعجل عشان عندي حصة انجليزي (حقون الجامعة يسموها محاضرة بس انا الى الحين اسميها حصة !!) ...
دخلت المواقف ورحت الى موقفي و الا الاقي واحد موقف في موقفي ... انا حقيقة ما عرفت ايش اسوي ... اقدر مثلا اوقف في اي موقف ثاني بس وين ما وقفت حكون وقفت في موقف طالب ثاني !! رحت اشوف السكيورتي عشان (يكلبشو) السيارة (يكلبشو يعني يحطو حاجة تمنع السيارة انها تتحرك ... يعني زي كلبشات المساجين) ... قلت للسيكورتي : ( في واحد وقف موقفي فلو سمحتو كلبشو سيارتو ) ... قال : ( احنا في ثاني اسبوع ولسا الامور حوسة ... ما نكلبش سيارات) ...

قلت طيب ... انا بنفسي حكلبش هذي السيارة ... رحت وقفت ورى السيارة اللي سرقت موقفي ظلما وبهتانا .. وقفت بطريقة تمنعو انو يخرج الا اذا جيت (طبعا شكل سيارتي غلط واقفه في نص الشارع !!) ... بس ادبا مني حطيت ورقة على قزاز السيارة اللي موقفه موقفي : (هذا الموقف خاص بي ... اذا اردت الخروج الرجاء الاتصال على *******0500 ) ... دخلت الحصة متأخر وخايف ان راعي السيارة يصدم سيارتي (ولو صدمة خفيفة) ويطلع ... فاحتياطا اخذت رقم لوحتو (اما لو صدم سيارتي ... مني شايل هم الا آخذ ورقه اصلاح من شرطتنا الرهيييييبه ... السرييييييعه في اجراءاتها !! ) ...

طلعت بعد ساعتين ... وياللعجب ... مدري كيف قدر يطلع ... بس الحمد لله ان سيارتي ما جاها شي الا شويه بويه راحت بعد ما مسحتها بيدي !!

طيب ليش انا سويت كذا ؟

انا حقيقية (اعتبر نفسي) اني انسان متسامح ... بس في بعض الاشياء ما ينفع تتسامح .. يعني لو سامحت هذا الطالب اليوم ... بكرا حيجي ويوقف في موقف طالب ثاني ... ومن أمن العقوبة أساء الادب ...

انا اشوف ان لازم ما نتسامح مع الناس اللي تخالف النظام ... لان النظام نظام ... حتى لو تنازلت عن حقك الخاص لازم ماتتنازل عن الحق العام ... يعني اللي ينط كل السرا ويجي اول واحد في الصف لازم نوقف في وجهو ... اللي يجي من اليمين ويخش في الاشارة على كل خلق الله لازم مانخليه (انا احتسب الاجر لما امنع واحد يسوي هذي الحركات !!) ... طبعا احيانا عادي تخلي واحد يخش قدامك ... بس على الاقل نبهو انو سوا شي غلط ...

بس مو معناه اننا نمنعو اننا نصرخ في وجهو ... لا ... ممكن بكلمة حلوه... طبعا بعض الناس ما ينفع معاهم الا انك تنزل على راصو بالـ (عجره) ... اذا قدرت فافعل !! ... فالغاية (قد) تبرر الوسيلة ..

اللي يكسر النظام مو متربي على انو يعيش النظام ... فلو احنا ما علمناه النظام مين غيرنا يعلمو !!

هناك 8 تعليقات:

غير معرف يقول...

ول :D كيف طلع من الموقف وانت مقفل عليه!
التعدي على النظام شي يقهر من جد، دايماً أنقهر من اللي يتعدّوا السرا في طابور القطار مع انه قليل بيصير بس وقت الزحمة ما تقدر تقول لأحد لأ! والا الناس اللي يقفلوا على غيرهم من اللي في القطار وهم الا بيدخلوا! طيب استنوا القطار ما حيطير! حيستناكم!!! لكن لا راسهم وألف سيف الا يلخبطوا الدنيا! عالم!!

شارع العروبة يقول...

المشكلة هذول الناس ما ادري يحسبو انهم هم الوحيدين المشغولين في العالم وباقي الناس طز فيهم ولا وراهم شي !!
طيب احنا زينا زيك يا باشا ...

Abdulmohsen يقول...

شكلك منقهر منهم من أول ....

هذه قصة صارت مع ولد عمتي (( وهو من الشرقية )) جا إلى الرياض ومو متعود على السواقة الخايسة حقت أهلها (( اعذروني )) كان ماسك سرا طوييييييل على مخرج لما وصل للمخرج دخل عليه واحد ... أو حاول يدخل طبعا ولد عمتي انقهر وماعندوا مزح فمشى وضرب مرايته وقال للي جالس معه عدل المراية .... الظاهر مراية الشخص الثاني انكسرت ...

بعدها أنا قمت أقدر سواقة أهل الشرقية لأنهم (( أغلبهم )) مؤدبين في السواقة

مدونة جميلة استمر .

غير معرف يقول...

أكيد طلع من الرصيف اللي وراه
لكن من جد معاناه أنا حاجز أقرب موقف من المواقف المجانية للمبنى ويعتبر أقرب من المواقف المدفوعة لكن كل يوم اجي القى واحد موقف مكاني :(

سامي يقول...

أؤيد فلسفتك بشدة،الحزم في تنفيذ القانون ليس غلظة ولاتنافي وجود الرحمة في قلب الحازم،،،،،
تقبل مروري

عزام يقول...

الاستهتار غالب على الشعب السعودي ، ثقافة تطبيق النظام شبه معدومة !
لكن الغريب أن السعوديين هم أكثر من يطبق النظام إذا كان بالخارج ، شيء عجيب فعلًا !

إنكاس يقول...

والله انا برضه ياشارع العروبة احتار احيانا اذا جاء واحد ووقف بجانب مساري عند الاشارة علشان يدخل مباشرة ويسقط على الناس بدل ما يصف ورا وتفوته الاشارة
هل اتركه من باب حسن الخلق
ولا ارفض لأنه سياخذ دور ناس خلفي؟؟
دوما اتخذ القرار الثاني،لأن الأول فيه ظلم للآخرين وتعويد له على مخالفة النظام

خير ما عملت

غير معرف يقول...

جميل أن نقوم بتدأيب المخالفين بالطرق المذكورة ..
ولكن علينا أن نتنبه ألا نخلط هذا بالانتصار الشخصي.