بعد ما خلصت الحصة ( الناس دايما يقولو ياخي كبرت وصرنا في الجامعة سميها محاضرة !!) .. المهم الطلاب طلعو يتمشو في السيب الين ما يجي المدرس ( او الدكتور ) ... انا احب اقعد انتظر في القاعة غالبا ... وانا قاعد وبعد ما طلع المدرس وبعض الطلاب وراه ... دخل طالبين من الطلاب اللي كانو معانا في المحاضرة وطالعو فيني مباشرة ... قالي الاول : " جزمتك فيها لفظ الجلالة من تحت " ... رديت عليه انكت عشان الطف الجو : " اجل كنت في عالم ثاني ... احنا في المحاضرة وانتا داخل جو مع الجزمة !! " ... قال : " لا مو انا اللي شايفه هذا اللي شافه " وأشر على صاحبو ... يعني صارت قضية ( في طالب لابس جزمة تحتها لفظ الجلاله ) وخلعت الجزمة عشان اشوف هذا اللي يقول عليه ...
المكتوب كلمة Paul
ترددت اخلع الجزمة وارجع حفيان للبيت ( :
تقريبا اتفقنا انها مؤامرة يهودية على الاسلام والمسلمين ( :
يعني ايش حيستفيدو لو حطو هذي الاشياء تحت رجولنا اللي ما اتوقع انهم قاصديين اصلا انهم يحطوها !! وحتى لو حطوها عن قصد هل تستاهل اننا نعيرها اي اهتمام اذا كانت العبارة غير واضحة ولم يعترفو بها .. صح لازم يصير عندنا كرامة بس مو نصير موسوسين ..
صار همنا كل واحد يطلع شي جديد ... يحبط مؤامرة جديدة قد تهدم اركان الدين فبذلك يكون قد انقذ الامة من شر محقق !!
اتذكر واحنا صغار طلعت اشاعة ان شعار كولاكولا بالمقلوب = لا محمد لامكة ... ولو تبغا تشوف المؤامرة لازم تمسك علبة الكوكاكولا وتوقف قدام مراية الحمام تماما وتركز عيونك على منتصف الشعار عشان تكتشف انهم مستقصدين بوضوح الاساءة الى الاسلام !!
ولا مطلعين على بيبسي pay every cent (to) save Israel !!
الين متى احنا في هذي التفاهات !!
طيب مو مفروض نشجع هذا الجيل الجديد من الثياب حتى يصبح بديلا ولو جزئيا عن الجينز والبدله !! حتى نعتز بتراثنا ويصير اساسي في لباس شبابنا ..
حتى لو تطور عالم ازياء الثياب ممكن يصير الثوب موضة عالمية !!
(اتذكر قبل فترة اقامت شركة لومار معرض ازياء لهذي الثياب في جدة )!!
