السبت، 13 يونيو، 2009

وين الجاي حيكون ؟؟

وانا واقف في اشارة في شارع الامير تركي مع صاحبي ... جمس جمبنا نزل القزاز ودقلنا بوري ... اثنين شباب صغار الدخان طالع من سجايرهم ومسترخيين على المقعدة ويكلموني : ( وين مستشفى دله ؟؟) ... بحكم طريقة كلامهم ... والشارع اللي انا فيه ... عرفت انهم فكروني من رواد هذا الشارع بحكم سيارتي وحبو يتعرفو عليا باستهبال ... فرديت عليه : ( دور في طريق الملك فهد تلاقيها ) ... قال : ( وين في طريق الملك فهد ؟؟) ... فتحت الاشارة في هذا الوقت واللي جمبي كان يبغى يتدخل ويوصف بس انا قطعت السالفة وقلت :(عاد انتا دور هناك الين تلاقيها ) ... قال بعصبيه لانه ما توقع الرد : ( هيه ... ايش ادور هناك !!) ... سكينا الشباك ومشينا وبعدين قعدت اشرح للي جمبي ...

التحلية اول ما فتح كان "نخبة الشباب الضايعة" تروح هناك تتمشى وتستعرض سياراتها وتتقهوى ويستهبلو ويعملو كل اللي في راصهم ... بعد فترة بدأت الطبقة اللي أقل من هذول الشباب تغزو هذا الشارع ... فالنخبة هذي طفشت من اختلاط الطبقات وحاولت تنقل الى مكان خاص بيهم ... يصير يتعرفو على بعض بسهولة ويستعرضو براحتهم بدون ما يكون هناك ناس غير مرغوب فيهم في المكان ... في الفترة الاخيرة بدأت هذي المجموعة تنتقل الى أماكن جديدة ... شارع الامير تركي ... ومؤخرا ولبعض الفئات المحدودة صارت تروح للحي الدبلوماسي ... ( على فكرة في الفيس بوك في تجمع لرواد طريق الامير تركي الاول !!)

الشباب هذي تبغا مكان غير مختلط الطبقات ... لان هذي الطبقة غالبا اهتمامتها واحدة و مستواها الاجتماعي قريب من بعضها فيصير هناك الواحد يتعرف على اي واحد في مكان التجمع بدون الحاجة الى تعب لانهم بكل بساطة لديهم الدليل على ان بينهم الكثير من الاشياء المشتركة : " انني من تجمع هذا الشارع " ... ما اتوقع ان اي واحد يدخل في هذا المجتمع بسهولة بس لو دخل حيلاقي العلاقات متشابكة وحيتعرف على كل رواد الشارع بمجرد انه تعرف على احدهم ... انا اسمي هذول الشباب " الطبقة الريادية" لانهم هم الذين يحددو الجديد لمثل هذي التجمعات الى ان "يتلوث" هذا المكان فينتقلو الى مكان جديد !!

لكن يظل التحلية يحتفظ بالكثير بسبب ترتيبه الرائع وشهرته والكم الرهيب من المطاعم والمقاهي ... بس نصيحة للي رايح التحلية : ( جهز أذانيك كويس ... يمكن ترجع للبيت وطبلتك مفقوعة اذا كنت تتمشى على رجولك في الشارع او مسوي مستمتع بالجو وجالس في جافا تايم عالشارع – من زين الجو اصلا- !!)

هناك 4 تعليقات:

مسولف يقول...

فعلاً لاحضت كثير عندنا بالجامعة وحتى على ايام المدارس نظامهم نظام "الشبكات" .

يعني تلقى شبكة "GMC" موقفين على يمين طريق الأمير تركي ويسولفون ... ساعة .. ساعتين .. مايهم الوقت

وتلقى اغلبهم مايعرفون بعض أو بالأصح توهم متعرفين على بعض ..

يمكن ثقافة الشبكات الإجتماعية أثرت عليهم ..

اما من ناحية المقارنة بين الأمير تركي والتحلية

أتوقع الأمير تركيب راح يكون المكان الأنسب لهم خصوصا بعد مايعتمدون "الممشى" على سور جامعة الملك سعود ...

إنكاس يقول...

احسن خلي التحلية يتطهر من هالأشكال
التحلية بدأت تنمو فيه لقاءات ثقافية وفكريةنخبوية
وهالطبقة التي تحدثت عنها يكثر فيها الانحلال والتفاهة بصراحه.

نامي الشريف يقول...

سلملي على التحلية والله زمان يافن

لي 6 سنين منقطع عن التحليه

بس يقولون صارت زي جدة غير ههههههه

نفر يقول...

يعني المرة الثانية سوي نفسك منت شايفه :)...

وأنا مع إنكاس الطبقة هاذي قلة من ترى فيه المسؤولية و الاهتمام بالمهم ... إلا من رحم ربي :)

إنكاس :

شكلك بتحول ولائك من خريص و إنكاس إلى التحلية ... ثانيا فيه واحد يقول إذا بغيت تروح مكان ما تحس فيه بالوحدة روح التحلية لأنه دائما يكون فيه حدث هناك ... وأنا أقول ما يسبب الأحداث هاذي غير الطبقة "التافهة" :)

مصائب قوم عند قوم فوائد