السبت، 12 ديسمبر، 2009

مسكين ما عندو بي بي !! اتوقع يستحق الزكاة !


" "إذا كنت جالسا بين مجموعه من الناس وكانو جميعا مطأطئي الرأس وأنت الوحيد رافع رأسك فلا تعتقد انك الوحيد المتفائل السعيد .. بل انت الوحيد الذي ليس لديه بلاك بيري "





هذا كلامهم .. يمكن كلامهم صح !! بس برضو لو كل اسبوع متأخر على اصحابك عشان الحادث الجديد اللي سويتو فأنت الوحيد الذي لديه بلاك بيري !! لو كل اصحابك اللي داخلين جو شات في المحاضرة بالبلاك بيري خبصو في الامتحان وانتا مسكين الوحيد اللي معطي الدكتور وجه وطلعت الدرجات فلا غرابه في الفرق لانك الوحيد الذي لا يملك بلاك بيري !! واذا كنت الوحيد الذي يكون بكامل تركيزه مع من حوله وصافي الذهن فأبشرك بأنك لم تشتري بلاك بيري بعد .. اذا كل اخبارك من النوع البايخ و "ساري الصلاحية لمدة ساعة" وبعد ما تنشرالخبر للي حولك تقول اسف كانت اشاعة بلاك بيري فلا نستغرب ان تكون دائما صاحب "أضحل" معلومات فأنت تملك بلاك بيري .. اذا كان عندك وقت كثييير وطفشان ولا عندك شي مشغل حياتك فينفع لك بلاك بيري بقوة .. اذا كنت من الناس اللي تحب تسوي نفسها مشغولة ومهمة وكل شوية تطلع الجوال وتقول "اوووه" وتبدا تكتب فأنصحك بالبلاك بيري .. اذا تحب الوان قوز قزح فأنصحك بلاك بيري بولد ولا تقصر كل يوم حط لون مرة ازرق فاقع ومرة زهري يفقع عيون الناظرين .. والقائمة تطول !!



طلع "التوت الاسود" وطلعت معاه العديد من الاكتشافات الجديدة :
- اكتشفنا ان الشعب السعودي خفيف دم وعندو امكانية على الابداع السريع في النكتة .. مثلا بعد ما حصل في جدة يقولك في محششين قاعدين على سطح عمارة وجا هلكوبتر الدفاع المدني يشيلهم قام صرخ واحد من المحششين : هيييه خلي خويك يطفي المروحة ترى روسنا رطبة ( :
اكتشفنا ان الاشاعة تسري في دمنا زي مسرى الشيطان في دم ابن ادم -
-اكتشفنا ان عندنا وقت أكثر من براميل النفط .. المشكلة ان مع هذا الاكتشاف الى الحين كل واحد يقول ياخي والله مشغووول .. مافي وقت .. حاضر صدقتك عمي ..
-اكتشفنا ان الشعب يحب التكنولوجيا وممكن يستخدمها طوالي في خدمة اهدافه السامية زي اللي في الصورة

تحليلي لانتشار البلاك بيري هو ان "الطبقة الراقية" بدأت تشتريه لان كان عبارة عن شبكة مغلقة بينهم .. طبعا بدأ باقي الناس تشوف هذا "الريموت كنترول" في ايدي هذي الناس وقالت خيلنا نجرب .. انتشر اكثر واكثر .. في ناس اشترتو بدون سبب على اساس انو كشخة وعلى بالها انها صارت كشخة لما شالت بلاك بيري عليه "كفر" اخضر فاتح .. بس في ناس معاها حق مقتنعة بميزاته انه ممكن يكون أرخص ويوفر الفاتورة - على اساس المسجات لاصحابهم اللي عندهم بلاك بيري ببلاش - والايميلات تجيك طوالي والانترنت مشبوك .. يعني يستفيدو منو ويحللو قيمتو !!



طيب البلاك بيري "موضة " وتعدي ؟؟
انا اتوقع ان في ناس مو ممكن تعيش بدون بلاك بيري بعد الان الا لو طلعت تقنية احسن منها .. زي الماسنجر مع قدمو الا ان في ناس ما قدرت تسيبو ! اما الناس الباقية الشقرا ورا الخيل" فهم ينتظرو الصرخة القادمة عشان يصرخو معاها !"




هناك 5 تعليقات:

عبدالرحمن البدر يقول...

هههههههههههههههههههههههههه

فعلا يا عزيزي .

الـ BB انتشر بشكل رهيييب جدا ، وصراحة له ميزة وسلبية في نفس الوقت : التواصل السريع والدائم .

وأنا أدري إنك أنت خصوصا متعقد من هذا الكائن : )

بالتوفيق وعقبال الآيفون : )

عبدالرحمن

غير معرف يقول...

انا اراهنك انك بتشتريه !

لا اشوفك جايبه طيب ؟

^_^

youssef يقول...

هههههههههههه
بعدين يا شيخ ترا المثل
"مع الخيل يا شقرا"

أقول وراه ما تشغلنا شوية خشب
مثل الاسبوع الماضي

وياخي استح على وجهك وافتح المدونة خلي الناس الباقية تنزل مواضيع

حنان ورده يقول...

كل عام وانتم بخير
انا مندهشه من اللي بيتابع النت وهم بيسوقوا السيارات انتبهتلهم في تويتر الواحد يقول الحمد لله باقي دقيقتين واوصل البيت
لكن ماكنت فاهمه بأيش يتابعوا اعتقدت بالجوال
بس صراحه سببوالي خوف ورهبه من الخروج من البيت بتخيل كل سائقي السيارات بيدردشوا عالتويتر
:(

عالمي اطفالي يقول...
أزال المؤلف هذا التعليق.