الثلاثاء، 4 مايو 2010

الرياض ما تخرش الميه !!

أشهد ان اللي بنا معامل الجامعة مخلص ,, كنا في عالم ثاني وماحسينا بشي الين طلعنا الساعة 2 والا الدنيا مقلوبة !

الشوارع مليانة ولوحات طايحة وشجر مقلع ... ناس غرقت وناس سبحت وناس فارشه على رصيف الدايري وقاعدة تصيد سمك ,, او ظبان !

مو غريبة ان الشوارع تغرق في ظرف ساعتين ؟
المطر كان كثيف بشكل غير مسبوق ,, الرياض كثير قد جاتها امطار قوية ومتواصلة بس من زمان ما غرقت زي كذا ,, اتذكر اخر مرة غرقت الرياض مثل هذي المرة أيام التمهيدي (يعني قبل 14 سنة تقريبا) وقتها وقفوا المدارس زي هذي المرة واتذكر كيف طرنا من الفرح لما وصلنا المدرسة وقالوا لنا مافي دوام رحنا انا واخواني كل واحد فتح "اللنش بوكس" وبدأنا نفطر في السيارة وبدأت بعلبة الكاكولا الصغيرة (كنا غير صحيين) ( :


بوصول مغرب امس كانت الصور والفديوهات مليانة في الانترنت والناس بدأت تروح تساعد ... تجمعوا شباب وقروبات تطوعية وبدأوا بمساعدة الناس والسيارات الغرقانة .. شي حلو لما تشوف سرعة الاستجابة .. لما تبادر الناس ويكونوا هما الاعلاميين وهم المنقذين وهم الكل في الكل ..

لكن احس ان الناس كبرت الموضوع شويا ,, بيتنا جمب الجامعة وعندي اختبار فما خرجت امس ولاشفت اللي حصل بس اليوم الصباح رحت اشوف ايش اللي صار ..


الدايري الشمالي ما كان فيه قطرة مويه ..


الصورة اللي تحت تبين امس كيف كان الشارع واليوم كيف صار (صورتين لنفس الشارع امس واليوم )





يعني التصريف ماكان سيء بتلك الدرجة ,, ما اقول ان الوضع تماااام بس الوضع أيضا ليس دمار ,, بس الناس نزلت نزلة قوية عالفساد ,, طيب يستاهل الراجل المسكين المدعو "فساد " كل هذا ؟؟
قد نعتبر ما حصل شي شبه طبيعي ممكن يحصل في اي دولة (قبل يومين غرقت مدينة امريكية بسبب امطار ) ,, في البداية ماكنت مقتنع بالكلام ان اللي حصل فساد واعتبرته شي طبيعي ممكن يحصل في اي دولة ,, لكن لما تقارن الاموال المصروفة مع النتائج يحق لك تزعل ,, الامانة بالفلوس المصروفة تقدر تربط على كل بيت "سفينة " نجاة احتياطية استعدادا لليوم الذي ستعود فيه الجزيرة مروجا وانهارا ,,

لما تسمع تصريحات متعالية تتمنى ان يحاسب المسؤولين على فشلهم الاداري وكبرهم الغير مبرر (مدونة سم ون) ,, اللي حصل عبارة عن خليط من سوء تخطيط وسوء متابعة وصيانة وقد لا ينجوا الفساد وينضم الى القائمة ...


فيديو انقاذ سائق شاحنة بعد غرق الشاحنة في احد "المسابح"

انقاذ اطفال غرق باصهم


حصل خير في النهاية كسبناها اجازة يوم وسمعنالنا كم نكته : ( هروب 600 سمكة من عمو حمزة والشرطة تطارد قرش في طريق الملك فهد – مكرمة ملكية : صرف سروال سباحة + لستك لكل مواطن وننوه ان نفخ اللستك من مسؤولية المواطن) غيرنا جو وصارت حاجة مثيرة رفعت ادرينالين عروق هل الرياض ..

هناك 11 تعليقًا:

عبدالرحمن يقول...

يا خي أنت مجرم : )

فعلا بالنسبة للسالفة اللي حصلت أمس كانت مفاجئة وغريبة وخرشت الكل :d

الشي اللي الناس ما هم متأكدين منه سالفة الوفيات ،

ورب ضارة نافعة الناس تنبهت بشكل واضح جدا لوجود الفساد : )

* أعجبتني سالفة اللنش بوكس :d

أبوحمزة الأديب يقول...

واااو..
كلام رائع من حبيب وغالي...

أحب أن أبين حاجة أن الكبري إلي طاح هو على وشك يطيح من زمان وقاعدين يصلحوا فيه لهم أسبوع...

بس ألف شكر ....

أصبحت الرياض مع التفاؤل لها كورنيش...!!

غير معرف يقول...

الصور الي انت حطيتها بالبداية هي للدايري الشرقي عند مخرج ٩

شارع العروبة يقول...

عبدالرحمن تعجبني مداحتك ( :
من جد رب ضارة نافعة

ابو حمزة اهلا بيك .. صح حتى لاحظت محطوط سنادات !!

فهد الحازمي يقول...

يا أخي لو كنت مكانك لاحتفلت بالمناسبة الأولى على افتتاح المدونة، يعني من الفرص النادرة اللي تحتفل فيها ب "كورنيش الرياض"
:)

عبدالله بن عمر يقول...

الله يقلع شياطينك!!

Unknown يقول...

احب اقول للحازمي ان المدونة مفتوحة من زمان وماكانت الامطار سبب افتتاحها

غير معرف يقول...

شكراً لهذا الطرح المتوازن
بالفعل تم تضخيم الأمور بشكل غير عادي
والأسوأ من ذلك أن فيه ناس من مدينة جدة يقولون اللهم لا شماتة يا أهل الرياض !! كما ويقول بعضهم إن مشايختكم يا اهل الرياض قالوا عن كارثة جدة بسبب المعاصي .. الحين وش سبب الامطار عندكم يا اهل الرياض وين مشايختكم ..
سبحان الله !! لا مقارنة بين ما حصل في الرياض وما حصل في جدة، ما حصل في جدة كارثة بكل المقاييس بينما في الرياض لا يرقى ليكون كارثة ، كما أني لا أبرئ الرياض من وجود مخالفات شرعية أو معاصي عند أهلها ، إلا أن مدينة جدة مشهورة بالفساد الخلقي ويشهد بذلك أهلها قبل غيرهم ..

تحياتي لقلمك السيال.

غير معرف يقول...

الناس اللي يقولون تم تضخيم السالفة ...
أقول لهم انتم ماتدرون عن شي ....

أسألوا أصحاب الوايتات المستأجره من قبل الأمانة ... أيش كانت تعمل ...

كانت تسحب الماء حتى ساعات الصباح الأولى ... تداركاً للفضيحة ...

وطبعاً كل شي بحقه ... رب ضارة نافعة ..

أرزاق ناس على مصايب ناس ...

الموضوع مافيه تضخيم ... بالعكس شي واقعي وحقيقي ...

elmnzel يقول...


شركة تنظيف بالرياض
الآن نقدم لكم افضل خدمات التنظيف بالرياض حيث نقدم لكم خدمات تنظيف منازل بالرياض بأفضل الاسعار ومن خلال مدربون متخصصون وعلى اعلى مستوى من الخدمة
شركة تنظيف منازل بالرياض
http://elmnzel.com/cleaning-riyadh/

صقر البشاير يقول...

شركة نظافة عامة بمكة
نحن شركة نظافة عامة بمكة نقوم بتنظيف منازل, تنظيف فلل, تنظيف شقق, تنظيف بيوت, تنظيف مجالس نقوم باستخدام اجود مود التنظيف مع عمالة مدربة جيداً على خدمات التنظيف بمكة
شركة تنظيف فلل بمكة
اتصل بنا على 0500941566
http://www.elbshayr.com/5/House-clearance
لنصلك باي مكان بمكة المكرمة