الاثنين، 5 مارس، 2012

يوميات سعوزلندي ٤ #______#


يوميات سعوزلندي ٤ #______#

بسم الله الرحمن الرحيم ..


معليش عالتأخير !! بس تعرفون اختبارات وكذا ^___^


الجزء الرابع من سلسلة ان شاء الله اني امتعتكم فيها ^_^
وعيشتكم فيها جو الفهاوة الي انا فيه :)


الجزء الرابع  ----------------------------------------------------------------------------
"سعوزلندي فاهي ! بس ذكي ^_* "








مرة ...كان الوالد توه محولي فلوس # واحد عيونه تقلب ($)_($) مع صوت الكاشير#

رحت الماكينة وصرفتها كلها حوالي ٣٠٠ دولار او شي زي كذا !
الشاهد اني مشيت وتأكدت ان الفلوس معي وكل شي تمااااام !
قعدت أنتظر الباص على الكراسي الحديد حقتهم ! ...
وأنتظر ..
وأنتظر ...
وأنتظر ....
الزبدة ان (القبو) حقي تكسر على الكراسي حقت الانتظار ! وفوق كذا بررررررررد !!

مرة عطست تجمدت عطستي قدامي من البرد !!<< هذي فقشة واضحة !هههههه

المهم مشيت لمحطة باصات ثانية قلت عشان نكسب وقت !! وأول ما مشيت وأناظر المحطة الي كانت وراي
وألاقي الباص توه واصل !!!! !! وأرررررركض وأدرعم وبغيت أتكرفس وأشوا اني لحقت عليه !

مشيت البطاقة عالجهاز 

(صورة للجهاز)

ركبت وكان الباص زحممممة !!! وكلهم لابسين أقنعة O_o
انا انلحست ! سألت واحد : وش السالفة يبو؟
قال حنا طلبة تحضيرية ومسوين حفلة تنكرية وكذا ! بس طردونا من صالة الجامعة والحين حنا رايحين لبيت واحد !!

#انا قعدت ابي استوعب !شلووووون كل ذولا بيروحون بيت واحد!! الباص فيه حوالي عشرين نفر ! واخبر بيوتهم ما تكفي خمسة ونص عشان تكفي ذولا#

قلتله: والله ماألومهم انهم طردوكم !! مزعجيين !!
ناظرني وهو قاعد يضحك وقالي: تعال معنا ^_^

أنا تبققت عيوني O_O قلت: لا شكراً !
قالي : come on ! It's gonna be fun!!! 
قلت : لاا لاااا شكراً جزيلاً صراحة !!

جات المحطة حقتي وضغطت الزر عشان أنزل !!
نزلت ! (عاد بين المحطة وبيتنا تقريباً ربع ساعة مشي ^_^ واللياقة ماتساعد !! ههههه)

وأنا ماشي جيت بأطلع سماعاتي وأتحسس مكان محفظتي !!

 ليس هنالك محفظة في جيبي O_O!!!!!!!!!!!!!!!!!!!!!!!!!!!!!!!!!!

على طول تذكرت الوصخ الي دعاني الى الفسق والفجور والعياذ بالله << مع انه ماقال شي عن كذا بس تعرفون تفكير حمضياتي! خخخخخXD

المهم ماعرفت وش أزين ! وين أروح؟ مين أعلم؟ بألقاها ولا لا ؟ 

# في ذيك اللحظة عاد حسيت اني بجزيرة زي حقت فيلم"cast away" #

رحت للبيت بسرعة وعلمتهم بالسالفة ! 
قالوا: كلم المترو وقلهم عن الوقت الي حطك فيه الباص ! وهم بيطلعونه لك ! لأن عندهم كاميرات في باصاتهم !! 

فرحت وقعدت أناقز من الفرحة لأسبابٍ منها :

البوك فيه ٣٠٠دولار + بطاقة ائتمانية + بطاقة الباص + والطامة الكبرى ( بطاقة احوالي السعودية ) << يعني مدري وش الي قردني وحطيتها بالبوك !!!!!!! ياخي أرفع الضغط !!زيادة عز فيها مثلاً ! تراها ماتدخلك الا البحرين ومكة !~على اساس مكة دولة خخخخخXD~

دقيت عليهم وقلتلهم الي حصل ! سألوني كم رقم الباص ؟
قلتلهم ماأدري والله كم رقمه ! قالوا مانقدر نخدمك الا برقم الباص !!!!!
بغيت أصيح صراحة ! قلتلهم طيب ماعندكم مكتب مفقودات ! قالوا اذا لقينها بنكلمك بس عطنا مواصفاتها !

عطيتهم الي يبون وقفلت !

عاد بعد هذيك اللحظة خلاص ! بديت أيأس اني ألاقي محفظتي!! عاد أشوا اني كنت حاط ٨٠ $
احتياط مخبيها بغرفتي ممكن تمشي حالي ٣ايام 
قعدت ساكت مالي خلق أبداً ! جاتني الأم قالت تبي شاي؟ قلت عطيني شاي !!

كليتي وكأني ماكليت ! النفسية زفففففت ! 

بعد ساعتين دقت علي الوالدة من الرياض ! كلمتها وصوتها مو عاجبني ! سألتها : وش صاير ليش صوتك كذا؟
قالتلي : اخوك الي كان ببطني ! توفى بالشهر الخامس من الحمل وسقطته !
"
"
"
كلمتها عادي عشان مايصير لها شي ! وقلت :الله يرحمه ويغفر له وش كان اسمه ؟
قالت: عبدالله ! وصلوا عليه في الراجحي وكان في عزاء كبير وقتها ربي رحمه وصلوا عليه ناس كثير !
قلت : الحمدلله !
وقعدنا نسولف شوي وقفلنا السماعة!

أنا خلااااص كل هالأحداث بيوم واحد ! لا وكان عندي اختبار بكرا ! رحت وانسدحت على سريري وعيني غرقانة بدموعي ! قعدت في شعور بين الي يبكي وبين المنفجع !
شعور ( صامت )

جا اليوم الي بعده ووجهي شاحب ! وعيوني ماعاد بقى فيها دموع ! رحت المدرسة وقعدوا اخوياي يسألوني : وش فيك ؟ وين أحمد الفلة ؟
مارديت على اأحد ومر اليوم كله زي كذا !!!

قمت باليوم الي بعده ! ^_^
صليت الفجر وتمغطت وطقطقت ظهري شويتين !!! وحي عالفلاح !!
كان هذاك اليوم وناااااسة بشكل !!!!!

 اي واحد اشوفه أقول : Hi ^_^ 
وكانت نسبة الحشيش عندي ذاك اليوم مرتفعة ! مافي ولا واحد شافني الا وقعد يضحك :)

كان يوم وناااااااااسة ! 
بس دقيقة ! تذكرت شي ! محفظتي !!! هيييييييه صح ! ( فيس واحد يصفق جبهته )
رحت عند خويي فواز قلتله الوضع كذا كذا ...
قال : ودي أساعدك بس اليوم انا مشغول ! بكرا نروح سوا للـ"مخفر" << مسلسل خليجي !!
قلت: اوكي اتفقنا ^_^

خلص الدوام ورحنا انا وخوياي للسوق ( السوق عند السعوديين = سينما ! )

بعد مافليناها وخلصنا قلنا نبي نروح للـtimezone 
طبعاً هالمكان تروح وتشتري بطاقة وتلعب في أي لعبة !!
 مدري وش يسمونها بالعربي بس هي بالنهاية مكان ألعاب وبس !! << طيب لاتطق ! O_o

صارتلنا سالفة هناك !! الله لا يوريكم !!


بأقولها لكم :

كنا نلعب بلياردو ويجينا بنتين وولد بدوا كأنهم بيقطون معنا ! 
( كنت أنا وواحد من اخوياي اسمه عمر ! قصصصصصمنجي من بريدة ولايدير انقليزي )

قلتله : لاتعطيهم وجه !
وبدوا يلفون حول الطاولة ويخربون شوي !!
قلتلهم : وش تبون؟
قالي الولد : بأعطيكم عرض ! عطني ٥$ وأخليك تلمس جسم هالبنتين ! واذا تبي تاخذهم معك البيت ٢٠$ !! 

O_O أنا قلت وش ذالحقنة !! ارتبكت صراحة !!
خويي القصمنجي يدقني ويسأل: وش يقولك وش يقولك ؟؟
  قلتله : مايبي شي بس يسأل كم أعمارنا !!!! 

قلت للولد : معليش بس أنا ( gay ) وهذا البويفريند حقي << الععععععععب يالتصريفة المحترمة!
ومسكت يد عمر !

القصمنجي شك بعمره !! قام يدقني : أحمد وش يقولون وش يقولون !!!!!!!
قلتله انثبر يبون يسرقوننا !!

راح قالي الولد : اوكي تقدر تاخذني أنا الليلة بـ١٥$ << ياليييييييييييييييييييييييييل !!!!!!!!

كلمت عمر بالانقلش : ترضى اخذه الليلة ؟
قالي : وش تقوووول انت !! ( وهو معصب )

رديت على الولد : شفت كيف خويي معصب !! معليش مابيك !!

ومسكت خويي وفقعنااااااااااااااا والله بغى يجلدني !! 

مسكني عمر مع رقبتي وقال : وش الساااااااااالفة ؟
انا فقعت ضحك ! هههههههههههههههههههههههههههه وعلمته السالفة !
قال: الحين ياقليل الخاتمة ورا ماخليتني انا الرجال وانت البنت !!
قلت: وش اسوي عاد احمد ربك طلعنا من السالفة !!


طبعاً انا ماقلت السالفة لقلة حياء مني ! ولكن عشان أبين ترا الوضع حاصل برا ومنتشر !!
ومالها داعي يحسبوني وصخ وكذا ...لا والله ذكرت السالفة ثقةً مني في عقولكم الناضجة والمترفعة عن هالأشكال ^_^

*وللمعلومية ترا كثير من هالأشكال يستهدفون المبتعثين خاصةً ! لأنو يعرفون الحكومة مغرقتهم فلوس ومرات بعضهم يجيك من دون لا ذمة ولاضمير ولا مراقبة لله سبحانه وتعالى ! ويروحون ويفشلون أنفسهم ويفشلون السعوديين وغير كذا ، نظرة الناس للمسلمين تكون عبر هذي الشريحة الوصخة ! ....الي تعتبر مو قليلة خاصة من المبتعثين !

^^
لكن لا أعمم !! بجد في من رفع روسنا من المبتعثين والأمثلة واااااااااجدة ومانقدر نحصيها !
تحية لشبابنا يا جماعة << تكفى يالشايب O_o

رجعت البيت !! وأرسلت لأبوي ايميل احكي فيه قصتي المبكية في ضياع المحفظة !

رد علي وكتب :


يقول في الايميل :" بالتأكيد كانت تجربة مميزة بالنسبة لك ,,, بأحولك فلوس بأقرب وقت
لا تخاف ,,, أنا موجود معك دايماً , أنت بس ركز على دراستك ^_^

تصبح على خير"



بغيت أصيح صراحة من كلامه الحلو (^؛______^)




بعدها بخمس دقايق !! جاتني رسالة وصلت لأبوي من شرطة نيوزيلندا O_____O





(صورة الايميل)

زبدة الايميل يقولون لقينا المحفظة وتعال بأي وقت خذها !!


طبعاً أنا قلبتها سامري في البيت من الفرحة !!! 


وسجدت سجود شكر وقلت الحمد لله ماضاعت !ورحت نمت نومة من أحلى مايكون ^ - ^

من بكرة رحت مع فواز للـ"مخفر" << برضو مسلسل خليجي >_<

جيتهم ولقيت المحفظة وكل أغراضي موجودة .................... بس !
من دون ٣٠٠ $ :"( 

تحمدت ربي وقلت زين لقيتها ! 
وسألتهم : شلون لقيتوها؟
قالوا دقوا علينا مكتب البريد ! لقوها بظرف بني ممسوحة منه البصمات !

قعدت أفكر #اجل كذا نظامهم !! يسرقون الفلوس ويمسحون البصمات ويرجعون باقي الي بالمحفظة لراعيه !
ياخي والله انهم وصخين محترمين ^_^ !!

من جد ! 
يعني في " وصخ وصخ " وفيه " وصخ محترم "
مو زي الي عندنا يسرقون ثوبك مع المحفظة !!!!!!!!!!!#


-------------------------------

مرة جانا درس عن مصطلحات الأكل والطبخ وكذا ... فعشان نفهم ونستوعب الدرس وش سوت المعلمة !

خلتنا نطبخ كيكة !!!! الله الله على التعليم الخطير !!
 تصدقون الحين ما في أمل أنسى المصطلحات الي حفظناها ذاك اليوم !
شي جميل ^___^
إليكم الصور !



(قبل)



(بعد)


^^^^^
صورة جماعية !!!
طبعاً هذي المدرسة مو هي نفسها الي بتجي قصتها بعد شوي ^_^
هذي وحدة ثانية 



مر أسبوعين تقريباً لوجودي في نيوزيلندا ! 

الوضع قد ما أقولكم طففففششش !!! لدرجة خيالية !
لأن قبل ما أجي أنا بشهر ! ضربهم زلزال قوي ! وكسر نص السيتي ! يعني أغلب أماكن الوناسة  الي في المدينة راحت !!

ورجعت لوضع (لازم ما أطفش) !!
رحت بنفس اليوم (كان يوم الجمعة) وجيت أبي أتعرف على ناس جدد !

لقيتلي شلة ! ربي مرسلها لي ! مكوّنة من خمس أشخاص:
علي، البراء ، فهد ، خلف ، وواحد والله نسيت اسمه !! بس يسمونه ( حنفي ) سعوديين مبتعثين طبعاً 

ناس ونعم صراحة ! 


صارتلنا سالفة !!
 مرة رحنا نلعب كورة يوم سبت !.....

الشاهد أنا كنت توني جديد فلازم أوريهم اللعب على أصوله !! << #تكفى_يالديتول

جات هجمة لنا وتقدمت !! عطاني خويي الكورة ورا المدافعين و صرت منفرد بالحارس!!
من الحماس تقدمت ويوم جيت بأشوت طب علي الحارس وتصادمنا !
الشاهد اني دعست يد الرجال :( وتبين عقبها انه تكسر أصبعه وحط أصياخ داخل !! :"(

طبعاً الحارس من تتوقعون ؟

صديقي الي توني متعرف عليه !!!!!!!!!!!!!!!!!!!!!
 ههههههههههه يعني وش هالبجاحة !! توني كنت بشقته وآكل من أكلهم ويوم لعبنا كسرت يده !! هههههههههههههههههههه حالتي صعبة والله !!

وهذي صورة مع ( علي ) 


ههههههههه المضحك بالموضوع انه قصمنجي ! يعني ذلني ذل على يده !!! كل ماجينا مطعم ولا شي قام يقلب بيده ويلمحلي !! ههههههههه ياحبيله !! 

طبعاً هناك الطقوس الرمضانية زي الي هنا بالضبببببط !
لدرجة انو حتى طاش ما طاش نشغلها بعد المغرب ! << الله يخلي موقع شاهد!


-----------------------------------------


 بعدها بأسبوع صارتلي سالفة غير طبيعية !

أرجو منك عزيزي القارئ التركيز والتشمير وإحضار الفشفاش والشراب الروحي (حمضيات)
"
"
"
"
"

كان يوم بارد جداً 
درجة الحرارة وصلت الى -٥
ومن كثر ماهو برد تحس ان الهواء ثقيل ! 
(صورتين للبرد)
شفتوا القارورة الي في الصورة ! تخيلوا اني بس دعستها ! وانكسرت !

المهم رحت انتظرت الباص وركبت ووصلت المدرسة ! 

دخلت الكلاس وقعدت !!
 جات المعلمة (الأبلة)  وفتحت موضوع فجأة وقالت : وش تتوقعون جنسيتي الثانية غير النيوزيلندية؟

استغربنا من السؤال  O_o وقعد كل واحد يجاوب (طبعاً حنا ٧ مع المعلمة وانا السعودي الوحيد)

قلت : بريطانيا؟
لا!
ايرلندا؟
لا!
امريكا؟
لاا!
الهند ؟؟؟؟؟؟
لااااااااا!!!!!!!!

ها ؟ وشو أجل قربيلنا  !!
قالت: حنا  تقريباً من الدول المعادية للسعودية !!!!! << انا على طول عرفت انها اسرائيلية !!!

بس اني سكت وقلت : غريبة ؟ أعداء مع السعودية ؟ لايكون ايرانية ؟
قالت : لاااا !! حنا قريبين من السعودية !
قلت : البحرين ؟ << هههههه اي والله اني قلت البحرين !!
قالت وهي معصبة : لا أحمد أنت تعرف بس ماتبي تقول !!!!

قلتلها: وشي طيب ؟ علميني !! اناعطيتك كل الي أعرفه !!!!
قالت : انا من إسرائيل !
"
"
قلت : وشي إسرائيل ؟ أول مرة أسمع فيها هالدولة !! 
قالت : الا تعرفها بس انك ماتبي تتكلم !! 

وخذت قلم وجات ترسم عالسبورة خريطة الشام !! وبقدرة قادر خلت الشام كلهااااااااا إسرائيل !
الين صارت السعودية تتشابك على الحدود معها!!!!!

قلت : لا غلط عليك << بصوت هادي !
وقمت وطلبت منها تعطيني القلم ! 


جبت أبغى أوضحلها قعدت أرسم الحدود الي تفرق بين الأردن وسوريا وفلسطين ولبنان والعراق 
مسكت نفسي والدمعة بعيني !!
 وقلت : هذي الدول الي أعرفها مو دولتك ...وش قلتيلي اسمها؟
قالت: إسرائييييل !
قلت : ايوا ايوا إسرائيل او مهما كانت ! اول مرة أسمع فيها !
قالت : حنا أقوى دولة في العالم وحنا اليهود موجودين من ٢٠٠٠ سنة !
رديت : آهاااا انتي يهودية !! أتذكر انو في شوية يهود هنا ( رسمت نقطة فوق لبنان بشوي )
ردت وهي معصبة واحتد النقاش !!

رحت انا جلست وقلت: خلاص أصلاً الموضوع أكبر من كذا ^_^ خلينا نكمل الحصة ولا كأنه صار شي !!

جلست ... وعقلي كان واقف !!
جلست ... ونفسي ما قدرت أمسكها !!
جلست ... وبخفوقي نارٍ ما يخمدها الا من خلقها !!

صراحة من الغبنة بعد هالكلام مسكت أغراضي وطلعت برا الكلاس بس بهدوء !
 قعدت على الدرج الي بالصورة !


حطيت السماعات وقلت خلني أغير جو ! أول مافتحت الآيباد ولقيت أنشودة "أمي فلسطين"
شغلتها وقعدت ابكي وابكي وابكي وابكي وابكي وابكي .....
"
"
"
تنفست بعد فترة وفتحت عيوني بعد ماغرقت بدموعي ... وقبل مايجي البريك بخمس دقايق 

جاتني المعلمة وهي تبكي ! قالت: أحمد ترا أنا مالي دخل باللي يسوونه في المسلمين هناك ! لاتحقد علي!
قلت: الحين الناس يموتون بكل يوم وليلة هناك !! ولاتبيني أحقد !
سكتت وراحت تبكي !

جا البريك...!
وجاني واحد سعودي الله يستر عليه وقالي: حرام عليك زعلت المززززة ! والله شكلها كيوت وهي تبكي !!
ناظرت فيه ! واشمئزيت من وجهه !! قلت : رح قبل ما أصفقك !
شاف اني مالي خلق ومشى !

خلص البريك وصحصحت ورجعت للكلاس !! فتحت الفيسبوق << ايه نعم فيسبوق ! عندك مانع !

 وجاتنا المعلمة حقت الحصة الثانية ومرت الحصة وخلصنا الدوام !
قبل ما أطلع من المعهد...
مريت على الاسرائيلية وقلت: الموضوع الي صار أبغاكي تنسينه ! والأصل ان الموضوع أكبر مني ومنك ! ولاتضغطين على نفسك وخصوصاً انك حامل << بالشهر الثالث
وقعدت أقول ان الضغط النفسي يأثر عالجنين وكذا ^___^

ومن بعدها ما شفتها بالمعهد !!
"
"
"
"
"
"
"
"
"
ههههههههههههههههههههههههههههههههههههههههه
^^
ودي تغيرون جو شوي ! خخخخ XD

-----

طبعاً ومن الأشياء الي تميز نيوزيلندا عن باقي الدول وشي !!

#تخيلوا بزارين يصارخون مع بعض ويقولون: بااااااااااااردة هييييييييييييه ^_____^#

صح عليك يا شاطر نيوزيلندا باردة ! طيب مين يعرف ايش يجي مع البرد ؟

#تخيلوا بزارين يصارخون مع بعض ويقولون:ثللللللللللللللللللللج هييييييييييييه ^______^#

شطااار صح عليكم .... ثلج !!

وهذي بعض الصور الي صورتها وأنا بالثلوج !! << خخخخخ موتوا بغيظكم أيها المغبرون !!!





^^^^^^^^


جزمتي ^_^ 
كنت توني شاريها من هناك !! ولا أزال خاق عليها #ENDLESSlove




^^^^^^^^^^

مع ان الفوكس مضروب !!
من اليمين : عبدالله > سعوزلندي > عبدالرحمن





^^^^^

صورة بالغلط !

مدونتي !!! كيييفي !! أحط الي أبي !! << ههههههههههههه  






^^^^^

جزمتي العظيمة #__# 

^^^^^^^

شعور جميل وانت منسدح عالثلج !! تحس انك أوروبي ! << سم أبوي o_O
^^^^^^^
هذا ولد العايلة الي ساكن معهم !!
اسمه: جاك
عمره : 11 سنة

للأسف هذا الولد أثبتلي ان في واحد أغبى من مستر بين !!! O.o
  أقرب مثال !!
الصورة الي تحت ! فجأة طاح وقعد يصارخ ! : الدب بياكلني لازم أسوي نفسي ميت !!!!

من بعدها تحمدت ربي عالعافية ( يارب لك الحمد ! )










^^^^^^

^^^^^^^^^

ياعبيبي !!!! ههههههههههه أصلاً مو برد !<<< ماكان متلحف بألف جاكيت !



^^^^^^^^

اللومينا حقت أبو العايلة !! #likeAboss

^^^^^^^^^^^

هذي أكثر صورة تعبت عليها ! ^____^ << ايه صح تعبان مررررة عليها !


^^^^^^^^^^

خشتي مفقعة من بعد النوم ! z_z


^^^^^^^^

هذي الأودي ولابلاش !! على الأقل يطعسون بالثلج !! مو بالتراب ! << ما يلمح لواحد ! ^_*


^^^^^^^^
عاد هذي تنفع خلفية ويندوز !! خخخخخخ













في النهاية تراني طولت !! لازم أنام قاعد أكتبها وبكرا وراي دوام والحين الساعة ؟مممم
اوووووووف ٣:٣٠ الفجر !!! سهرتوني عشان أكتبلكم انت وياه #_#

بس يالله ! ان شاء تكون أعجبتكم !! بغض النظر عن الفهاوة الي فيها #_^

وقبل ما اختم بأقول شي :

تراني حبيت أشارككم هاليوميات الي قضيتها في مدة تقريباً شهرين في نيوزيلندا ^_^
 عشان أوصل رسالة انو ممكن انك تكتب شي :
( مضحك ، مفيد ، مسلي ) أختصرها في كلمة ( مـمـمـ ) ههههههه وش هالاختصار السامج !!!
"
أتمنى اني وصلت رسالة طيبة لقلوبكم 3> + 
وترقبوا الجزء الخامس !!

ولا تقاطعونا يا جماعة !!

ورجاء الي أعجبته المدونة ينشرها ^_^ انا ماكتبتها الا عشان يشوفها أكبر قدر من (الحمضيات) في دولتنا العظيمة !!

دمتم في غبار !! خخخ


للي ماشاف الأجزاء الي قبل !
الأولى: http://kriyadh.blogspot.com/2012/02/blog-post.html
الثانية:http://kriyadh.blogspot.com/2012/02/2.html
الثالثة:http://kriyadh.blogspot.com/2012/02/3.html

 وتابعوني عالتويتر : @a7mad_ar



هناك 11 تعليقًا:

غير معرف يقول...

واااوو احجزول مكاان بجي معكم

غير معرف يقول...

قسم بالله شيء حميل
حبيت اسلوبك وبساطتك
الله يوفقك وعقبال مانشوفك سفير السعوديه هناك
وتصير صدق بزنس مان

غير معرف يقول...

حنفي = منصور يا فاهي

Albara يقول...

ما شاء الله عليك وش ذا الذاكرة <<<< ما كان يشوفك تكتب ويضحك عليك
اهنيك ع الأسلوب

غير معرف يقول...

7sabk fi Al-facebook plz! !

حفرية مخضرمة #__# يقول...

Ahmad khaled alrasheed

حفرية مخضرمة #__# يقول...

Ahmad khaled alrasheed

غير معرف يقول...

الصراحة اعجبتني في الاسرائيلية
وباين ان ابوك مربيك احسن تربية
تقبل مروري .... فتى الهيلا

Wohnungsräumung wien يقول...

تسلم ايديك على الموضوع الممتاز
Wohnungsräumung
Wohnungsräumung
Wohnungsräumung wien
Wohnungsräumung wien
Wohnungsräumung wein

JORDAN يقول...

مع اني قرأت يومياتك متأخر 12/12/2013 الأ اني استمتعت جدا بقرائتها و الصور الجميلة ز شكرا مع تحياتي

منهل الرشدان - ألأردن

غير معرف يقول...

شي جمييييييل جدآ