الثلاثاء، 14 أكتوبر 2008

حقوق الانسان بس ؟؟ فين حقوق الشيطان ؟

بسم الله الرحمن الرحيم

تحذير حكومي : هذا الكلام سبب رئيسي للاصابة بالسرطان وامراض الرئة !!





والله عناد نفسي ادخن .. بس عناد في هالتحذير البايخ !!! ... احد يحذرك من شي بعد مايوقع في يدك خلاص ؟؟ مو المفروض تحذره من قبل ؟؟

... اووو صح .. انا اسف .. مكتوب " تحذير حكومي"!!!! اذا عرف السبب بطل العجب !!

تذكرني بافلام الرعب القديمة .. لمن تشتري الفلم خلاص وتشغله .. يقولك ترا محتواه لازم تبعد الصغار وتحت سن معين وكذا .. بعد اييييييييش !!!

بعدين ليش اي شي حكومي كذا ؟؟ مستحيل يكون بيرفكت ؟؟ انا احب الحكومة وما ابغى ادخل في السياسة ...ولكن انا اطالب بخصخصة هذا التحذير .. .. الناس يقولوا اذا خصخصنا الشي يرتفع مستوى ادائه ..

او حتى يصير هذا التحذير شراكة بين القطاع الخاص والقطاع الحكومي .. .. !! !!

بس غالبا اي شراكة من هالنوع ينتج عنها شي زي كذا :
تحذير القطاع الخاص : نرجوا الانتباه للتحذير التالي : تحذير حكومي : هذا المنتج يسبب ..... !!!

المهم .. مو هذا الموضوع ... الموضوع كالتالي .. انا مطالب بكتابة مقال عن اي شي .. وانا الان تحت تاثير مشروبات غريبة تحداني بعض الناس ان اشربها ..اشياء غريبة .. بس شرعية تماما .. وتباع في البقالات واماكن الصرف الصحي اذا ماني غلطان .. المقصود .. كل الكلام السابق واللاحق .. خذ وخل .. ورفع القلم عن المجنون حتى يعقل او يفيق ماني متاكد ..
جمبي واحد كل شوية يقول : الله يقطع شيطانك .. الله يقلع ابليسك .. الله ياخذ شيطانك .. ليش ليش لييييش ؟؟؟
ايش سوالك شيطاني ؟؟


سب شيطانك انتا زي ما تبغى بس خلي شيطاني في حاله .. ولد عفاريت ومحترم وما عمره مد يده على احد .. بعدين ايش دراك يمكن انه احسن منك !!
ليش لا ؟؟
كثير ناس مصرين ان البشر احسن من الشياطين .. مع ان في نقاط ترجح كفة الشياطين اكثر .. !!
انا ما ابغى افتي ولا اجزم بشي .. بس ابغى افكر (بصوت عالي ) ..





دحين مو كل بني ادم عنده شيطان يوسوسله ؟؟
حلو ..
الشيطان هل عنده احد يوسوسله ؟؟
لا !!
في احد يقوله سوي كذا ولا كذا ؟؟؟
ولا عايش معتمد على نفسه في كل افعاله ؟؟
يعني اذا نبغى نقارن ..... عندك واحد يتعرض للوسوسة 24 ساعة اللي هو الانسان .. واخر مايتعرض لاي وساوس من اي احد .. مين احسن ؟؟الانسان ولا الشيطان ؟؟؟


واحد يقول بس الشيطان اساسا سيء .. هو مخلوق على انه سيء .. بينما الانسان مخلوق على انه حسن وجيد ...
طيب بأسألك وأقول ... هل الانسان يسمع لوساوس الشيطان ؟؟ .. حلو ... احيانا .. ماشي ..

اذا سمع لوسوسة شيطان وسوى معصية .. ايش صار جيد ولا سيء ؟؟ سيء .. يعني تغير وانحرف عن الاصل اللي خلق عليه ..
نقارن مرة ثانية .. واحد الله خلقه على شكل او طريقة وثابت عليها ماتغير من بداية حياته الى وفاته .. والثاني يتغير كل شوية ومتذتذب بين الخير والشر .. وكثير مرات يصير شر بحت ( اللي هم الكفار الشريرين ) ..
اذن مين الافضل ؟؟ .. الثابت على فطرته ولا المتغير ؟؟؟
اللي مخلوق سيء وبقى سيء على اصله ؟؟ ولا اللي لعب في ابو ابو اصله ؟؟؟


الاجابة مايحتاجلها توضيح زيادة ..

وفي نقطة مهمة .. في دراسة سريعة اجريتها مؤخرا ( تحت تأثير نفس المشروبات الغريبة ) وطلعت بنتائج



انه لازم نغير الحريم بالشياطين .. ضروووري

الشياطين ارحم بمليون مرة .. صدقوني






واحنا دراساتنا جادة ومخلصة وماعندها شي بدون ادلة .. وهذا الدليل




اولا .. ( ان كيدهن عظيم ) .. و ( ان كيد الشيطان كان ضعيفا ) ....




ها ؟؟؟؟ مين احسن ؟؟ مين تبغى ؟؟ كيد عظيم ولا كيد ضعيف ؟؟

مين احسن كشريك ؟؟ واحد كيده عظيم وكبير لدرجة انه ذكر في القران بهالصورة المخيفة!!!!
ولا الكيد الضعيف المسكين المغلوب على امره ؟؟؟
وكمان حاجة ثانية
الكيد الضعيف المسكين المغلوب على امره هذا .. اذا مو عاجبك ... مليت من مكايده .. بس قول بسم الله الرحمن الرحيم .. بش !!!! اختفى !! خلاص ماصار فيه كيد ضعيف ولا حاجة ...

بييييييينما

الكيد العظيم والمصيبة الكبيرة .. والله لو تقرا المصحف كله والانجيل والتوراة والله مايتحرك من مكانه .. قاعد قاعد .. فوق راسك ..... سوي زي ماتسوي ...


بالله بالعقل يا اهل العقل .. مين افضل ؟؟
مو اريح نبدل الحريم بالشياطين ؟؟


انا خايف اكمل وادخل في اشايء لاتحمد عقباها .. خليني الين هنا يكفي !!

نصيحة اخيرة .. بعد دراسة جادة ..
لاتشرب اي شي يتحداك عليه احد !!!!!!!
صدقني ماتدحاك يبغالك الخير !!!!!
اضافة للموضوع
هذي القصة اعجبتني ..
الزوج يقول لزوجته: حبيبة قلبي أنا رايح رحلة لمدة أسبوع مع مدراء كبار في الشركة
بنروح نصيد سمك وأنتي عارفه هذي فرصه لي إني أحسن من علاقتي مع المدراء
ولو سمحتي ودي تجهزين الشنطه حقت ملابسي
ولاتنسين البجامه الزرقا الجديدة اللي اشتريتها
ولو سمحتي جهزي لي شنطة الصيد وحطي السناره فيها
لأننا بنروح بعد الدوام على طول
وراح آخذها معاي من الصبح
بعد أسبوع رجع الزوج مرهق
وأول ماسألته زوجته هاه كيف الصيد معاكم

قال أف أف ياصدنا صيد هامور وشعور
وكل أنواع السمك
صنارتي ماوقفت ليل ونهار
بس والله تعبت تعب على كيف كيفك
بس حبيبتي والله اني زعلان منك
ليش نسيتي تحطين البجامه الزرقا في الشنطه؟؟؟
الزوجة وبكل برود وخبث
أنت لو فتحت شنطة السناره كان لقيت البجامه فوق السناره على طول
أن كــيــدهــن لـعــظــيـم
بس تصرف ذكي
: )

هناك 5 تعليقات:

غير معرف يقول...

اولا :-
اتمنى عندما تناقش موضوعا وتدخل فيه آيات كأدلة ان تعود لنفس تفسير هذه الآيات وتنظر لتفسيرها ومن ثم تبدأ بالنقاش ..
فالحكم على الشئ فرع من تصوره يا ولدي ومايصح نستشهد بالآيات في غير محلها إلا لأنها وافقت هوانا...



ثانيا:-

بكلماتك تلك ذكرتني بمطاوعة القرن الحالي ممن يرفضون المرأة ويقارنوها بالإثم العظيم ...ولا ادري فقد تصبح بعد بضع سنين شيطان حسب زعمهم كما ذكره القسيسين في اوروبا في عصور الظلام...
ولا ادري لم الهجوم القاسي على المرأة وحتى لو كان مزاحا او ضحكا فهذا يعني انه هناك خلل واضح في منظومتنا الفكرية
يا اخي امزح بأي شئ لكن المرأة تبدّلها بالشياطين؟ ويحك أيعني أن الشيطان افضل من أمك .. أختك ... زوجتك .. بنتك... عمتك .. خالتك...

أيعني أن من احتوتك في بطنها 9 شهور وذاقت المر في ولادتك وذاقت العذاب في تربيتك وتغذيتك وذاقت الآلام والتعب في فراقك أن الشيطان افضل منها

مجرد معادلة بسيطة تجعلني احس بأنه هناك خلل كبير فيها : (

عذرا يجب علينا ان ننتبه لما نقوله : )

تحياتي

عزام يقول...

يعطيك العافية زيزو ؛) ..

أعجبني آخر سطرين :P

شارع العروبة يقول...

اهلا اخوي..
اولا انا احترم جدا رأيك اللي فيه وجه كبير من الصحة ..اتذكر ايام الابتدائي كان يسألنا المدرس أيش اشد خطرا الشيطان ام صديق السوء ؟؟
ثم يجاوبنا بعد ان نرفع كلنا ايادينا ولكن بدون اجابة صحيحة : (صديق السوء اشد خطرا من الشيطان لاننا نستطيع طرد الشيطان بالاستعاذه بالله منه) ..
اذا من اشد كيدا .. الشيطان او الجنس البشري عموما ؟
الجنس البشري !! لان كيد الشيطان ضعيفا كما اخبرنا الله تعالى ويدفع فقط بالاستعاذه ..
لكن اذا قلنا ان المرأة اشد كيدا من الشيطان وهو قول اصلا غير لائق فهل ذلك ينفي ان يكون كيد الرجل اقل كيدا من المرأة والشيطان كليهما !!
المشكلة ليست في الفكرة وانما في طريقة وصولها الى اذهاننا !!
انا اقترح اننا نبطل من الرجال والحريم كلهم ونستبدلهم بمجتمع شيطاني عشان كيد الشيطان اضعف (ترا امزح زي الموضوع اللي اصلا هو مزح في مزح ) !!

غير معرف يقول...

شرايك لو نسوي حركة ثانية ...

نبدل الرجال بالشياطين ..

ونخلي الحريم يعرفوا قيمتنا !!

: q

مخــرج 10 يقول...

اهاااااااااااااااا

اخيرا عرفتك يا meroworld

حسبي الله على ابليسك وابليسي وكل الاباليس

بعدين ايش " ياولدي" ؟؟؟


ههههههههههههههههههههههههههههههههههه