الجمعة، 2 أبريل 2010

لو يمسكو إدارة المصمك للقرية النجدية؟؟

اتذكر اخر مرة زرت فيها متحف المصمك لما كنت تقريبا في نص الابتدائي .. زماااان حوالي قبل 10 سنين.. كالعادة لما ترجع وتزور مكان زرته في الصغر تسأل نفس السؤال : " ما كان كبييير ؟ "

التغير الثاني اللي اختلف علي في المصمك كان صدمة بالنسبة لي .. صدمة حضارية ثقافية تاريخية سميها اللي تسميها .. صدمة كبيرة عندما تأتي لتزور المصمك وما تلاقيه اصلا !!

كان باقي ربع ساعة على صلاة الظهر واحنا داخلين من البوابة .. حارس البوابة قال ادخلو بس اطلعو بسرعة ولا تطولو قلنا "سم طال عمرك " مع ان ربع ساعة ما تكفي جدار واحد من جدران المصمك .. لكن هذا كان ظني الخاطئ ... 5 دقايق وطفشت


الاماكن التاريخية تستمد جمالها من التجاعيد .. من عدم الانتظام .. من العشوائية التي تعبر بك زمن الخطوط المستقيمة والاشكال الهندسية شديدة الانتظام الى زمن اكثر تسامحا يعطي تلك الاشكال مجالا بأن تثور قليلا عن الاستقامة المتطرفة ..

هيئة السياحة نحسبهم والله حسيبهم كان عندهم نية حسنة .. سمعوا بالدول صاحبة المعالم التاريخية وسمعو بشغلة يسموها ترميم الاثار ... قالو جيد .. خلينا نتطور زي العالم ونهتم بمعالمنا القديمة "هيا كلها معلمين على بعض" .. أعطو مهمة المشروع لاداري كبير خريج كلية الطيران "احتمال يكون خريج أي كلية ثانية بس مستحييييل خريج كلية الاثار " .. توسموا في هذا الرجل انه لن يسرق اكثر من 5% من قيمة المشروع فقالو توكلنا على الله وسلمو المشروع لصاحبنا ..

صاحبنا بدأ بحماس شديد .. جا على الجدران وقشع كل تعاليم الماضي وغبار الملك عبدالعزيز وحط صبة جديدة لامعة .. شال الارضيات المتعرجعة وركب حجر مستوي تماما ..


ما كفاه كذا وراح حط كل شي ممكن يشتت ذهنك ويبعد فرصة ان هذا معلم تاريخي ...طفايات الحريق الحمراء فاقعة لونها في كل مكان ولاتسر الناظرين ...كاميرات المراقبة وحرص صاحبنا ان ينتقي اكبر نوع كاميرات مراقبة وجدت في التاريخ حتى تصير الكاميرات جزء من المتحف ...برادات الموية النيكل .. الكراسي اللي حاول يجيب اكثر نوع "موديرن" واكثر نوع مايركب مع الجو التاريخي ... فتحات بيارة الله يكرمكم ما فيها اي حس فني .. الانوار "سبوت لايت " !! ما ادري ايش سوا بالضبط بس حااااس الدنيا وقلب المصمك فوق تحت ..

جزاه الله خيرا على ما بذل لنهضة الامة وتاريخها ...بعد ما خلصنا انا وصاحبي رحنا نتغدا في القرية النجدية وهناك فعلا حسيت بالتاريخ !!! لو يمسكو ادارة المصمك للقرية النجدية ؟؟

هناك 4 تعليقات:

عبدالرحمن يقول...

ههههههههههههه
فعلا كلامك في الصميم : )

عن نفسي أشوف إن الأماكن هذي حلو الواحد يزورها ويستانس فيها ، لكن بالشكل اللي صاير ألحين كاميرات مراقبة وأوقات زيارة وحوسة تصير الشغلة مملة جدا ،

فيه عندك الدرعية مثلا حلوة ومرتبة ومنظمة صح إن المودرن دخل عليها بس ولو لا تزال تحتفظ بأثريّتها الحلوة : )

شكرا يا باشا ،

mtlinjawi يقول...

انا زميلك اللي كنت معاك اصور ....... و صراحة اكثر شي قهرني في الموضوع ان اللي رمم المصمك حتى ما احسه حق ديكور او شي ... لانه كل الاضاءات ( اللمبات ) بارزة و ظاهرة . و الاماكن اللي فيها لوحات او كذا ما تلاقي فيها اضاءة اما الاماكن اللي ما فيها شي تلاقيها ظلااام
الله يسامحهم .. و ان شاء الله اللي يكون ماسك الدرعية مو هوا نفس اللي مسك المصمك

شارع العروبة يقول...

عبدالرحمن انتا شكرا .. الدرعية ترا قاعدين يرمموها الحين تتذكر المرة اللي رحنا فيها ولا دخلونا !! والله خايف يصير نفس الشي !

اهلا ماجد .. لو ما جيتك ما كان ما رحت اصلا ( : ..

ربيع الاسلام يقول...

كل شئ يسونه في الاخير يطلع اعوج ليش ما ادري ؟

اما يتركوا الدنيا مغبره ومو ممكن الواحد يستمتع او يصلحوها اكثر من الازم خخخ

صار الموضوع ذكريات الزمن القادم مو اثار تاريخيه